Milʉ́mlʉ́ 2
2
Nzéá Sísǐm mé Nzyɛ̌m
1Ɨ́ móhó Paŋtekôt, obûʼla bɨ́bɛ̂h, bé á be ó nzyɛŋá, gúmo gwár. 2Tyé e tyé yaá, duú ɨ́ bwaʼ bwaʼ nzě duho ɨ́ jʉ́o kʉ́, nwɨɨla e duú nkúo-mbɛ́ʼ-mímbû. Yé á si dibe mbɛ̌r waá wɨ́wɛ̂h, gúmó bʉ̂r bɨ́bɛ̂h, bé á be mindîndǐl yɨ́. 3Bé ká dwɛ̂ʼ nɛ́ɛ: bé bee ó, byúú bísɔ̂ʼ, nwɨɨla e bwá mínjʉl mí siʼe. Bisɨ́ǎ byaá, byé ntɔ̂ʼ cɨcɛma, nzě didi bʉ̂r bɨ́bɛ̂h ɨ́ menyʉ̂l. 4Bɨ́bɛ̂h, bé á be ó, bé mû lwɨ́ŋlá e Sísǐm mé Nzyɛ̌m. Bé ntɔ̂ʼ táare élwib bílwǐb biswîh, byaá Sísǐm mé Nzyɛ̌m wé á dwe bé nkul ó, bé lwíbɨɨ bí.
5Tɨ̂ʼ Yerʉ́zalɛm, yé á be ó le oYúden bé á be otîtyěl o bʉ̂r bá. Bé á byɛ̂l ó, ɨ́ bikúl bíbyɛ̂h bi dí ɨ́ sí yɨ̂ʼ bí. 6Jɔʼ bé á jóʼo duú yaá yɨ́, bê nzě swâl gúmo gwár yaá, minum mimběʼ, ebě, mʉr nyɨnyɛ̂h ɨ́ sɔ́má yɔ́ɔ́, á si jóʼo milɔ̌b mé Nzyɛ̌m ɨ́ lwǐb yé. Milɔ̌b mé Nzyɛ̌m myaá, myé á cɨɨ ó e nzɨ̌ nyʉ́ʉ́ mbûʼla lwǐb swîh. 7Bé á si bu kâm, mepɨʼ dîm bé ɨ́ milʉ̂. Bé ó: «Bʉr bɨ́bɛ̂h o dí elwib bâ, bé abe bʉ̂r ó Galilê ɛ̌? 8Yé bé nó wá, á mʉr nyɨnyɛ̂h ɨ́ sɔ́má gá yɨ́ná báná jóʼo nyʉ́ʉ́ mʉ̂r lɨ́ elwib ɨ́ lwǐb nyɨ́ɛ á byɛ̂l tɨ̂ʼ yɨ́, ebe yé ɛ́? 9Ɨ́ sɔ́má gá yɨ́ná yɨ̂, yé ɨ́ buo báájaá-dwih. Bâʼ tó tɨ́lwa ɨ́ mesí mé Pártia, le Mêd, le Elam, le Mezopotamî, le Yʉ́da le Kapadosía. Bʉ́ʉ́ duhǒ sí Pɔ́ŋtos, le yaá Azía, 10le Frigía, le Pamfilía, le Egɨ̂ptɛn ndu e Libî, dí kúnókúno e Sirénia yɨ́, ti e bʉr o b'á duhǒ Rôm bá. Yé ntémé, yê le oYúden ti e bʉr o bíkûl dí ejɨ̂ʼ yébé gá wɨ́ná bá; bʉr ó Krɛ̂t le baá ó Arabî. 11Sá ékâm, yé ó: mɨná gá óbɛ̂h, bé lɨ́ ejóʼo bé lɨ́ elwib ɨ́ bilwǐb gá bíná, dumo e bisyɛ́ɛla bínɨ́nɨ́ɨ́ mé Nzyɛ̌m.»
12Bɨ́bɛ̂h, bé á si kâm, akǎ be e mepɨʼ ɨ́ milʉ̂. Bé ntɔ̂ʼ díila páʼ nyɔ́ɔ́ ó: «Wáǎ mbǐ lɔ̌b wɨ̂?» 13Sâ gwár, bʉ́ʉ́, bé á be ó lɨ́ epya óbûʼla. Bé ó: «Bé mû ó lɨ́ epuro ményoʼ!»
Lɔ́ɔ́ mé Pétrus
14Nó ó Pétrus á nze tyɛ̂b tîtyěl, bé e bʉr o mílʉ́mlʉ́ kám e ngwár, nzě bɨ̂n twíí kʉ́. Nye le entumo e bʉ̂r laá ó: «Bɨ̌n oYúden, le bʉr bɨ́bɛ̂h o dí edi ɨ́ Yerʉ́zalɛm bá, gʉ́ŋáá gá lɔ̌b wɨ̂. Bɨ̌n a kʉ́ gwá jôʼlǒ sá múo nzě lɛ́ɔɔ bɨ́n yɨ̂. 15Ebě, bʉr o bɨ́n dí ebee bâ, bé apuro ményoʼ mpʉ bɨ́n dí ejwɨ̌ʼ nɨ̌. Dʉ́o, lé dína ó, mewala ebǔ mé mɛ́n. 16Ebě, lɔ́ɔ́ ngwíha milɔ̌b Joɛ̂l á boo cɛma wɨ́, wɨ́ dira mûh. Nye á cɛma ó, mbi wɨ̂:
17“Nzyɛ̌m á lɛ́ɛ ó:
Ɨ́ melú mé ósûʼla má,
me óntɨh bʉ̂r bɨ́bɛ̂h Sísǐm wâm.
Bwá ó bʉbá, le bwá ó bʉrʉ̂m bɨ́n,
bé ógwîh mílɔ̌b myâm.
Biloʼo bín, byé óbee mísolá bísɔ̂ʼ.
Minjʉ̌m mín, myé ójɨm bílíma
bi dí edumo e bisá ngá syɛ́ɛ bí.
18Yé ó nó:
ɨ́ melû maá,
me óntɨh ósyɛ̂l o mésá bâm,
bʉbá le bʉrʉ̂m, Sísǐm wâm.
Bé ógwîh mílɔ̌b myâm.
19Me ósâ bísá bí ékâm,
le mesimá ɨ́ jʉ́o kʉ́, le ɨ́ sí tʉ́ŋlʉ̌.
Metié, le siʼe, le dwiné dúluu, byé ónyɨ̂n.
20Njʉl dʉ́o, wé ódwira édúrʉ́ʉ́.
Álomó óbe ó ɨ́ cʉʼ, mpʉ nyʉ̂l metié.
Bisâ byaá, byé ósyɛ́ɛ ó,
elú mé Dâ apǎ pyâl.
Móhó waá, wé óbe ó móhó nɨ́nɨ́ɨ́ le waá kûm.
21Nó, mʉr nyɨnyɛ̂h ósâ mínjɨʼla lɨ́ etwóolo díé mé Dâ Nzyɛ̌m nyá, ótiʼe.”
22«Bʉr o b'Ɨ́zraɛ̂l, jóʼlááá gá sá mé dí elɛ́ɛ bɨ́n yɨ̂: Yésʉs, mʉr Nazarɛ̂t, á si sâ mesimá me nkûl ti e bisá bí ékâm. Nzyɛ̌m á sâ bisyɛ́ɛla byaá ɨ́ mebó mé nó ó, nye nkʉ̂ lɛ̂ʼle bɨ́n mbi mʉ̂r Yésʉs á be wɨ́. Byé á sáŋɔɔ ó, bɨ̌n bɨɛ lɨ́ ebee, mpʉ bɨ́n bʉr o tɨ̂ʼ dí ekʉ́ gʉ́a yɨ́. 23Mpʉ̌ Nzyɛ̌m á boo tíʼe ɨ́ lémé wé yɨ́, nye á kpɛl ó, nye dwêʼ bɨ̌n nkul emɛ̂r Yésʉs. Nó bɨ́n bɨɛ á tímle nye ɨ́ mebó mínjéʼe-Nzyɛ̌m, míɛ nzě bomlo nyé e binzâŋ, bɨ́nɔɔ nyé ɨ́ kolôs kʉ́, jʉ́ŋɔɔ nyê. 24Nzyɛ̌m nzě pɛh nyê, pɛʼ nyé ɨ́ mekpaa mé éswie, ebě, eswie, lé á bé agwá mɛ̂r nyé kɔ́m kɔm. 25Ebě, David nyɨɛ á lɛ́ɛ ɨ́ lɔ̌b wé ó:
“Me á be lɨ́ ebeě Dâ Nzyɛ̌m bijɔʼ bíbyɛ̂h ɨ́ mpǒm nyǎm.
Nye lɨ́ ekamle e me lɨ́ epéne,
ebě nye lɨ́ esúʼo mé, lɨ́ emɛ̂r mbó éjʉ́m wâm.
26Sɨ́ǎ yaá ó lémé wâm mû sí lóno ɨ́ bisʉhʉʉ yɨ́.
Mekǎn mâm ntémé, maá me bísʉhʉʉ.
Lémé wâm, wé ólóno ɨ́ mpûʼla,
le esâ ó, nyʉ̂l nyǎm díʼee ɨ́ ntuuu.
27Ebě, go ákóʼó bîr sísǐm wâm ó,
wé líʼɨɨ kwár odwe.
Nó ntémé, go ákam ó,
Mʉr gǒ dí ti nyá bôʼ ɨ́ soo.
28Gʉ́ lɛ̂ʼle mé nzɨ̌ twiʼ.
Go ókǎ lóŋlǒ lémé wâm e bisʉhʉʉ
ɨ́ jɔʼ mɨ́ná óbeela mémpǒm yɨ́.”
29«Bɨ́ɔɔ́ bâm! Okɛ́l bâm! Me páa lɛ́ɛ bɨ́n ɨ́ hwɨ́m sá dí tyeetye ɨ́ lɔ̌b mpám gá yɨ́ná David yɨ́. Yé ó: nye á si dwe, debe. Nó soo nyé, nye dína ó tɨ̂, kumo mûh ɨ́ dʉ́ó lɨ̂. 30Mpʉ̌ David á be ngwíha milɔ̌b yɨ́, nye á be ɨ́ boó gʉ́a ó, Nzyɛ̌m á si kɛʼ, ntaa mínkâl ó, nye ópɛ̂h nyʉ́ʉ́ mʉ̂r ɨ́ bʉr o mpóʼo nyé, dil nyé ɨ́ diá jwɨ́ɨ yé. 31David á si boo bee sá yé á be ó, yé ópyâl yɨ́. Nó nyé á nze lɛ́ɛ lɔ̌b épah e sóo mé Mʉ̂r Nzyɛ̌m á lœm múló mé jwɨ́ɨ nyá yɨ́. Yé á be ó, jɔʼ nyé á cɛma ó:
“Nye á bé alíʼɔɔ kwár odwe.
Nó ntémé ó nyé á be abo” yɨ́.
32Yésʉs waá ó Nzyɛ̌m á pɛh, dwih lɨ́ odwe nyá. Lɔ̌b wé ó bɨ́h dí eboʼlo bɨ́n wɨ̂. 33Nye á si bére, tó di sí ɨ́ mbó éjʉ́m mé Nzyɛ̌m. Nye ó b'á ntɨh bɨ̌h Sísǐm Nzyɛ̌m Sɔ́ŋ á kɛʼ bɨ̌h wɨ́. Sâ gwár e gwár yaá ó bɨ́n mû lɨ́ ebee le ejóʼo yɨ́. 34Ntʉ̌ David mʉr tɨ̂ʼ á bére kʉ́. Nye á lɛ́ɛ ó: #2.34: Nye á cɛma nó ó, ɨ́ Sâm 110.1.: Dâ Nzyɛ̌m á lɛ́ɛ e Tî wǎm ó: “Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ, 35tó pyâl ɨ́ jɔʼ mé ósâ óntɨ̂m le obɨn bô ó, bé díʼee tyélátyéla mékʉ̌ yô yɨ́.”
36«Bʉr bɨ́bɛ̂h o dí wâʼ ɨ́ sí Ɨ́zraɛ̂l bá, bé lɨ́ ekʉ́ gʉ́ǎ lɔ̌b waá: Yésʉs waá, nye ó bɨ́n á jʉ̂ lɨ́ ebomlo nyé e binzâŋ, bɨ́nɔɔ nyé ɨ́ kolôs kʉ́ nyá. Nye ó Nzyɛ̌m á tyêl Tî gá wɨ́ná, waá nyé á lœm múló mé jwɨ́ɨ nyá.»
37Jɔʼ éntumo e bʉ̂r, lé á jóʼo mekǎn maá yɨ́, mé ntɔ̂ʼ mɛ̂r bé ɨ́ milémé myɔ́ɔ́. Nó ó bé á dî e Pétrus, bé e bʉ́ʉ́ bʉ̂r o mílʉ́mlʉ́ ó: «Bɨ́ɔɔ́ bɨ́h, bɨ̌h bé ɨ́ jala le ekǎ sâ nyá ɛ́?»
38Nó ó Pétrus á yala e bé ó: «Túmáá gá mikoo e misyóm mín. Bɨ̌n a dwírá míléme. Mʉr nyɨnyɛ̂h ɨ́ sɔ́má yɨ́n, nye dúŋɔɔ ɨ́ díé mé Yésʉs-Krîst, Nzyɛ̌m pɛ́ʼɛɛ nye bibaa bí ébébe nyé á niʼe nye bí. Nó ó bɨ́n ngá kǎ nʉǎ sá Nzyɛ̌m á boo kɛʼ bɨ̌n yɨ́: Sísǐm wé. 39Ebě, nkɛ̌ʼ mé Nzyɛ̌m, nye tɨ̂ʼ ó, lɨ́ esú lɨ́n, ndu e bwán bɨ́n, ndu e baá bɨ́bɛ̂h dí lɨ́ ejaa bá, le baá bɨ́bɛ̂h Dâ, dí Nzyɛ̌m gá wɨ́ná nyá, ngá jébe bá.»
40Pétrus nzě báʼǎ boʼlo bé myúú mílɔ̌b ɨ́ buo buo, le etô le egbâ bé nkul ɨ́ miléme. Nye ó: «Biʼee gá twiʼ. Bɨ̌n a dí e ncɛrá le onzyɛ́h ó bʉ̂r ó myǎ bʉ̂r wɨ̂.»
41Buobuo bʉr ɨ́ sɔ́má yɔ́ɔ́, bé ntɔ̂ʼ kǎm sá Pétrus á lɛ́ɛ yɨ́, ntɔ̂ʼ duŋɔɔ. Ɨ́ móhó waá, kúnókúno e bʉr otɔ́ɔ́sin olɛ̂l, bé á si nî ɨ́ sɔ́má óbûʼla. 42Bé á be lɨ́ ekʉ́ sâ sɨ́n jɔʼ yɨ́yɛ̂h lɨ́ etó jóʼo mílɛ́ʼlá bʉ̂r o mílʉ́mlʉ́ bé á dwidwe bé mí. Bé á didi ntémé ó, nzyɛŋá, bɨ́ɔɔ́ e bɨ́ɔɔ́ tʉ́ŋlʉ̌, le edɨde ntémé gúmo gwár, le ejɨjɨʼla e Nzyɛ̌m.
Twǐʼ Mbɛ̌r-Nzyɛ̌m
43Bʉ́á kʉ́ nzě mɛ̂r bʉ̂r bɨ́bɛ̂h, tɨ̂ ɨ́ bisyɛ́ɛla bí ékâm ti e mesimá ɨ́ buo buo bʉ̂r o mílʉ́mlʉ́ mé Yésʉs, bé á sɨ̂sa bí. 44Bʉr bɨ́bɛ̂h o b'á bûʼla bá, bé mû ó sâ gwár; bibi bísá byɔ́ɔ́ gúmo gwár, bɨbaʼlɔɔ mébi mɔ́ɔ́ mpúhlá. 45Bé á be lɨ́ ebɛ́ma bípéh bísí byɔ́ɔ́ e mebi mɔ́ɔ́ mɨ́mɛ̂h, nzě kablɔɔ bímɔnɨ́ bi tɨ̂ʼ páʼ nyɔ́ɔ́, mʉr nyɨnyɛ̂h nʉnʉǎ mɔnɨ́ yaá, dû mpʉ bígwɨ́má byé, byé á be yɨ́, nzě de byê. 46Bé á be lɨ́ esâ sɨ́n jɔʼ yɨ́yɛ̂h lɨ́ etô mpáh Nzyɛ̌m, bɨ́bɛ̂h e léme ngwár, le epɛ̂ʼlǎ blêr ɨ́ mimbɛ̌r myɔ́ɔ́, le edeŋɔɔ méde mɔ́ɔ́, milémé myɔ́ɔ́, myé osí lóno ɨ́ bisʉhʉʉ. Myé á bé abě mbáʼrá e mikóo. 47Bé á bɨbe ó, lɨ́ edwě Nzyɛ̌m kûm. Sá tɨ̂ʼ ó bʉ̂r bɨ́bɛ̂h, bé á bu kpɛl bé yɨ́. Dʉ́ó lɨ́lɛ̂h, Tî Yésʉs á be lɨ́ edwe bʉ́ʉ́ bʉ̂r twiʼ, le ekɛl bé ɨ́ Mbɛ̌r-Nzyɛ̌m.
Селектирано:
Milʉ́mlʉ́ 2: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се