Juan 13
13
Ri Jesús kuch'aj ri kaqan rutijo'n
1Xa naqaj chi k'o wi lo ruq'ijol ri nimaq'ij Pascua yey ri Jesús reta'am ya kopon ruq'ijol echiri' kuya kan ruwachulew y ke'ek ruk' Ruqaw chila' chikaj. Ek'u Rire lik k'ax eb'una'om rutijo'n e k'o ruk' wara che ruwachulew; yey janipa q'ij xk'oji' kuk', e la' lik k'ax xeb'una'o.
2Xopon k'u rub'eneb'al q'ij echiri' ri Jesús kuk' rutijo'n e ri' kewa'ik. Jun k'u chike e ri Judas aj Iscariot ruk'ajol ri Simón. Yey kojom chi pa ranima' ruma ritzel winaq kuk'ayij ri Jesús.
3Ek'u ri Jesús reta'am ya'tal ronoje puq'ab' ruma Ruqaw, yey Rire petinaq ruk' ri Dios y ruk' ri Dios katzelej wi. 4Na ruk' ta k'u ri', ri Jesús xyaktajik, xresaj ruq'u' uripom chirij, xuk'am jun twayo puq'ab' y xuxim chupa. 5Tek'uchiri' xuq'ej ya' pa jun k'olib'al, xujeq uch'ajik ri kaqan rutijo'n y kuchaqisaj ruk' ri twayo uximom chupa.
6Echiri' kujeq uch'ajik ri raqan ri Pedro, rire jewa' xub'i'ij che ri Jesús:
—Wajawal, ¿kach'aj kami la ri' ri waqan? —xcha'.
7Ri Jesús xuk'ul uwach:
—Wo'ora na kamaj ta usuk' sa' wa kintajin che u'anik; k'ate na k'u ri' kamaj usuk' —xcha'.
8Ek'u ri Pedro xub'i'ij che:
—Ri'in na kanya ta k'ana luwar che'la kach'aj la ri waqan —xcha'.
Ri Jesús xub'i'ij che:
—We na kanch'aj ta la' waqan, ri' na jinta chi awe wuk' ri'in —xcha'.
9Xub'i'ij k'u ri Pedro che:
—We e ri', Wajawal, na xew tane ri waqan kach'aj la; ch'aja ne la ri' ri nuq'ab' y ri nujolom —xcha'.
10Ri Jesús jewa' xub'i'ij che:
—E junoq k'ak' atininaq, xew kajawaxik kach'aji' ri raqan, ma ronoje rucuerpo ch'ajtal chik. Jek'ula' ri'ix chwach ri Dios ix chi ch'ajtalik, tob' na iwonoje taj —xcha'.
11Ri Jesús reta'am chik china ri kak'ayin re; e uwari'che xub'i'ij: “Na iwonoje taj ix ch'ajtalik.”
12Echiri' xuk'is uch'ajik ri kaqan rutijo'n, xurip tanchi ruq'u' chirij, xtz'uyi' tanchi chwa ri mexa y xutz'onoj chike:
—¿Kimaj usuk' sa' ke'elawi wa xin'an chiwe? 13Ri'ix kib'i'ij chwe: “Tijonel” y “Qajawal” y qatzij ri kib'i'ij, ma lik e u'anom ri'. 14We in k'u Itijonel ri' yey in Iwajawal y xinch'aj k'u li'waqan, jek'ula' ri' chi'ana ri'ix; chich'aja k'u li'waqan chiwach ri'ix chiwib'il iwib'. 15Ri'in xin'an wa' re k'utub'al chiwach, cha' ri'ix jela' ki'ano pacha' ri xin'an ri'in. 16Paqatzij wi kamb'i'ij chiwe: Na jinta juna aj chak más k'o uwach chwa ri rajaw, yey na jinta ne juna taqo'n más k'o uwach chwa ri taqayom lo re. 17We kimaj usuk' taq wa' y kitijoj iwib' che u'anik, nim iq'ij iwalaxik ri'.
18»Pero na kinch'a't ta piwi' iwonoje, ma ri'in weta'am china ri eb'enucha'om. Yey e ku'ana na ri tz'ib'ital kan pa Ruch'a'tem ri Dios, pa kub'i'ij wi:
E ri jun kawa' junam wuk',
e ri' ri yaktajinaq chwij. Sal. 41:9
19Kintajin k'u pan che ub'i'xikil chiwe wo'ora cha' echiri' ku'ana wa', ri'ix kikojo: “In Ri'in.” 20Paqatzij wi kamb'i'ij chiwe: China ri kak'uluw re ri kantaq b'i ri'in, e junam ruk' in ri kinuk'ulu; yey china k'u ri kak'uluw we ri'in, e kuk'ul ri Jun taqayom lo we —xcha'.
Ri Jesús kuq'alajisaj china ri kak'ayin re
(Mt. 26:20-25; Mr. 14:17-21; Lc. 22:21-23)
21Echiri' xuk'is ub'i'xikil wa', ri Jesús xok b'is chuk'u'x y jewa' xub'i'ij:
—Paqatzij wi kamb'i'ij chiwe: Jun chiwe ri'ix kinuk'ayij —xcha'.
22Ek'uchiri', rutijo'n xkijeq kakitzula' kiwach chikib'il kib' ma na keta'am taj china ri xub'i'ij. 23K'o k'u jun chike rutijo'n, wa' e ri lik k'ax kana' ruma ri Jesús, kawa'ik ja'l putzal Rire chwa ri mexa. 24Ek'u ri Simón Pedro xu'an pan uq'ab' che cha' kutz'onoj che ri Jesús china ri kub'i'ij. 25Y ri jun tijo'n ja'l putzal ri Jesús xutz'onoj k'u che:
—Wajawal, ¿china la' la kab'i'ij la? —xcha'.
26Ri Jesús xuk'ul uwach:
—Kanmu' juch'aqap pam y china k'u che kanya wi, e rire —xcha'.
Xumu' k'u juch'aqap pam y xuya che ri Judas aj Iscariot, ruk'ajol ri Simón. 27Echiri' ri Judas xuk'am ri pam, xok ri Satanás pa ranima'. Ek'u ri Jesús xub'i'ij che:
—Ri kawaj ka'ano, cha'ana la' ri' —xcha'.
28Yey na jinta junoq chike ri kewa' chwa ri mexa xumaj usuk' su'b'e xub'i'ij la' che. 29Ruma k'u puq'ab' ri Judas k'o wi ri b'olxa pa k'olotal wi ri kipuaq, jujun chike xkich'ob'o laj ri Jesús xub'i'ij che ku'loq'o tan ri kajawax chike re ri nimaq'ij, o laj k'o kujach chike ri nib'a'ib'. 30Ek'uchiri' ri Judas uk'amom chi ri pam, na jampatana xel b'i yey lik chaq'ab' chik.
Ri taqanik puwi ri rutzil k'u'xaj
31Echiri' elinaq chub'i ri Judas, ri Jesús xub'i'ij:
—Ek'u wo'ora kaq'alajin runimal uchomalil Ralaxel Chikixo'l Tikawex y ruk' Rire kaq'alajin wi runimal uchomalil ri Dios. 32Yey we Ralaxel Chikixo'l Tikawex kuq'alajisaj runimal uchomalil ri Dios, jek'uri'la' e ri Dios ri kaq'alajisan runimal uchomalil Ralaxel Chikixo'l Tikawex, yey wa' na kamayin ta che u'anik.
33»Ix walk'o'al, xa joq'otaj chi in k'o iwuk'. Ri'ix kinitzukuj na k'u ri'; pero e pacha' ri ximb'i'ij chike raj judi'ab', na jinta piq'ab' kix'ek chila' pa kin'ek wi ri'in.
34»Kanya wa jun k'ak' taqanik chiwe: E lik k'ax china'a iwib' chiwach. Jela' pacha' ri'in lik k'ax kixinna'o, jek'ula' lik k'ax china'a iwib' ri'ix chiwach. 35We lik k'u k'ax kina' iwib' chiwach, ruma wa' konoje ri winaq kaketa'maj ix nutijo'n —xcha'.
Ri Jesús kuq'alajisaj ri ku'an ri Pedro echiri' karewaj we reta'am uwach
(Mt. 26:31-35; Mr. 14:27-31; Lc. 22:31-34)
36Ri Simón Pedro xutz'onoj che ri Jesús:
—Wajawal, ¿pa k'u ke'ek wi la? —xcha'.
Ri Jesús xuk'ul uwach:
—E pa wa kin'ek wi ri'in, na ya'tal ta chawe kat-terej b'i chwij wo'ora; no'j kopon na k'u ruq'ijol echiri' katopon chila' pa kin'ek wi ri'in —xcha'.
37Ek'u ri Pedro xub'i'ij che:
—Wajawal, ¿su'chak na ya'tal ta chwe kinterej b'i chi'ij la wo'ora? Ma ri'in xa jumul kanya ne ri nuk'aslem pa kamik uma rilal —xcha'.
38Y ri Jesús xuk'ul uwach:
—¿Lik qatzij kawaj kaya awib' pa kamik wuma ri'in? Paqatzij wi kamb'i'ij chawe: Echiri' k'amaja' ne kab'ixon ri teren, ri'at oxlaj chik ab'i'im na aweta'am ta nuwach.
Селектирано:
Juan 13: acrN
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2009, Wycliffe Bible Translators, Inc. All rights reserved.