uYoohani 18
18
Avhalongozi avha Vhayuuda vhakumulema uYeesu
(uMataayi 26:47-56; uMaaliko 14:43-50; uLuuka 22:47-53)
1Lwe uYeesu aamala kulaavha, aheepa na vhasundikwa vhaakwe nu kulamba ishihoto isha Kidilooni pe páali ishilimbika isha mazayituuni. Vhahinjila umwo. 2UYuuda we ámwaniliiye uYeesu, ápamanyile ipo, mwe pe ulwinji ahahomaanaga na vhasundikwa vhaakwe penepo. 3Pe ahayiposheela impuga iya vhasikaali na vhavhomvi vhamo kufuma ku vhapiti avha vhapuuti na Vhafalisaayi, ahasogola navho pa shilimbika isho. Lwe vhakusogola, vhányatuuye inyaale na mazondolo ni vilwilo.
4UYeesu ápezile amanyile zyonti zye kwe zimwaje. Pe aheepa pa vhasundikwa vhaakwe, ahasogola pa mpuga iyo, ahavhuziilizya ahati, “Vhuli, mukumulondola unaanu?” 5Vhahamwamula vhahati, “Tukumulondola uYeesu uMunaazaleeti.” Pe uweene ahavhaamula ahati, “Neene ne mukundondola.” Ahavhaliilizyo iho, uYuuda we ámwaniliiye uYeesu, áyimiliiye pooka navho. 6Lwe uYeesu avhavhuuzya kuuti, “Neene ne mukundondola,” avhasikaali ivho vhahagaluha mwisinda nu kugwa pansi. 7UYeesu ahavhavhuziilizya havhili ahati, “Vhuli, mukumulondola unaanu?” Vhahamwamula vhahati, “Tukumulondola uYeesu uMunaazaleeti.” 8UYeesu ahavhavhuuzya ahati, “Navhavhuuzya kuuti, neene ne mukundondola. Inga mukundondola neene, ishi muvhaleshe avhasundikwa vhaane ivha vhasogolaje.” 9UYeesu áyanzile vhwevhulo, inga zilunjishe zye áyanzile kuuti, “We Taata, navhagulilaga ahinza, ataliipo we ateezile mu vhaala vhe umpiiye.”#18:9 uYoohani 6:39; 17:12
10USiimoni uPeeteli áali ni ipanga. Pe ahalikuula, ahamudiba nu kumudumula ikutwi ilya kundiilo umuvhomvi uwa mupuuti umupiti. Umuvhomvi uyo izina lyakwe vhahatinji uMaaliko. 11UYeesu ahamuvhuuzya uPeeteli ahati, “We Peeteli, galusya ipanga mu shipata shaakwe. Vhuli, utamanyile kuuti nkwanzilwa kuyimba inza vwe uTaata akasiime kuuti njimvilwe?#18:11 Nkwanzilwa kuyimba inza vwe uTaata akasiime kuuti njimvilwe: IShiyunaani shikuti, Intahamwelele ulupindi lwe uTaata ampiiye kuuti imwelele?”
UYeesu pilongolela ilya mupuuti umupiti
(uMataayi 26:57-58; uMaaliko 14:53-54; uLuuka 22:54)
12Pe umupiti uwa vhasikaali, pooka ni mpuga yaakwe na vhavhomvi avha vhalongozi avha Vhayuuda vhahamulema uYeesu, vhahamukunga. 13Pe vhahamutwala suuti kwa Aanasi, we áali wu yisevwala uwa Kayaafa. UKayaafa we áali mupuuti umupiti umwaha uwo. 14UKayaafa we insiku izya mwisinda ávhapanziizye avhalongozi avha Vhayuuda kuuti, “Hinza kuuti umuntu wooka afwe kuzya vhantu vhonti.”#18:14 uYoohani 11:50
UPeeteli akumuhaana uYeesu
(uMataayi 26:58, 69-70; uMaaliko 14:54, 66-68; uLuuka 22:55-57)
15USiimoni uPeeteli nu musundikwa uwamwavho wumo, vhahamulandataga uYeesu mwisinda lwe vhakumutwala kwa Aanasi. Umusundikwa uyo, umupuuti umupiti ámumanyile, ye nongwa ahinjila pooka nu Yeesu pa lupitu ulwa nyumba iya mupuuti umupiti. 16Ileelo uPeeteli ahimiilila panzi pa mulyango, pe umusundikwa uwamwavho uyo, we ámanyisile nu mupuuti umupiti, ahafuma panzi. Ahayanga nu mulindu we áali muguulizi wa pa mulyango, pe ahamwitishila uPeeteli kwinjila muhati. 17Pe umulindu umuguulizi uyo ahamuvhuziilizya uPeeteli ahati, “Vhuli, niiwe te we wooka mu vhasundikwa avha muntu uyo?” UPeeteli ahamwamula ahati, “Ndaali, te neene.” 18Ahavhaliilizyo iho, avhazya na vhavhomvi vhaala vhímiliiye pe vhápemvile umwoto uwa mazimwa, mwe pe kwáli impepo. Woope uPeeteli áyimiliiye pooka navho, ahootaga umwoto.
Umupuuti umupiti akumuvhuziilizya uYeesu
(uMataayi 26:59-66; uMaaliko 14:55-64; uLuuka 22:66-71)
19Pe umupuuti umupiti uyo uAanasi, ahamuvhuziilizya uYeesu izya vhasundikwa ni zya nsambiilizyo zyakwe. 20UYeesu ahamwamula ahati, “Ahavhaliilizyo honti nayangaga na vhantu vhonti apazelu, navhasambilizyaga avhantu mu masinagoogi na pa Nyumba iMfinjile pe aVhayuuda avhinji vhakuvhungaanaga pooka. Ntaayanzile izwi naalimo kukwilu. 21Ishi shooni she ukumbuziilizya ine?#18:21 Shooni she ukumbuziilizya ine? Kulandatana ni ndajizyo izya Vhayuuda, yitáamile te muumwo kumuvhuziilizya umuntu kuuti ayihomeshezye wuuyo weeka. Avhantu avhanji vhe vhahanzilwaga kumuhomeshezya. Shooni she utakuvhavhuziilizya avhantu vhe vhatejelezyaga lwe nkusambiilizya? Avheene vhamanyile zye nayangaga.”
22Lwe uYeesu ayanga izyo, umuguulizi wumo we áyimiliiye papiipi nawo, ahamukanza ni ikoofi, ahamuvhuziilizya ahati, “Shooni she ukumwamula umupuuti umupiti vhwevhulo?” 23UYeesu ahamwamula ahati, “Inga nayanga havhiivhi, twivwe yanga uvhuvhiivhi vhwane. Ileelo inga nayanga zya nalyoli, pe shooni she ukunkoma?” 24Pe uYeesu she akunziilwe, uAanasi ahalajizya avhasikaali kuuti, vhamunyatule nu kumutwala kwa mupuuti umupiti, uKayaafa.
UPeeteli akumuhaana uYeesu havhili
(uMataayi 26:71-75; uMaaliko 14:69-72; uLuuka 22:58-62)
25Yeenya, lwe uPeeteli ali kwota umwoto, avhantu vhamo vhahamuvhuziilizya vhahati, “Vhuli, niiwe te we wooka mu vhasundikwa avha muntu uyo?” UPeeteli ahahaana ahati, “Ndaali, te neene haa.” 26Ileelo wooka mu vhazya avha mupuuti umupiti, we áali mujenzi uwa muntu ula we uPeeteli ámudivile ikutwi, ahamuvhuziilizya ahati, “Vhuli, te weewe we naakuvhwenyi uli pooka nu Yeesu mu shilimbika?” 27UPeeteli ahahaana havhili ahati, “Te neene.” Ahavhaliilizyo hanaaho inkanda yihavhilishila.
Vhakumutwala uYeesu kwa Pilaato
(uMataayi 27:1-2, 11-14; uMaaliko 15:1-5; uLuuka 23:1-5)
28Inzanshi lwe kwasha, avhalongozi avha Vhayuuda vhahamunyatula uYeesu kufuma kwa Kayaafa, nu kumutwala ku nyumba iya kukonzezya iya mulongozi uwa Vhaluumi. Ileelo avheene vhatínjiiye mu nyumba umwo,#18:28 Ileelo avheene vhatínjiiye mu nyumba umwo: AVhayuuda vhahavhavhazyaga avhantu vhonti vhe te Vhayuuda pooka ni nyumba zyavho kuuti nkandamanu. inga vhatahayihandamanie, vhapootwe kulya ishaakulya isha shikulukuulu isha Pasaaka. 29Pe umulongozi uwa Vhaluumi uyo uwa shigavho isha nsi isha Yudeeya, we izina lyakwe vhahatinji uPilaato ahafuma panzi, nu kusogola kwe vháali, ahavhavhuziilizya ahati, “Vhuli, umuntu uno ananzile ishooni she mukumulonjeelela?” 30Avheene vhahamwamula vhahati, “Inga umuntu uno atananzile naashimo, nkandi tutinzile nawo kuli iwe.” 31UPilaato ahavhavhuuzya ahati, “Ishi imwe munyatuli, musogole mumulonje kulandatana ni ndajizyo zyinyu.” Ileelo avheene vhahamwamula vhahati, “Iswe tutakwitishilwa kumulonga umuntu kuuti afwe.” 32Izyo zyávhombesile vhwevhulo, inga zilunjishe zye uYeesu áyanzile, kulolesya vwe kuuti afwe.
UPilaato akumuvhuziilizya uYeesu
33Lwe uPilaato ayiivwa izyo, ahinjila havhili mu nyumba iya kukonzezya, ahavhalajizya kuuti vhamutwale uYeesu ku kwakwe. Lwe vhamutwala, ahamuvhuziilizya uYeesu ahati, “Vhuli, iwe we Mwene uwa Vhayuuda?” 34Ileelo uYeesu ahamwamula ahati, “Vhuli, izyo zye ukumbuziilizya, zikufuma mu nsiivho zyaho, pamo avhantu avhanji vhe vhakuvhuziizye inongwa zyane?” 35UPilaato ahamwamula ahati, “Vhuli, ine ne Muyuuda? Avhantu avha mu nsi yaaho pooka na vhapiti avha vhapuuti vhe vhakuleesite iwe kuli ine. Vhuli, uvhomvile ishooni?” 36UYeesu ahamwamula ahati, “Uvhumwene vhwane te vhwa mu nsi umu. Inga vhuvhanje vhwa mu nsi umu, avhavhomvi vhaane, nkandi vhandwiliiye, inga ntahaalemwe na Vhayuuda. Ileelo uvhumwene vhwane te vhwa mu nsi umu.” 37Pe uPilaato ahamuvhuziilizya ahati, “Vhuli, ishi zya nalyoli kuuti iwe we mwene?” UYeesu ahamwamula ahati, “Iwe we wayanga kuuti ine ne mwene. Ine nápafwilwe mu nsi umu, havhili nínzile, inga mbasambiilizye avhantu uvhwanalyoli. Umuntu wonti we akuvhulandata uvhwanalyoli, akugatejeelezya amazwi gaane.” 38UPilaato ahamuvhuziilizya ahati, “Uvhwanalyoli she shintu vhuli?”
Lwe uPilaato ayanga izyo, ahafuma havhili panzi, ahavhavhuuzya avhalongozi avha Vhayuuda ahati, “Ine ntavhulola uvhunanzi naavhumo kufuma kwa muntu uno. 39Ileelo muli na maata aga kundaavha kuuti mbasatulile umukungwa wumo ahavhaliilizyo aha shikulukuulu isha Pasaaka. Vhuli, mukwanza kuuti mbasatulile uMwene uwa Vhayuuda uno?” 40Ileelo avhantu vhonti vhahazuma ahalanga kwi izwi ipiti vhahati, “Ndaali! Utahatusatulile umuntu uyo, utusatulile uBalaaba.” UBalaaba ákunziilwe kuzya kuyisambuha isilikaali iya Shiluumi.
Селектирано:
uYoohani 18: nih
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.