Milʉ́mlʉ́ 1
1
Yésʉs lɨ́ ekɛʼ bʉ̂r o mílʉ́mlʉ́ bé Sísǐm mé Nzyɛ̌m
1Théophile, mɨ́ɔɔ́ wǎm!
Ɨ́ mekaná mé ésôʼ mé á nyɛɛ cɛma go má, me á si lɛ́ɛ sá yɨ́yɛ̂h Yésʉs á sâ, le elɛ̂ʼle, duho ɨ́ menyɛ̌l, 2tó pyâl pyáláa ɨ́ móhó nyé á bɨ́nɔɔ ɨ́ jʉ́o kʉ́ wɨ́. Nye dína apǎ bɨ́nɔɔ ɨ́ jʉ́o kʉ́, nye á si líʼe bʉr o mílʉ́mlʉ́ bé, nyé á twâr bá, etié e nzɨ̌ Sísǐm mé Nzyɛ̌m. 3Jɔʼ nyé á sil esia e mitúú, ntɔ̂ʼ dwe yɨ́, nye nzě pah, duho lɨ́ odwe, nzě lɛ̂ʼle bʉ̂r o mílʉ́mlʉ́ bé nyʉ̂l nyé e nzɨ̌ bijwɨʼ ɨ́ buo buo, ó bé gʉ́ŋaa tyeetye ó, nye á kʉ be ó kublakúbla. Ɨ́ melû mekám ménâ maá, bé e boo nɔ́ɔ́ ó b'á bɨbe. Nye á lɨlɛ́ɛ bé ó, milɔ̌b mi Mpóʼo mé Nzyɛ̌m. 4Ɨ́ gúú móhó bé e boo nɔ́ɔ́, bé á be lɨ́ ede wɨ́, nye e bé ó: «Aduho gá Yerʉ́zalɛm, tô lɨ́ ejaa. Bɨ̌n a bónó sá Sɔ́ŋ wǎm á kɛʼ bɨ̌n yɨ́: yé ó sá mé á lɛ́ɛ bɨ̌n yɨ́. 5Ebě, Yʉánɛs nyɨɛ á dudu bʉr ó e medíbé. Yɨ́ kǎ lîʼ njɨ bwá mélû abuo, bɨ̌n bé ókǎ duŋɔɔ ó e Sísǐm mé Nzyɛ̌m.»
Yésʉs lɨ́ ebɨ́nɔɔ kʉ́
6Nó ɨ́ jɔʼ bé á be, bé mû bé omér yɨ́, bé ntɔ̂ʼ dî e Yésʉs ó: «Dâ ɛ̌, nzê ɨ́ jɔʼ yɨ̂ʼ ó gó ngá báʼǎ tyêl sí Ɨ́zraɛ̂l ɛ̌?»
7Yésʉs ntɔ̂ʼ yala e bé ó: «Bɨ̌n bé ajala le egʉ́a bíjɔʼ le mimbû Sɔ́ŋ wǎm ngá sâ bísyɛ́ɛla byé bí. Ebě, Sɔ́ŋ wǎm mʉr tɨ̂ʼ ó b'á tyêl bijɔʼ byaá e nkul jwɨ́ɨ́ yé nye mʉr tɨ̂. 8Bɨ̌n bé óbi nkûl ɨ́ jɔ̌ʼ Sísǐm mé Nzyɛ̌m ngá sulo bɨ́n ɨ́ menyʉ̂l yɨ́. Nó ó bɨ́n ngá boʼlo mílɔ̌b myâm, táare ɨ́ Yerʉ́zalɛm, le ɨ́ mekwár mé sí Yʉ́da mɨ́mɛ̂h, ndu e maá mé sí Samarî, tó pyâl ɨ́ medumo mé sí mɨ́mɛ̂h yɨ́.»
9Jɔ̌ʼ Yésʉs á sil elɛ́ɛ milɔ̌b myaá yɨ́, nye nzě bɨ́nɔɔ ɨ́ jʉ́o kʉ́ ɨ́ míh mɔ́ɔ́. Píe tɨ̂, dwiné nzě búblo nyê. Nye ntɔ̂ʼ dîm bé ɨ́ mîh.
10Bé dína mîh lɨ́ edwɛ̂ʼ kʉ́, lɨ́ ebeě mpʉ̌ Yésʉs á bɨ́nɔɔ kʉ́ yɨ́ nɛ́ɛ: bé kǎ twɨra ó, bʉr obá, bé ɨ́ mempah me nyʉ̂l e mikán ɨ́ pan pan. 11Bʉr baá ntɔ̂ʼ lɛ́ɛ e bé ó: «Bʉr ó Galilê, bɨ̌n di náǎ lɨ́ edwɛ̂ʼ jʉ́o kʉ́ ɨ́ di di di ɨ́ yé? Yésʉs, mʉr pɛʼɔɔ ɨ́ sɔ́má yɨ́n nyá, óbáʼǎ nze ó, mbi ngwár e ngwár bɨ̂n bee nyé lɨ́ ebɨ́nɔɔ ɨ́ jʉ́o kʉ́ nɨ̌.»
12Bʉr o mílʉ́mlʉ́ bé, bé ntɔ̂ʼ nyɛl ékɔ́a écwɨ̂ʼ bé jɨ́jébé ó, “Ecwɨ́ʼ lé ólivier” lɨ́, nzě tóŋɔɔ̌ Yerʉ́zalɛm. Tyen yɔ́ɔ́ yaá, yé á be ó kúnókúno e kíloméra ngwár, bím tyen mʉ̂r dí e nkul etye ɨ́ dʉ́ó é sábat yɨ́. 13Jɔʼ bé á pyâl gʉ̂ʼ yɨ́, bê nzě bére ɨ́ ntɔ́ɔ tólóm mbɛ̌r bé á boo didi tɨ̂ʼ nyɨ́. Bé á be ó: Pétrus, Yʉánɛs, Jacques ti e André, Philippe ti e Thomas, Barthélemy ti e Matthieu, Jacques, mwân mé Alfê, Simon “Kɔmlʉ kwár” ti e Yʉ̂d, mwân mé Jacques. 14Bɨ́bɛ̂h, bé á sisyɛŋa léme ngwár ó, bé tirwo ó e syɛ́ɛ́ mínjɨʼla. Tɨ̂ʼ ntémé, yé á be ó le obûʼla o bʉ́bá, le nyɔ̌ŋ mé Yésʉs, Maria, ti e bɨ́ɔɔ́ le okɛ́l mé Yésʉs.
15Ɨ́ tíl mélû yaá mpʉ óbûʼla nter e mekám mébá, bé á syɛŋa yɨ́, Pétrus nzě mɔa sí, tyɛ̂b témé entumo e bʉ̂r énɨ̌ memɛ̌n. Nye ó: 16«Bɨ́ɔɔ́ bâm! Okɛ́l bâm! Yé á jala ó, sá Sísǐm mé Nzyɛ̌m wé á lɛ́ɛ ɨ́ nzɨ̌ mé David yɨ́, yé díraa. Yé á be cɛmá ó, ɨ́ lɔ̌b mé Yʉ́das, mʉr á to le etɨ́e bʉr nzɨ̌ etó mɛ̂r Yésʉs nyá. 17Nye ntémé á be ó mʉr ngwár ɨ́ sɔ́má gá yɨ́ná. Nye ntémé á si bi nkɔb ɨ́ syɛ́ɛ́ gá yɨ́ná yɨ̂.»
18(Náǎ yé ó, ɨ́ mɔnɨ́ Yʉ́das waá á bi tâŋ myɛ́na duho ɨ́ bɨ́blǎ syɛ́ɛla yé yɨ́, nye á be ó sí tó bwâm pemé. Ɨ́ pemé gwár yaá, nye nzě jéʼe éduma sí mbûmbǔr, mo wé ntɔ̂ʼ bʉ̂l, bisá bí mo bíbyɛ̂h kʉ̌l e kʉ̌l ɨ́ lwɨ́ʼlɨ́ lwɨ́ʼlɨ́ sí e sí. 19Bʉr ó Yerʉ́zalɛm bɨ́bɛ̂h, bé á si jóʼo lɔ́ɔ́ éswie laá. Nó ó bé á ka jwɨr pemé yaá ɨ́ lwǐb yɔ́ɔ́: “Akɛ́ldáma”. Díe laá, lé páʼlɔ́ɔ́ ó, “Pemé métié”.)
20Pétrus nzě lɛ́ɛ ntémé ó: «Ebě, yê cɛmá lɨ́ oSâm mé David ó:
“Mbɛ̌r wé, wé líʼɨɨ gumo.
Mʉ̌r sá akǎ báʼǎ di tɨ̂.”
Yé ntémé, yê cɛmá ó:
“Nyʉ́ʉ́ mʉ̂r, nye nʉ́aa
dǐ tyɛ̂b esôʼ yé.”
21-22Nó yé jala ó, nyʉ́ʉ́ mʉ̂r ɨ́ sɔ́má gá yɨ́ná bâʼraa e bɨ̌h, bʉr o mílʉ́mlʉ́ mé Yésʉs. Nye ntémé tôʼ le ebʉboʼlo ó, Tî Yésʉs, nyɨ́ pah, duho lɨ́ odwe. Mʉr waá, nye ɨ́ jala le ebe mʉ̂r sɔ́má yé á dudû Tî Yésʉs nyá. Nye díʼee mʉr á tiʼe e mɨná gâ, táare ɨ́ jɔ̌ʼ Yʉánɛs á du Yésʉs ɨ́ díbé Yɔrdên, tó kumo ɨ́ jɔʼ nyé á bɨ́nɔɔ ɨ́ sɔ́má gá yɨ́ná yɨ́ nyá.»
23Bê nzě pɛ̂h bʉ̂r obá: nyâ, díé lé Yóseb, waá bé á jwɨr Barsabâs nyá. (Lʉ́ʉ́ díé lé, lé ó Yʉstʉ̂s.) Nyʉ́ʉ́, lé díe, Mathias. 24Nó ó bʉ̂r ó gwɨ́hlá bɨ́bɛ̂h, bé á jɨʼla e Nzyɛ̌m, lɛ́ɔɔ ó: «Dâ ɛ̌, go ó dí egʉ́a mílémé mí bʉ̂r bɨ́bɛ̂h. Lɛ́ʼláá bɨ́h ɨ́ sɔ́má bʉ̂r obá bâ, waá gó á pɛ̂h nyá. 25Ebě, nye ɨ́ jala le enʉǎ dǐ Yʉ́das á dímle lɨ́ etó kœ̌b dǐ yé á jʉ́ʼa e nyɨɛ yɨ́. Nyɨ́haá ó ngá tô e syɛ́ɛ́ lʉ́mlʉ́ dóló.» 26Nó bé á nze do ebya, lɨ́ epɛ̂h nyʉ́ʉ́ mʉ̂r ɨ́ sɔ́má bʉ̂r obá baá. Ebya nzě twâr Mathias. Nó ó bé á ka nze láa nye mʉr jálá le ebâʼra e sɔ́má bʉ̂r o mílʉ́mlʉ́ kám e ngwár nyá yɨ́.
Селектирано:
Milʉ́mlʉ́ 1: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се