CAKACAKA 23
23
Ni sa tukuni koya tiko ko Paula, sa kaya na bete levu me ra tavia na gusuna, 1—5. Sa veiletitaki koya ko ira na nona meca, 6—11. Sa buki kena vere ko ira na Jiu, me ra vakamatea, a sa vakabulai koya na turaga ni valu, a sa tala nai valu me ra kauta ki Sisaria vei Filikesa, 12—35.
1A sa vakaraici ira matua na mataveilewai ko Paula, ka kaya, Oi kemuni na veiwekani, au sa muria tiko ka yacova na siga oqo na ka ka’u a nanuma sa dodonu e na mata ni Kalou. 2A sa kaya ko Ananaiasa na bete levu vei ira sa tu voleka vua me ra tavia na gusuna. 3Sa qai kaya vua ko Paula, Ena tavi iko na Kalou, ko iko na lalaga sa boro vulavula: ko sa tiko beka mo lewai au me vaka na vunau, ka sa kaya me’u tavi, ia ka sa sega ni vaka na vunau? 4Sa qai taroga ko ira sa tu voleka, O sa vosavakacacataka li na bete levu ni Kalou? 5Sa qai kaya ko Paula, Au sa sega ni kila, koi kemuni na veiwekani, ni sa bete levu ko koya: ni sa volai, Mo kakua ni vosavakacacataki koya sa lewai ira na kai nomu.
6Ia ni sa kunea ko Paula ni sai tokani i Setoki eso vei ira, ka so tale era Farisi, sa kaci ko koya e na matadra na mataveilewai, Oi kemuni na veiwekani koi au na Farisi, a luve ni Farisi: e na vuku ni’u sa vakadinata ni na tu cake tale na mate ka’u sa tarogi kina. 7Ia ni sa vosa oti vakaoqo ko koya, sa tubu na veileti vei ira na Farisi, kei ira nai tokani i Setoki; a sa tawase rua kina na lewe vuqa. 8Ni sa daukaya ko ira nai tokani i Setoki sa sega na tu cake tale mai na mate, se agilose, se yalo; a sa daukaya ko ira na Farisi sa dina ruarua. 9A sa levu na qoqolou, a sa qai tu cake ko ira na vunivola era nodrai tokani na Farisi; a ra sa gumatua, ka kaya, Keitou sa sega ni kunea e dua na ka ca vua na tamata oqo; ia ka vakaevei kevaka sa vosa vua e dua na agilose se na yalo? 10Ni sa qai tubu na veileti levu, sa rere na turaga levu ni valu, de ra basuraki Paula, a sa vosa vei ira na sotia, me ra lako sobu me ra kaliraka vakaukauwa maivei ira, ka me ra kauta ki na bure ni valu.
11Ia e na bogi sa muri sa tu voleka vua ko koya na Turaga, ka kaya, Mo vakacegu ga, Paula: ni sa kilikili mo tukuni au mai Roma talega, me vaka ko sa tukuni au e Jerusalemi.
12Ia ni sa siga mai, sa buki vere ko ira na Jiu eso, a ra sa veivakadreti e na bubului, ka kaya me ra kakua ni kana se gunu me rawa mada na nodra vakamatei Paula. 13A ra sa lewe vasagavulu ka mani vakacaca era sa bukia na vere oqo. 14A ra sa lako mai vei ira na bete levu kei ira na qase, ka kaya, Keitou sa veivakadreti e na bubului levu, me keitou kakua ni kania e dua na ka, me sa rawa mada na neitou vakamatei Paula: 15ia koi kemudou kei ira talega na mataveilewai, dou tukuna vua na turaga levu ni valu me kauti koya sobu mai vei kemudou, me vaka dou sa via taroga vakadodonu e na vukuna: ia koi keitou, ni sa bera ni yaco ko koya, keitou sa vakarau tu me vakamatea.
16Ia sa rogoca na vere oqo na luvena-tagane na gane i Paula, ka sa lako ka curu ki na bure ni valu, ka tukuna vei Paula. 17Sa qai kaciva e dua vei ira na turaga ni valu ko Paula, ka kaya, Kauta na cauravou oqo vua na turaga levu ni valu; sa dua na ka sa tu vua me tukuna vei koya. 18Sa qai kauta me rau lako vua na turaga levu ni valu, a sa kaya, Sa kacivi au ko Paula na tamata ka vesu tu, ka kaya me’u kauta mai vei iko na cauravou oqo, ni sa dua na ka sa tu vua me tukuna vei iko. 19Sa qai taura na ligana na turaga levu ni valu, a rau sa lako vakatikitiki vakai rau; a sa taroga, A cava beka na ka sa tu vei iko ko sa via tukuna vei au? 20Sa qai kaya ko koya, Sa lomavata ko ira na Jiu me ra masuti iko mo kauti Paula sobu e na mataka vei ira na mataveilewai, me vaka ko sa via taroga vakadodonu eso na ka e na vukuna; 21ia mo kakua ni vakarogoca na nodra vakamamasu; ni ra sa le vasagavulu ka mani vakacaca era sa lawavaka, a ra sa veivakadreti vakai ira e na bubului, me ra kakua ni kana se gunu me ra vakamatei koya mada eliu: a ra sa qai vakarau tu, a ra sa waraka ga mo yalata vei ira. 22Sa qai vakalaiva na cauravou na turaga levu ni valu me lako yani, a sa vakarota, Mo kakua ni tukuna vua e dua ni ko sa mai vakatakila vei au na ka oqo.
23A sa kacivi rau e lewe rua na turaga ni valu ko koya, ka kaya, Vakarautaka na sotia e lewe rua na drau, kei na tamata e le vitusagavulu era vodo ose, kei na tamata e le rua na drau sa vakaiyaragi e na moto, me ra lako ki Sisaria e nai katolu ni tiki ni bogi; 24ka vakarautaka talega eso na ose, me vodo kina ko Paula, me kau vakavinaka ki Sisaria vei Filikesa na kovana. 25A sa vola nai vola ko koya ka vakaoqo:
26Koi au ko Kilotiu Laisiasa vua na turaga vinaka sara ko Filikesa, sa loloma! 27A tamata oqo era a taura na Jiu, a sa voleka ni ra vakamatea; au sa qai kauti ira na sotia, ka vakabulai koya, ni ka’u sa kila e kai Roma ko koya. 28Ia ni’u sa via kila se cava era sa beitaki koya kina, au sa kauta ki na nodra mataveilewai: 29ia ka’u sa kunea ni sa beitaki ko koya e na ka eso e veiletitaki e na nodra vunau, ia ka sega na ka sa beitaki vua sa dodonu me mate kina se me vesu. 30Ia ni sa tukuni mai vei au era sa lawavaki koya ko ira na Jiu, au sa vakariri me’u vakatala yani vei iko au sa vosa talega vei ira era beitaka me ra tukuna e matamu na veika sa beitaki kina ko koya. Sa loloma.
31Sa qai kauti Paula ko ira na sotia, me vaka sa vakaroti vei ira, a ra sa kauta e na bogi ki Adipatiri. 32Ia e na mataka era sa biuti ira sa vodo ose me ra lako vata kaya, a ra sa lesu tale ki na bure ni valu. 33Ia ni sa yaco ki Sisaria ko ira oqori, era sa solia nai vola vua na turaga, ka vakaraitaki Paula talega vua: 34ia ni sa wilika oti na turaga, sa taroga se ko cei na nona vanua. Ni sa qai kila sa kai Silisia, 35sa kaya Au na rogoci iko, ni ra sa yaco mai ko ira era sa beitaki iko. A sa vakarota me vakatawai e na vale ni veilewai nei Eroti.
Селектирано:
CAKACAKA 23: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific