Yon 5
5
Yeesus Betesda eka irauwa-pa mua oko saliwak
1Aria Yeesus nan ikaeya wi Yuuda lotu fofa maneka oko kererek. Ne iir nain Yerusalem ikiwok. 2Owowa nain pona-pa Sipsip Omopora naimik, epa nain eka irauwa oko nan ikua. Wi Iibru opora-pa eka nain Betesda naimik. Eka irauwa nain soomarow era saawirinowa kua ikur ikua. Ne iinan kuasura onaiya ikua. 3-4Wi napum mua unow akena, mua mokok opa, meren damola ne wapena merena kuumaremik, wi naap nan ikomakemik. [Moram iir kui-kuisow Mua Maneka ensel-ke orop eka nain ararumeya bulubul imenareya urufap napum mua oraimik, ne mua ookikir oraiya nain-ke sariarinon. Wi naap maemik.] 5Ne mua napuma oko-ko nan ikua, mokoma ten arow, ikur okaiwi-pa arow napuma nain aawep inepiw ikaiya. 6Yeesus urupemi mua nain naap urufap kema-pa maek, aa, napuma fain iiriw ekera aawok. Neemi ekap miir onoma-pa nokarek, “Nee, no kamenap? Sariarekam naep-i?” 7Naeya mua nain-ke maakek, “Oo saria, mua naareke efa asipap efa aawep eka bulubul wuiya nain neeke efa porainon? Yo kekanep orekam naep oniyem-na weetak, mua oko-ke efa nomakemi wi kiikir oraimik.” 8Naeya maakek, “No iikire, iikirap nena inow maa unowa opap soomare.” 9Naap maakeya mua nain sariarep iikirap ona maa unowa opap soomarek. Yeesus nain onak nain Sabat fofa-pa onak.
10Naapeya wi Yuuda-ke mua nain urufap maakemik, “Aakisa Sabat-ke. No moram sira puukap nena inow maa opap soomarin?” 11Naap maakiwkin wia maakek, “Mua yo efa saliwak nain-ke efa maakeya yena inow maa unowa opap soomariyem.” 12Ne nokaremik, “Mua naareke naap onowa nefa suuwak?” 13Mua nain opora-ko me wia kiripomak, moram Yeesus unuma me wiar amisarek, ne iir nain mua yakeyak manekiya Yeesus wi wia bilikaremi ikiwok. 14Naap ikok Yeesus tempel pika kemena ikiwok-na mua nain urufak. Urufap maakek, “No sariaren. No pina onowa piipue, oko wiimar maa samor akena aawinan.” 15Are nan Yeesus amisarek. Ne ikiwep wi Yuuda wia maakek, “Mua efa saliwak nain Yeesus-ke.”
16Naapeya iir nain wi kema bagiwirap Yeesus samorowa onoma wuamik. Moram o Sabat-pa sira nain onak. 17Wi naap maiwkin Yeesus-ke wia maakek, “Yena Auwa anane maneka naap uuwam-ikaiya. Ne yos pun naap uuwam-ikainen.” 18Naap maeya wi Yuuda o ifakimu naep kekanemik. Moram me Sabat sira muutiw wiar puukak. O feenap maiya pun, “Mua Maneka yena Auwa-ke,” naap maiya nain Mua Maneka saarik arekam naep oniya. Opor ara nain muuta o ifakimu naep onamik.
Mua Maneka Muuka uuwowa onowa unuma onaiya ikua
19Ne Yeesus-ke wia maakek, “Yo makena nia maakiyem, Muuka ona waisow kema-pa maa me oniya, weetak. Wiawi maa oniya nain wiar urufap oniya. Wiawi maa kamenap oniya, nain muuka pun naap akena oniya. 20Moram Wiawi ona Muuka kookalep maa unowa ona oniya nain ofakowiya. Ikoka maa mane-maneka ofakoweya wiar urufap kakaowen. 21Feenap, wi mua umimik nain Wiawi-ke wia iikirowiya. Ne Muuka pun naap, mua eena wia kookalep sira naap wia oniya. 22Wiawi mua kuisow-ko me wia mekawiya. Wia mekawowa kekanowa nain Muuka iwok. 23Naapeya mua unowa eliw Muuka unuma pirikuan, Wiawi unuma pirimik naap. Mua eena Muuka unuma me piriya nain Wiawi pun unuma me wiar piriya, o eena sesekak nain. 24Yo makena nia maakiyem. Mua eena yo opora efar miimiya, ne o eena efa sesekeya ekapem nain pun opora wiar opiya nain umowa iiriw nomakep anane eliwa ikowa nan ikua. Naapeya opora-pa me arinon. Neemi me samor aawinon, anane eliwa ikainon. 25Naeya yo feenap nia maakiyem, epa nan kereriya, nain aakisa fanek, wi mua eena umowa-ke wia opap ikua nain Mua Maneka Muuka iwakara wiar miimimik. Ne wi opora wiar miimap opimik nain wueliw ikaikuan. 26Eliwa ikowa nain onoma Auwa wiar ikua. Ne ona Muuka kekanowa nain iweya os pun wiar ikua. 27O Mua Muukiya wia mekawowa kekanowa nain iwok. 28-29Aria ni opora fain miimap kema unu-unowa me wueka. Feenap, epa fan weeserikua, wi iiriw umemik nain o iwakara wiar miimap eruwa-pa iikirikuan. Wi iikirap iiriw eena sira eliwa onam-ikemik nain eliwa ikaikuan. Ne wi sira samora miiwa-pa onam-ikemik nain samor aawikuan.”
Yeesus ona kekanowa-pa uuwiya nain wame maek
30“Aria yo yena kema-pa maa me oniyem. Auwa opora wiar miimap kakeniw naap wia mekawiyem. Moram yo me yena kookalowa ookiyem, weetak. O eena efa sesekeya ekapem nain kookalowa wiar ookiyem. 31Yo yenaiw yame mainen-na, yo maiyem nain eliw naap maowen, ‘Weetak, no nenaiw main nain me pepek.’ 32Nain mua oko nan ikua, os-ke maemi yo efa maiya nain makena. 33Ne mua papako wia sesekiwkin Yon wiar ikiwemik nain yo efa maemi opor makena wia maakek. 34Nain Yon yo efa maek nain makena, nain mua opora-ke. Yo fain naep maiyem, ni Yon opora efa maek nain opowen-na Mua Maneka-ke nia aawinon. 35Yon parina saarik wilinem-ikok ni parina niem-ikua. Nain nis-ke parina nain urufap kemelaman nain parina-pa ikowa nain ewur piipuaman.
36Ne Yon opora nia maakem-ikua nain maa oko fain-ke wiar nomakek. Feenap, yo mauwow unowa Auwa-ke efa maakeya onami welawiyem fain efar urufap amisarowen, yo mua kamenap nain-ke. Uuwowa efar urufap amisarowen, os-ke efa sesekak. 37Auwa eena efa sesekak nain pun yo efa maiya. Nain ni iwakara me wiar miimaman, ne miira pun me urufaman, weetak akena. 38Ne pun mua eena sesekak nain opora me wiar opiman, naapeya o opora ni kema-pa me niar ikaiya. 39-40Aria ni Mua Maneka opora siisimep-puamik nain urufiman, moram ni kema feenap wuiman, i neeke anane eliwa ikowa sira nain aawimik. Ne opor unowa Mua Maneka opora-pa ikomakek nain yo efa maek, nain ni anane eliwa ikowa aawu naep yo efar ekapowa nain ni weetak, miatiniman.
41Wi mua-ke unuma efar pirowa nain me kema suuwiyem, oram-ke. 42Nain yo nia amisarem, ni Mua Maneka me kookaliman. 43Yo eena Auwa-ke efa pepekimeya ekapem nain me efa aawiman. Ne mua-ko onaiw wame maiya nain aawiman. 44Ni miiw mua-ke unuma nia piruk naep oniman. Nain Mua Maneka mua kamenap nia naiya nain me kema suuwiman. Naapeya ni kamenap o opora wiar opowen?
45Aria ni sira samora oniman nain wiimar me yos-ke yena Auwa mokok epa-pa opora-pa nia wuinen, weetak. Moses-ke naap nia oninon, o eena yia asipinon naiman nain-ke opora-pa nia wuinon. 46O opora wiar opakaman-na yo opora pun efar opakaman. Moram opora siisimok nain yo efa maemi siisimok. 47Ne ni opora siisimok nain me wiar opiman, naapeya yo opora maiyem nain kamenap efar opowen? Weetak.”
നിലവിൽ തിരഞ്ഞെടുത്തിരിക്കുന്നു:
Yon 5: mhlNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 1998, Wycliffe Bible Translators, Inc. All rights reserved.
