Yemba - 2017 CABTAL (NT) Non Drama

Yemba - 2017 CABTAL (NT) Drama

Njhʉ̄ é lá, ŋ́gɔ́ mvhɔ aleʼé ánɛ ŋgap alāʼ, wɔnzwí mɛ́t, é tswíʼ mevɛ̄t mīi é lemteē azík mbɔŋ, émi pɔ́ ke cuŋtéē, ńdɔk mmé nzemɛ́nzēm, ŋ́gʉ̄ɔ á lesi. Ŋ́gē eshʉʼe, ńjʉ́ɔ mía mía tɔ́ yīi, mɛ́ ke lɔ̄k ŋkápte lesi, á gɔ́ mbekne pekne. Pɔ́ kó á ntē éwú, ḿbiŋ te apfhō Ndi Yɛɛ́so jʉ́ɔ. Ńtshí éwú, anu á pú ntsyā á wɔ́p, pɔ́ té zhɛ́ ajū mīi, á ŋghʉ̄ ɛ́. Ńdɛ ŋgē ejʉ́ɔ, mbaŋa zɛ́pīa é ŋwak á mvhɔ pɔ́p, ḿmāʼ menzhó ánɛ pɔ́p, é ŋwaŋne tɛʼ. Pɔ́ jʉ́ɔ ncɔ̄ʼ, ńcʉ́ʼɛ ncʉ̄ʉ esī. Epuɔ mɛ́t é zɛ́tte á wɔ́p ŋ́gɛ: «Pɛ é ghʉ páʼ lā, éfāʼ á ŋiŋ yīi a á nte, á nnɔ mepfhō ó? A te ega á. A á nzím ánɛ lewhʉ̄. Pɛ ekímte anu zīi, a le shúŋ á wɛ́, afʉʼ zīi, pɛ a pɔ́p é le zɛ́t á Ŋgaliléa. A le lé á mbū pɛ ŋ́gɛ: “Mɛ́ pɔŋteé á leswiŋ á Méŋ‑Ŋiŋnɔŋ á mbū epuɔ tepɔŋ. Mɛ́ ekwɛ̄te á yí ánɛ mbaŋne paŋné, á ezím ánɛ lewhʉ̄ ánɛ páte eleʼé tɛ́t.” »
Pɔ́ lɛ ŋkímte páʼ Yɛɛ́so a le zī eshúŋ menu muɔ mɛ́t, efhó ajʉʼ mɛ́t, ŋ́gʉɔ mbɛ́te menu mīi é ntɔ́k, éshúŋ meziŋ‑ntō Yɛɛ́so ntsɔp zɛ́mɔʼɔ́ mé legēm, mbɔɔ á mbū emɔ̄ʼ epuɔ pí. Wɔnzwí mɛ́t é lɛ wɔ Malía mɔ́ Makdala pɔ́ Jáane, ŋ́ghʉ̄ á Malía mía Jáak. Mbɔɔ emɔ̄ʼ wɔnzwí pīi, pɔ́ lɛ éwú, pɔ́ pú nnɔ̄ŋ mbɛ́tɛ menu mɛ́t eshúŋɔ meziŋ‑ntō. Pɔ́ júʼ, é gɔ́ páʼ menu te athū lā, ḿbú te véŋ. Táʼ, Piɛ á ke ndū á esī, ŋ́kʉte ŋgʉ̄ɔ á lesi, ḿbáne á esī, ńcʉ̄te njʉ́ɔ áa ndaʼ epak nzhó tsīi, mɛ́ ke lɔ̄k nzémte apfhō Yɛɛ́so. Ŋ́gē epiŋ nzem mé mba zi, anu á ziŋɛ ntsyāa á yí. A te zhɛ́ ajū mīi á ke tɔ́k ɔ́.


Aleʼé mɛ́t, epuɔ mémpīa ánɛ nnɔ Yɛɛ́so é lu á esī á Yelósalɛm, ńnɔŋ ŋgʉ̄ɔ mé amɔ̄ʼ akap alāʼ, mɛ́ tɔ́ŋ lɛ, Emayus. Ŋgia á lekō éwú, é nɔŋ ŋkūʼɔ ajūɔ mekílo ntsɔp zɛ́mɔʼɔ́ mé legēm. Ńziŋɛ eshúŋnɛ ánɛ menu ntsem mīi, é ke tɔ́kē. Pɔ́ le nɔ̄ŋ eshúŋnɛ, ńnɔŋ ŋŋāka, Yɛɛ́so yí méŋwɛ̄t á shʉʼ ŋkó á nnɔ pɔ́p, pɔ́ a pɔ́p é nɔŋ nzīŋɛ. Táʼ, azō á kʉɛ leghi tsɔ́p, tɛ pɔ́ té á yí yiŋ. Yɛɛ́so á zɛ́tte á wɔ́p ŋ́gɛ: «Pɛ púu nzīŋɛ ŋŋāka akɔ̄ páʼa ā?» Pɔ́ tshí ajʉʼ, ńcʉ̄ʼne athū. Mmɔ̄ʼ ŋiŋ wɔp, lezēŋ tsí é gɔ́ lɛ Kleopás, á zɛ́tte á yí ŋ́gɛ: «O lɔkɔ ŋgɔ́ɔ wulewu á ntē Yelósalɛm, éyi o ka zhɛ́ menu mīi, é tɔ́k ega ánɛ meleʼé muɔ lɛ̄. » Á zɛ́tte ŋ́gɛ: «Akɔ̄ á ke ghʉ̄ éwú ú?»
Pɔ́ gɛ: «Ménu mīi, é ke ghʉ̄ á Yɛɛ́so ŋiŋ Naázalɛt. A kɛ á kwaʼ ntswi‑ŋke Ndém, tɛ epuɔ metsem é jʉ́ɔ ánɛ mefaʼ mí, mbɔɔ ánɛ ashuŋne zí. Ndém á zéŋ nnɔ̄ŋ ŋkɔ̄ŋtɛ á yí. Tɛ́ wɔ nɔŋ‑epɔʼ epi melʉɛ, pɔ́ mekém alāʼ pék, é gɔ á yí, ŋ́gyá ŋ́gɛ, mɛ́ ezwhí á yí, mɛ́ kwɛte á yí ánɛ mbaŋne paŋné. Mbɔ pek kɛ si nnɔŋ ŋkwāŋa ŋ́gɛ, yí mé pɔŋteé á lezāʼ ŋkhʉ apuʼ á ntɔ̄ŋ epuɔ Islaɛl. Á ayáʼa eleʼé tɛ́t, páʼ emuɔ menu mɛ́t é ke tɔ́kē. É té ndaʼ épúp ɔ́, emɔ̄ʼ wɔnzwí á nnɔ pek, é ntsɔ́ʼ ntē wék. Pɔ́ mmé melanjhʉ̄, ŋ́gʉ̄ɔ á ajʉʼ zīi, mɛ́ ke túŋ á Yɛɛ́so éwú, ŋ́kó éwú, éfāʼ apfhō zí, pɔ́ té jʉ́ɔ, ḿbīŋ nzem eshúŋ á wék ŋ́gɛ, mecɔʼ Ndém é ŋŋwāk á mvhɔ pɔ́p, éshúŋ á wɔ́p ŋ́gɛ, Yɛɛ́so a gɔ́ áa nte. Emɔ̄ʼ epuɔ pék é njúʼ épúp, ŋ́gʉ̄ɔ á lesi, ŋ́kó njʉ́ɔ á gɔ́ ndeŋ ndeŋ páʼ wɔnzwí é eshúŋ á wɔ́p épúp. Tɛ́ ŋké te á Yɛɛ́so jʉ́ɔ. »
Yɛɛ́so á lɛ ndé á mbū pɔ́p ŋ́gɛ: «Pɛ gɔ́ áa metsetseŋ. Ntē wɛ́ é si ŋká kaá á levēŋ ajū mīi, metswi‑ŋke Ndém é le léē. Pɛ ka zhɛ́ á légɛ Nzaʼ‑Ŋkhʉ yīi Ndém a le laʼnēē, a ke pɔŋté á lejʉ̄ɔ ŋgʉɔ̄ʼ tɛʼ, tɛ́ ŋkó ánɛ lewūʼ tsí lɛ̄?» Ńdé épúp, ńzī á lekɛ̄ʼte menu ntsem mīi é cʉteē á yí á ntē aŋwaʼne Ndém, éshúŋ á wɔ́p, tɛ efhó ánɛ aŋwaʼne Mɔɔ́sɛ, ŋ́gʉ̄ɔ ŋkó ánɛ etsi metswi‑ŋke Ndém metsem.
Pɔ́ a pɔ́p é gʉɔ tɛ nnɔ̄ŋ ŋkúɔ́ akap yīi, pɔ́ mémpīa é nnɔŋ ŋgʉ̄ɔ mé éwú, Yɛɛ́so á ghʉ páʼ a zɛɛ́t ŋgɔ etswiʼne eziŋ egʉɔ mé mvhɔ lā, tɛ́ pɔ́ lɔk ashuŋne ŋkúʼte á yí, ńdé ŋ́gɛ: «Ḿpɛ epú ndáʼ ega, njhʉ̄ e é tɔ́k. Nzém e cʉ́ʼɛ eséŋ seéŋ. » Á véŋ, pɔ́ a pɔ́p é gʉɔ me ŋgyā á ndáʼa.
Afʉʼ á lejhʉ̄ etsō á kuʼ, pɔ́ gʉɔ nnáŋ á esī, Yɛɛ́so á pɛ́ mblɛ, ésyákne á Ndém, ḿbwɔ́ʼte, ŋ́gyá mé pɔ́p. Leghi tsɔ́p é lɛ ntsɔ́ʼɔ, pɔ́ yiŋ á yí. Á lɛ mbí á mvhɔ pɔ́p. Pɔ́ sɛt nnɛ̄t ndé á tsetsɛlɛ pɔ́p ŋ́gɛ: «Á té páʼa ŋgɔ́ ajū mīi, á nnɔŋ ŋghʉ̄ɛ, ntē wɔ́kɔ é gáŋtɛ, afʉʼ zīi ḿpɛ a pɔ́p é ŋgɔ́ á mɛnzhɛ, á nɔŋ ŋkɛ́ʼtɛ menu á ntē aŋwaʼne Ndém, éshúŋɔ á wɔ́kɔ lā kɛ?»
Pɔ́ lɛ ndū á esī afʉʼ mɛ́t, ḿbīŋ nzem á Yelósalɛm, ńtswɛ́tte meziŋ‑ntō Yɛɛ́so ntsɔp zɛ́mɔʼɔ́ mé legēm, pɔ́ emɔ̄ʼ epuɔ pɔ́p, mbɔ pɔ́ mbú ncúʼte. Pɔ́ shúŋ epuɔ mémpīa mɛ́t ŋ́gɛ: «Anuúnē ŋ́gɛ, Ndi a á nzím ánɛ lewhʉ̄. Simɔŋ a á njʉ́ɔ á yí. » Pɔ́ zéŋ mbɛ́te azɔ́p ajū mīi pɔ́ ŋkó á mɛnzhɛ njʉ́ɔ, ńzéŋ eshúŋ á wɔ́p páʼ, a á nɔŋ mbwɔ́ʼtɛ mblɛ ŋgāptɛ, tɛ́ pɔ́ yiŋ á yí.


Pɔ́ le zɛ́t eshúŋne shuŋné, Yɛɛ́so á ŋwak á tsetsɛlɛ pɔ́p, ńtsāʼte á wɔ́p ndé ŋ́gɛ: «Apwɛne a egɔ́ mé pɛ. » Além zɔ́p á tsɔ́ʼɔ, ecɔʼ é pú ŋgɔ̄ á wɔ́p, pɔ́ nɔŋ ndɔ̄kɔ á yí ntɔ́ŋɔ agega ŋiŋ yīi, a lē ŋkwhʉ́. Tɛ́ Yɛɛ́so á gɛ: «Além zɛ́ á tsɔ́ʼɔ páʼa melaʼ akɔ̄? Pɛ miʼtɛ á levēŋ ajū mīi, pɛ é si njʉ́ɔ melaʼ akɔ̄? Pɛ ecʉ̄te mbū má pɔ́ mekhu má njʉ́ɔ, a gɔ́ á gá. Pɛ emɔ̄te á gá njúʼ, agega ŋiŋ á té mbap nnɛ̄t pɔ́ mekwɛ́ wɛ, páʼ pɛ jʉ́ɔ meŋ ŋgwīɛ̄ la á. » Á ge elé épúp, ńnɔŋ ntswīi á wɔ́p mbū mí pɔ́ mekhu mí. Pɔ́ jʉ́ɔ épúp, ŋ́kák tɛʼ, táʼ, á ke nzɛ́t ŋkʉ̄ʼnɛ á wɔ́p kʉʼne, pɔ́ té kūʼ á levēŋ ɛ́. Yɛɛ́so á jʉ́ɔ, ńdɛ nzɛ́tte á wɔ́p ŋ́gɛ: «Pɛ wɛɛ̄ ajūɔ mpfɛ́ɛt á esī egā a?» Pɔ́ faʼ akem esōh ntɔɔ̄ɔ, ŋ́gyá mé yí. Á tswí, ńtshí á mvhɔ pɔ́p mpfɛ́t. Ḿbiŋ ndé á mbū pɔ́p ŋ́gɛ: «Á páʼa ŋgɔ́ anu zīi meŋ ndɛɛ́ eshúŋɔ á wɛ́, afʉʼ zīi ḿpɛ kɛɛ́ nzóko. Meŋ nde shúŋ á wɛ́ ŋ́gɛ: «Ajūɔ tsem zīi mɛ́ le tí ánɛ meŋ, á ke pɔŋté á legɔ̄ mbo poo. Á akɔ̄ lɛ́ zīi, á ntē aŋwaʼne Mɔɔ́sɛ, pɔ́ etsi metswi‑ŋke Ndém, mbɔɔ á ntē aŋwaʼne azɔp ntshi. »
Á lɛ ŋkɛ́ʼte leghi tsɔ́p á lelɔk njúʼ menu mīi, é ntē aŋwaʼne Ndém. Á zéŋ ndé á mbū pɔ́p ŋ́gɛ: «Mɛ́ le tí á ntē aŋwaʼne Ndém ŋ́gɛ: Nzaʼ‑Ŋkhʉ yīi Ndém a le laʼnēē, a pɔŋteé á yí á lejʉ̄ɔ ŋgʉɔ̄ʼ, ŋ́kwhʉ́, ḿbiŋ nzím ánɛ lewhʉ̄ ánɛ páte eleʼé tɛ́t. Ńzéŋ ŋgɔ́ lɛ, mɛ́ e ké eláʼ ezi á Yelósalɛm, á lelɔk lezēŋ tsí ntswī á mbū ŋgɔŋ ŋgɔŋ ŋ́gɛ, awíɛ awíɛ a egɔ̄ nnɛ̄t zi, ŋ́gwáʼ atswhī tepɔŋ zí, Ndém a shʉʼ ndēkne mefa mí. Pɛ pwɔ̄ mé pɔŋteé á leshūŋ menu muɔ mīi, pɛ é njʉ́ɔ. Pɛ ezhɛ́ ŋ́gɛ, meŋ a shʉʼ etó ajū mīi mɔʼɔ́ ga a le laʼnēē, á leyā mé pɛ. Pɛ eké nnáŋ á tésɔŋ nzwíʼte, tɛ ndáʼ ŋkó afʉʼ zīi, mete Ndém é fhó á lephū, ésóʼo ŋkó ánɛ pɛ. »


Ńdé épúp, ńdɔ̄k á wɔ́p efhó á tésɔŋ ntó, pɔ́ a pɔ́p é gʉɔ tɛ ncʉ́ʼ á lekō á Betani, á kɔ́ʼne mbū mí mé athʉ́, ńnéŋ mbwɛ́né ánɛ pɔ́p. Ŋ́gē enéŋ mbwɛ́né ánɛ pɔ́p épúp, ńnɔŋ ŋkɔ́ʼɔ ŋgʉ̄ɔ mé lephū, tɛ mbíte. Pɔ́ cʉ́ʼ ntshí ajʉʼ mɛ́t, ŋ́gūʼte á yí, ḿbiŋ ndɔ̄k á mía lekāk, ésɛ̄t nnɛ̄t mé Yelósalɛm. Ŋ́gʉɔ tɛ ŋkó éwú, ńcʉ́ʼɛ mbúu nnáŋa áa Mía Ŋgyā Ndém efʉʼ metsem, ŋ́gūʼtɛ á Ndém.

കേൾക്കുക Lúkási 24