Lc 16
16
Qodaloqotenaĝana ñe'me namaĝajec jo'ne ja 'noe'n daa'me 'lonataqa
1Jesús nach'e ena'am 'yaĝatema da'me dojo' jogaa'me lapaĝaguenataqa: “'Uo joca'li ñe'me jiyaĝaua neuoyaq jo'ne 'uo ñe'me lamaĝajec jo'ne yelolegue da'me leuoyaĝac; qama'le qo'yaĝatem joca'li ñe'me nadipa: «Ñe'me adamaĝajec ch'e ye'uetac yema ga'me adeuoyaĝac.» 2Chane'eja joñe'me neuoyaq 'me ladipa yiyaĝana ca'li ñe'me lamaĝajec qama'le enapega: «¿Jach'e da'me dojo' aua'uo 'me jayem qo'yaĝatem? Nayi jayem aualoĝona ga'me at'onatac, qa'a ja auaqanatet ta'le oquetalegue da'me auelolegue ga'me yeuoyaĝac.» 3Ñe'me namaĝajec ya'uo da'me lelnataĝac: «¿Jach'e jogamaĝa ja'uo nayi, queda'me jayem yepoleguet da'me qaya'te 'yonatac ñe'me yadipa? Qaya'te 'yañaĝac ta'le jo'onataĝalegue jena'me aleua, nataq'aen jepocoĝolegue ta'le jiyaĝanaque jaga'me ñachetaqate. 4Male jayaten da'me ja'uo nayi, qaedi maqachaĝa uo'oe gaa'me jayem yeloteguet qomle, qom male ja jelolegue da'me neuoyaĝac.» 5Chane'eja onolqa'tape yiyaĝanalo gaa'me jo'ne maliaĝa ja yejete'n ñe'me ladipa jo'ne neuoyaq. Yenat ga'me 'uaechiñe: «¿Jach'e ga'me eeta ga'me maliaĝa ja auejetenec ñe'me yadipa?» 6Joga'me 'yateguet: «Maliaĝa ñep'ia ga'me cien lete' ga'me li'i jaga'me olivo jala.» Ñe'me yelolegue da'me neuoyaĝac enaac: «Janjo' jana'me anep'iayaĝalate: paja'a oñiyiñe, auedelegue qama'le auachalegue ga'me cincuenta.» 7Yem qama'le yenat ga'me laqaya: «Da'me am, ¿jach'e ga'me eeta jaga'me anep'ia?» Joga'me 'yateguet: «Tachi'ña da'me cien ga'me naponaqa ga'me trigo.» Enapega joga'me: «Janjo' jana'me anep'iayaĝalate: aua'uo ga'me laqaya jo'ne ochenta.» 8Qama'le ñe'me nadipa yi'yoĝoden ñe'me lamaĝajec jo'ne ja chimaqachiñe ga'me 'lonatac queda'me ja naqala'te da'me mach'e yauo'oe ga'me 'ye't. Qa'a qom jouaĝat da'me mach'e leuoyaĝac, jogaa'me jo'ne yema'alo gaa'me uetedalegue jena'me aleua nayi yataqachiñe ja naqalataĝayaqa, ja ena'ama gaa'me jo'ne uetedaue da'me yoqochiñe.
9“Chane'eja nayi ami ja'aĝatema queda'me 'noota ta'le a'uonataĝañiya ga'me neuoyaĝaco jo'ne ja chimadichiñe jena'me aleua da'me anaviquila'ajalo gaa'me anaigaĝa'udi', qaedi qom loiquiaqa' da'me neuoyaĝaco qama'le ñe'me jo'ne ladipa gaa'me 'nachaqa'te jo'ne ja 'naidena'alo nach'e ena'am ami yaconegueta.
10“Joñe'me jo'ne yelo'tegue ga'me jaleca jo'ne qoyanem, nach'e ena'am yayateta da'me yelo'tegue ga'me jalcote; nataq'aen ñe'me jo'ne ja 'nonaĝachigui ga'me jaleca, nach'e ena'am ga'me jalcote. 11Chane'eja, qom ja a'nonaĝachita da'me aueloyilegue da'me dojo' ja 'noe'n neuoyaĝaco jena'me aleua, qama'le ¿jach'e jogamaĝa ami yepataĝaeta gaa'me chimadichidiñe neuoyaĝaco? 12Nataq'aen qom ja aviyamaĝachiyac ga'me ja adoĝochi, qama'le ¿jach'e jogamaĝa ami yanema ga'me mach'e adoĝochi?
13“Qaya'te nelatac ta'le en dos gaa'me ladi'p; qa'a yañoĝot da'me niquiya'a ga'me onolec mate mane'e noqopita ga'me laqaya, nataq'aen yoqo'cha ga'me onolec qama'te 'yotan ga'me laqaya. Qama'le nach'e ena'am da'me ami: ja qoyaqanatet ta'le qot'onataĝaneuo'o ñe'me Dios choqodaa'me neuoyaĝaco.”
Jesús yachimaqachiñe da'me Dios lamaĝajoĝonaĝaco
14Jogaa'me fariseopi jo'ne nach'egaua naequetedapegue' jana'me laicaua domachita yema da'me dojo' qama'le ye'uetedac ñe'me Jesús. 15Qo'che' Jesús enapegalo jogaa'me: “Ami jo'ne aueñetapela't yataqata ami chimadichidiñe nale auajoyiya'agueta ga'me jiyaĝadipi, qalaĝaja Dios yayaten queda'me yataqachiñe ja 'noe'n naa'me adai'lidi'; qa'a ga'me yi'yoĝodetedac jena'me jiyaĝadipi, nach'ega 'yotan joñe'me Dios.
16“Daa'me nedii's jo'ne lamaĝajoĝonaĝaco ñe'me Dios nataq'aen 'laqataĝanaĝa'j dia'me 'laqataĝanaĝanaqa qo'yaĝatetac chayovida'a ca'li novi' di'me Juan. Qalaĝaja nayi chiyoqotelegue di'me Juan da'me qo'yaĝatetac da'me 'naqataĝanaĝac jo'ne onaĝaic 'me 'yaĝatetac da'me lejaliaĝa ñe'me Dios, qama'le ena'uaque 'nañaĝate'tape qaedi tadoue joda'me. 17Qalaĝaja da'me jo'ne ja qalaq yem qomle di'me piyem nataq'aen jena'me aleua; dojo' yataqachiñe qalaq, ta'le ja yepaquetelegue ga'me onolec nediijec jodaa'me Dios lamaĝajoĝonaĝaco.
18“Qom 'uo ga'me jiyaĝaua yeguem jaga'me loua, nataq'aen 'uoneguet jaga'me yauo laqaya, qama'le yenoĝon da'me jo'ne qoyiyamaĝatetac 'me 'lonaĝac jaga'me 'uaeñe loua. Nataq'aen ñe'me jo'ne en loua jaga'me qoyeguem, nach'e ena'am yenoĝon da'me jo'ne qoyiyamaĝatetac 'me 'lonaĝac jaga'me.
Da'me qodaloqotenaĝana ñe'me neuoyaq nataq'aen ñe'me choĝodaq 'me Lázaro
19“'Uo ñe'me jiyaĝaua neuoyaq, jo'ne yaidiñe nale gaa'me leuo 'me onaĝayaqa nataq'aen 'yoĝodache, nataq'aen nalochiguilo naa'me noloqo'ote da'me ya'uo ga'me liqui'yaĝanataĝanaĝac jo'ne 'uo da'me li'yoĝodic. 20Nach'e ena'am 'uo ñe'me choĝodaq lenaĝat Lázaro, jo'ne yataqachiñe yemaye da'me dola ga'me lo'oc, qama'le qoyachetaue jena'me aleua ga'me najom ñe'me neuoyaq. 21Ñejo' jiyaĝaua jetaque yanotec nale ga'me 'liyoĝot jo'ne yeguem ñe'me neuoyaq. Qalaĝaja chayovida'alo gaa'me pi'o yec'adeta da'me 'yole'j ga'me 'laltaqatel jena'me lo'oc.
22“'Uo jo'me nolo' ca'li Lázaro male yeleu, qama'le jogaa'me piyem laje' navidijeguem qaedi ue'tajop joñe'me Abraham. Ñe'me neuoyaq nach'e ena'am yeleu, qama'le qoyijeñi. 23Qama'le ca'li yeme'eguet da'me lachoĝodec ñe'me neuoyaq da'me ue'ta ga'me napa'lpi 'lachaqa', qama'le neuayaĝajeguem da'me lec'atenaĝanaĝac qama'le ja jote'ta da'me yela'a ñe'me Abraham, nataq'aen Lázaro ue'tajop joñe'me. 24Chane'eja 'nalaĝajeguem: «¡Abraham, jayem avichoĝoden! Anamaĝaquena ñe'me Lázaro da'me yipichiñgui ga'me noĝop na'me liaĝata lejenec qaedi yipet jena'me yachaĝat, qa'a 'uo da'me yachoĝodec jena'me joue'ta jo'ne dole' 'lachaqa'.» 25Qalaĝaja Abraham 'yateguet: «Am yalec, anetouetac queda'me ca'li cha'li ouetaue da'me anejiyaĝauayaĝac qama'le 'uo da'me adiyamaĝac 'me adamaic, qalaĝaja Lázaro 'uo da'me lachoĝodec da'me 'loyaĝac. Qama'te nayi ñe'me yaconeguet da'me nichoĝodenataguec jena'me jenjo', am qamqa'me auaconeguet da'me adachoĝodec. 26Choqoda'me uoja'eda, 'uo di'me uañe laeñi da'me qo'mi nataq'aen jo'ne yataqata qaya'ñgui; qama'le qo'mi da'me jouaqa'ta jenjo' qaya'te yaqanatet ta'le dajoyi na'me naja', nataq'aen ami da'me ovi'ta na'me naja' qaya'te yaqanatet ta'le najoequena.»
27“Ñe'me neuoyaq enaac: «Chane'eja am ñachoĝodenot, Abraham, qaedi auamaĝague ñe'me Lázaro ga'me 'lachaqa' ga'me taĝadena', 28jo'ne ueteda'a gaa'me cinco yanoqolqa, da'me uaqatalo gaa'me qaedi ja nach'e ena'ama nec'adeta jenjo' joue'ta jo'ne nachoĝodaqa'.» 29Qalaĝaja Abraham 'yateguet: «Jogaa'me joote uetauelo gaa'me ledii's di'me Moisés nataq'aen dia'me Dios 'laqataĝanaĝanaqa: ¡'noota qom yoqocha'alo!» 30Qama'le ñe'me neuoyaq 'yateguet: «Eja, Abraham, qalaĝaja qom 'uo ga'me yeleu jo'ne 'niyelaĝajeguem nataq'aen naloĝonegueta, qama'le jogaa'me 'niyelaĝadetot qom'te joñe'me Dios.» 31Qalaĝaja Abraham enaac: «Qom ja jetaque yoqochideta di'me Moisés nataq'aen Dios 'laqataĝanaĝanaqa, qama'le ¿teua'atoqo' 'yamaqaten qom 'uo gamachaqaega yeleu jo'ne 'niyelaĝajeguem?»”
Селектирано:
Lc 16: TSN
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Nuevo Testament Toba del Oeste © 2010 Sociedad Bíblica Argentina