Markusna Enjil 14
14
Bag. 14.
1Ugros owin aharro basana kore ter esum wide kalfitigon. Fegirin samli duligon wide abajiligon akasshan mine Yesugi mekir wekked arrigi beru an. 2Ama awesan: „Koren turmunum an. Mine gebila arg abidi bimbelin.“
3Ter Betanir, Siman baraskolna kar, kalen dogor agingon en wer tasum, tekkodon bata iris adel, naridin sud, temen digrikol wekki kagingon. Bata iris dabusingi togos wide tenna urdogor bogsum. 4Weri teddo dalilton gizetakkos tinnewertichir wesan: „Ter ma in iriski ikke atelifen, 5dinar imil toskin dogor digriged janos hajebuligi tidirsindogor?“ Wide engi awabihesan. 6Ama Yesu wesum: „Tekki mugwe. Ir ma tekkodon asokebaindun? Ter aiged awid adel wekki awsum. Mine hajebuli irgodon dime daran. 7Ir birigrunna watti malegi eskergi tirged herki bawrun. Ama ai irgodon dime damnim. 8Ter eskesingi awossum. Ter anna jitagi numegrossum kuyrarn owollo. 9Aleged irgi witidirri, in enjil beshirtakkinn agar maler, ter awsinged bibainkandan, tenna jilattigir.“
10Yahuda Isharyuti, diminde owingarirton wer, bujusum fegirina samli dulinai, tekki tirgi selimeirri an. Tiri gijred guresan. 11Wide tekki wadesan, dugu wekki bitirru an. Ter wide terin aharro akasshum watti tedder tekki tirgi biselimetidiringi.
12Kalfitina ugros koyaldir, ugros tedder basagi agojsander, tenna hirani wetirsan: „Sayer er abirgin ar jurgi basana kalegi alletirrungi?“ 13Owigi tenna hiranirton ishin wetidirsum: „Mediner jukrun, teddo zol kube essindi wekki kagingon irgi babidirin. Tekki tebaewe. 14Ter tonn agarro tebae ju kana tirtigi wetirwe: ‚Fegir ekki awetirin: Agar saïder basagi kalli anna hiranigodon?’ 15Ter irgi bamintidirin gurfa dul wekki awidi hadrebulgi. Teddo alledecchirwe.“ 16Hiran owingari belligi mediner tosan. Wide elsan tirgi wetidirsin nawre. Teddo wide basagi allesan.
17Share bidangad, ter tasum diminde owingariged. 18Tiri tegos akallangon Yesu wesum: „Aleged irgi wetidirrin, iddeton wer aigi biselimen, aigodon akalil.“ 19Tir wide milian tekki wetirsan wer wekked: „Ai ter eria aba?“ 20Tirgi wetidirsum: „Diminde owirton werum, aigodon kisbir atabel. 21Zolna tod nogbun, tendogor bajbun nawre. Ama, wo ugros eshum man ogijdogor, tekked zolna tod biselimtakkikanin. Man ogijnai gen esum uskitakkikomenkin.“
22Akallangon Yesu kal wekki injirgi barkos wide togijos wide tidiros wesum: „Ar kalwe. In anna jita teran.“ 23Widegon dibitegi arrigi barkos wide tidirsum. Teddeton male nisan. 24Wide wetidirsum: „In anna gew teran, gew ahid erdi, bibogtakkil digrichi werina joro. 25Aleged irgi wetidirrin, ai wide binimnim enebna oliserton, man ugros artina mulkir erkir nirinbokon.“
26Teddo sebihos wide belsan zetunna gunagir. 27Yesu wetidirsum: „Ir male in ugugi addeton biuretakkirun, bajbun nawre: ‚Ai egedig aïwilgi jomkirin, egedigon bigulijtakkiran.’ 28Ama ann imbelarn aharro Jelilgir binnowollandin.“ 29Butrus tekki wetirsum: „Male ekki mugos nogkiran, ai ekki bimugminim.“ 30Yesu tekki wetirsum: „Aleged ekki wetirrin, elongu, in sharegi, elgon darbadn ondi gir owigi kililemeningon, aigi gir toskigi bigubin.“ 31Butrus wide odigir wesum: „Ai on diarro jukringon ekkodon, ekki bigubminim.“ Ikkegon male wesan.
32Wide ezba werro tosan. Tenn erigon Jatsamanig eran. Yesu tenna hiranigi wetidirsum: „Indo tegoswe salirinbokon.“ 33Tekkodon wide arejjusum Butruskon Yagubkon wide Hanagongi. Terin agabir muslarkon galabadirgon tosum. 34Tirgi wetidirsum: „Annewerti desen musulbun, diarro junbokon. Indo welesos bichi tegwe.“ 35Ter wide kinnekki tiddeton warianos ariddogor obos wide asalisum, man saa tennaiton nogingi esketakkikin. 36Wide wesum: „Wo aba, wo ambab, haja male enna in turum. In dibitegi annaiton warigros. Ama ai abirigrin nawitemnum, er abirgin awtakk agad.“ 37Wide rejae targi nerburangon eledir Butruski wetirsum: „Wo Siman, er nerbuna? Er eskergi saa habbekki bichi tegarki marosma? 38Bichi tegos saliwe, jeribadir tomendunna joro. Newertig ankin, ter neshitum. Ama jita jagadum.“ 39Wide jurgi owittiged salisum. Man were ter awesingi wesum. 40Owittiged targi nerburangon eledirsum. Mine tinna misichi dullanbusan. Wala mine tekki rudetirarki iyirkomnan. 41Toskittiged targi wide wetidirsum: „Eleken nerwe. Wide welesewe. Kefen. Saa bidasum, tedder zolna tod biselimtakkin zenbikonina ichir. Imboloswe, nogrun! 42Alai ahan aigi biselimel awtanbun.“
43Ter abainingon Yahuda tasum — tekkon diminde owirton esum — wide tekkodon jema digri wer siwdiged wide wichirigonged. Fegirina samli duli wide abajili wide samlinaiton ishinbusan. 44Tekki biselimelgon tirgi amara wekki tidiredagsum. Wide wetidirsum: „Ai dogrinna tirti, ter ter teran. Morogirwe. Wide tekked juwe harsedagrungon.“ 45Ter tasingodon tekk abidi tale torgi wetirsum: „Wo rabi, wo rabi.“ 46Wide dogsum. Mani wattigi tendogor ichigi kujur morogressan. 47Yesugodon dalirton wer siwidti soche fegirina samil dulna nugudna ulugki merossum. 48Yesu rude wetidirsum: „Ir kaenu magas wekk abidi bel tasure, siwdiged wide wichiriged aigi arw an. 49Ugros malegi inna barer jamar akurkidisim. Ir aigi arkomnun. Ama in tasum, kitab bajbulgi timer an.“ 50Tenna hirani male tekki mugos dosossan.
51Wide shebab wer kad aro wekked tenna wirjigidti tagredarel tekki tebaedangon morogirsan. 52Ter kadegi mugossidir wirijbungon tinnaiton dosossum.
53Yesuged bujusan fegirin samil dulnai. Teddo jamesan fegirina samli duli, wide samligon, wide abajili male. 54Butruskon wariged tebaedasum fegirina samil dulna kag abidi. Wide targi hadamin barer tegossum igked kakengon.
55Fegirina samli duli wide tinna mejlis malegon shahada wekki Yesun dogor awerissan, berosirw an. 56Wala elkomnan, digrichi weri tendogor zurked shehdekokrangon. Ama tinna shahada ittiwrigi egirkomnum. 57Terin aharro shahidi mursaji weri imbel wesan: 58„Ar tekki awengon gijirsun: Ai in jama ichiged goibulgi borkidos wide ugros toskin aharro echel wekki bigoirin, ichiged goitakkimenil wekki.“ 59Wala in wereged tinna shahada egirkomnum. 60Fegirina samil dul imbel seler tebos tekki isigsum: „Er were wekkonged arudemnu, ingu endogor ashehdelig abidi?“ 61Ama Yesu kite santebusum. Wala were wekkonged rudetirkomnum. Owittiged fegirina samil dul tekki isig wetirsum: „Won er komisbul, barkebulna tod, terre?“ 62Yesu wesum: „Ai ter ter erin. Widegon ir binalkandun zolna todti artina gudran iyinneged agingon wide simena gemir tabungon.“ 63Fegirina samil dul tenna kadechigi bashijos wide wesum: „Mingirrun elgon shahidigi? 64Iri gijirsun jedifadigi. Inna raï minde?“ Male tendogor hukmesan: „Diar tendogor wejbebun an.“ 65Weri tiddeton ugudisan tendogor tuf undurarki. Wide tenna koigi tagros wide tekki jomdig wetirsan: „Nebyer an.“ Hadamigon tekki lukamiyeged ajomdigsan.
66Butrus hoshtur engon fegirina samil dulna nogochirton wer tasum. 67Butruski akakengon uru nalos wetirsum: „Ekkon Yesu Nasirandigodon dasum?“ 68Gubos wesum: „Ai aïyirminim. Wala afehmemnim er awengi.“ Wide bochigir hohan togogir belsingodon darbadn ondi kililesum. 69Nogo owittiged nalos agiligi wetidirsum: „Ingon tiddetonm an.“ 70Owittiged gubossum. Shobbenn aharro agili Butruski wetirsan: „Aleged er tiddetonum. Mine er Jelillotonum. Enna bainid tinna bainid galg engad.“ 71Naladton jedifadtongi ugudi wesum: „Ai aïyirminim in ogij iri tekked abaindungi.“ 72Darbad owittiged kililesum. Butrus wide jilesum were tekki Yesu wetirsingi: „Darbad elgon gir owigi kililemeningon er aigi gir toskigi bigubn an.“ Ingi jilos oisum.
Селектирано:
Markusna Enjil 14: XNZ1912
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Published by the British and Foreign Bible Society in 1912.