Budu: Neta 2021 WBT (NT) Non Drama

Budu: Koya 2021 WBT (NT) Drama

Budu: Koya 2021 WBT (NT) Non Drama

Ɓisi mʉngana, Yeso i꞉nye akʉ ɨtɛtɛtɛ yɨ yapuu yɛɛ ɨja ngia ɓi꞉nye isoko ɓɔ Gɛnɛjalɛtɨ, ungbutu wʉ ɓombi wi꞉nye wu꞉mukungueni tʉkʉ ɓʉ kuu. Ɓi꞉nye kʉkʉnda kʉkɔ mapanʉ kʉ Asʉɓɨɨ. Ambʉna ɓombi ɓɔɔ ɓʉfɛ sipe kijo akʉ lɨngbɔɔ dyepini anʉ ɨtɛtɛtɛ yɨ yapuu, ɓi꞉nyeni tiga kʉjaɓa mɨkaʉ ngiindaɓʉ. Kija a꞉ɗito akʉ ɨngbɔɔ mɨngana ngia yi꞉nye yɨ Simoni, ambumusigio ɓɔ: « Tutuo ɨngbɔɔ danga nʉ ɨdʉnda. » Yeso ambuwulo amati ʉ ɨngbɔɔ ngiinanɨ ɓʉ jomu, ambufaniso panɨa ungbutu wʉ ɓombi.
Iya a꞉pipo panɨa ɓʉ gba, ambusigio Simoni ɓɔ: « Tutuo ɨngbɔɔ akʉ ɨmba, nambuno mɨkaʉ ngiindɛnʉ kʉfa sipe. »
Simoni ambumutisio ɓɔ: « Mʉpananakɨa, kʉkwaya kuu nuɓutu kupi, chʉkɔmʉ kambʉfa 'usipe gʉ kʉ mungono. Ɨkyɛmɨngana, jʉ kʉ ɔwɛ wutitio, ma꞊no‑zʉ mɨkaʉ tʉkʉ noo. » Iya ɓa꞉no nayɔ mɨkaʉ, ɓambʉfa sipe ɨja nadɨndɨ, kija mɨkaʉ ya꞉faniso tinyoo. Iya ɓa꞉na ɓwanɨ, ɓambusoko ɓadii ɓʉndaɓʉ nʉ lɨkɔndɔ ɓɔ ɓʉka naɓɔ kʉsalɨa. Ɛɓɔ ɓi꞉nye akʉ ɨngbɔɔ nga yɛmɔ. Kija ɓa꞉ka, ɓambuhuukiso lɨngbɔɔ ngilʉndaɓʉ dyepini nʉ sipe tʉkʉ ɓʉ kyɛɛ kyɛɛ, tinene ɓɔ laindikio. Ati ngia Simoni ngia i꞉nye ino ɓɔ Pɛtɛlɔ a꞉na‑ɔɔ moni ngikʉnanɨ, ambʉgbʉkʉmɨa nʉ muwuu akʉ mɨtɨndɨ yɨ Yeso ambusigo ɓɔ: « Makʉʉɓɨɨ, ʉngwa ɓaka anambamba asɛmɛ ʉngwaa, jʉ ɛmɛ ma mombi ʉ ɓʉɓɨɓɨ. »
Kʉnɨna sipe yɛɛ ɨja ngiinanɨ ɓi꞉nye ɓʉfeni, ya꞉kiso Simoni nʉ ɓombi ngiɓa ɓi꞉nye ɨzɔ nayɔ kʉ ʉɓa. Abana tʉkʉ ɔɔ Yakɔbɔ nʉ Yʉanɨ, ɓana ɓʉ Jɛbɛdayɔ iɓa ɓi꞉nye ɓadii ɓʉ Simoni, ya꞉ɓukiso ɛɓɔ ʉɓa kʉ kisoo. Kija Yeso a꞉sigio Simoni ɓɔ: « Wɔɔkumokɔmʉ, jʉ waɓio tiga nɛmɛ kʉfɨa ɓombi, kʉndʉ iya wi꞉nye fa pongo‑ɔɔ sipe. »
Tiga ndʉ ɓa꞉fʉma lɨngbɔɔ akʉ ɨdʉnda, ɓambʉsɨa kumbo kʉ 'uɓomu ɓambufaniso nayɔ kpata.


Ati ngia Yeso i꞉nye‑ɔɔ akʉ gʉlʉ mʉngana ɓɔmʉ, gue mʉngana i꞉nye ananɨ keɓu‑keɓu umupipeni ndʉtʉ kʉ iɓomu. Iya gue ngiinanɨ a꞉na Yeso, kija a꞉gbʉkʉmɨa mesu akɛsɨ, ambʉmʉndɨanɨa kusigo ɓɔ: « Makʉʉɓɨɨ, ndʉ wakʉnda, najaɓaka ɓaka kweso ngia tʉkʉ jaɓakaa. »
Yeso ambuyumo ɨkɔndɔ, ambumuɓoto. Ambumusigio ɓɔ: « Mʉ꞉kʉnda ɓɔ jaɓanakɨa jaɓanakɨa. » Kʉ nɨma ngiinanɨ keɓu‑keɓu ambʉʉngwa gue ngiinanɨ tʉkʉ ɓʉ ngwa. Kija Yeso a꞉musigio ɓɔ: « Wɔɔɓɨakɔmʉ mombi moni ngika, ɨkyɛmɨngana sa ɔɔ kumu‑kumu ambʉnakangaka ndʉtʉ. Kija wanzo 'ʉtʉmbɨa akʉ wʉjaɓanakɨa‑ɔɔ keɓu‑keɓu, kʉkpatanakɨa nʉ mapanʉ ngika Mʉsa a꞉tɨndakɨa, kʉpananiso ɓombi ɓɔ wʉhɨa hɨaa. »
Uduɓa wʉ Yeso wi꞉nye kʉnadaa mʉa kʉ uɓomu. Tiga ungbutu wʉ ɓombi wɔɔ 'ʉja wa꞉mʉmanakɨa nayɔ kʉkɔ, aka ekoo ngia ɓɔ uɓuhiiso ɓakwisikiso. Ɨkyɛmɨngana, Yeso i꞉nye ʉngwa ati ʉndaɓʉ ambʉsa akʉ ɨza, kija i꞉nye kyɨa kʉta Asʉɓɨɨ nani.


Tiga ɓisi mʉngana, Yeso i꞉nye kʉpanɨa. Ɓafalisayɔ nʉ ɓapananakɨa ɓʉ mapanʉ ɓi꞉nye ɓuwuloke kʉ ananɨ. Ɓi꞉nye ɓʉʉngweni akʉ lɨkʉmbʉ kʉ liɓomu ngila lʉ Galilaya, Yudɛa nʉ gʉlʉ ʉ Yelusalɛma. Yeso i꞉nye nʉ angu ʉ Makʉʉɓɨɨ kuhiiso ɓakwisikiso. Kija ɓombi nga ɓɔmɔ ɓa꞉ka nʉ mombi mʉngana 'ufuɓoke ekoo ʉ ɓʉkwaɨ. Ndʉtʉ yi꞉nye nayɔ iwe tʉkʉ ɓʉ kpɔjɔ. Ɓi꞉nye kʉkʉnda kukumunio nayɔ akʉ ɨkáa ngia Yeso i꞉nye‑ɛɛ, nayɔ kʉnapɨa apɛɛ angɔ. Ɨkyɛmɨngana, ndʉ ɨngbaa nayɔ kukumuniso ambɛnɨ ya꞉nyɨakɔmʉ aka ekoo ʉ ungbutu wʉ ɓombi, kija ɓa꞉ɗito nayɔ ekoo ʉ ʉpaʉ, ɓambʉgana ihoo, ɓambumijiso ekoo ʉ ɓʉkwaɨ apɛɛ ʉ Yeso. Kʉnɨna baya ngiindaɓʉ, Yeso ambusigio mombi ʉ kweso ɓɔ: « Adii, Asʉɓɨɨ ʉ꞉napɨa ɓʉɓɨɓɨ ngiɓʉsɔɔ pɨaa. »
Ɓafalisayɔ nʉ ɓapananakɨa ɓʉ mapanʉ ɓambufaniso tiga ɓukuono kusigo ɓɔ: « A‑zʉ anɨ kusigo moni ngika kakʉzɨaka Asʉɓɨɨ? Anɨ iya a ikanzi ngia apɨa ɓombi ɓʉɓɨɓɨ, yambikinye tʉkʉ Asʉɓɨɨ kʉ nangana? »
Ɨkyɛmɨngana, ndʉ Yeso i꞉nye kʉmbɨa moni ngika ɓi꞉nye kutunguo engo kʉtaa, kija a꞉ɓusigio ɓɔ: « Jʉtanɨ nakutunguo ikanzi yɨ moni ngiinanɨ? Ɨmanɨ ya zia zia? Gʉ kusigo ɓɔ: ‹ Asʉɓɨɨ ʉ꞉napɨa ɓʉɓɨɓɨ ngiɓʉsɔɔ pɨaa ›, gʉ kusigo ɓɔ: ‹ Ʉngwa ɨkʉʉ wambʉkɨndaka ›? Ɨkyɛmɨngana, mbɨeni ɓɔ, ɛmɛ Mwana ngia ʉ Mombi manʉ ʉpanʉ akʉ ɨtaka kʉpɨa ɓʉɓɨɓɨ. » Kija a꞉sigio mombi ngia ndʉtʉ yi꞉nye yimuweni ɓɔ: « Manɔwɛ kusigio ɓɔ: ‹ Ʉngwa ɨkʉʉ! Chɨka ɓʉkwaɨ ngiɓʉsɔɔ, wambʉtʉa andɔɔ. › »
Kʉ nɨma ngiinanɨ, mombi ngiinanɨ ambʉʉngwa ɨkʉʉ, tʉkʉ na akʉ mesu kʉndaɓʉ. Ambufuɓuo ɓʉkwaɨ ngiɓa i꞉nye ɓʉkwaɨ ekoo ɔngɔ. Kija a꞉sa andɔngɔ inyeni tii tʉkʉ kubibiso Asʉɓɨɨ. Kija ya꞉mbangɨa ɓombi kʉ ɓuɓomu, ɓambubibiso Asʉɓɨɨ. Moni ngikʉnanɨ ki꞉nye naɓɔ kukiso kʉ ʉɓa, ɓambuɓio tiga kusigo ɓɔ: « Kʉ꞉na moni kɔɔ mʉmbangɛ ɓʉɓʉnɨ ngia. »


Mbise ʉ moni ngikʉnanɨ, Yeso ambʉɓʉa, kija a꞉na ndɔmbɛ ɔɔ lipise manzanza mʉngana ino ɓɔ Lawi 'uwei akʉ bilo ngiangɔ. Ambumusigio ɓɔ: « Nakpata! » Ambʉsɨa kumbo kʉ 'uɓomu, ambʉmaa kija a꞉faniso nayɔ kpata.
Kija Lawi a꞉tinisio Yeso ʉmbɔ wɔɔ 'ʉja andɔngɔ. Ungbutu wʉ ɓandɔmbɛ ɓɔɔ ɓulipise manzanza, nʉ ɓombi nga ɓɔmɔ, ɓi꞉nye kʉdyakaka ɨzɔ naɓɔ. Tiga ananɨ, Ɓafalisayɔ nʉ ɓapananakɨa ɓʉ mapanʉ ngiɓʉndaɓʉ ɓa꞉faniso gʉa Yeso anambamba ʉ ɓakpataka ngiɓangɔ kusigo ɓɔ: « Jʉtanɨ‑zʉ nakʉdyakaka nʉ mwakanaka ɨzɔ nʉ ɓombi ɓɔɔ ɓulipise manzanza, nʉ ɓombi ɓʉ ɓʉɓɨɓɨ? »
Yeso ambuɓutisio ɓɔ: « Ɓombi ɓɔɔ ngbita ngbita ɓambakakyɨa nʉ taa yɨ nana nʉ mʉnganga, ɨkyɛmɨngana tʉkʉ ɓombi ɓʉ ɓakwisikiso ɓaakyɨa nʉ taa yangɔ. Ma꞉kakɔmʉ kusoko ɓombi ɓɔɔ ngbingbii, ɨkyɛmɨngana ma꞉ka kusoko ɓombi ɓʉ ɓʉɓɨɓɨ aka ekoo ngia ɓɔ ɓunicho mɨtʉma ngiindaɓʉ. »


Kija Ɓafalisayɔ ɓa꞉sigio Yeso aka ɓɔ: « Ɓakpataka ngiɓa ɓʉ Yʉanɨ nʉ iɓa ɓʉndɛsʉ ɓaatáa idyo akʉ wati kʉ gagaa, aka ekoo nɨta Asʉɓɨɨ. Ɨkyɛmɨngana, iɓa ɓʉsɔɔ, kuu nga yɨndaɓʉ tʉkʉ dyakaka nʉ mwakanaka. »
Yeso ambuɓutisio ɓɔ: « Ajʉ na ikanzi ngia natitio ɓombi ngiɓa ɓu꞉ɓusoko akʉ ʉmbɔ wʉ chɨkana kʉtáa idyo akʉ wati, ɓinyeni‑zʉ kʉ ɨzɔ nʉ‑ɔɔ swaɨ ʉ moi kʉtaa ɓiɛ? Ɨkyɛmɨngana, akʉ makwaa ngika kɔmɔ ka꞊kʉka, ika ɓa꞊ɓuungwisio ɓisi ongo‑ɔɔ swaɨ ʉ moi, tiga akʉ makwaa ngikʉnanɨ ɓa꞊táa idyo akʉ wati taa. »
Kija Yeso a꞉ɓʉmatɨa isisinio ngia: « Mombi gʉkʉ mʉngana ambʉkɔmʉ akwanana kʉchɨka ɨɗaka yɨ ɨpʉkʉ ngia yɨ ɨtakɨ‑takɨ, kukuto ekoo ʉ ɨdɔdɔkɔ. Ʉkyɨeni ɓwanɨ, a꞊natʉa ɨpʉkʉ ngia yɨ ɨtakɨ‑takɨ natʉaa. Nʉ wagba nguʉnanɨ wʉ ɨtakɨ‑takɨ wambʉkʉkwanana nʉ ɨdɔdɔkɔ kʉ ɓwanɨ. Ngbanga ngbanga kʉ ɓwanɨ, mombi gʉkʉ mʉngana ambʉkʉkwanana kuto vinyo wʉ ɨtakɨ‑takɨ amati ʉ lɨkɔchɔ lʉ jɛnɛ jɛnɛ. Jʉ ndʉ akyɨa ɓwanɨ, vinyo ngiinanɨ wʉ ɨtakɨ‑takɨ a꞊ɨka ɨkʉʉ, ambʉnatʉa lɨkɔchɔ ngilʉnanɨ. Kija vinyo a꞊yabuo akɛsɨ, lɨkɔchɔ lambʉtambɨa tiga kʉtambɨaa. Ɨkyɛmɨngana, yɨkwanana kuto vinyo ngia wʉ ɨtakɨ‑takɨ kʉ amati ʉ lɨkɔchɔ lʉ ɨtakɨ‑takɨ. Kʉ ɓwanɨ, yambʉkɔmʉ nʉ mombi gʉkʉ mʉngana iya ɓɔ ndʉ amwa vinyo wʉ jɛnɛ, akʉnda ɓata iya wʉ ɨtakɨ‑takɨ. Jʉ a꞊sigo tʉkʉ ɓɔ: ‹ Iya wʉ jɛnɛ a tiga uɗo nadɨndɨ. › »

കേൾക്കുക Luka 5