Panagnaꞌan 42
42
Meꞌ pungtinaꞌi si Yusup pī hap Misir melli kinakan
1Pag takale si Yakub weꞌ niyaꞌ kinakan pinabellihan laꞌi si lahat Misir, paꞌinne si meꞌ anaknen, “Weꞌey hadja kaꞌam pahali? 2Takaleku,” paꞌinne, “weꞌ niyaꞌ koꞌ kinakan pinabellihan laꞌi si Misir. Pī kaꞌam bellihanun kite bi kinakan duk kite bi gaꞌi matey.” 3Manjari pī ne meꞌ saka si Yusup sampūꞌin magbelli kinakan si lahat Misir. 4Saguwaꞌ gaꞌi dinaꞌak nuhut Binyamin, sali Yusupin, weꞌ si Yakub peggeꞌ tinalew iye kaw niyaꞌ umantag si iye. 5Magtuhut ne meꞌ anak Yakubin duk meꞌ aꞌa sinduwehin pī magbelli kinakan peggeꞌ kasigpitan isab siye sabab unusin si lahat Kanaꞌan.
6Manjari, si Yusup ne mangantan lahat Misirin, duk iye magantan meꞌ magpabelli kinakan si kēmon meꞌ aꞌahin. Manjari pī meꞌ saka Yusupin si iye duk pasujud siye si iye, lendoꞌden diyataꞌ bulak. 7Takilale weꞌ si Yusup meꞌ sakanen saguwaꞌ magmā-mā gaꞌi siye takilalene ubus bu binistiga siye weꞌ ne, paꞌinne, “Ambanbi?” “Amban lahat Kanaꞌan,” paꞌinde, “pitu kami melli kinakan.” 8Bisan si Yusup takilalene sakanen, bang siye gaꞌ iye takilalede. 9Taꞌesseb-esseb si Yusup meꞌ bakas tineginepne metuꞌuhin bu paꞌinne si siye, “Kaꞌam iyan ispāy. Hatu pitu kaꞌam mayam hadja bang saꞌingge kami makajari tadaꞌag.” 10Paꞌinde, “Dumaꞌin kami pitu magispāy, Tuwan, pitu kami, meꞌ daraꞌakannun, melli kinakan hadja. 11Dambuwaꞌ du sama kamihin. Meꞌ aꞌa bentel kami. Dumaꞌin kami, meꞌ daraꞌakannun, ispāy.” 12Paꞌinne si siye, “Dumaꞌin. Asal magispāy kaꞌam pitu si lahat inin mayam bang saꞌingge makajari tadaꞌag.” 13Ubus paꞌinde, “Kami, meꞌ daraꞌakannun, sampūꞌ duk duwe kami magpungtinaꞌihin. Dambuwaꞌ du sama kamihin laꞌi si lahat Kanaꞌan. Kabungsuhanin īꞌ laꞌi taꞌamban si sama kamihin duk dambuwaꞌin ubus ne matey.”
14Saguwaꞌ si Yusup, paꞌinne, “Sā pinaꞌinkun hep, ispāy kaꞌam. 15Payamanku koꞌ bang toꞌo ke pinaꞌinbin. Bang gaꞌi pitu salibin, sapahanku weꞌ gaꞌi kaꞌam makajari tahalaꞌ amban lahat inin. Toꞌo pinaꞌinku inin kuweꞌ toꞌo weꞌ ellum sultanin. 16Dambuwaꞌ kaꞌam pī ngeddoꞌ salibin duk meꞌ sinduwehin tuꞌu dahuꞌ dem kalabusu duk kataꞌuhanku bang toꞌo ke pinaꞌinbin. Bang gaꞌi toꞌo, asal bugtuꞌ ispāy teꞌed kaꞌam.” 17Ubus bu kinalabusu siye weꞌ ne tellum bahangi.
18Pag katellum bahanginen paꞌin si Yusup si siye, “Peggeꞌ tinalew ku si Tuhan maꞌaseꞌ ku si kaꞌam. Hinangun bi inin duk kaꞌam ellum. 19Bang aꞌa bentel kaꞌam, makajari dambuwaꞌ hadja kaꞌam taꞌamban tuꞌu dem kalabusu. Sinduwehin makajari pī moꞌo kinakan si anak-andabin duk siye gaꞌi inusan. 20Ubus bu boꞌohun bi pitu salibin. Bang sā iyan hinangbi kataꞌuhanku weꞌ bennal binissābin duk kaꞌam gaꞌi papateyku.” Tinuhut weꞌ de bissāne miyaꞌan. 21Ubus magbissā-bissā siye dīhanande, paꞌinde, “Bugtuꞌ inin ne tumbas hininangten bi sabab si Yusup pungtinaꞌiten bi. Takitete bi kasigpitannen duk talewnen. Pabuyuꞌ-buyuꞌ iye si kite bi bu gaꞌ asipte bi. Hangkan hep kasigpitan kite bi kuweꞌitu.” 22Paꞌin si Ruben, “Hangkan ne paꞌinku, ‘Daꞌa iye binasahun bi,’ saguwaꞌ gaꞌ kaꞌam ngasip. Na, kuweꞌitu tinumbasan kite bi sabab kamateynen.” 23Gaꞌi kataꞌuhande weꞌ tasabut si Yusup binissāden peggeꞌ niyaꞌ hep aꞌa magpahāti si siye. 24Ubus tahalaꞌ si Yusup duk nangis iye. Pag ubus iye nangis, pī iye balik duk missā si siye. Ubus bu dinaꞌak ineddoꞌ weꞌ ne Simeon duk dinaꞌak iningketan weꞌ ne sābu laꞌi pe siye.
25Manjari daꞌak si Yusup daraꞌakannen pinennoꞌan karut meꞌ sakanen duk kinakan duk pinabalik sīnden dangan-dangan inisi dem karutde duk inurungan isab siye lutuꞌ. Iye miyaꞌan hininang weꞌ meꞌ daraꞌakannen.
26Ubus dinuwaꞌ ne weꞌ meꞌ pungtinaꞌine miyaꞌan kinakanin diyataꞌ hayepde, ubus bu hap lumaꞌ ne siye. 27Pag sakaliꞌ siye padeheng peggeꞌ sangem ne, iluka weꞌ dambuwaꞌin karutnen urunganne hayepnen kinakan. Takitene sīnnen laꞌi dem karut. 28Paꞌinne si meꞌ pungtinaꞌinen, “Tiyaꞌ du pinabalik sīnkun. Tiyaꞌ du tuꞌu dem karutku.” Arak siye kaꞌumāgadan duk migpid siye manamal duk paꞌinde, “Ine teꞌ hinangan Tuhan si kitehin bi?”
29Pag tekka ne siye balik laꞌi si lahat Kanaꞌan, magaka ne siye pu si Yakub samaden sabab kēmon bakas maꞌumantag si siyehin. 30Paꞌinde, “Aꞌa miyaꞌan, iye mangantanan lahat Misirin, binistiga kami weꞌ ne duk paꞌinne weꞌ ispāy koꞌ kami laꞌi si lahatde. 31Akahan kami iye weꞌ kami meꞌ aꞌa bentel. ‘Dumaꞌin kami ispāy,’ paꞌin kami. 32‘Sampūꞌ duk duwe kami magpungtinaꞌihin. Magdambuwaꞌ sama kami. Dambuwaꞌin matey ne, bu salihin īꞌ laꞌi si sama kamihin si lahat Kanaꞌan.’ 33Manjari paꞌin aꞌa mangantan lahat miyaꞌan si kami, ‘Kahagad ku weꞌ aꞌa bentel kaꞌam bang ambananbi tuꞌu si aku dambuwaꞌ pungtinaꞌibin. Ubus sinduwehin kaꞌam boꞌohanun bi ne kinakan usbabin si lahat Kanaꞌan duk siye gaꞌi inusan.’ 34Paꞌinne pe, ‘Boꞌohun bi pitu salibin duk kataꞌuhanku weꞌ asal dumaꞌin kaꞌam ispāy saguwaꞌ meꞌ aꞌa bentel kaꞌam. Ubus paluwasku du pungtinaꞌibin duk makajari kaꞌam lumengngan tungan-tungan tuꞌu si lahat inin.’ ”
35Pag buꞌusande isi karutden takesuwaꞌde du sīnden dangan-dangan laꞌi dem karutde. Pag kitede sīnden tinalew siye. Sampay samaden isab tinalew. 36Manjari paꞌin samaden si Yakub si siye, “Kaꞌam hadja jānnen hangkan lepas meꞌ anakkun. Matey ne si Yusup duk gaꞌ ne tuꞌu Simeon. Kuweꞌitu batang eddoꞌbi ne isab Binyamin. Aku iye manandal kasusehanin!” 37Manjari paꞌin si Ruben si samanen, “Bang gaꞌi tūrananku pitu balik Binyamin papateyun saꞌ duwe anakku lellahin. Pangandelun si aku Binyamin duk tūrananku du iye balik pitu si kaꞌu.” 38Nambung samanen, paꞌinne, “Gaꞌi makajari; gaꞌi anakkun nuhut kaꞌam peggeꞌ matey ne sakane langgungin duk iye saꞌ dendangan taꞌambanin. Bang upama niyaꞌ umantag si iye si palengngananbi suddanen matey ku weꞌ dukkakun.”
നിലവിൽ തിരഞ്ഞെടുത്തിരിക്കുന്നു:
Panagnaꞌan 42: yakV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2019, Wycliffe Bible Translators, Inc. All rights reserved.