If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

“यीशु ने बोल्लेया, सच्ची अंगूर री बेल मैं है, अते मेरे पिता तिसेरे माली हिन। हर इक्क डाली जे मेरे बिच है ते जिस बिच फल्ल नी लगदा, से तिसजो बड्डी दिन्दे, अते मेरी हर इक्क डाली जो जे फलदी, से तिसजो छांटदे हिन ताकि होर जादा फल्ल लगन। मैं जे शिक्षा तुसा जो दित्ते री है तुसा तिस कने पवित्र होई गेरे हिन। तुसा मेरे बिच बणी रेयो ते मैं तुसा रे बिच बणी रैहन्गा, जिय्यां से डाली जे अंगूर री बेल कने जुड़ी ना रे तां अप्पु से फली नी सकदी, तिय्यां ही तुसा भी जे मेरे कने जुड़ी नी रैहन्गे तां नी फली सकदे। मैं अंगूर री बेल है, तुसा डाली हिन जे मेरे कने जुड़ी रैहन्दा अते मैं तिस कने, से बड़ा फलदा, किजोकी मेरे का बखरे होई करी तुसा किच्‍छ नी करी सकदे जे कोई मेरे अंदर बणी नी रैहन्दा, तां तिसजो कट्टी करी सूटी दित्तेया जांदा ते जां से सुकी जांदा तां मणू तिसजो बटोरी करी आग्ग करी बिच फुक्की दिंदे। जे तुसा मेरे बिच बणी रैहन्गे, अते मेरी सिखाए री शिक्षा तुसा रे बिच बणी रैहन्गी, तां तुसा किच्‍छ भी मंगो, मेरे पिता ने तुसा री हर जरुरत जो पूरा करणा। जां तुसा मता फल्ल लियांदे तां तिस कने ए साबित हुंदा कि तुसा मेरे चेल्‍ले हिन। इस कने मेरे पिता री बड़ाई हुंदी। जदेया मेरे पिता ने मेरे कने प्यार कित्तेया, मैं भी तिय्यां ही तुसा रे कने प्यार कित्तेया मेरे प्यार बिच बणी रेयो जे तुसा मेरे हुकमां जो मंनगे, तां मेरे प्यार बिच बणी रैहन्गे, तिय्यां ही जिय्यां मैं अपणे पिता रे हुकमां जो मनदा अते तिन्हेरे प्यार बिच बणी रैहन्दा। मैं ए गल्लां तुसा रे कने इधेरे तांइ बोल्ली ताकि तुसा जो मेरे सांई भरपुरी कने खुसी मिल्ले। मेरा हुकम ए है कि जिय्यां मैं तुसा रे कने प्यार कित्तेया, तिय्यां ही तुसा भी इक्क दूज्जे कने प्यार करो। इसका बड्डा प्यार होर कुसकी रा नी, कि कोई अपणे दोस्तां तांइ अपणी जान देई देयो। जे हुकम मैं तुसा जो दित्तेया, जे तुसा तिसजो मनगे, तां ही तुसा मेरे दोस्त हिन। अवे मैं तुसा जो नौक्कर नी बोलणा किजोकी कोई नौक्कर नी जाणदा कि उसेरा मालक कै करदा, पर मैं तुसा जो दोस्त बोल्लेया, किजोकी से सब गल्लां जे मैं अपणे पिता का सुणी तुसा जो दस्सी दित्ती री हिन। तुसा मेरे जो नी चुणेया, पर मैं तुसा जो इक्क मकसद कने चुणेया कि तुसा जाओ अते इदेय कम्म करण जे पिता-परमेश्वर जो पसंद आए ते तुसा रे ठीक कम्म बणी रे, ताकि मेरे नां कने तुसा जे किच्‍छ भी पिता का मंगो से तुसा री हर जरुरत जो पूरा करण। मैं तुसा जो ए हुकम इधेरे तांइ देया करदा ए ताकि तुसा इक्क-दूज्जे कने प्यार करो।”

जे अगर दुनिया रे मणू तुसा कने दुश्मणी करदी तां याद रख्खो से तुसा रे का पैल्ले मेरे का दुश्मणी करदी। जे तुसा इस दुनिया रे लोक्कां सांई हुन्दे तां दुनिया रे लोक्कां ने तुसा कने अपणेयां सांई प्यार करणा थिया, पर तुसा इस दुनिया रे लोक्कां सांई नी हिन किजोकी मैं तुसा जो इस दुनिया रे लोक्कां बिच का चुणी लित्ते रा है, अते इधेरे तांइ दुनिया रे मणू तुसा रे कने दुश्मणी रखदे। मैं जे गल्लां तुसा जो बोल्ली, तिन्हा जो याद रख्खो, इक्क नौक्कर अपणे मालक का बड्डा नी हुंदा, इधेरे तांइ जे तिन्हा मेरे पर जुल्म कित्तेया तां तुसा पर भी जुल्म करणा, अते जे अगर तिन्हा मेरी शिक्षा जो मन्नेयां, तां तुसा री भी मनणी। पर तिन्हा लोक्कां ने तुसा पर भी जुल्म करणा किजोकी तुसा मेरे चेल्‍ले हिन, किजोकी से परमेश्वर जो नी जाणदे जिस ने मेरे जो भेज्जे रा है। जे मैं नी आंदा अते तिन्हा कने गल्लां नी करदा तां से कुसकी भी पाप रे कसुरवार नी हुन्दे पर अवे तिन्हा का तिन्हेरे पाप्पां तांइ कोई भी भाह्ना नी ए जे मेरे कने नफरत करदा से मेरे पिता कने भी नफरत करदा जे मैं तिन्हेरे बिच से चिन्हा-चमत्कार नी दसदा, जे कुसकी ने भी नी कित्ते, तां से पाप रे कसुरवार नी हुन्दे, पर अवे जां से दिख्खी चुके रे हिन तां भी मेरे कने अते मेरे पिता दोन्नां का नफरत करदे हिन। पर ए इधेरे तांइ होया कि से वचन पूरा हो जे पवित्रशास्त्र बिच लिख्खे रा है:
तिन्हा ने बेकार ही मेरे कने नफरत कित्ती।
जां तिस मददगार ने आणा, जिस जो मैं पिता रे पास्से का तुसा का भेजणा, बल्कि सच्चाई री आत्‍मा, जे पिता रे पास्से का आंदी, तिसने मेरी गवाई दैणी। अते तुसा ने भी गवाई दैणी, किजोकी तुसा सुरु का ही मेरे कने रे।

കേൾക്കുക यूहन्ना 15