Iranian Azeri Bible

آدام آروادی حوّا ائله یاخینلیق اتدی و حوّا بویلو اولوب قایِنی دوغدو. و ددی: «ربّئن کؤمه‌یی ائله بئر ائنسان دونیایا گتئردئم.» سونرا حوّا اونون قارداشی هابئلی دوغدو. هابئل چوبان اولدو، آمّا قاین اَکئنچی.
بئر مودّت کچندن سونرا قاین تورپاغین میوه‌سئندن ربّه هدئیّه تقدئمی گتئردی. هابئل ده سوروسونده ائلک دوغولان حیوانلاردان بئر نچه‌سئنی و اونلارین پئیئنی هدئیّه تقدئمی گتئردی. رب هابئلی و اونون تقدئمئنی قبول اتدی، آمّا قایِنی و اونون تقدئمئنی قبول اتمه‌دی. بونا گؤره ده قاین چوخ قضبله‌نئب قاش-قاباغینی ساللادی. رب قایِنه ددی: «نئیه قضبله‌نئبسن؟ نئیه قاش-قاباغینی ساللاییبسان؟ اگر یاخشی اولانی اده‌سن، مگر قبول اولونمازسان؟ اگر یاخشی اولانی اتمیه‌سن، گوناه قاپینین آغزیندا کمئن قوروب سنی گؤزله‌یئر، آمّا سن اونا قالئب گلملی‌سن.»
قاین قارداشی هابئلله دانیشدی. اونلار چؤلده ائکن، قاین قارداشی هابئلئن اوستونه یوگوروب اونو اؤلدوردو. او زامان رب قایِندن سوروشدو: «قارداشین هابئل هارادادیر؟» قاین ددی: «بئلمئرم، مگر من قارداشیمین کشئکچئسی‌یَم؟» رب ددی: «سن نه ادئبسن؟ قارداشینین قانی تورپاقدان منه فریاد ادئر. ائندی بو تورپاغین لعنتی آلتینداسان؛ او تورپاق کی آغزینی آچیب اِله کی، سنئن اَلئنله تؤکولن قارداش قانینی اودسون. تورپاغی بِجَردئیئن زامان او داها گوجونو سنه ورمه‌یه‌جک. یر اوزونده قاچاق و سرگردان اولاجاقسان.» قاین ربّه ددی: «جزام چکه بئله‌جیئمدن داها آرتیقدیر. باخ، بو گون سن منی بو تورپاقلاردان قوووبسان. من ده سنئن حوضوروندان گئزله‌نئب یر اوزونده قاچاق و سرگردان اولاجاغام. کئم ده منه راست گلسه، منی اؤلدوره‌جک.» رب اونا ددی: «بونا گؤره کئم قایِنی اؤلدورسه، اوندان یدّی قات ائنتئقام آلیناجاق.» رب قایِنه بئر علامت قویدو کی، کئم اونا راست گلسه، اونو اؤلدورمه‌سئن. بله‌جه قاین ربّئن حوضورونو ترک اتدی و عدن باغینین شرق سمتئنده، «نود» تورپاغیندا یاشاماغا باشلادی.

قاین آروادی ائله یاخینلیق اتدی و آروادی بویلو اولوب خنوخو دوغدو. او زامان او، بئر شهر تئکدی، شهره اوغلو خنوخون آدینی وردی. خنوخدان عئراد اولدو. عئراد مِخویائلئن آتاسی اولدو، مِخویائل مِتوشائلئن آتاسی اولدو، مِتوشائل لَمِکئن آتاسی اولدو. لَمِک ائکی آرواد آلدی: بئرئنئن آدی عادا، او بئرئنئن آدی زئلّا ائدی. عادا یابالی دوغدو. یابال او آداملارین آتاسی اولدو کی، چادیردا یاشاییرلار و سورو ساخلاییرلار. اونون قارداشینین آدی یوبال ائدی. یوبال او آداملارین آتاسی اولدو کی، هر جور طنبور و نِی چالیرلار. زئلّا دا توبَل-قایِنی دوغدو. توبَل-قاین بورونجدن و دمئردن هر جور آلَتلر دوزَلدن ائدی. باجیسینین آدی دا نَعَما ائدی.
بئر دفه لَمِک آروادلارینا ددی:
«ای عادا و زئلّا، سسئمی اشئدئن،
ای لَمِکئن آروادلاری، سؤزومه قولاق آسین:
منی یارالادیغی اوچون بئر آدام اؤلدوردوم،
منی ووردوغو اوچون بئر جاوان اؤلدوردوم.
اگر قاین اوچون یدّی قات قئصاص آلیناجاقسا،
لَمِک اوچون یتمئش یدّی قات آلیناجاق.»

آدَم گئنه آروادی ائله یاخینلیق اتدی و حَوّا بئر اوغلان دوغوب آدینی شِت قویدو و ددی: «هابئلئن یرئنه کی، قاین اؤلدوردو، تاری منه آیری بئر نسئل تعیئن اتدی.» شِتئن ده بئر اوغلو اولدو و آدینی اِنوش قویدو. او زامان ائنسانلار ربّه سئتایئش اتمیه باشلادیلار.

കേൾക്കുക یارادیلیش 4