Blackfoot Blackfoot people are found in Canada and the USA: the Blackfoot Confederacy is in southern Alberta and consists of Siksika, Blood, and Pikani (North Peigan); the South Peigan occupy the Blackfeet Indian Reservation in Montana, USA. The language is called Siksiká which means Blackfoot. Parts of the Bible were first published in Blackfoot in 1890.
Gospel of John The Blackfoot Gospel of John called Annaahk John Manistsitsinikatahpi Jesus Manistsipaitapiihpiai was translated by Wycliffe Bible Translators and Blackfoot people and published by the Canadian Bible Society in 1979. A slight revision was made in 2025-2026 to both the text and audio.

Translated by Wycliffe Bible Translators. Reviewed by Blackfoot people with help from Wycliffe/SIL and the Canadian Bible Society. Published by the Canadian Bible Society, 1979, 2026.

Annaahk John Manistsitsinikatahpi Jesus Manistsipaitapiihpiai

Óóki ki ánnika omáa Jesus itáʼpawaawahkaawa omiim Galilee. Mátaahsiʼtakiwa mááhkitaʼpaissii omiim Judea takaa omííksi istóʼtotamaʼpssiiksi Jews iiksííkaʼkimaayaiksi mááhksiʼníyissaiksi.
Kii ki ánniayii áyakoʼtsstsiiwa omííksi Jews otómahksiksistsikomssooaawaists niitsínihkatoohpiistsi, itáʼpiʼmaaoʼpi. Jesus otsítanikka ómohpapiʼihpiksi, “Stámomatapoota. Istapoota Judea. Ánnimayi omííksiska kitáíssksinimáatsaaiksi ákoʼtsitskakaitapiiyi inímiiksi kipíʼkanisttsissiistsi. Ikkámsstainiki kááhksaaʼtaʼssi kitákohkottsaitanissttotsiihpiaawa otsítonnatsitapiihpi. Áámostsi kitáwaanisttotsiihpiaawa. Kii ánnohkayii kitákohkottaistamaatsaaya matápiiwa kanistapsspi.” Ánniai áániiyaiksi ómohpapiʼihpiiksi. Ostówaawayi onóóhkattsawáakomaiʼtookaiksi, kííwa otohpapiyímmahpiaiksi.
Itanístsiiwaiksi, “Mátomaoʼtsstsiiwa nitsítaakanisttsiihpi nitáyaakanisttotsiihpi. Kiistóaawa kitáísksaohkottanisttotsiihpoaawa kitáyaakanisttotsiihpoaawaistsi. Ótapiiʼssina kimátakohkottsíkaimmokoaawa kiistóaawa. Ki niistówa nitsínaoʼkáíkaimmokiaawa takaa nitáísksawaanistayaawa iikókaʼpiiwa manistáʼpaisspiaawa. Kiistóaawa stámawattsitapook omii otsítaohkanaʼpssatoohpiaawa ómahksiksistsikoi. Niistówa nimátakitapoohpa annohka. Mátomaitaoʼtsstsiiwa nitsítaakitapoohpi.”
Ánniayii áánistsiiwaiksi. Kii ki óómikskaoʼkiaiksi áíʼtapooyaiksi Jerusalem omííksi ómohpapiʼihpiiksi omáa Jesus. Ostóyi sotámitsikkitaʼpawaahkaawa omiim Galilee. Kii ki ánniayii Jesus ostóyi mánoohkattsitapoowa Jerusalem. Naisimiitapoowayi niitáaksaohkottsinoahpi.
Óóki. Omííksi istóʼtotamaʼpssiiksi Jews itáʼpaissammiiyaawa Jesus omiim otsítaohkanaʼpssatoohpiaawa ómahksiksistsikoi. Áániiyi, “Tsimááhta ááhkitaʼpaitapiiwahtaoʼtsiksi.”
Ki omííksi matápiiksi ánniksaoʼki itáísimiiʼpoyiiyaawa. Annííksi áániiyaawa, “Ááhksokaʼpitapiiyi omáa Jesus.” Ki annííksi áániiyaawa, “Saa. Kimátomaaniihpoaawa. Stámikakaiksisstaʼpípiwa annóma matápiiyima.”
Ki amííksi matápiiksi mátohtsitsiʼpoyii omíi Jesus otsítakaitapiʼssi. Iikómaisstonnoyiiyaawa omííksi istóʼtotamaʼpssiiksi Jews mááhkitsitoohtoyissaawa.
Kii ki aihtatsíkiokstoohsi amóstsi ómahksiksistsikoistsi, omáa Jesus itsitápoowa omii ómahkitawaatsímoihkaaoʼpi. Ki sotámssksinimaatstohkiwa. Ki Omííksi istóʼtotamaʼpssiiksi Jews iksípisatsimmiiyaawa Jesus. Áániiyaawa, “Haa! Mátssksinimáatsaawa omáa nínaawa. Tsááhta ááhkanistaohkottssksinimaatstohkiwahta ánni.” Jesus sotámanistsiiwaiksi, “Nimátohtaissksinimáatstohkihpa niistówa niksímsstaanistsi. Annaahka Áʼpistotookiwahka, nitóʼtsskookahka ánnahkaoʼka ómohtoʼtsstsiihpiaawa nitssksinímaatstohkssiistsi. Omáa matápiiwa ikkámsskskaʼtsimaasi mááhkanisttotsissi Áʼpistotookiyi otsitsííhtaani ánnahkayii ákohtohkoissksinima nitssksinímaatstohkssini. Ákitssksinima ikkámohtoʼtsstsisi Áʼpistotookiwa kiáya niistówa niksímstaani. Omííksi káákaissksinimaatstohkatoomiksi otáwattsiksimsstaanoaawaistsi kááksstayaawa ááhksspimmahsaawa. Ki noohkíítsii niistówa nómohtaʼpaoʼtakihpi. Nómohtaʼpaoʼtaki ááhksspimmahsi annaahk nitóʼtsskookahka. Ki ánnihkayi kitákohtoʼtssksiniihpoaawa tsííkamoʼtaʼpssi, ki nimátayomooksspa.”
Óóki. Sotámaniiwa omáa Jesus, “Moses Kítohkokkoaawa natowókakihtsimaani, ki mátsitsstsiihpa kiistóaawa ááhkanistsiʼtsimi natowókakihtsimaani. Kimáʼkayikaʼkimaahsoaayi káahksiʼnikkssoaayi niistówa? Kimátohtaisapoohpoaawa natowókakihtsimaani.” Sotámaniiyaawa, “Ááhkitsstsiihpa makáʼpatoʼsi kitsípstsistomataai kááhkawaanikki ánni kááhkanistáíʼpoyissi. Mátsitsstsiihpa ááhkayikaʼkimaai káakhksiʼniyissi.”
Óóki. Sotámaniiwa omáa Jesus, “Amohka niʼtókskayihka nipíʼkanisttsissinihka kómohtohkanipisatsiʼtakihpoaawa nitsítanisttotsissi issikópiiksistsikoi. Óóki, kitsííkakohtomookoaawa Moses kááhkatoaʼpsskskaahsoaayi kókoʼsoaawaiksi. Otsíístapaahsiiksi ánnikskayi iimatápaatooma amohka natóísskskaakssini, kii oostóyi noohkáttsitsiistapanistsiiwa otsíístapaahkoayossokoʼsiksi mááhkoohkattanisttssi. Ki ánnohkayii kíístoaawa kitákitatoaʼpsskskaawayaawa kókoʼsoaawaiksi áánisoonisaawa ímakssikopiiksistsikosi. Kiistóaawa kitákanisttotsiihpoaawa áámohk ímakssikópiiksistsikosi kááhkohtsitaisapoohsoaayi Moses otokákihtsimaani. Ki ánnohka kitákohkottsaohtsayiksiksinokihpoaawa nitsítohkottotoahsi omááhka nínaawahka omii issikópiiksistsikoi. Kimáhaisopoyaʼpsskskaʼtsiihpoaawa kanistáímmokihpoaawayi. Kitákohkottókamoʼtsskskaʼtsiihpoaawa annihka tánisttotsiihpihka.”
Ki ánniai ánniksayi istsitapííyi omii Jerusalem, áániiyaawa, “Annaahka Jesus ánniskaoʼkinai otsitsííhtatahpoaawayiska mááhksiʼnitahsaawayi omííksi kitátoaʼpinaaiminnooniksi. Issáʼtsik. Ostóyi itáíʼpoyiiwa otsítakaitapiihpi ki osótamssaissikáattsooka kitátoaʼpinaiminnooniksi. Iikánistsinattsiwa ánni áíksimstatsiiyaawa Jesusi otsíítaʼpamssayi Áʼpistotookiwa ómohtakohkoikiihpiska áyaksikamotsiipiookiiyi. Issksiníʼpa mátanistsiksimsstaawaiksaawa. Kiistónnoon ináóʼkssksiniihpa omiima ómohtoʼtoohpima Jesus. Ki Áʼpistotookiwa anniska ómohtakohkoikiihpiska, mátakitsstsiʼpa ááhkssksinimi ómohtoʼtoohpiayi. Ki ánnihkayii iihtssksinííʼpa Jesus mátakohkottamiiwa.” Óóki. Ánniai Jesus sotámitsipiima omii ómahkitawaatsímoihkaaoʼpi. Áísohkssitsipssatsiiwa omííksi otáíssksinimáatsaaiksi manistáksokaʼpoohtóyihpiaiksi. Áániiwa, “Oki. Kanistsíksimsstaahpoaawa, kááhkssksinookihpoaawa kii nómohtoʼtoohpii. Kitsípahtsiiksimsstaahpoaawa. Kitáókamoʼtanistohpoaawa iitsstsííhpa nitsipóóhsapsskooki. Ánnahkayi nómohtoʼtoo. Nimátáwattaistoohpa. Ostóyi nitsipóóhsapsskooka. Ki kiistóaawa kimátssksinoaawaawaatsiksi. Niistówa nítssksinoaawa, takaa ostóyi nómohtoʼtoo. Ki nitóʼtsskooka.”
Óóki. Ánniayii áíʼtsstsiihpa otáíssáaksinnoki mááhkítohtoipiyissi. Kii ináóʼksaomiitaoʼtsstsiiwa itáaksiʼnitahpi. Káátsaitsstsiiʼpa otsikííhtooki. Sotámitakaitapiiyi iimáíʼtoyiiksi Jesus. Áániiyaawa otsskáakaohsi otsipisatáístamatstohkssiistsi; ákohkottohtoʼtssksiniihpa otámssayi Áʼpistotookiwa anniiska otákohkoikiihpiska.
Ki ánniai niitsisímiawaaniiyaawa omííksi matápiiksi. Osótamoohtookoaawa amííksayii Pharisees. Ki omííksi Pharisees ki omííksi nínaatóyaapiikoaikisi itomátsskoyiiyaawa omííksi otsínnakiikoaamoaawaiksi. Áánistsiiyaawaiksi “Matóyinnoka Jesusa.”
Ki ánniai Jesus sotámanistsiiwa omíi ótapiʼssini “Óóki. Kitákattsiʼnaksisamohpokaissiimohpoaawa, ki ánnika táksotamsskitapoo annaahka nitóʼtsskookahka. Ki ánniika aiʼsskitóʼtooyiniki annaahka nitóʼtsskookahka kitákitsiyikaʼpssamokihpoaawa ki kimátakohkoonookihpoaawa. Ki omiim nitáyaakitáopiihpim kimátakohkottsitoʼtoohpoaawa.”
Óóki. Omííksi istóʼtotamaʼpssiksi Jews sotámomatapohtsiʼpoyiiyaawa Jesus. Áániiyaawa “Tsimááhtaa ááhksiksimsstatoomahta mááhkitapoohsi. Tsimááhta ááhkitsaohkottohkoonoawahtaa kiistónnoona. Ááhkikkamiksimsstaawa mááhkitapoohsi mááhkitohpokaʼpssiimahsi omííksi Jews ayístapípiaʼpaopiiksi noohkíítssksaahkoistsi. Ááhkikkamaiksimsstaawa mááhkitssksinimaatsaahsi amiiksi saiʼpaitapiiyi kátaaʼnistapssiiksi Jews itáópiiksi omíístska noohkíítssksaahkoistska. Saa. Mátakohkottanistsiiwa Tsááhta ááhkanistapaniwahta otáánissi, ‘Kitáákiyikaʼpssamokihpoaawa, kii kimátakohkoonookihpoaawa. Ki omiim nitáyaakitáópiihpim kimátakhokottsitoʼtoohpoaawa.’ ”
Óóki. Ki ánnika ki áíʼstsaaiksistsikowa omíístska ómahksiksistsikoistsi. Ánnihkayi ksistsikói istohkanáóʼtotamaʼpiwa. Ki ánnaoʼka omáa Jesus itáípoyiwa. Sotámsaisttoowa. Itotóísskskaniiwa aohkíí mááhkitsopoyaʼpanissi manístsspiayi amóska Natowóttakiska. Áániiwa, “Óóki. Itsstsííyi ksistóaawa kitsítotoisapsspoaawa ánni kitáíʼnakihpoaawa. Stámomaiʼtookik. Kitákomiiksistssimihpoaawa. Nítohkanaomaiʼtookiiksi ákohtoʼtsikimsskaawa aohkíí iihtanípaitapiioʼpi. Ákanistohtoʼtsikimsskaawa omííksi áómaiʼtakiiksi ánni aʼsíítahtai. Ánniai niitsítssínaiʼpi omiistsi natóyisínaakssiistsi.”
Omáa Jesus otááʼnissi aohkíí niitapániwa Natowóttaki. Niitapániiwa áómaiʼtakiiksi ákitohkotayaawa Natowóttaki. Anniihka otsítanistoohpihka mátomaohkotawaiksi áómaiʼtakiiksi Natowóttaki. Mátomiitaoʼtóoyinai takaa Jesus mátomainayáttsaawaatsi.
Óóki. Omííksi matápiiksi náyoohtoyiiksi Jesus sotámaniiyaawa, “Omáa Jesus ááhkiitaʼpamiiwa annaahka áwaatoyiʼpoyiiwahka áyoohkoawahk mááhkoʼtoohsi.” Ki annííksi istsíkiiksi áániiyaawa, “Ánniskaoʼkinayi Áʼpistotookiwa anniska ómohtakohkoikiihpiska.” Ki annííksi mattstsíkiiksi áániiyaawa, “Saa. Ostóyi iihtóʼtoowa Galilee. Áʼpistotookiwa anniska ómohtakohkoikiihpiska mátakohtoʼtooyinai Galilee. Natóísinakssini itanáʼsiwa otáksiistapaahkossokoʼsimmoka annaahka isskóóhtsika isttsíípihkininaawahka Davidahka. Ki ákitsitapiiwa Bethlehem, otakáítapisskooma annaahka David.” Ki anniayii niitayákiitsiksimsstaayaawa amííksi matápiiksi; náwayakiitsiksimsstatsiiyaawa Jesusi. Ki annííksi ííkstaayaawa máahksinnahsaawayi, ki ináóʼksaitsstsiihpa mááhksikiihtooki.
Óóki. Ánnika omííksi iyínnakiikoaiksi sotámitsskoʼtooyaawa óómiksi nínaatóyaapiikoaiksi ki Pharisees. Otsítanikkoaawaiksi “Tsskáa kómohtsaoʼtsipiaawaawa Jesus.” Itanííyaawa, “Námohtsáyinnannaana manistáissksinimaatstohkihpi. Mátomaikakitsstsiihpa matápii ánni ááhkanistsiʼpoyii.” Osótamanikkoaawa omííksi Pharisees, “Kikátaoʼkattsipahtsíípiookoaawa. Kitsínaaiminnooniksi mátsitsstsiihpa áómaiʼtoyii. Niistónnaana tanistápsspinnaani Pharisees, mátsitsstsiiʼpa áómaiʼtoyi i. Omiiksi oʼkiáʼpitapiiksi ánniksaoʼki áómaiʼtoyiiksi. Takaa oʼkiáʼpitapiiksi mátotsistapiʼtsimiaawa natwókakihtsimaani. Ómohtsikaisatairamokoaawa anniska Áʼpistotookiiyiska.” Ánniayi áániiwa omííksi Pharisees. Ánniayi niitssíinaanistsiiyaawa omííksi oʼkiáʼpitapiiksi iimáíʼtoyiiksi Jesus.
Kii ki ánnika omáahka Nicodemusahka, ánnahkaoʼka ííkaoksisawáaatsiiwa Jesusi. Ostoyi ánnikskaoʼki annííksiska Pharisees. Sotámanistsiiwa omííksi noohkáttoh-Pharisees ki amííksi nínaatóyaapiikoaiksi, “Kii itanáʼsiwa kitokákihtsimannooni ákohkottsaokakihtsimatawa omáa matápiwa saomáyoohtoahki onóóhkanistáyaakohkaniihpi aotóíʼpoyisi ááhkohtsitssksiníssi otánisttsiihpi.” Ki omáa Nicodemus osótaminikkanikkaiksi mááhksaipoyisskohtomoahsi Jesus. Áánistsiiyaawayi, “Kitákohkottsiyikokstoohpi omíístsi natóisínakssistsi. Kitákohtoʼtohkoissksiniʼpa otsáyitsstsiisi áwaatoyiʼpoyii ááhkohtoʼtooi Galilee. Ánnimai iihtoʼtoowa annaahka Jesus. Kitsikánistaiʼpoyi annoohka ánni kinóóhkattohtoʼtoohpi Galilee.”
[ Ki ánnimayii itohkánawahkayii matápiiksi,

കേൾക്കുക John 7