If you have would like a copy of this version please contact info@davaraudiobibles.org

Lowa New Testament

फारुसीपाक्‍या धाङ सादुकीपाक्‍या होरी, येशुला छो़ता झ्‍यीयेला, नाम्‍खे श्‍यीङखामने खुङक्‍याला ताक च्‍यीक तो़न्‍रोजे ॱनेरी श्‍यी़वालाक। खोङबागी खुङक्‍याला सुवालाक, “घोमो क्षाई घाङला खेक्‍या, ‘ॱनाम ॱमाउ झ्‍येरी ॱङेटो ॱनामस्‍यी दाङा हुङगीलाक।’ ॱनेरी ॱनालाक। धेनी ॱङारोक खेक्‍या, ‘ॱनाम ॱमाउ धाङ ॱमुक्‍पी तुम्‍ता झ्‍येरी, धीरीङ ॱलुङछुप ग्‍याप्‍कीलाक।’ ॱनेरी ॱनालाक। खेक्‍या ॱनामगी दोकला तेरी, ङीमा घारे हुङये दुक ॱनेरी स्‍येलालाक हीना धान्‍दा झ्‍युङगीन धी़गी ताकक्‍याई दो़न्‍दाकगो टो ॱमीथुवालाक। ङेन्‍पा धाङ लोक्‍येमगी मीरापक्‍या ताक चालालाक हीना योनागी ताक माना, श्‍येम्‍मा घीया ॱमेतेरकीलाक।” धेनी खोङबा खुङक्‍याला भोरती, होदेने फेप्‍पालाक।


छोगी ॱहाकीनला ॱलेप्‍ती, ङेनेक्‍याई ग्‍याङगा खेरती हुङयेगो ढेन्‍बा ज्‍येपालाक। येशुगी खुङक्‍याला सुवालाक, “फारुसीपाक्‍या धाङ सादुकीपाक्‍याई क्‍युरचीने, शाप-शाप झ्‍यी धेनी राङला ॱरुङ।”
धेनी खुङक्‍या खोराङक्‍या नाङदु थाप्‍ती, देरे ॱनेवालाक, “होराङक्‍याई ग्‍याङगा खेरती मायोवा, खोङबागी देरे सुङालाक।”
हीना येशुगी दे खेन्‍दा जेदी सुवालाक, “खे धेपा च्‍युङा हो़गीन मीक्‍या, खेक्‍या खेराङक्‍या नाङदु ग्‍याङगा मेगीनगी छीला घीझ्‍येरी थाबा? खेक्‍या धोराङा ॱहामेघोराई? मी ॱङातोङगी क्षीला ग्‍याङगा ॱङा तेरती, खेक्‍याई ल्‍हाक्‍मा बाक्‍ता घाजो़ दुतागो खेक्‍याई मेढेन्‍दाई? याङ मी श्‍यीतोङगी क्षीला ग्‍याङगा धी़न तेरती, खेक्‍याई बाक्‍ता घाजो़ दी़गीनगो मेढेन्‍दाई? ङी ग्‍याङगागी क्षीला लाब ताङा मालाक ॱनेरी, खेक्‍या घाङगी झ्‍येरी ॱहाघोरयेला लेजो? फारुसीपाक्‍या धाङ सादुकीपाक्‍याई क्‍युरचीने शाप-शाप झ्‍यी।”
धेनी खोङबागी ग्‍याङगागी क्‍युरचीगी कोरला मेन्‍दा, हीना फारुसीपाक्‍या धाङ सादुकीपाक्‍याई ॱलापच्‍याक्‍याला शाप-शाप झ्‍यी ॱनेरी सुङगीनगो खुङक्‍याई ॱहाघोरपालाक।


धा येशु केसारया फीलीप्‍पीगी युदु फेप्‍ती, खोङबागी ङेनेक्‍याला ढीवालाक, “मीक्‍याई मी-भु सु लाक ॱनेरी ॱनीओ?”
खुङक्‍याई ॱनेवालाक, “रीङगागी ठी़सो़खेन योहान्‍ना धेनी रीङगागी एलीया धेनी रीङगागी येरेमीया याङना ॱङो़नस्‍येखेनक्‍याने च्‍यीक लाक ॱनेरी ॱनी।”
खोङबागी सुवालाक, “हीना खेक्‍या ङा सु लाक ॱनेकीओ?”
सीमोन पेटोगी ॱनेवालाक, “खेराङ नी मास्‍यीका, सो़न्‍पो को़न्‍क्षोकगी सेगो लाक।”
धेनी येशुगी खोला सुवालाक, “योनागी भु सीमोन, ख्‍यो़ला झ्‍यीलाप थोप्‍पास्‍योक। घीझ्‍येरी ॱनाना मीने मेन्‍दा, नाम्‍खे श्‍यीङखामदु श्‍युक्‍कीन, ङी यापगीराङ ख्‍यो़ला दे तो़न जेपालाक। धेनी ङा ख्‍यो़ला ॱनाहीन, ख्‍यो़ पेटो नी फोङगीङ हीन धेनी फोङगीङ देगी खाला, ङा ङी क्षो़छोक चीक्‍येहीन धेनी ॱङ्यावागी वाङ घीन्‍गीया देगी खाला मेग्‍यागीलाक। ङा ख्‍यो़ला नाम्‍खे ग्‍यासीगी धीमीकक्‍या तेरयेहीन धेनी ख्‍यी़ साश्‍यीदु घी धाम्‍गीनगो नाम्‍खे श्‍यीङखामदु धाम्‍गीलाक धेनी ख्‍यी़ साश्‍यीदु घी टोगीनगो नाम्‍खे श्‍यीङखामदु टोगीलाक।” धेनी खोङबागी ङेनेक्‍याला खोङबा मास्‍यीका हीन्‍गीनगो, मी सुला ॱमास्‍ये ॱनेरी का स्‍युक्‍क्षे ॱनावालाक।


होदे धी़चो़ने येशुगी राङगी ङेनेक्‍याला, खोङबा येरुसालेमला फेप घोगुलाक धेनी गोठीक्‍या धाङ क्षो़पो़न क्षेक्‍या धाङ क्षो़ठीमगी ॱलोपो़नक्‍याने दुक्‍पु माङा च्‍यीक ङ्याङ घोगुलाक धेनी खोङबा से घोगीलाक हीना ङीमा सुम्‍बागोला छीवाने या श्‍याङगीलाक ॱनागीनगी, कोरला सेस्‍ये जेपालाक।
धेनी पेटोगी खोङबाला शुरला ठीक्‍ती, आङजी तारी ॱनेवालाक, “चोवो, देरे चावाने माझ्‍युङास्‍योक! खेराङला देरे झ्‍युङगीमालाक।”
हीना येशुगी श्‍याल ग्‍युरती पेटोला सुवालाक, “धी़क ख्‍यो़, ङी ग्‍याप्‍तु सोङ! ख्‍यो़ ङी छीला भारचे हीन घीझ्‍येरी ॱनाना ख्‍यी़ साम्‍लो को़न्‍क्षोकने मेन्‍दा मीने दुक।”
धेनी येशुगी राङगी ङेनेक्‍याला सुवालाक, “ङी स्‍याम्‍ला डाङी दो़गीनक्‍या, राङला ॱलो़ तारी राङगी ग्‍याङस्‍यीङ खुरती, ङी स्‍याबाला डाङ घोगीलाक। घीझ्‍येरी ॱनाना राङगी सोक क्‍योप्‍ङी दो़गीनगी़, होदे स्‍योरतु च्‍युक्‍कीलाक हीना राङगी सोक, ङी क्षीला स्‍योरतु च्‍युक्‍कीनगोला, होदे ॱङेगीलाक। मी च्‍यीकला जीक्‍तेन घीरी थोप्‍ती थामेपे सोकगो स्‍योरना, घी फेन थोक्‍कीले? याङ मी च्‍यीकगी राङगी सोकगी छापला घी तेर थुक्‍कीले? घीझ्‍येरी ॱनाना मी-भु नी, राङगी भाङछेनक्‍यामुला राङगी यापगी शीजेला फेप्‍कीलाक धेनी मी रे-रेला राङगी ज्‍यावाला थी़न्‍गीन लेन ॱनाङगीलाक। ङा धेन्‍पाराङ खेक्‍याला ॱनाहीन, दुरु लारी धेता मी रीङगागी, मी-भु राङगी ग्‍यासी वाङग्‍युरला फेप्‍कीनगो ॱमाथोङगीन थुक्‍पे, छीवा ङ्याङ घोगुमालाक।”

കേൾക്കുക मेथा 16