लूका 10
10
सतर चेला नै सेवा में भेजणा
1आ बातां गै बाद एक दिन में यीसू सतर चेला नै चुण्या अर झिकै झिकै गाम में बां आप जाणो, बठै दो दो कर'गे पेलां बानै घाल दिया। 2यीसू बानै केयो, “खेत पाकेड़ा तो घणाई है पण मजदूर थोड़ा है। ईंखातर खेत गै धणि नै जा'गे बिनती करो कै फसल बाडण खातर मजदूर घालै।” 3अर देखो, मैं थानै भेड़ां गी तरियां, भेड़िया गै बरगा थारो बिरोध करण आळा लोगां गै बिचाळै भेजूं हूं। 4ईंखातर थे जांवता आपगै सागै रिपिया, झोळो अर बुंटा गी दूसरी जोड़ी बी सागै ना लेईयो अर ना रा में किनैई निमस्कार करणै में ज्यादा टेम खराब ना करियो। 5झिकैई घर में जाओ तो पेलां इंया केवो कै, “ईं घर गो भलो होवै।” 6बिं घर में कोई धरमी भलो आदमी होयो तो बिनै थारी आसिस मिलसी। जे ना होयो तो थारो आसिरवाद थारै कनै पाछो आ'ज्यैगो। 7अर आपगो खाणो पीणो बिं घर में होवै अर बिं खातर घर घर ना फिरियो। बिं घर ऊं लूखि मिसी मिलै बाई खाईयो क्यूंकै दिहाड़ियै नै बिंगी दिहाड़ी मिलणी चईयै। 8अर जद थे किसै गाम में जाओ अर लोग राजी होगे थानै खाण खातर देवै तो बो ई खाईयो। 9अर बठै बीमार लोगां नै ठीक करियो अर बानै केवो, “परमेसर गो राज थारै कनै आ'ग्यो।” 10पण झिकै नगर में थे जाओ अर लोग थारो आदर ना करै तो बांगी गळियां में जा'गे केवो, 11थारै नगर गी धूड़ अठैई झाड़गे जांवां अर आपगा आप ई जाणो। फेर ई थे जाण लेईयो कै परमेसर गो राज थारै कनै आ'ग्यो। 12मैं थानै केऊं हूं कै न्याय गै दिन बिं नगर गै लोगां गी हालत परमेसर गी सजा पायड़ै सोदोम नगर गै लोगां गी हालत ऊं भोत बुरो हो'सी।
अबिस्वासी नगरां नै धिकार
(मत्ती 11:20-24)
13हाय, खुराजीन अर बेतसैदा नगर गा लोगो। झिका सामरथ गा काम थारै पर करया है बे ई सूर अर सेदा नगर#10:13 सूर अर सेदा नगर: गै लोगां पर होंता तो बे कद गी बोरी ओढगे अर राख लगागे आपगी गळती खातर पिछतांवंता। 14पण न्याय गै दिन थारी हालत सूर अर सेदा गै लोगां गी हालत ऊं भोत ई बुरी होवैगी। 15अर हे कफरनहूम गा लोगो, थे ओ ना सोचो म्हानै आदर ऊं सुरग में चकसी पण थानै तो नरक में गेरीजैगो। 16फेर चेला नै केयो, “झिको थारी सुणैगो बो मेरी सुणैगो। झिको थानै धिकारैगो बो मनै धिकारैगो झिको मनै ओछो जाणै बे मनै घालण आळै नै ओछो जाणै।”
सतर चेला पाछा आया
17बे सतर चेला बड़ा राजी होगे पाछा आया अर यीसू नै केण लाग्या, “हे प्रभु, थारै नाम ऊं ओपरी आत्मा म्हारो केणो मानै।” 18यीसू बानै केयो, “मैं सैतान नै आकास ऊं बिजळी गी तरियां एकदम पड़तो देख्यो। 19देखो, मैं थानै सांप अर बिछूआं यानी सैतान नै बस में करण गो अर बिरोदियां गी सारी ताकत नै बस में करण गो अधिकार थानै दियो है। कोई बी चीज ऊं थारो नुकसान कोनी होवै। 20तो बी थे खुस ना होईयो कै ओपरी आत्मा म्हारै बस में हो'गी। पण थे ईं बात पर खुस होईयो कै थारो नाम सुरग में लिखेड़ो है।”
यीसू आनंद करयो
(मत्ती 11:25-27; 13:16,17)
21बिं घड़ी बो पवितर आत्मा गै दिएड़ै आनंद ऊं भरग्यो अर केयो, “हे पिता, सुरग अर धरती गा प्रभु मैं थारो धन्यवाद करूं कै थे आं बातां नै ग्यानी लोगां ऊं अर समझदार लोगां ऊं लकोगे राखी बां लोगां पर परगट करी झिका टाबरां गी तरियां है। क्यूंकै थानै ओ ई बडिया लागै। 22मनै मेरै पिता सारो ग्यान अर सामरथ दी है अर पिता गै अलावा बेटै नै कोई कोनी जाणै है अर बेटै गै अलावा पिता नै कोई कोनी जाणै है। पण झिको बेटो परगट करै है बो पिता नै जाणै है।” 23जद चेला कानी मुड़गे बानै केयो, “धन्य है बे आंख्या झिको थे देखण लागरया हो, बे बिनै देखै। 24क्यूंकै भोत सारा परमेसर गी बात बोलण आळा अर राजांवा आ सोची झिकी बात थे देखो, बानै म्हे देखां, पण देख कोनी सक्या अर थे झिकी सुणो बे कोनी सुण सक्या।”
दयालु सामरी गी मिसाल
25जद एक धरम सासतरी खड़यो होयो अर यीसू नै परखण खातर बोल्यो, “हे गुरू, मैं अनन्त जीवन गो बारस होण खातर के करूं?” 26यीसू बिनै केयो, “मूसा गै नेम-विधान में के लिखेड़ो है, तूं बिनै किंया समझ है?” 27बण केयो, “तूं आपगै प्रभु परमेसर ऊं आपगै पूरै दिल अर पूरै प्राण अर पूरी ताकत अर पूरै मन ऊं प्रेम कर। अर आपगै पड़ोसी ऊं बी इंयाई प्रेम कर जिंया तूं अपणै आप ऊं प्रेम करै है।”#व्यवस्ता विवरण 6:5 28यीसू बिनै केयो, “तूं ठीक उतर दियो। तूं इंयाई करैगो तो जींवंतो रेवैगो।” 29पण बण अपणै आपनै सई ठेराण खातर पूछयो, “मेरो पड़ोसी कुण है?” 30यीसू एक मिसाल ऊं बिनै समझायो, “एक आदमी यरुसलेम ऊं यरीहो गाम में जाण लागरयो, रा गै मा डाकुआं बिंगा कपड़ा उतारगे अर कूट'गे अधमरयो कर'गे बठै रेड़ दियो। 31‘केई देर बाद बिं रा पर एक याजक जाण लागरयो। बण बिं आदमी नै देख्यो अर बिंऊं कतरा गे पासो फोरगे टप ग्यो।’ 32बिंगै केई देर बाद बठकर लेवी गोत गो एक आदमी जावै हो। बण ई बिंऊं नफरत करी अर कतरागे पासो फोरगे टप ग्यो। 33पण बठाकर'ई एक सामरी जाती गो आदमी जावै हो बण बिनै देख्यो अर बिं पर तरस खायो। 34बण बिंगै कनै आ'गे बिंगै घावां पर मलम पटी करी। अर आपगै गधै पर बिठागे धरमसाळा में लेग्यो। अर बिंगी सेवा करण लागग्यो। 35दूसरै दिन धरमसाळा गै मालिक नै दो चांदी गा सिका देगे केयो, ‘इंगी सेवा करियो अर ज्यादा खरचो तेरै कनूं लागज्यै तो पाछो आऊंती बारी देस्यूं।’ 36यीसू बिनै पूछयो, ‘तेरी समझ ऊं बता कै बां तीनां में अधमरयै आदमी गो पड़ोसी कुण हो?’” 37बण केयो, “बो ई है झिकै बिं पर तरस करयो।” जद यीसू बिनै केयो, “जा तूं बी दूसरा गै सागै इंयाई कर।”
मारथा अर मरियम गै घरे यीसू गो जाणो
38जद बे चालतां-चालतां, बो एक गाम में पूग्यो। बठै एक मारथा नाम गी लुगाई ही बा बिनै आपगै घरे ले जा'गे बिंगो आदर मान करयो। 39बिंगी एक मरियम नाम गी भेन ही। झिकी यीसू गै पगां में बेठी अर बिंगी बातां सुणण लागगी। 40पण मारथा बिंगी सेवा करती करती थकगी। अर यीसू नै आ'गे केयो, “हे प्रभु, थानै मेरी चिंता कोनी के? मेरी भेन सारो काम मेरूं कराण लागरी है इनै थे केवो कै मनै सारो लगावै।” 41यीसू बिनै उतर दियो, “मारथा, हे मारथा, तूं भोत काम अर बातां गी चिंता करै अर घबरावै है। 42पण एक काम गी बात जरूरी ही, झिकी नै मरियम चुणली आ इंऊं खोसीजै कोनी।”
Селектирано:
लूका 10: BGQ
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2023 (Active), Wycliffe Bible Translators, Inc. All rights reserved. © WIn Publishing Trust