ഈ ബുക്ക്‌ണ പറ്റി സിന്നൊരു സേദി
ആള്‌ഗണ ദെങ്ക്‌സ്യ ഒരുത്താന സൊല്ലിബ്‌ഡുവെ എന്ത് പള്യ ഒപ്പ്‌കെ്ട്ട് കാലാത്തിലി ആള്‌ഗാക്ക് സാമി ബാക്ക് കൊഡുത്തിര്‌ന്താ്. അദ് അച്ചെ ണഡാക്ക്യ ബേ്ണ്ടി സാമി സൊല്ലിബ്‌ട്ട് ബന്ത ഏസുണ പറ്റ്യുള്ള ണല്ല സേദിന പറ്റിത്തെ മത്തായി എ്ള്‌ദിന ണല്ല സേദിലി സൊല്ലിര്‌ക്കാദ്. ഏസു പ്‌റാന്ത് ബളാന്ത എഗുദാര് ജാദിക്ക് താനേമല്ല, ഉലഗാത്തില്യ എല്ലാര്‌ക്ക്‌മ് ബേ്ണ്ടി ഉള്ളാദ്‌ത്തെ ഈ ണല്ല സേദി.
ഏസു എച്ചെ പ്‌റാന്താ് എന്ത് മുദ സൊല്ലികൊണ്ട്‌ത്തെ മത്തായി ഈ സേദി എ്ള്‌ദ്യ പ്‌ഡിക്കാദ്. പ്‌റ ഏസു തണ്ണിക്ക് മുളുഗ്‌റാദ്‌ണ പറ്റിമ് സോദണെപഡ്‌റാദ്‌ണ പറ്റിമ് ഗെലീലേലി സാമി സേദിന സൊല്ലുറാദ്, പഡ്‌സ്‌റാദ്, ണോയിക്കാറാര്‌ണ തെ്ള്‌സ്‌റാദ്‌ണെല്ല പറ്റിമ് ഒനൊന്റൊനൊന്റായി എ്ള്‌ദിര്‌ക്കാ്. അദ്‌ക്ക് പ്‌റ ഏസു ഗെലീലേലിര്‌ന്ത് എര്‌സലേമ്‌ക്ക് പോരാദ്, ഏസു സാരാദ്‌ക്ക് മുദ ബാരാത്തിലി ണഡാന്ത കാര്യഗളാന കുരുസ്‌ക്കെ സേത്തി ആണി അഡിത്ത് കൊല്ലുറാദ്, താന് ഉജുറെ്ന്ത്‌റാദ്‌ഗണെല്ല പറ്റി എ്ള്‌ദിര്‌ക്കാ്.
സാമി ആള്‌റാദ്‌ണ പറ്റി പഡ്‌സ്‌റവാന്‌മ് സാമി സൊല്ലുസുലാക്കാക്ക് ഇര്‌ക്ക അര്‌ത്തണ സൊല്ലുറവാന്‌മാന ഒരു മ്‌ഗ്‌ന്ത ബാത്ത്യാനായി ഏസുണ ഈ സേദിലി മത്തായി കാട്ടി തന്തിര്‌ക്കാ്. ഏസു പഡിസിന കാര്യഗണ അഞ്ച് കാര്യഗളായി പ്‌റ്‌ത്തിര്‌ക്കാ്. ഒണ്ണാവദായി സാമി ആള്‌റാദ്‌ക്ക് പട്ടവാര്‌ക്കുള്ള ഗുണഗ, ബാഗ്യഗ, കഡാമെഗ, എങ്കാദ്‌ഗണെല്ല പറ്റി ഏസു മലേലി ബെത്ത് സൊല്ലുറ ണായഗ (5-7). റണ്ടാവദായി ഏസുദ് സൊല്ലുപഡി ണഡാക്ക പന്നന്റ് ആള് തമ്മ് ബേലെ എച്ചെ സെയ്‌ഡൊ എങ്കാദുക്കുള്ള ബുദ്ദിണായ (10). മൂണാവദായി സാമി ആള്‌റാദ്‌ണ പറ്റി എ്ണേത്ത് സൊല്ലിര്‌ക്ക കദെഗ (13). ണാലാവദായി തന്ന് സൊല്ലുപഡി ണഡാക്കവാര് ആഡൊ എന്ത് സൊല്ലുറാദ്‌ക്കുള്ള അര്‌ത്തണ പറ്റി പഡ്‌സ്‌റ കാര്യഗ (18). അഞ്ചാവദായി ഉലഗാത്തിലിര്‌ക്കാദ് ഒട്ടുക്ക് അളിരാദ്‌ണ പറ്റിമ് സാമി ആള്‌റാദ് ബരാദ്‌ണ പറ്റിമ് (മത്തായി 24-25).
ഈ ബുക്കിലി അഡാങ്കിര്‌ക്കാദ്
ഏസു ക്‌റ്‌സ്‌ത്ത്‌ദ് പാട്ടലാമ് അയാള്‌ദ് പ്‌റാവിമ് 1:1—2:23
തണ്ണിക്ക് മുളുഗ്‌സ്‌റ ഓഗന്നാ് സെയ്‌ദ ബേലെഗ 3:1–12
ഏസു ക്‌റ്‌സ്‌ത്ത് തണ്ണിക്ക് മുളുഗ്‌റാദ്‌മ് സോദണെപഡ്‌റാദ്‌മ് 3:13—4:11
ഏസു ഗെലീലേലി എദ്‌ക്ക ബേലെ സെയ്‌രാ് 4:12—18:35
ഏസു ഗെലീലേലിര്‌ന്ത് എര്‌സലേമ് മാട്ട് പോരാദ് 19:1—20:34
ഏസു സാരാദ്‌ക്ക് മുദ എര്‌സലേമ് പട്ടണാത്തിലിമ് അദ്‌ക്ക് ബെ്ള്യേമ് 21:1—27:66
ഏസു ക്‌റ്‌സ്‌ത്ത് ഉജുറേ്റാദ്‌മ് കണ്ണ്‌ക്ക് കാട്ട്‌റാദ്‌മ് 28:1–20

കേൾക്കുക മത്തായി ഈ ബുക്ക്‌ണ പറ്റി സിന്നൊരു സേദി