Text: © The Bible Society of Zambia, 2003 Audio: ℗ 2012 Hosanna

Lunda - 2003 Edition (Drama - NT)

The Holy Bible in Lunda Ndembu © United Bible Societies, 2003. 

Henohu Chawija chaMankendi Akadi Iluŋi, chikweti ijina daChipandakenu, hichikuswila kwakwihi.
Akulumpi jawatupristu niansoneki hiyakukeŋa hakumujahila Yesu, muloŋa atiyili antu woma.
Satana hakwiŋila mudi Yudasi atumbawu ijina dikwawu daIsakaroti, wadiŋi wahekumi nayedi (12).
Hakuya, hakutiyaŋana nawakulumpi jawatupristu niakulumpi janjita, mwakumulubwila kudi wena.
Atiya nikuwaha; hiyakutiyaŋana nindi kumwinka mali.
Yena hakwiteja, hakukeŋa hatela kumulubwila kudi wena hakadi izaza dawantu.


Chidinashiki Ifuku daMankendi Akadi Iluŋi, dajahaŋawu mwana kamukoku waChipandakenu,
Yesu hakutemesha aPetulu naYowanu nindi, Yenu mutuloŋesheli Chipandakenu, twakadyi.
Wena hiyakumwihula nawu, Wunakeŋi tuloŋesheli kudihi?
Yena hakuyila nindi, Chimukushika muŋanda, kukuyibulakana iyala nasendi nsaba yamenji; mwakamulondeli mwitala mwakwiŋilayi.
Mwakamwili mwiniitala nenu, Nkuluŋaŋa nehuli nindi, Itala dawenyi dinakadiila Chipandakenu nawatumbanji twami didihi?
Yena wakayileja itala dahewulu deneni, mudi yuma yakupoŋomwena dehi; dimu mwakaloŋeshela.
Hiyakuya, hiyakuwana mwomwayilejayi dehi; aloŋesha niChipandakenu.
Chiyinashiki mpinji, hakushakama hamu nawapostolu.
Hakuyila nindi, Nafwili kudya nenu Chipandakenu ichi, hinichidi kanda nikabi.
Muloŋa nukuyileja nami, kuchidya cheŋi, chiŋa chinalumbuluki dehi chalala muwanta waNzambi.
Hakutambula lupasa, chanasakililiyi hakwila nindi, Tambulenu lwenilu munwi wejima wenu.
Ami nukuyileja nami, kufumisha kulelu hinakanwa cheŋi yanyikabu yamuvinyuku, kunwa cheŋi, chiŋa wanta waNzambi wunenzi dehi.
Hakunona dinkendi, chanasakililiyi hakudihumuna, hakuyinka, nindi, Weniwu diwu mujimba wami wanenkuwu hanyijimba yenwenu; ilenuŋa mwenimu muŋanakanaŋa nachu.
Mwomumu nawa, cheliluwu anadyi dehi, hakunona lupasa nindi, Lupasilu dichi chitiyaŋenu chachiha chamumashi ami, awa akuyipwekela.
Talenu, chikasa chamfukeji chidi hamu nachami hamesa.
Muloŋa Mwana kaMuntu chalala hakuya, mwomwatoŋweluwu dehi; oyi yihuŋu yakamona muntu wukumufukeja!
Wena hiyakutachika kudihujola nawu mukwetwinyi wukwila chumichi?
Mukachi kawu himukuvulumuka ntadi yakwila nawu mwinetwinyi aketejawu nawu nabadiki akwawu?
Yena hakuyila nindi, Anyanta jawaJentili ayiyuulaŋa; niákweti wanta mukachi kawu ayitenaŋa nawu akwakuwahisha akwawu.
Ilaŋa enu bayi mwilaŋa omuku. Nábadiki akwawu mukachi kenu ekali neyi kansi, niwálema ekali neyi mukwakukalakela akwawu.
Muloŋa nabadiki hinyi, wákalakalaŋa, tahindi iwu nashakami nakudya? Netu, iwu nashakami nakudya. Ilaŋa ami nidi mukachi kenu nimukwakuyikalakela.
Enu yenu munankakelami mwahita kweseka kwami kwejima;
ami nukuyikunjika wanta wenu, neyi chankunjikiluwu ami kudi Tata yami,
kulonda mwakadyi nakunwa kumesa yami muwanta wami, mwakashakami hamatanda awanta nakusompesha nyunza yaIsarela ikumi nayiyedi (12).
Eyi Shimona, Shimona, Satana nayilombi dehi kulonda ayisaali neyi tidiku;
ilaŋa ami nakulombeleli kulonda kukuhwelela kweyi kubuli kukaŋanya. Nineyi, chiwakabalumuka mumuchima, wakakoleshaŋa anakweyi.
Petulu hakumwila nindi, Mwanta neteji kuya naneyi hela mukaleya hela tuhu kufwa.
Hakumwila nindi, Eyi Petulu, nukukuleja nami, ikombu kwitiyila lelu chiŋa eyi wunasambili dehi kudikala kasatu neyi hinamwiluka Yesuku.
Hakuyila nindi, Chinayitemesheli chakadi hela chikwama hela ipakumuna hela nkwabilu, mwakaankilili chuma, tahindi? Nawu, Nehi.
Hakuyila nindi, Ichi dinu, yowu wukweti chikwama asendi, niipakumuna chochimu; nábuli mpoku yakabali alandishi kahuma kindi kulonda alandi yimu.
Muloŋa nukuyileja nami, chuma chasonekeluwu chakuntenami chakwila nawu,
Amubombeli hamu nawakwakuputola;
keŋa chilumbulukili mudami. Muloŋa nsaŋu jasonekawu dehi jejima jakuntenami keŋa jimani.
Wena nawu, Mwanta, tala mpoku jakabali jiyedi iji. Yena hakuyila nindi, Jinawanini.


Hakwidika, hakuya kumpidi yaOliveta neyi chelilaŋayi; atumbanji niwena hiyakumulondela.
Chanashikiyi kwayilaŋayi, hakuyila nindi, Lombelenu mubuli kwiŋila mukutesha.
Hakwambuka nawu kuleha neyi mwakunatila ilola, hakufukama nakulombela,
nindi, Eyi Tata, neyi wuneteji amfumishi lupasilu; ilaŋa bayi ela munakeŋamuku, chiŋa muwunakeŋeyi.
Hikukumumwekena kaŋelu wakufuma mwiwulu nakumukolesha.
Hakulwisha nankashi, hakusweja kulombela; masulwilindi hiyakwila kafwampi neyi malekileki amashi aweni hiyakuholokela hamaseki.
Hakunyamuka kukulombela kwindi, hakwinza kudi atumbanji, hakuyiwana anakami dehi tulu twakuneŋa.
Hakuyila nindi, Munakaminidi tulu? Hindukenu mulombeli, mubuli kwiŋila mukutesha.


Iku wuchidi kuhosha, kutala izaza dawantu, ninowu wahekumi nayedi (12) wukweti ijina daYudasi, natwaminuku. Hakwinza kwakwihi naYesu amupwepujoli.
Ilaŋa Yesu hakumwila nindi, Eyi Yudasi, wufukeji Mwana kaMuntu nakumupwepujola?
Ádiŋi nindi, chanamonuwu chakukeŋa kwilawu, hiyakwila nawu, Mwanta tutapani nampoku yakabali, tahindi?
Mwinawu wumu hakutapa ŋamba yakapristu muneni, kutapa kwakumuketula itu dachidiilu.
Yesu hakwila nindi, Kunahu, lekenu. Yokwata niitu dindi, yomukuswisha nikumukuswisha.
Yesu hakuyila akulumpi jawatupristu niakulumpi jamashidika akuTembeli, niakulumpi jawantu enjili nakumukwata, nindi, Munenzi nampoku jakabali nanyitondu neyi chakukwata ikombi?
Chinadiŋi nenu muTembeli hefuku hefuku, enu himwolweli makasenu nakunkwataku. Ilaŋa iyi himpinji yenu niyachiyuulu chamwidima.


Hiyakumukwata, hiyakumutwala nakumwiŋija mwitala dakapristu muneni. Petulu hakulondela hahalehi.
Chanabutuluwu kesi muchipaŋu, hiyakushakama hamu, Petulu niyena hakushakama nawu.
Chaŋadima wumu chanamumoniyi nashakami kuchejeji chakesi, hakumushinshika nindi, Iwu muntu niyena wadiŋi nindi.
Yena hakudikala nindi, Eyi mumbanda, hinamwilukaku.
Chihanalehi chanti, mukwawu hakumumona, nindi, Nineyi wumwinawu. Petulu nindi, Eyi iyala, ami hinimwinawuku.
Chihanahiti neyi mpinji yimu, mukwawu hakumulamata nindi, Iwu muntu, chalala wadiŋi nindi, muloŋa niyena hikaŊaliliya.
Petulu nindi Eyi iyala, ami kwami kwiluka chiwudi nakuhosha nehi. Iku wuchidi kuhosha, ikombu etiyila nikwitiyila.
Mwanta hakushetumuka, hakumutala Petulu. Petulu hakwanuka mazu aMwanta amwililiyi nindi, Lelu hakela ikombu wuchidi kanda etiyili, wakadikala kasatu neyi hinamwilukaku.
Hakwidika muchipaŋu nakudila chacheni.


Amayala adiŋi amukwata Yesu hiyakumuseha nikumweta.
Amukasa niihina hamesu, hiyakumwila nawu, Profwetaku! Nakweti hinyi?
Amuhosheli chatama yuma yikwawu yayivulu, nikumutuka.


Chikunachi akulumpi jawaYudeya hiyakupompa nawakulumpi jawatupristu niansoneki; hiyakumutwala muchota chawu,
nawu, Neyi wuKristu, tuleji. Hakuyila nindi, Neyi nukuyileja, himukukuhwelelaku.
Hela nukuyihula, himukuŋakulaku.
Kufumisha hanu, Mwana kaMuntu akamushakamisha kuchikasa chaNzambi chachidiilu chaŋovu.
Wejima wawu hiyakwila nawu, Komana, eyi wuMwana kaNzambi? Yena nindi, Mwomwenomu mumunahoshi, muloŋa dichi chinidi.
Wena nawu, Tukeŋi nawa wunsahu wukwawu? Tunamutiyi dehi etu aweni kukanwa kindi yomweni.

കേൾക്കുക Luka 22