CAKACAKA 24
24
Sa qai muri Paula ko ira na Jiu ki Sisaria, me ra beitaki koya, a sa tukuna ko koya na nonai valavala kei na nonai vakavuvuli, 1—21. Sa qai vunau ko Paula, a sa sautaninini kina ko Filikesa, ia sa sega ga ni vakabauta, 22—27.
1Sa bogi lima sa qai lako sobu ko Ananaiasa na bete levu kei ira na qase, ka dua na tamata sa vuku e na vosa, ko Teritulu, era sa beitaki Paula vua na turaga. 2Ia ni sa kacivi mai ko koya, sa vakatekivu ko Teritulu me beitaka, ka kaya, Keitou sa vakacegu vakalevu e na vukumuni, a sa yaco me vinaka na matanitu oqo e na nomuni lewa vakavuku, 3keitou sa vakavinavinaka kina e na veisiga kecega kei na veiyasana kecega, I Filikesa vakaturaga sara, ni keitou sa rekitaka. 4Ia de balavu walega vei kemuni na noqu vosa, au masuti kemuni mo ni yalovinaka mo ni rogoci keitou mada vakalailai. 5Ni keitou sa kunea na tamata la oqo e dauveivakacalai, a sa dauvakatubu ca ko koya vei ira kecega na Jiu e vuravura, a sa liu vei ira nai tokani ni kai Nasareci: 6ka sa ia me vakacacana talega na vale ni soro; ka keitou a taura, ka via lewa me vaka na neitou vunau. 7Ia ko Laisiasa na turaga levu ni valu sa lako vakaukauwa mai, ka kaliraka mai na liga i keitou, 8a sa vosa vei ira era sa beitaki koya me ra lako mai vei kemuni: ia ni kemuni sa tarogi koya, ko ni na kila rawa na ka kecega keitou sa beitaka vua. 9A ra sa vakadinadina ko ira na Jiu, ka kaya sa dina na veika oqo.
10Ia ni sa deguvacu na turaga vei Paula me vosa, sa qai kaya ko koya, Ni’u sa kila sa vuqa na yabaki ko ni sa turaga ni lewa kina e na vanua oqo, au sa vinakata vakalevu me’u tukuni au: 11O ni sa kila, sa qai oti walega e tinikarua na bogi ni ka’u a lako cake kina ki Jerusalemi me’u lotu. 12A ra sa sega ni kunei au ni keirau sa veileti kaya e dua e na vale ni soro, se ni’u sa vakatubu ca vei ira na lewe vuqa, sa sega ga e na veivale ni lotu, se e na koro; 13a ra sa sega talega ni vakatakila rawa ni sa dina na veika era sa beitaki au kina. 14Ia na ka oqo ka’u sa vakatusa vei kemuni, ai valavala era sa vakatoka mei vakavuvuli vakatani, au sa lotu vakakina vua na nodra Kalou na noqu qase, ka vakadinata na ka kecega sa volai e na vunau kei ira na parofita: 15ia ka’u sa vakanuinui vua na Kalou, ni na tu cake tale ko ira na mate, ko ira na yalododonu kei ira na sega ni yalododonu, o koya era sa nuitaka talega ko ira. 16Ia na ka oqo ka’u sa gumatua kina, me kakua e dua na siga e cala kina na lewa-ni-lomaqu vua na Kalou, se vei ira na tamata. 17Ia ni sa oti e vuqa na yabaki, ka’u a lako mai me’u kauta na ka-ni-loloma ki na noqu vanua, kei nai madrali eso. 18Ia ka so na Jiu mai Esia era sa kunei au ni’u sa vakasavasavataki e na vale ni soro, ia keitou sa sega ni lewe vuqa, se keitou ue. 19E dodonu talega me ra mai tu e matamuni eke, ka tukuna, kevaka era sa kila e dua na ka ca vei au. 20Se me ra tukuna ko ira oqo, kevaka era sa kunea e dua na ka ca vei au, ni’u sa tu e na matadra na mataveilewai, 21e na vuku ga ni vosa e dua bauga sa vakaoqo, ni’u sa tu e na kedra maliwa, ka kaci, E na vuku ni nodra tu cake tale na mate dou sa qai tarogi au kina e na siga oqo.
22Ia ni sa rogoca na veika oqo ko Filikesa, a sa kila vinaka na Lotu, sa vakasukai ira, a sa kaya, Ni sa lako sobu mai ko Laisiasa na turaga levu ni valu, ka’u na qai lewa na ka dou sa veiletitaka. 23A sa vosa ko koya vua e dua na turaga ni valu me vakatawai Paula, me laiva ga me lako voli, ka me kakua ni vakatatabuya e dua na wekana sa qaravi koya, se lako mai vua.
24Ia sa bogi vica, sa lako mai ko Filikesa kei na watina ko Tarusila, na yalewa ni Jutia, ka sa talaki me lako mai ko Paula, ka sa vakarogoci koya ni sa vosataka na vakabauti Karisito Jisu. 25Ia ni sa vunautaka tiko ko koya nai valavala dodonu, nai valavala malua, kei na veilewai sa bera mai, sa sautaninini ko Filikesa, ka kaya, Lako tani mada edaidai; ia ni’u sa lalaga e na dua na gauna, ka’u na kacivi iko mai. 26Sa nuitaka talega ni na soli lavo vua ko Paula: o koya oqo sa talakitaki vakavuqa kina, me rau veivosaki kaya. 27Ia ni sa oti e rua na yabaki, sa lako mai ko Porisiu Fesito mei sosomi kei Filikesa: ka ni sa vinakata ko Filikesa me vakayalovinakataki ira na Jiu vua, sa biuti Paula me vesu tu ga.
Селектирано:
CAKACAKA 24: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific