Luka Enjil 1
1
Bag. 1.
1Digrichi weri kasshan awdi annā barer awtakkeligi bajirw an, 2misiged naleli wide weregi ahadmereli argi wedecchirsan nawre. 3Ikkegon ai anna kidir haja malegi seregir uru gijirsin nawite, wer wekked irgi bibajtidirrin, 4wo andolida Taüfilus, er iyirinna jiradilo werechi er gijirsini alechi erangi.
5Hirudus Yahudichina orna ugrosir fegir wer dasum. Tenn erigon Zakariyay esan. Abiyana bagdirton esum. Wide tenn engon Harunna burwirton esum. Tenn erigon Elisabat esan. 6Owingari serechi esan artin owollo. Guymen talebusan artina sheria maler wide tenn amur kamillogon. 7Wala affigi kokomnan. Mine Elisabat mir esinged. Owingarigon durwi esan.
8Zakariyana ugrosi bidarangad, tidder artin owollo kute tebos fegiri aawrangi awiry an, 9kulugon tendogor digrosingad, jamar tosum, artigi bahurki talgetirri an. 10Gebila jamebul male bochiged salingon tebsum bahuma wattir.
11Artina malaika bahuma dadina iyinneged tekki beltirsum. 12Tekki nalos Zakariya sarke wer tendogor digirsum. 13Malaika tekki wetirsum: „Sarkimen, wo Zakariya. Mine er wesini gijirtakkossan. Wide enn en Elisabatton ekki tod wekki buskitirin. Wide Hanay an tenn erig undurkan. 14Ekkon guratti dul wer barin. Widegon digrichi weri bigurekandan tenn uskarked. 15Mine ter bidulanin artin owollo. Wala hamur wekkon wala nadi wekkongi binimnum. Tinenna turtongon newerti gadisebulged beyebukanin. 16Wide digrichi werigi Israeln affichirton artig abidi biwidegrirkanin. 17Wide tenn owollo bitalekanin Eliyana newertigon wide tenna shidagonged. Timbabin achigi tonig abidi biwidegirkanin, wide monbuligi serechin erigk abidi, gebila sewa wekki artigi awtirri an.“ 18Zakariya malaikagi wetirsum: „Won mine ingi ai biyirrin? Aigon ann engon durwiy erungon.“ 19Malaika widegir wetirsum: „Ai Jabraïl terrin, artin owollo kute tebil, wide ishinbul, ekki wetirri an, wide tekked ekki beshireri an. 20Elekengon ahan er bimumdanin. Wala eskergi bibainmunum, in, ai ekki wetirsini, ta nogranbokon. Mine er anna weregi mursigringad, tenn ugrosir bitanogilgi.“
21Gebilagon Zakariyagi urwedagsum. Wide tenna batyad jaman tur nosoyaningad ajebir dabusum. 22Bel bidargi eske tirgodon bainidti marossum. Tir iyirsan ter ugnutti wekki jamar nalsingi. Ter wide amaraged tirgodon abainsum. Wide mumdan kewidsum. 23Ter ajelisinin ugrosi bajrangad tenna kagir nogsum.
24Man ugrosin aharro Elisabat, tenna en, mewansum. Ama shahar dicchi bokkiredagsum. 25Wide wesum: „Ikke teran aiged arti awsum ugrosi ter aigi nalsinder, anna aïradti zolin barerton dukiry an.“
26Shahar gorjittir arti malaika Jabraïlgi neja Jelildi werro ishinsum, Nasiray an webul werro, 27burfeta ogij Dawudna karton tekki hatbedagsin wernai. Ogijn erigon Yusif esan. Burfetan erigon Meryem esan.
28Malaika tennai torgi wide wesum: „Salam, wo tir endogor gendel! Tir ekkodonu!“ 29In werechigodon Meryem sarkos wide tennewertigodon bain wesum: „In salam min terre?“ 30Malaika tekki wetirsum: „Sarkimen, Meryem. Mine er seregidti artin awtir elessum. 31Elekengon er mewan tod wekki buskin. Tenn erigon Yesuw an undurkan. 32Ter bidulankanin wide tekki tir dogondina todt an buwekandan. Wide tekki arti Dawud timbabna kursigi bitirkanin. 33Dimen bokon oran Yagubna kan dogor bikewidkanin. Wide tenna mulki bikelkiyanin.“ 34Mani wattigi Meryem malaikagi wetirsum: „Won minegon in bitanogin, ogij wekki iyirmendingon?“ 35Malaika wide widegirtirsum: „Newerti gadisebul endogor bikuten. Wide tir dogondina gudra ekki bitagrin. Ini jiradilo teran eddeton buskitakkil gadisebul buwetakkin, artina tod an. 36Ahangon Elisabat, enna ehel, tod wekked mewum, tenna durukaner. Elekengon tenna shahar gorjittir dabun, man mirm an awesanna tirti. 37Mine wekkongon artinai gasimnum.“
38Meryem wide wesum: „Ahan ai tirna nogogi, enna were nawre awtakkiden agad.“ Tennaiton malaika wide nogsum.
39Meryem man ugrosir turungeged imbelligi gunachig abidi Yahudiyena neja werro jusum. 40Wide Zakariyana kar tosum. Wide Elisabatti salamgi tirsum.
41Elisabat wide Meryemna salamgi gijirsingodon affi tenna tur warijsum. Wide Elisabat newerti gadisebulged eyos 42wide hisi dul wekked uwe wesum: „Er ecchin barer barkebun. Wide enna tuna terigon barkebun. 43Won sayerton aigi tadenu anna tirtina tinen annai atan? 44Gijir, enna salam ann ulgir tosingodon affi anna tur gurattiged warij wadaisum. 45Barkebun amnerelna tirti, arti tekki wetirsingi bitanogn an.“
46Meryem wide wesum: „Annewerti artigi asoken. 47Wide gurattiged beressum arti aigi aosilged. 48Mine tenna nogona kinagidti urungad. Ahan elekenton jili male aigi bibarkeran. 49Mine gudrakol aiged dulkanegi awsum. 50Tenn erigon gadisebun. Tenna rahmagon jilna jilbokonum tekki asarkilin dogor. 51Shidagi tenna iged awsum. A dulkonigi gulosirsum. 52Duligi kursichin dogorton shugudos wide kinatonigi sokeirsum. 53Origbuligi herked berkidos wide berbuligi sudir talekidirsum. 54Ter Israel tenna todti jamegirsum, tenna rahmagi jilos, 55antimbabigi wetidirsin nawre, Ebrehingon wide tenna diriyegongi dimen bokon.“
56Meryem mando tegsum tennai shaliar toskirigi wide tenna kagir wide bidasum.
57Ama Elisabatna uskarna ugrosi timosrangad tod wekki uskisum. 58Tenna kan arichigon wide awtindichigon gijirsan arti tekki desen sokesingi. Tekkodon wide guresan.
59Ugros idwittir tasan, affigi jilbagi mertirw an. Wide affitodti timbabn eriged uwesan. Tinen widegir wesum: „Ilah an. 60Hanay an teran buwetakkin.“ 61Tekki wetirsan: „Wekkon inna kar damnum, in eriged uwebul wer.“ 62Tir wide timbabki amaragi awtirsan: „Er mine awersin uwerangi?“ 63Ter wide amaraged loh wekki werissum. Wide tendogor bajsum: „Tenn eri Hana term an.“ Male wide ajibesan. 64Tenna saayen tenna agil kustakki wide tenna nedton bain artigi barkesum. 65Wide sarke wer tinna kan arichi malen dogor digirsum. Yahudiyena gunachi malergon in habar agudeged abainsan. 66Wer nutin gijirsingi tenna ar jamegred wide wesum: „Min weran in affitod biturubkanin? Artina i tekkodon esum.“
67Wide Zakariya, tentimbab, newerti gadisebulged eyos nebye wesum: 68„Barkebun arti, Israelna tir. Mine tenna gebilagi jile duk osarki awtirel, 69wide argi nishi aosil wekki ebirdecchirel, Dawud tenna todna kar, 70tenna nebichi gadisebulin agilged waïrton bainsin nawite: 71Argi anna aduwichirton wide argi atisili malen irton aosirin, 72rahmagi awiry an antimbabigodon, wide tenna waad gadisebulgi jileri an, 73jodti ter Ebrehin antimbabki jodtirsingi, tekked argi adecchirsum: 74sarkekiyir tekki abderungi, anna aduwichin ichirton duki belburangon, 75wide tenn owolged nume talerungi seregidir wide alegidir, anna ayarn ugrosi maler.“
76„Won ekkon, wo ogicchod, tir dogondina nebiy an buwetakkin. Mine er artina koin owolgi barin, tenna darubki sewagirinna joro. 77Er tenna gebilagi duki belarki bamintirin tinna zenbichina komsarked. 78Ama tir tenn a jagadted argi jilosir dogogedton dawiged burwirin, 79dulumar agiligon wide diarn enenur agilin dogorgon dawer an, widegon anna osichigi gendarna darbir talekid an.“
80Ama affitod keyka akogoransum newertiged. Wide halachir esum Israelgi bel ta abidinbokon.
Селектирано:
Luka Enjil 1: XNZ1912
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Published by the British and Foreign Bible Society in 1912.