MATAYO 28
28
Lisimuguka lia Yeso
(Mar. 16:1-10; Luk. 24:1-12; Yoh. 20:1-10)
1Inyima wi Lisabato nivuchezaa ku lidiku lia Jumapili, Maria Magadalena na Maria wundi, vazia kohenza ha kilindwa. 2Nonoho, liali ho ilidegera linene lie kivala; engelosi wu Mwami yika kutura mwigulu, nagomagominya iligina, ma niyikara ku. 3Ligondo lilie lialoleka kuli oloheni, kandi izinguvu zizie ziali izindavu kuli ilikonza. 4Avalindi vi kilindwa vaadegera nuvuti ovonene nivagwa kuli avandu vakuzi.
5Engelosi yavolera avakali yavo, “Mutatia mba! Manyi ndi mwenya Yeso wavambwa. 6Siaveeye hano mba; yaakusimugukizwa kuli yavoola. Hambi mulole ha yagonaa. 7Kalunu, muzie vwangu muvoolere aviigi veve, ‘Usimugukiziywi kutura mu likuza, na kalunu yimiraa imbiri winyu kuzia Galilaya; mulamulola uwene yeyo!’ Mwizurizi aga inzi mali kumuvolera.”
8Kunangwa avakali yavo vaatura hakilindwa vwangu, nivatiiyi, navuzwa ni vizuyi uvuyanzi vonene ligali, ni vanyagura kuzia kovoolera aviigi veve.
9Lwa vaali nivazizaa kovoolera aviigi veve, nonoho Yeso mwene yagana navo navacheliza; “Mirembe ku munyi.” Vakali yavo vazia kuye, ni vagumira ku virenge vivie, kandi vaamusigamira. 10Maku Yeso yavavolera, “Mutatia mba! Muzie kovoolera avamwavo vange vazie Galilaya, valandolera yo.”
Makuva ga valindi vi kilindwa
11Avakali yavo lwa vaali ni vazizaa, valala ku avasikari avalindaa ikilindwa vazia mu lidaala linene kovoolera avasaalisi vanene amakuva goosi agaali nigekoleka 12A vasaalisi vanene na vakulundu vavugana harara nivalomba kiyaalo. Vaaha avasikari yavo mabese manyingi 13ni vavoola, “Muvoolere avandu ndi, ‘Aviigi veve vazi vudiku ni vamwiva lwa mwali ni mugonaa.’ 14Niiva amakuva yaga galaduuka ku mwamihi, kunyi kulamuvoolera munyi muvura imbara, na munyi simulava ni kindu kimudegeliza mba.”
15Kunangwa avalindi yavo vaavugura mabese ni vakora kuli vavolerwa vakole. Na amakuva yaga galanda mu Vayuda kali kuduuka kalunu.
Yeso yaloleka ku aviigi likomi na mulala
(Mar. 16:14-18; Luk. 24:36-49; Yoh. 20:19-23; Vik. 1:6-8)
16Aviigi likomi na mulala vazia ku kiguru mu Galilaya, aha Yeso yavalaga vazie. 17Lwa vamulola vaamusigamira kali niiva avalala kuvo vahayahayiza. 18Yeso yisunda ahimbi kuvo navavoolera, “Mbeeveywi zinguru ziosi mu ligulu kandi mu lirova. 19Muzie, mukore avandu vi zihiiri ziosi vave vigi vange: muvabatizi: mu lieta lia Baba, liu Umwana, na lia Roho Mutakatifu; 20muviigizi kolonda ivindu viosi via mali kumulaga. Na ndava harara ni munyi madiku goosi; kuduuka ku keheri chi ing'inga.”
Селектирано:
MATAYO 28: LOGOOLI
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
©Bible Society of Kenya, 2019