Seemthawhnak 33
33
Jakob leh Esau an Tuaktia
1Jakob cu khua zoh na ah Esau a phat a hmu, mi 400 rum an ii. Curuangah a tianaule cu Leah leh Rachel leh a nusunle pahnih hemah a ṭheek hngai. 2A nusunle cu an tiale rum hmaiah, cun Leah leh a tiale, cun Rachel leh Josef cu an dungtatleng ah a sia hngai. 3Amah cu an hmalaah a tat li, a u hnaih a phat hlan cu vulei sanla ah voi sarih a kuum.
4Ihmansela Esau ni amah tuak dingin a zuang ih a bua, a hngawng thlia deuh in a hnam, culeh an ṭap. 5Esau ni khua a zoh ih numipawl leh tepangpawl a hmuh hngai tikah, “Ahi namah rum a om mile hi ahule an ii?” tiah a ti. Jakob ni, “Pathian ni na tungsau pa naktiahngaiin a ma piak mi tianaule an ii hi,” tiah a ti. 6Cutikah nusunle, cun an tiale ni an hnaih ih an kuum. 7Leah khaw a tiale rum an hnaih ve ih an kuum; cun netatleng ah Josef leh Rachel khaw an hnaih ih an kuum. 8Esau ni, “Ahi sumhnamrual ka tuah hngaimi hmawhhmawh hi itu na tican ii maw?” tiah a ti. Jakob ni, “Ka bawipa na mithmaiṭha hmungah dingah hepangkhaw,” tiah a sawn. 9Ihmansela Esau ni, “Ka nau, kamah a daih in ka ngei hngai; na ngeihmi cu namah ca’h siahtia kau,” tiah a ti. 10Jakob ni, “I hlah e, naktiahte’n; na mithmaiṭha ka co a’cun ka kut ih laksawng hi ma co kau; icatile ahimang mithmaiṭha rum a ma colaak hnuk cu na mithmai tan hmuh hi Pathian mithmai hmuh mang a ti taktak. 11Pathian ni naktiahngaiin a ma piak rom ruangah leh ka ṭulmi izongza ka ngeih ruangah na hemih ka kentaakmi laksawng hi naktiahin ma co hram kau,” tiah a ti. Curuangah a torh ciamco, culeh Esau ni a la.
12Cutikah Esau ni, “Kan lam cu tat tu hu, culeh kei cu namah rum kan tat khat thok,” tiah a ti. 13Ihmansela Jakob ni, “Ka bawipa, tepangle hi an ṭawnṭai ih, sumhnam runpawl cu hnawitawp lio an ii ih ka zokhen mi an ii; ni khat lamtah hi luan deuh in tahsak an ik a’cun an thi remro thok. 14Ka bawipa leh na tungsau cu tat li kau u la, kei tu cu ka hmala ih sumhnamle ih vah khawh tuakcaang leh tepangle ih vah khawh tuakcaang in, Seir ah ka bawipa ka tan man hlansung nuammangin ka tan dawi lei,” tiah a ti.
15Curuangah Esau ni, “Ka milaipawl hrekkhat na hemah mata hngai tu hmen lang,” tiah a ti. Ihmansela Jakob ni, “Ituruangah ka bawipa cu ka parah cuti cu na ṭha a he?” tiah a ti. 16Curuangah Esau cu acu ni ah Seir la ahcun a kirṭhan. 17Ihmansela Jakob cu Sukkoth laah a tat ih inn a sak tia, cun a sumhnam caah thlaam a sa; curuangah a hmun cu Sukkoth tiah kawh a ii.
Jakob Shekhem ah a Pha
18Jakob cu Paddan-aram in a kirla ah Kanaan ram ih a ommi Shekhem khua ah himtein a pha; culeh khua lengla ah riahbuuk cu a sa. 19Culeh Shekhem ih pa Hamor ih tiapale hemin ngun tangka 100 in acui a thlam saknak hmun cu a lei. 20Acunang ahcun pakawh a don ih El-Elohe-Israel#33:20 El-Elohe-Israelti cu Pathian, Israel ih Pathian tican. tiah a ko.
Селектирано:
Seemthawhnak 33: KHBF
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Khualsim Holy Bible © Bible Society of Myanmar, 2021.