लूका 9
9
बारा खास चेला नै सेवकाइ खातर घाल्या
(मत्ती 10:5-15; मरकुस 6:7-13)
1एक दिन यीसू आपगै बारा चेला नै बुला'गे बानै लोगां गी सारी बीमारियां नै ठीक करण अर ओपरियां काडण गी सामरथ अर हक दियो। 2अर बानै परमेसर गै आण आळै राज गो परचार अर बीमारां नै चंगा करण खातर घाल दिया। 3अर बानै केयो, “सारा खाली हात जाईयो रा गै खातर लाठी, झोळी, रोटी, पीसा, अर ना दो दो कुड़ता लेईयो अर झिकै गाम में थे जाओ, 4बठै किंगै एक गै ई घरे रेईयो अर बिं घर माऊं विदा होईयो।” 5जठै थानै लोग आदर मान ना करै बिं जिग्यां थारी करणी थारै सागै है, केगे आपगै पगां गी धूड़ झड़का देईयो। 6इंया बे गाम गाम में लोगां नै ठीक करता अर सुब समाचार बतावंता हा।
हेरोदेस गी उळझण
(मत्ती 14:1-12; मरकुस 6:14-29)
7बिं देस गै चोथै हिसै गो राजा हेरोदेस यीसू गै बारै में सुणगे घबरा'ग्यो क्यूंकै लोग केण लागग्या यूहना मरगे पाछो जीग्यो। 8कोई केवै कै एलियाह परमेसर गी बात बताण आळो परगट हो'ग्यो अर कणैई केयो, “पुराणै जुग गो कोई परमेसर गी बात बताण आळो जीग्यो है।” 9पण हेरोदेस केयो कै, “यूहना गो तो मैं सिर कटवा दियो, फेर ओ कुण है? बिंगै बारै में ऐ बातां सुणन लागरयो हूं?” बण यीसू नै देखण गी इच्छा करी।
पांच हजार आदमियां नै जिमाणो
(मत्ती 14:13-21; मरकुस 6:30-44)
10फेर बे बारा चेला झिको बां करयो बिंगो लेखो जोखो पाछा आ'गे यीसू नै बतायो अर यीसू बानै न्यारा कर'गे बेतसैदा नगर में लेग्या। 11पण भीड़ नै ठा लागग्यो तो बा सागै ई चाल पड़ी यीसू बानै परमेसर गै राज गी बातां बताई अर बीमारां नै ठीक करया। 12जद आथण होण लागी तो चेला आ'गे यीसू नै केयो, “आनै जाण दैयो तो ऐ कठैई जा'गे आपगो आसरो ढूंढै'गे रोटी-पाणी गो जूगाड़ करै, क्यूंकै आपां तो सुनसान जिग्यां में हां।” बा भीड़ लगभग पांच हजार ही। 13बण बानै केयो, “थे ई आनै कीं खाण नै देवो।” बां केयो, “म्हारै कनै तो पांच रोटी अर दो मछलियां गै सिवा ओर कीं कोनी, थे इंया तो कोनी चावो के म्हे नगर में जांवा अर आंगै खातर रोटी मोल लेगे आवां।” 14जद यीसू चेला नै केयो, “आनै सारा नै पचास पचास कर'गे लेण में बिठा दैयो।” 15बां सारा नै लेण में बिठा दिया। 16अर यीसू बे रोटी अर मछली लेगे सुरग कानी परमेसर गो धन्यवाद करयो अर तोड़ तोड़गे चेला नै देण लागग्या अर चेला लोगां नै परोसण लागग्या। 17लोगां धाप धाप'गे रोटी खाई अर बाकी बचेड़ी रोटियां गा बारा टोकरा भरिजग्या।
पतरस यीसू नै मसी मान्यो
(मत्ती 16:13-20; मरकुस 8:27-30)
18इंया होयो कै जद यीसू एकान्त जिग्यां में चेला सागै पराथना करण लागरया जद बण चेला नै पूछयो, “लोग मनै के केवै?” 19बां केयो, “केई लोग केवै यूहना बतिस्मो देण आळो, केई केवै एलियाह अर केई केवै पुराणै टेम गो परमेसर गी बात बताण आळो पैदा हो'ग्यो।” 20बण बानै पूछयो, “थे मनै के मानो।” पतरस बोल्यो, “परमेसर गो भेजेड़ो मसी।” 21यीसू बानै चेतागे केयो, “आ बात किनैई ना बताईयो।”
यीसू आपगी मोत गै बारै में बात कैई
(मत्ती 16:21-23; मरकुस 8:31-33)
22फेर बण केयो, “मिनख गै बेटै नै ओ जरूरी है कै बो भोत ब्यादियां में पड़ै अर बुजरग अर मुख्य याजक अर सासतरी बिनै ओछो जाणगे मार दैयगा अर बो तीसरै दिन जीज्यैगो।”
यीसू गै लारै चालणै गो मतलब
(मत्ती 16:24-28; मरकुस 8:34–9:1)
23बण सारा नै केयो, “जे मेरै लारै आणो चावै बो अपणै आपनै भूलज्यै अर आपगो करूस लेगे मेरै लारै हो'ज्यै, 24झिको आदमी आपगा प्राण मेरै खातर संसार में खो देवैगो बो सुरगा में पा'ल्यैगो। अर झिको आपगै खातर आपगा प्राण संसार में बचावैगो बो सुरग में खो देवैगो। 25फेर बण केयो, ‘जे आदमी सारै संसार गो राज लेण खातर आपगा प्राण खो'दैय तो बिनै के मिलै?’ 26जे कोई आदमी मनै अर मेरी बातां नै मानण ऊं सरमावैगो तो मिनख गो बेटो आपगी मेमा में अर आपगै पिता अर पवितर सुरगदूतां गी मेमा में धरती पर आवैगो बानै बी लेण ऊं सरमावैगो। 27पण मैं थानै साची केऊं, अठै केई हिस्या बी है झिका मरण ऊं पेली परमेसर गो राज देखैगा।”
यीसू गो रूप बदळग्यो
(मत्ती 17:1-8; मरकुस 9:2-8)
28आं बातां गै आठ दिन बाद में यीसू, पतरस, यूहना अर याकूब नै सागै लेगे प्हाड़ पर पराथना करण गेयो। 29जद यीसू पराथना करण लागरयो तो बिंगै चेहरै गो रूप बदळग्यो अर बिंगा कपड़ा दूध बरगा धोळा हो'ग्या अर चमकण लागग्या। 30अर बिंगै सागै दो आदमी मूसा नबी अर एलियाह परमेसर गी बात बोलण आळा बातां करण लागरया। 31बे आपगी मेमा गै सागै दिखै हा अर यरुसलेम में बिंगै मरणै गी बात करण लागरया। 32पतरस अर बिंगा साथी नींद में हा। जद पतरस जाग्यो तो बांनै मेमा में दोनां नै यीसू सागै खड़या देख्या। 33जद बे दोनूं बांगै कनूं जाण लाग्या तो पतरस बोल्यो, “हे स्वामी, आपणो अठै रेणो ठीक है म्हे अठै तीन मण्डप बणावांगा एक मूसा गो, एक थारो अर एक एलियाह गो।” पतरस नै ठा कोनी हो बो बिं टेम के केण लागरयो है। 34जद पतरस आ बात करण लागरयो तो काळी घटा बानै घेर लिया। अर बे देखगे डरग्या। 35जद आकासबाणी होई, “ओ मेरो चुणेड़ो बेटो है इंगी बात सुणो।” 36आकासबाणी होंताई यीसू बानै एकलो खड़यो दिख्यो अर बे चुप हो'ग्या। झिको कीं बां देख्यो किनैई कोनी बतायो।
ओपरी बड़ैडै़ छोरै नै ठीक करणो
(मत्ती 17:14-18; मरकुस 9:14-27)
37दूसरै दिन प्हाड़ ऊं उतरतांई लोगां गी भोत भीड़ बिंगै कनै आ'गी। 38अर एक आदमी भीड़ माऊं ऊंची आवाज में आ बिनती करतो आयो, “हे गुरू मेरै इकलोतै बेटै पर किरपा करो।” 39फेर बण यीसू ऊं केयो, ओपरी बिमै बड़ जावै है अर बा जोर ऊं चिलाण लागज्यै है। बिनै इतो मरोड़ दैय है कै बिंगै मूं ऊं झाग आण लागज्यै है। बिनै बा ओपरी छोडै ई कोनी अर नास करै है। 40बो आदमी केण लागग्यो कै, “मैं थारै चेला नै ई केयो, पण बांऊं निकळी कोनी।” 41यीसू बानै केयो, “हे अबिस्वासियो अर जिदी लोगो मैं थारै सागै किताक दिन रेऊंगा अर थारी सेऊंगा। अर तेरै बेटै नै अठै ल्या।” 42जद बो छोरै कनै आण लाग्यो तो ओपरी बिनै पटक'गे मरोड़ दियो। जद यीसू ललकारी तो ओपरी बिमुं निकळगी अर छोरो ठीक हो'ग्यो तो बिंगै बाप नै सूंप दियो। 43जद लोग परमेसर गी सामरथ नै देखगे हेरान होण लागग्या।
यीसू आपगी मोत खातर दूसरी बात करी
(मत्ती 17:22,23; मरकुस 9:30-32)
पण जद सारा लोग यीसू गै चमत्कारा ऊं हेरान होण लागरया तो बे आपगै चेला नै केण लाग्या, 44“थे ध्यान ऊं सुणो मिनख गो बेटो मिनखां गै हातां ऊं पकड़ाईजण आळो है।” 45पण बे ईं बात गो मतलब कोनी समझया अर बांऊं लुकेड़ी ही अर यीसू ऊं बिंगो मतलब पूछणै ऊं डरा हा।
सारा ऊं मोटो कुण?
(मत्ती 18:1-5; मरकुस 9:33-37)
46फेर बांमै आपसरी में विवाद होण लागग्यो कै सारा ऊं मोटो कुण है? 47यीसू बांगै मन गी बात जाणग्या अर एक टाबर नै कनै बुला'गे केयो जे कोई मेरै नाम ऊं ईं टाबर नै मानै तो बो मनै मानै। 48जे कोई मनै मानै बो मेरै घालण आळै नै मानै क्यूंकै झिको थारै मू अपणै आपनै छोटो समझै है बो ई परमेसर गी नजर में सारा ऊं मोटो है।
झिको बिरोधी कोनी, बो सागै
(मरकुस 9:38-40)
49जद यूहना बोल्यो, “हे स्वामी, म्हे एक आदमी नै थारै नाम ऊं ओपरी काडतां देख्यो अर म्हे बिनै रोक्यो बी हो क्यूंकै कै बो आपणै सागै कोनी रेवै।” 50यीसू बिनै केयो, “थे बिनै रोके ना करो, क्यूंकै झिको थारै बिरोध में कोनी, बो थारै सागै है।”
सामरिया यीसू गो बिरोध करयो
51जद यीसू गा सुरग में बुलाण गा दिन कनै आया तो बण यरुसलेम जाण गो पक्को बिचार कर लियो। 52बण आपगै दूतां नै सामरिया इलाका गै एक गाम में भेज्या कै बिंगै बठै पोंचणै ऊं पेलां कीं तैयारी करै। 53पण बठै गै लोगां बिंगो आदर कोनी करयो क्यूंकै बे यरुसलेम जावै हा। 54ओ देखगे याकूब अर यूहना बोल्या, “हे प्रभु, थे चावो तो म्हे पराथना करां कै परमेसर आकास ऊं आग बरसावै अर आं लोगां नै नास कर दैय।” 55पण यीसू बानै ललकारया। थानै अजे तांई ठा कोनी कै थे किसै मन गा हो। मिनख गो बेटो लोगां नै बचाण आयो है, नास करण कोनी आयो। 56अर बे बठूं दूसरै गाम में उड़ग्या।
यीसू गा चेला बणनै गो मोल
(मत्ती 8:19-22)
57जद बे जाण लागरया तो कणैई आदमी बिनै आ'गे केयो, “मैं थारै सागै चालूंगा” 58यीसू बिनै केयो “गादड़ा गै कनै घुरी अर आकास गै पंछिया गै कनै तो आलणां होवै पण मिनख गै बेटै गै कनै तो सिर ढकण नै जिग्यां कोनी।” 59फेर बण दूसरै आदमी नै केयो, “मेरै सागै चाल” बण केयो, “मेरै बुजरग पिता नै माटी देण ऊं पेलां कोनी आ सकूं।” 60बण बिनै केयो, “मरेड़ै आदमिया नै आपगा मरेड़ा नै माटी देण दैयो। पण थे जा'गे परमेसर गै राज गो परचार करो।” 61एक आदमी ओर बोल्यो, “हे प्रभु, मैं ई थारै सागै चाल पडू़ंगा पण पेलां मैं मेरै घराळा नै पूछ आऊं।” 62यीसू बिनै केयो, “जे आपगो हात हळ पर रखगे पीछै देखण आळै आदमी गी तरियां थे पीछै गी सोचोगा तो थे परमेसर गै राज गै लाइक कोनी हो।”
Селектирано:
लूका 9: BGQ
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2023 (Active), Wycliffe Bible Translators, Inc. All rights reserved. © WIn Publishing Trust