Juan 14
14
Ruma ri Jesús kojopon ruk' ri Dios
1»Lik mapax ik'u'x. E chikub'a' ik'u'x ruk' ri Dios y chikub'a' ik'u'x wuk' ri'in. 2Chila' pa k'o wi ri Nuqaw lik uk'iyal jeqleb'al k'olik. We ta na e ta u'anom, ri'in nub'i'im chi ri' chiwe. Ek'u wa' kin'ek cha' ki'nyijb'a' jun luwar iwe ri'ix. 3Yey we xin'ek k'ut y xyijb'itaj ri luwar iwe'ix, kink'un tanchik y kixo'lnuk'ama' cha' jela' pa kine'k'ola wi ri'in, ri'ix kixe'k'ola chila' wuk'. 4Ri'ix iweta'am pa kin'ek wi yey iweta'am ri b'e —xcha'.
5Xub'i'ij k'u ri Tomás che:
—Qajawal, ri'oj na qeta'am taj pa ke'ek wi la. ¿Sa' k'u u'anik ri' kaqeta'maj ri b'e? —xcha'.
6Ri Jesús xuk'ul uwach:
—In ri in B'e, in ri in Q'ijsaq yey in ri in K'aslemal. Na jinta junoq kopon ruk' ri Nuqaw we na wuma ta ri'in. 7We iweta'am nuwach ri'in, iweta'am uwach ri' ri Nuqaw. Chwi k'u ri' wo'ora kiweta'maj uwach, ma iwilom chi uwach —xcha'.
8Ek'u ri Felipe xub'i'ij che:
—Qajawal, k'utu la chiqawach ri Qaw la y kojkub'i' k'u ri' che —xcha'.
9Ri Jesús xuk'ul uwach:
—Felipe, uk'iyal q'ij chi wa' k'ut e la' in k'o iwuk', ¿yey k'amaja' kaweta'maj nuwach? Ma china ri eta'mayom nuwach ri'in, ri' e rilom uwach ri Nuqaw. ¿Su'chak k'u ri' katz'onoj chwe kank'ut ri Nuqaw chiwach? 10Ri'in ruk' ri Nuqaw y Rire wuk' ri'in, xa oj jun. ¿Na kakoj ta kami ri' wa'? E janipa wa kamb'i'ij chiwe, na xa ta pa we ri'in kamb'i'ij ma ri nuch'a'tem e re ri Nuqaw ri jeqel wuk', yey Rire ku'an ruchak wuma ri'in. 11Chikojo k'u wa kamb'i'ij chiwe: Ri'in ruk' ri Nuqaw y Rire wuk' ri'in, xa oj jun. We na kikoj ta k'u wa' ruma ri nuch'a'tem, e chikojo ruma ri chak nu'anom.
12»Paqatzij wi kamb'i'ij chiwe: China ri kakub'i' uk'u'x wuk' ri'in, ri' ku'an ne ri chak jela' pacha' ri kan'an ri'in; y más ne nimaq taq chak ri ku'ano, ma e ri'in kin'ek pa k'o wi ri Nuqaw. 13Ronoje k'u ri kitz'onoj ri'ix che ri Nuqaw pa ri nub'i', ri'in kan'ano cha' jela' runimal uchomalil ri Dios kaq'alajin ruma Ruk'ajol. 14Ronoje k'u ri' ri kitz'onoj ri'ix pa ri nub'i', ri'in kan'ano.
Ri Jesús kach'a't chwi ruk'unib'al ri Ruxlab'ixel ri Dios
15»We ri'ix k'ax kinina'o, e lik chi'ana janipa ri kixintaq che u'anik. 16Yey ri'in e kantz'onoj che ri Nuqaw cha' kutaq chi lo jun chik To'b'el iwe re kunimarisaj ik'u'x; y asu kak'oji' iwuk' na jinta utaqexik. 17Wa' e ri Uxlab'ixel re ri Q'ijsaq. Taq ri winaq na utz taj kakik'ulu, ma na kakil ta uwach y na keta'am tane uwach. No'j ri'ix iweta'am uwach, ma Rire k'o chixo'lib'al y ko'lk'ola piwanima'.
18»Ri'in na kixinwoq'otaj ta kanoq, ma kintzelej lo iwuk'. 19Na naj ta chi k'u ri', ri winaq na kakil ta chi nuwach; no'j ri'ix kiwil tanchi nuwach. Ruma k'u ri'in kink'astaj lo chikixo'l ri ekaminaq, jenela' ri'ix kixk'astajik. 20Chupa k'u ri' la' la q'ij ri'ix kiweta'maj: Ri'in ruk' ri Nuqaw xa oj jun, yey ri'ix xa jun i'anom wuk' ri'in y ri'in xa jun nu'anom iwuk' ri'ix. 21China k'u ri uk'ulum ri nutaqanik y ku'an k'u janipa ri kamb'i'ij che, ri' lik k'ax kinuna'o. Y china ri k'ax kana'w we ri'in, k'ax kana' ruma ri Nuqaw. Yey ri'in lik k'ax kanna'o y kanq'alajisaj che, in china ri'in —xcha'.
22Ri Judas (na e ta ri aj Iscariot) xub'i'ij:
—Qajawal, ¿su'b'e kaq'alajisaj la chiqawach ri'oj china rilal yey chikiwach ri winaq na ka'an ta la wa'? —xcha'.
23Ri Jesús xuk'ul uwach:
—China ri k'ax kinuna' ri'in, e ku'an janipa ri kamb'i'ij che. Ek'u ri Nuqaw k'ax kuna' rire, yey ri Nuqaw y ri'in kojo'ljeqela ruk'. 24China k'u ri na k'ax ta kinuna'o, ri' na kutaqej ta janipa ri kamb'i'ij che. Wa tzij kixtajin che utayik, na xa ta we'in, e re ri Nuqaw, ri xtaqaw lo we'in.
25»Ronoje wa' kintajin che ub'i'xik chiwe xaloq' k'a in k'o iwuk'. 26Yey echiri' kin'ek, ri Nuqaw kutaq lo ri jun To'b'el pa ri nub'i' re kub'ochi'ij ik'u'x, wa' e ri Santowilaj Ruxlab'ixel ri Dios. Echiri' kak'un Rire, kuk'ut ronoje chiwach y kukuxtaj k'u chiwe janipa ri nub'i'im ri'in chiwe.
27»Ri utzil chomal k'o wuk' ri'in, kanya kan chiwe. Yey wa' wa utzil chomal kanya ri'in chiwe na xa ta jela' pacha' ri kakiya taq ri winaq. Mapax k'u ik'u'x y mixi'ij iwib'.
28»Itom chi k'u ri nub'i'im chiwe: “Kin'ek yey kintzelej tanchi lo iwuk'.” We e la' qatzij lik k'ax kinina'o, xixki'kot tane k'u ri' che echiri' xito kin'ek ruk' ri Nuqaw, ma Rire más k'o uwach chinuwa ri'in.
29»Kannab'esaj pan ub'i'xik wa' chiwe cha' echiri' ku'ana', kikoj k'u ri'. 30Na naj ta chi k'ut kinch'a't iwuk'; ma ya kak'un lo ritzel winaq, ri jun kataqan che ruwachulew, tob' na jinta ne puq'ab' rire kataqan panuwi ri'in. 31Na ruk' ta k'u ri', kan'ano janipa ri kinutaq ri Nuqaw che u'anik, cha' jela' ri winaq che ruwachulew kaketa'maj ri'in lik k'ax kanna' ri Nuqaw.
»Chixyaktajoq; jo', chojel b'i wara.
Селектирано:
Juan 14: acrN
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2009, Wycliffe Bible Translators, Inc. All rights reserved.