Genesis 12
12
Si Abram
12:1-10
1Kinwanin nan apo ken Abram, “Taynam nan iliyo ay naay, nan ag-iyo ya nan baey da amam ta omeyka isnan ili ay awnitko itdo ken sik-a. 2-3Et awnitak bindisyonan sik-a is adoado is ap-om ya gawis is menteanda. Et gapo ken sik-a et awnitak badangan nan adoado ay ipogaw isnan am-in ay kailiili. Nan mangipaila is gawis ken dakayo et bindisyonak abes daida ngem nan mang-ipail-ila is ngawi ken dakayo et dosaek daida.”
4Pitompoo ya lima nan tew-en Abram isdin kinmaananda id Haran ay kaneg din inbagan nan apo ken siya. Nanakkey si Lot. 5Inkawitna si Sarai ay asawana, si Lot ay kaanakana, am-in ay bonagda ay nabanol ya nan babaada ay iHaran et omeyda id Canaan.
6Idi inomdanda dat omey si Abram isnan kad-an di kaiw id More ay esay ili isnan sag-en di Sikem. Isdin deey ay timpo et wada et nan ipogaw ay mentetee isdi ay nan iCanaan. 7Ngem ninpaila nan apo ken Abram et kanana, “Siya na nan ili ay idyak isnan ap-om.” Dat mensapo si Abram isdi is mangpop-oowana isnan igasgasingna isnan apo ay ninpaila ken siya.
8Nakwas pay di dat men-aton da Abram et menteeda isnan bilig ay ninbetaeyan nan ili ay Betel ya Ai. Dat kasin mensapo si Abram isdi is mangpop-oowana isnan igasgasingna isnan apo. 9Dadat men-at-at-aton isnan il-ili ay menpaey isnan abagatan di Canaan. 10Ngem wada nan dadama ay bitil id Canaan isonga inmeyda id Egipto.
Nan Inmayan Da Abram Id Egipto
12:11-20
11Idi nganngani ay omdanda id Egipto dat kanan Abram ken Sarai ay asawana, “Napintaska ay babai 12et no getken nan iyEgipto ay asawak sik-a et awnitda mangpatey tasiyay asawaenda sik-a 13isonga ibagam ken daida en innodik sik-a tasiyay adida mangpatey nodi gawis nan ikkanda ken sak-en.”
14Idi inomdanda id Egipto dat kanan tet-ewa nan iyEgipto en napintas san babai. 15Nan tap-in nan gagayyem nan ali et inilada siya dadat ibaga isnan ali en napintapintas siya isonga danat paayagan. 16Gapo ken siya et gawis nan ikakkan nan ali ken Abram tay inagtana siya is ad-ado ay kalnilo ya kalding, baka, dangki, kamel ya baa ay lalalaki ya bababai. 17Ngem gapo tay inalan nan ali si Sarai dat agtan nan apo is dadama ay sakit san ali ya san am-in ay mentetee isnan baeyna. 18-19Dat paayagan san ali si Abram et sootena, “Dakayon aped kinampotan sak-en ay mangwani en sin-agi kayo dakayo pay sin-asawa? Damen aped inyoog ay asawaek siya? Nay si asawam. Ayagam ta komaan kayo!” 20Dat bilinen san ali nan babaana et pakaanenda issan deey ay ili da Abram ay sin-asawa ay inkawitda am-in ay kokwada isnan kinmaananda.
നിലവിൽ തിരഞ്ഞെടുത്തിരിക്കുന്നു:
Genesis 12: xnn
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.
