Markusna Enjil 15
15
Bag. 15.
1Fejirroton fegirina samli duli samligon abajiligon wide tinna jelsa malegodongon shurergi Yesugi shartiged teros Bilatuski ojju selimesan.
2Bilatus tekki isigsum: „Er Yahudichina or terre?“ Yesu rude wetirsum: „Er awen.“ 3Fegirina samli duli wide tekki digrigir ashekesan. 4Owittiged Bilatus tekki isig wetirsum: „Er wekkonged arudemnu? Uru saï kottekki endogor ashehderangi.“ 5Yesu wekkonged rudetirkomnum, Bilatus ajibenbokon.
6Bilatus kore nutin esir wekki atalgetidirsum, tiri birigrangi. 7Wekki Barabas esan. In tenna tiwrichigodon shartir dabusum fitne wer wide berar werna jiradilo. 8Jema dogor, Bilatusnai, ju uwe wesan: „Er aawsingi argi eleken awdecchir.“ 9Bilatus tirgi rudetidir wesum: „Abirigirwa ai irgi Yahudichina orki talgetidirringi?“ 10Ter iyirsum fegirina samli duli tekki hasedted selimesangi. 11Fegirina samli duli jemagi agissan, wew an Barabaski talgetidir an. 12Bilatus owittiged rude wetidirsum: „Won min wekki awrin in Yahudichina orm an iri awerunged?“ 13Tir wide uwe wesan: „Berro soligir.“ 14Bilatus tirgi wetidirsum: „Won min wekki awingad?“ Tiri desen igir torgi uwe wesan tinna hisi maleged: „Berro soligir!“ 15Bilatus tirgi rediyadti birgos Barabaski talgetidirsum. Yesugon tukossinn aharro tirgi selimeirsum, berro soligirw an.
16Askari tekki aredarangon hoshkir tosan. Man agarkon walayana ka teran. Teddo bulug malegi jamos 17Yesugi kade gele wekki undurossir, wide kasir wekki kiliserton awijos tendogor kujursan. 18Wide tekki salamgi lufetirarki ugudisan. Widegon awesan: „Salam alek, wo Yahudichina or!“ 19Agen sha wekked tenna urdogor tekki ajomsan. Widegon atufundursan. Widegon rekaetirka asejdetirsan. 20Tendogor uswossann aharro kade gelegi dukos tenna kadechigi undurtirsan. Wide tekki kiyejjusan, berro soligirw an.
21Ogij, Siman Kairawandiy an awesan, gurton talebungon morogirsan, Yesuna berki inj an. In ogicchon Iskender wide Rufuskonna timbes esum.
22Yesuged tasan agar Juljutay an awerando, urna kidm ane teran. 23Wide tekki tirsan hamur miri wekked sawbul wekki, ni an. Tekkon monossum. 24Berro soligrossann aharro tenna kadechigi tinna barer abagijsan. Wide kulugi tindogochir aïnjisan, wer nutin mingi baringi nalw an. 25Tekki salbesanna wattigi saa toskitti ter esum. 26Bacchi wekkon tenn urdogor solibusum. Ter bacchirgon tenna zenbi ter esum: Yahudichina or term an.“ 27Tekkodongon magas owigi soligirsan, wekkon tenna iyinneged, owittigon tenna mayinneged, 28kitab wekorelgi timer an: „Usigodon irtakkisum.“ 29Widegon nogbuli tendogor ajedifesan. Wide tinna urigi guyigirka awesan: „Wo er, jamagi biborkidil wide ugros toskir bigoil! 30Ennewertigi os berdogorton shugur ta!“ 31Widegon fegirina samli duligon ittiwrina barer tendogor aüsusan abajiligodon. Wide wesan: „Echeligi osirsum. Ama tennewertigi eske aosmunum. 32Shugur tar agad, komisbul, Israelna or, berdogorton. Ar naled tekked bamnerun.“ Tekkodon solibuligon tekki aaïresan.
33Saa gorjittir duluma wer arid malen dogor tasum, saa iskodittin bokon. 34Saa iskodittir Yesu hisi dul wekked uwe wesum: „Eloï, Eloï, lama sabaktani?“ In weregon in teran: 35„Arti, arti, er ma aigi mugossum?“ Hadrebulirton weri gijredirgi wesan: „Ahan Eliyagi aüwen.“ 36Wer bodirgi sifinja wekki haliged eyegros wide agena sha werdogor kujros soketirsum, ni an. Wide wesum: „Mugwe! Isso nallun, ter on Eliya targi bishugudikin.“ 37Yesu wide hisi ali wekked uwos newertigi selimossum. 38Jamana hijab wide basshum owan, dogorton togor junbokon. 39Imilgi akiyel Yesuna gebello tebil tennewertigi ikke ossingi nalos wesum: „Aleged in zol artina tod ter esum.“ 40Ecchi werigon mando warirton urwed tebsan, tinna barergon Meryem Majdaliyagon, wide Meryem Yagub kinagon Yusifkonna tinengon, wide Salumagon. 41Ingu tekki tebaedasan wide tekki ahadmesan ter Jelillo dasinna wattigi. Wide echeli digrichi werigon, tekkodon Urushalimgir kujbukosani.
42Share bidangad, jihaz ter esinged, samten owol, 43Yusif Arimatiyandi, emir sherif wer, tasum. Tekkon artina mulkigi urwedagsum. Ter targi wide jesrergi Bilatusnai to jurgi Yesuna jitagi birigsum. 44Bilatus ajibesum ter ikke gawan diossingi. Ter wide imilgi akiyelgi uwedtargi isigsum, ter on zaman dikokin. 45Imilgi akiyelnaiton iyiros Yusifki jitagi tirossum. 46Ter kitan wekki janed wide dielgi shugudi kefinesum kitanged. Wide te werro undursum. Tegon kulu werro golbusum. Wide kulu wekki gergij atta tena agilgi kobossum. 47Wide Meryem Majdaliyagon wide Meryem Yusifna tinengon urwedagsan uskursann agarki.
Селектирано:
Markusna Enjil 15: XNZ1912
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Published by the British and Foreign Bible Society in 1912.