Zlr 3
3
Zləmbamta mndu ma dmaku
1Mataba inda nimtak tsatsaf Yawe, Lazglafta ná, mal nahaɗik hiɗata ni. Ka lagha tsi slanaghatá marakw. Kaʼa nda tsi mantsa: « Kahwathwata mnata Lazglafta kazlay na: “Yaha kuni da za yakwa dər wati ma fuha ma na gam na kəʼa ra?” » kaʼa. 2Ka tsa marakw ya nda tsa nahaɗik ya mantsa: « Laviŋ lava ŋni ta za yakwa fu ma na Gam na, 3ba yakwa yeya fu ma takataka yeya mnaŋna Lazglafta kazlay na: “Yaha kuni da zay, yaha kuni da ksaŋta, ka mantsa a tsi wu dzaʼa mtay kuni ta mtaku,” » kaʼa. 4Ama ka tsa nahaɗik ya nda tsa marakw ya mantsa: « Si ga! Rwuta a kuni wa. 5Nda sna Lazglafta kazlay na, baɗ zuta ghuni ya ná, dzaʼa tsaɗaku ira ghuni tsiɗiɗ, ŋa nzakwa ghuni manda Lazglafta, ŋa snaŋta ghuni ta skwi ɗina nda ghwaɗaka skwi, » kaʼa. 6Tahula snaŋta tsa marakw ya ta tsa gwaɗa ya, kəʼa kaʼa nghanavatá yakwa tsa fu ya ná, zəɗ ka zay, ta taɗaku iri tida, dzaʼa vlay ta ndanu ŋa guna ghunislak guli. Ka sliʼaftá tsi ka tsaʼatá yakwa tsa fu ya ka zuta, vlaŋha ta zəʼala taŋ ta nzaku ta vata ni ya, ka zutá tsaya guli. 7Ka gunatá ira taŋ his his ka dukwaftá həŋ ná, ka fərdiʼu həŋ. Mantsa tama, ka ɗahaftá həŋ ta sluhwa ghuraf ka habivta misti.
8Tahula tsa, ta hləmata hawu ka snaŋtá tsa zgun ya nda markwa taŋ ta lwa Yawe, Lazglafta ta wawaku ma gam. Ka sliʼaftá həŋ ka laghwi ɗifaghuta diʼiŋ ta wa ira Yawe, Lazglafta ma mataba fuha ma tsa gam ya. 9Ka hgaŋtá Yawe, Lazglafta ta mndu kaʼa mantsa: « Ga ka na? » kaʼa. 10« Lwa gha snaŋ yu ma gam kəl yu ka ɗifaghuta, ksu ksa zləŋ ta iʼi, kabga ka fərdiʼu yu, » ka mndu. 11« Wa ta mnaghata kazlay na ka fərdiʼu ka kəʼa na? Ari zu za a ka ta yakwa tsa fu mna gha yu kazlay na yaha ka da zay kəʼa ya kay na? » kaʼa nda tsi. 12« Nana marakw vli kagha ŋa nzakwa ŋni nda tsi na kay ta vliha ta na yakwa tsa fu ya ka zutá yu, » ka tsa mndu ya. 13Ka Yawe, Lazglafta nda tsa marakw ya mantsa: « Nahgani na maga ka? » kaʼa. « Nahaɗik ta barifta, ka zuta yu, » ka tsa marakw ya.
14Ka Yawe, Lazglafta nda nahaɗik mantsa: « Fitika magata gha ta skwi manda nana ya, dzaʼa nda ksiʼa ka mataba inda rini nda nimtak. Daga gita nda huɗi dzaʼa mbaɗa ka ta mbaɗa, gəninika haɗik dzaʼa ka zay ma inda nzakwa gha nda hafu. 15Dzaʼa naghunaf na yu ka ghuma nda na marakw na. Mantsa dzaʼa nzakwa tsi mataba zivira gha nda zivira ni. Zivira ni dzaʼa dzaɓaghaptá ghəŋa gha, dzaʼa balay kagha ta durama guli, » kaʼa nda tsi.
16Kaʼa nda tsa marakw ya mantsa: « Dzaʼa sgaghagha sga yu ta ghuya ɗaŋwa ta ghəŋa zlghatá huɗa gha. Nda ɗaŋwa dzaʼa ya ka ta zwaŋ. Dzaʼa mamay ka ta nzuvusta nda zəʼala ghuni, ama tsatsi dzaʼa ga mgham ta ghəŋa kagha guli, » kaʼa
17Kaʼa nda zgun guli mantsa: « Fitika tsuʼafta gha ta gwaɗa markwa ghuni ka zutá ka ta tsa yakwa fu si mna gha yu kazlay na yaha ka da zay kəʼa ya, ta ksiʼaf ksiʼa yu ta haɗik dabga kagha. Nda ɗaŋwa dzaʼa mutsagapta ka ta skwi ŋa zay gha ma inda nzakwa gha nda hafu. 18Teki nda ghwenzi dzaʼa ɗyaghafta haɗik, masuʼata ta ɗyaku ma mtak ŋa gha dzaʼa zay. 19Slrək visa gha kada mutsafta ka ta skwi ŋa zay gha, ha ka vraghata gha da haɗik, kabga tsagap ma haɗik lu ta kagha, gəninika haɗik ka, da tsa gəninika haɗik ya dzaʼa vra ka guli, » kaʼa.
20Lagha Adamu#3:20 Adamu na: Manda mnay kazlay na: Mndu, kəʼa ya nda gwaɗa Ibru. Hga taŋtaŋa mndu ná, Adamu ya. ka tsanaftá hgu ta markwa taŋ ka Hawa#3:20 Hawa na: Manda mnay kazlay na: Hafu, kəʼa ya nda gwaɗa Ibru., kabga tsatsi ma ni ma inda mnduha dzaʼa nzakway nda hafu mida. 21Ka kɓanaftá Yawe, Lazglafta ta lguta huta ta i Adamu nda markwa taŋ ka fanavatá həŋ.
22Ka Yawe, Lazglafta tama ma ghəŋa ni mantsa: « Wana nzata mndu manda ya turtuk mataba amu#3:22 Amu: Ma zlrafta ni nda gwaɗa Ibru, tsaya nda nza manda mndu tekw mataba amu. nda sna ta skwi ɗina nda ghwaɗaka skwi. Ndana ná, yaha da ksaŋtá yakwa fwa hafu, da zuta tsi, da nzatá tsi nda hafu ŋa kɗekedzeŋ, » kaʼa. 23Mantsa tama ka ghəzlagaptá Yawe, Lazglafta ta mndu ma Gama Aden. Ka ghəzligiŋta ŋa dzaʼa ni da hva tsa haɗik kəl lu ka tsagapta ya. 24Tahula ghəzligiŋta ni ta mndu ma tsa Gama Aden ya, nda ga silwa tsa Gam ya, ka pghuŋtá tsi ta wa ni ta kerubaha ni,#3:24 Kerubaha: Mndərga sana duhwalha Lazglafta ta ngha skwiha nda ghuɓa. nda limay ta wuɗaku ghandand, ŋa pya təva dzaʼa da vla tsa fwa hafu ya.
നിലവിൽ തിരഞ്ഞെടുത്തിരിക്കുന്നു:
Zlr 3: xed
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. All rights reserved.
