uYoohani 19
19
UYeesu akulongwa kuuti ahomeelwe pa shihovhenkanyo
(uMataayi 27:15-31; uMaaliko 15:6-20; uLuuka 23:13-25)
1Pe uPilaato ahavhalajizya avhasikaali vhaakwe kuuti vhamunyatule uYeesu nu kumuhoma nu muchaapu. 2Avhasikaali vhahatavha ishipambwi isha mimvwa nu kumuzwalizya kwi itwe. Havhili vhahamuzwalizya inkanzu iya muhoola uwa mafwomfwo, ngati wu mwene. 3Vhahavhanga vhakupalamila ku kwakwe, havhili vhahavhanga vhakumulamuha vhakuti, “Mwakaata we Mwene wa Vhayuuda!” Vhahanda kumukanza na makoofi.
4UPilaato ahafuma panzi havhili, ahayivhuuzya impuga iya vhantu ivho ahati, “Yeenyi, naakumuleeta ishi kuli imwe umuntu uno, inga mumanye kuuti ntakuvhulola uvhunanzi naavhumo ku kwakwe.” 5Pe vhahamufumwa uYeesu panzi she azwaye ishipambwi isha mimvwa kwi itwe ni nkanzu iya muhoola uwa mafwomfwo. UPilaato ahayivhuuzya impuga iya vhantu ahati, “Yeenyi wali umuntu uno.” 6Avhapiti avha vhapuuti na vhaguulizi avha Nyumba iMfinjile lwe vhamulola uYeesu, vhahazuma ahalanga vhahati, “Muhomeele pa shihovhenkanyo! Muhomeele!” Pe uPilaato ahavhavhuuzya ahati, “Munyatuli mweneemwe musogole mumuhomeele pa shihovhenkanyo, mwe pe ine ntavhulola uvhunanzi naavhumo ku kwakwe.” 7AVhayuuda vhahamwamula uPilaato vhahati, “Iswe tuli nu lulajizyo. Kulandatana nu lulajizyo ulwo, yikwanzilwa afwe, mwe pe akuyivhiiha kuuti Mwana wa Mulungu.”#19:7 aVhalaawi 24:16
8Lwe uPilaato ayiivwa amazwi igo, pe ahoogopa nkaani. 9Pe ahinjila havhili nu Yeesu mu nyumba iya kukonzezya, ahamuvhuziilizya ahati, “Ukufuma kwoshi?” Ileelo uYeesu atahamwamula naashimo. 10Pe uPilaato ahamuvhuziilizya ahati, “Shooni she utakunaamula? Vhuli, utamanyile kuuti ine indi na maha aga kukusatula, havhili indi na maha aga kukuhomeela pa shihovhenkanyo?” 11UYeesu ahamwamula uPilaato ahati, “Utaamile uvhanje na maha naagamo kuli ine, inga uMulungu atakupanje. Pe ishi, umuntu we ambiisile mu nyoovhe zyaho, we ali nu vhutalamalandu uvhupiti kuluusya uvhwaho.” 12Lwe uPilaato ayiivwa izyo, ahanda kulondola idala ilya kumusatula uYeesu, ileelo aVhayuuda vhahazuma ahalanga vhahati, “Inga wamusatula umuntu uno, pe te we mumanyani wa Kayisaali.#19:12 UKayisaali: Vhaazya mu Ntantiho izya Mazwi aMajeni. Umuntu wonti we akuyivhiiha kuuti wu mwene, akumusambuha uKayisaali.” 13Lwe uPilaato ayiivwa amazwi igo, ahamuleeta uYeesu panzi, ahatendama pa shitengo isha kulonjela. Apenepo vhahapiitaga vhahatinji uLwalo ulwa Mavhwe, mu njango iya Shiyalaamu vhakuti Gabaasa.
14Háali havhaliilizyo aha vhushenzelo ishi, isiku ilya kuyisengaanya ishikulukuulu isha Pasaaka. UPilaato ahavhavhuuzya aVhayuuda ahati, “Yeenyi umwene wiinyu uno ipa!” 15Avheene vhahazuma ahalanga vhahati, “Mugoje! Mugoje! Muhomeele pa shihovhenkanyo!” UPilaato ahavhavhuziilizya ahati, “Vhuli, imuhomele pa shihovhenkanyo umwene wiinyu?” Avhapiti avha vhapuuti vhahamwamula vhahati, “Iswe tutali nu mwene uwunji, nkandi we Kayisaali!” 16Pe uPilaato ahamuvhiiha uYeesu mu nyoovhe zyavho, inga vhamuhomeele pa shihovhenkanyo. Pe avhasikaali vhahamunyatula uYeesu vhahasogola nawo.
UYeesu akuhomeelwa pa shihovhenkanyo
(uMataayi 27:32-44; uMaaliko 15:21-32; uLuuka 23:26-43)
17Lwe avhasikaali vhakumunyatula, uYeesu ávhusiizye ishihovhenkanyo shaakwe, nu kufuma mu nkaaya. Ásogooye nasho pamo pe mu njango iya Shiyalaamu vhahatinji pa Goligoota, kwe kuuti Ipangaawe ilya Itwe. 18Lwe vhaafiha ipo, vhahamuhomeela uYeesu pa shihovhenkanyo. Havhili apenepo vhávhahomeleeye avhantu vhavhili mu vihovhenkanyo vwavho, wumo ku luvhazu ulwa kundiilo ulwa Yeesu, uwamwavho ulwa kumongo.
19UPilaato ahalajizya kuuti uvhusimbe vhusimbwe nu kuvhuvhiiha pamwanya pa shihovhenkanyo isha Yeesu, vhwe vhukuti, “UYEESU UMUNAAZALEETI, UMWENE UWA VHAYUUDA.” 20Uvhusimbe uvhwo vhwásimviilwe mu njango iya Shiyalaamu ni ya Shiluumi ni ya Shiyunaani. AVhayuuda avhinji vhahavhaazya uvhusimbe uvhwo, mwe pe vhámuhomeleeye uYeesu pa shihovhenkanyo pápalamiine ni nkaaya iya Yelusaleemu. 21Pe avhapiti avha vhapuuti vhahamuvhuuzya uPilaato vhahati, “Utahasimbe kuuti, ‘Uno wu Mwene uwa Vhayuuda,’ nkandi usimbe kuuti, ‘Umuntu uno aatili, uweene wu Mwene uwa Vhayuuda.’” 22UPilaato ahavhaamula ahati, “Ndaali, uvhusimbe vhusyale vhwevhulo inza vwe ndajiziizye.”
23Lwe avhasikaali vhamuhomeela uYeesu pa shihovhenkanyo, vhahanyatula amenda gaakwe nu kugagavhanya genego ivigavho vine. Vhonti vhahanyatula ishigavho shooka shooka. Havhili vhahanyatula ni nkanzu yaakwe. Inkanzu iyo yitáamile nu vhusone, yámamiilwe kwandila kumwanya kufishila pansi. 24Pe vhahapanzanya vhahati, “Tutahayizeepule inkanzu ino, tuyihomele ulutambu kuuti yivhe ya naanu.” Izi zyávhombesile vhwevhulo, inga zilunjishe zye zisimviilwe mu Vhusimbe uVhufinjile kuuti, “Vhágavhiine amenda gaane, nu kuyihomela ulutambu inkanzu yaane.”#19:24 iZabuuli 22:18 Avhasikaali vwe vhávhomvile vhwevhulo.
25Yeenya, kwáli avhantanda vhane vhe vhímiliiye papiipi ni shihovhenkanyo isha Yeesu. Mu vhantanda ivho kwáli unyina wa Yeesu, nu nyina umunsi uwa Yeesu nu Maliiya umushi wa Kileyoopa nu Maliiya uwa ku Magidaala. 26Lwe uYeesu amulola unyina, nu musundikwa we uYeesu ámukunzite nkaani woope ayimiliiye papiipi nu nyina, ahati, “We maayi, mwenye uno. Umuvhiishe kuvha mwana waaho.” 27Havhili ahamuvhuuzya umusundikwa uyo ahati, “Mwenye uno. Umuvhiishe kuvha wu maayi waaho.” Pe kufuma ahavhaliilizyo hanaaho umusundikwa uyo ahamuvhiiha kuvha wu nyina waakwe, ahasogola kutendama ku kwakwe.
UYeesu akufwa pa shihovhenkanyo
(uMataayi 27:45-56; uMaaliko 15:33-41; uLuuka 23:44-49)
28Lwe uYeesu aamanya kuuti aamala kuyivhomba imbombo yaakwe, ahati, “Ishinyooto shanduma.” Áyanzile vhwevhulo, inga zilunjishe zye zisimviilwe mu Vhusimbe uVhufinjile.#19:28 iZabuuli 69:21 29Ipo páali ishiliilo she vhízuziizye idivaayi inkali. Pe vhahanyatula umwepe, vhahavhutumpiha mu divaayi iyo, pe vhahavhuvhiiha kwi ilanzi, vhahamutwalila uYeesu kwi ilomu. 30Lwe uYeesu alinga idivaayi iyo, ahayanga ahati, “Imbombo yaane yaasila!” Pe ahinamiha itwe lyakwe, ahafwa.#19:30 Ahafwa: IShiyunaani shikuti, Ahafumwa uvhulanzi vhwakwe.
Avhasikaali vhakumulasa uYeesu ni mpalala
31Isiku ilyo lyáli lisiku ilya kusengaanya iSabaato.#19:31 Isiku ilya kusengaanya iSabaato: Ilyo lyámile lisiku ilya Pachisaano, pe aVhayuuda vhahayisenganyaaga kwi isiku lyavho ilya Sabaato. ISabaato iyo yihandaga Pachisaano hamazuuvha. Avhalongozi avha Vhayuuda vhatahanzaga kuuti ivwala visyale pa vihovhenkanyo isiku ilya Sabaato, mwe pe lyámile lisiku ipiti nkaani. Pe vhahasogola kwa Pilaato, vhahamulaavha kuuti avhitishile kuuti avhasikaali vhasogole vhavivunze ivinama#19:31 Vhavivunze ivinama: Vhávhomvile vhwevhulo, inga vhafwe naluvhiilo. ivwa vhantu vhe vhávhahomeleeye nu kuvwefwa ivwala vwavho pa vihovhenkanyo. 32Pe avhasikaali vhahasogola, vhahavhavunza ivinama avhantu ivho vhavhili vhe vhávhahomeleeye pooka nu Yeesu. 33Ileelo lwe vhasogola kwa Yeesu, vhahaaga afuuye, pe vhatahamuvunza ivinama vwakwe. 34Ileelo umusikaali wumo ahamulasa uYeesu ni mpalala pa luvhazu. Pe amavhanda na minzi vihafuma. 35Inongwa izi zisimviilwe nu muntu we ázivhwenyi, lwe zikuvhombeha. Zye akuyanga zya nalyoli, havhili woope amanyile kuuti zye akuyanga zya nalyoli. Pe akuhomeshezya, inga niimwe mwitishe. 36Izyo zyávhombesile, inga zilunjishe zye zisimviilwe mu Vhusimbe uVhufinjile kuuti, “Ifupa lyakwe inga lyoka te lihavunzishe.”#19:36 iZabuuli 34:20 37Havhili uVhusimbe uVhufinjile vhukuti, “Vhalimulola we vhámulasile.”#19:37 uZakaliya 12:10
Kusyilwa ukwa Yeesu
(uMataayi 27:57-61; uMaaliko 15:42-47; uLuuka 23:50-56)
38Kwáli umuntu wumo kufuma mu nkaaya iya Alimataayi, izina lyakwe vhahatinji uYoosefu. Umuntu uyo áali musundikwa uwa Yeesu, ileelo kukwilu, mwe pe ahavhogopaga avhalongozi avha Vhayuuda. Lwe izyo zyonti zyatuuha, pe umuntu uyo ahasogola kwa Pilaato, ahamulaavha kuuti anyatule ishaala isha Yeesu, inga ashisyile. UPilaato ahamwitishila. Pe uYoosefu ahasogola, ahashiisya ishaala isha Yeesu pa shihovhenkanyo. 39Woope uNikodeemo we isiku limo ásogooye kwa Yeesu uvhusiku, ahinza na mafuta ge gakununshila ahinza. Uvhumwamu uvhwa mafuta igo vhwáli ikiilo 30 ishi. 40Pe vhonti vhavhili vhahashinyatula ishaala isha Yeesu, vhahashipaha amafuta igo nu kushizinga na menda amazelu, kulandatana na maata aga Vhayuuda aga kusyila avhantu. 41Pe vhámuhomeleeye uYeesu páali ishilimbika. Mu shilimbika umwo mwáli imbiipa impwa,#19:41 Imbiipa impwa: Yáali mwata ku Vhayuuda umuntu kuyibanila imbiipa she ashiili kufwa. ye vhatámusyiliiye umuntu naawumo. 42Isiku ilyo lyáli lisiku ilya Vhayuuda kuyisengaanya ni Sabaato. Kuli izyo, vhahamusyila uYeesu mu mbiipa iyo, mwe pe yáali papiipi.
Селектирано:
uYoohani 19: nih
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.