Yohana 19
19
1Bilatus pǝlǝa tsǝa à kwak Yesu nǝ kamso. 2Asoje marǝki zwe kǝla mbulan-murǝm sǝ à oasǝi Yesu a ɓamuri. À turi wi daura ulang mala amurǝma a rǝì, 3sǝ à kǝ nyarke a ɓadǝmbǝi à kǝ ne wi cau ɓangginǝban ama, “Ɓǝ̀ rǝo pwalo, we murǝm mala amǝ Yahudi!” Sǝ à nǝ̀ koe a ɓamǝsǝi nǝ ɓabuia.
4Bilatus pǝlǝa pur ɗǝm aban aɓwana-mǝgule mala amǝ Yahudi sǝ nea wia ama, “Wu kwaki kir wun! Mǝ ndo mǝ nǝ pusǝì, mǝ nǝ yinǝi aban wun, sǝa ma wu sǝlǝ ama mim ngga ǝn kumi nǝ ɓe kǝ cauɓikea ɗang.” 5Pǝlǝa Yesu pur abania anza, nǝ mbulan zwe a muri andǝ daura mala amurǝma a rǝì. Sǝ Bilatus nea wia ama, “Ɓwe nia ka!”
6Lang agbani pǝris andǝ amǝyal Ndàmǝgule nǝ̀ sǝni ka, à loasǝ gia a kuli à na ama, “Gballì a nggun-gangndi! Gballì a nggun-gangndi!”
Bilatus na ama, “Wu twali la, wu kya gballì a nggun-gangndi nǝ ɓamur rǝ wun! Acemǝnana mim ngga ǝn kumi nǝ ɓe kǝ cauɓikea ɗang.”
7Pǝlǝa aɓwana-mǝgule mala amǝ Yahudi eari wi ama, “Aɓa nggurcau ma'sǝm ngga, ɓoaro ɓǝ̀ wú, acemǝnana twal ɓamuri ama yì ka, Muna mala Ɓakuli na!”
8Lang Bilatus nǝ̀ ok man yì cau ka, gir nî pe wi ɓangciu kǝrkǝr. 9Pǝlǝa nyesǝ Yesu wari nǝi aɓa palta ɗǝm sǝ ɗi ama, “We ka, a pur a ya ban le?”
Sǝ Yesu ka duk kuni piu, pǝlǝi wi kǝ cau ɗang. 10Bilatus banggi wi ama, “A pà nǝ nam cau ɗang? A sǝlǝ mbak ama mǝ ndanǝ rǝcandǝa mǝ nǝ panzǝo, ko mǝ nǝ tsǝa ɓǝa gballio a nggun-gangndi?”
11Yesu eari wi ama, “A pà nǝ kum rǝcandǝa a muram ɗang, yi mǝnana ɓǝ̀ Ɓakuli pa mo raka. Ace mǝno ka, ɓwa mǝnana tasǝam aɓa buo ka, cauɓikea male gulo kuti mo.” 12Lang Bilatus ok mǝnia yì cau ka, pǝlǝa ɓariki nǝ̀ alta njargula mǝnana nǝ̀ pusǝna Yesu nǝi ka. Sǝ aɓwana-mǝgule mala amǝ Yahudi ka, à loasǝ gia bang-bang ama, “Ɓǝ̀ a panzǝ ɓwa mǝnia sǝ au ka, lǝmndǝ ama a nda gyajam mala Kaisar, Mǝtala nzali ɗang! Acemǝnana ɓwa mana kat twal ɓamuri ama yì ka, murǝm na ka, ɓwe ka mǝ'mgbicau na arǝ Mǝtala nzali!”
13Lang Bilatus nǝ̀ ok cau mǝno ka, pǝlǝa pusǝ Yesu a banfana sǝ eauwe do amur buno ɓashi mǝnana à kǝ tunǝi ama, “Ban múr tali” ka. (Nǝ kun Ibǝru ka à kǝ tunǝi ama, “Gabbata.”) 14Anggo ka pwarizǝkia gbashina a pwari gilǝrǝu ace Lamsan Yalimuru. Pǝlǝa Bilatus banggi amǝ Yahudi ama, “Wu sǝni, murǝm ma'wun nia ka!”
15Kara yia kat à lo a rǝì gǝu ama, “Wali ɓǝ̀ wu! Wali ɓǝ̀ wu! Gballì a nggun-gangndi!”
Bilatus ɗia ama, “Mana! Wu earce ɓǝ̀ ǝn gballì murǝm ma'wun a nggun le?”
Pǝlǝa agbani pǝris malea ear ama, “Kǝ murǝm pa a bu sǝm ɗang, she kǝ Kaisar Mǝtala nzali mala amǝ Roma!” 16Gandǝa Bilatus pea wia Yesu, ɓǝà kya gballì amur nggun-gangndi ka.
Sǝ à bwal Yesu à um nǝi.
À gballì Yesu amur nggun-gangndi
(Matiu 27:32-44; Markus 15:21-32; Luka 23:26-43)
17À tsǝki wi nggun-gangndi mǝnana à nǝ̀ ká gballì amuri ka, a meali, sǝ pur aban ká aban mǝnana à kǝ tunǝi ama “Ban kpouloɓamuru” ka. Nǝ kun Ibǝru ka, à tunǝ banì ama, “Golgota.” 18Àkǝ̀ banì sǝ à gballì Yesu amur nggun-gangndi. À gballì aɓea ɓwana ɓari gbal andǝ Yesu, mwashat ata bui mǝli sǝ ɓe ka ata bui mǝnggare, sǝ Yesu na aɓa ɓalǝu.
19Bilatus gilǝgir arǝ gbǝlang kpamgbang sǝ tsǝa à gballì arǝ nggun-gangndi amur Yesu. Cau mǝnana gilǝ ka nda, “Yesu Ɓwa Nazarat, Murǝm Mala Amǝ Yahudi.” 20Ban mǝnana à gballì Yesu kam ngga, sau nǝ la ɗang, aɓwana pas ɓal mǝnia yì gir à gilǝì ka, acemǝnana à gilǝì nǝ kun mala amǝ Ibǝru, andǝ kun mala amǝ Latin, andǝ kun mala amǝ Gǝrik. 21Sǝ agbani pǝris wari aban Bilatus à kya banggi wi ama, “Kǝa gilǝ ama, ‘Yì ka, nda Murǝm mala amǝ Yahudi’ ɗang. Ɓoaro male ka à nǝ̀ gilǝ ama, ‘Ɓwa mǝnia ka bangŋa ama, yì nda Murǝm mala amǝ Yahudi.’ ”
22Bilatus nyesǝia wia ama, “Awo! Gir mǝnana ǝn gilǝna ka dumǝna anggo.”
23Anzǝm mǝnana asoje gballìna Yesu amur nggun-gangndi ka, à pwan agir-nggurǝi à gauwia banì ine, sǝ koya soje ka twal banì mwashat. Sǝ nggea-daura male mǝnana à te nǝ nggurbyau mwashat kunkpakǝri pa a rǝì raka, à twali gbal. 24Pǝlǝa à nea rǝia ama, “Ɓǝ̀ sǝm ngga na ama sǝm nǝ̀ sanggi daura man ɗang, a kun mani ka ɓǝ̀ sǝm kocàca amuri, ɓwa mǝnana li ka ɓǝ̀ twali.” Mǝnia yì gir ka yi pa anggo ace mǝnana ɓǝ̀ lumsǝ cau mala Ɓakuli mǝnana bangŋa ama,
“À gakia rǝia adaura mem
sǝ à kocàca ace
nggea-daura mem.”#19:24 Ɓalli gbal aɓa: Ang 22:18.
Mǝnia ka nda gir mǝnana asoje pe ka.
25Nggea Yesu, andǝ mǝ'eam ngge mǝmɓwame, andǝ Maryamu mālá Kilobas, andǝ Maryamu Ɓwa Magdala ka, à ndaban came tu aban nggun-gangndi mǝnana à gballì Yesu amuri ka. 26Yesu sǝn ngge andǝ ɓe lagga male mǝnana earkiyi ace raka aban came abanì; pǝlǝa banggi ngge ama, “Nnâ, munio nia ka.”
27Sǝ ne mǝnia yì lagga male ka ama, “We ka, nggo nia ka.” Twal a pwari mǝno ka, mǝnia yì lagga mala Yesu ka, um nǝ nggea Yesu a ɓala male.
Lú mala Yesu
(Matiu 27:45-56; Markus 15:33-41; Luka 23:44-49)
28Yesu sǝlǝna ama ado ka agir mǝnana kat Ɓakuli turi ɓǝ̀ yi pea ka, malǝna pea, sǝ ace mǝnana ɓǝ̀ cau mala Malǝmce mala Ɓakuli ɓǝ̀ lumsǝ ka, bangŋa ama, “Ən nggǝ ok mǝsamur.”
29Kwar nakam abanì, mǝnana lumsǝ nǝ mùr ɓǝlanggun anap mǝhangŋe ka, pǝlǝa asoje par soso aɓalǝi sǝ à loasǝi a kun gara à tsǝki wi a kuni ɓǝ̀ nu. 30Lang Yesu sonzǝ mur anap nì ka, na ama, “Malǝna!”
Pǝlǝa dili muri sǝ pa yilǝmi.
À zuɓi Yesu nǝ kaɗa a mǝsǝnkanggari
31Pwari mǝno ka pwari gilǝrǝu na acemǝnana ɓǝ̀ ban fana ka pwari Sabbat na. Sǝ aɓwana-mǝgule mala amǝ Yahudi ka à pà nǝ̀ earce ɓǝa lú ueo akano aban gyare amur anggun-gangndi, ɓǝa bwal ɓe pwari mǝno kǝ yiu ka ɗang. Ace mani ka à banggi Bilatus ama, ɓǝ̀ earia wia ɓǝa ɓunggi akusǝ aɓwana mana à gballia amur anggun-gangndi ka. À earce pe anggo ace mǝnana ɓǝa wu tu à nǝ̀ sulǝ nggūrǝia a nzali. À zǝmbǝa anggo acemǝnana mǝnia yì pwari Sabbat ka, pwari mǝfele na aban amǝ Yahudi, sǝ ɗǝm ngga pwari mǝgule na acemǝnana yi karǝ nǝ Pwari Lamsan ngga. 32Asoje pǝlǝa à wario à kya ɓunggi akusǝ aɓwana mǝnana à gballia a bu mǝli andǝ bu mǝnggare mala Yesu ka. 33Lang à yiu aban Yesu ka, à sǝni ka Yesu angŋa dǝmbǝa wuna, sǝ à ɗeki, a ɓunggi akusǝi ɗang. 34Sǝa ma, mwashat aɓalǝ amǝnia yì asoje ka, zuɓi Yesu a nkanggari nǝ kaɗa, kara nkila andǝ mur puro aban sukkio. 35Ɓwa mǝnana sǝn mǝnia yì gir ka, nda bang ce ka, sǝ cau mǝnana na ka mǝsǝcau na, ace mǝnana wun gbal ka ɓǝ̀ wu ak ce sǝ ɓǝ̀ wu pa ɓamur wun. 36Mǝnia yì gir ka pa anggo ace mǝnana ɓǝ̀ lumsǝ cau mala Ɓakuli mǝnana à gilǝì aɓa Malǝmce ama, “À pà nǝ̀ ɓun mu kǝ bare ɗang.”#19:36 Ɓalli gbal aɓa: Pur 12:46; Ɓal 9:12; Ang 34:20. 37Sǝ ɓe ban ɗǝm aɓa Malǝmce mala Ɓakuli bangŋa ama, “Aɓwana nǝ̀ sǝn ɓwa mǝnana à zuɓi nǝ kaɗa ka.”#19:37 Ɓalli gbal aɓa: Zak 12:10; Sǝn 1:7.
À tsǝk Yesu a ɓembe
(Matiu 27:57-61; Markus 15:42-47; Luka 23:50-56)
38Nǝ nzǝmo ka, Yisǝfu, ɓwa Arimatiya zǝmbǝi Bilatus ama, nǝ̀ twal lú Yesu. (Yì Yisǝfu ka mǝkpata Yesu na aɓa sǝmbǝrǝa, acemǝnana kǝ ɓanggi aɓwana-mǝgule mala amǝ Yahudi.) Bilatus pǝlǝa eari wi ɓǝ̀ twali. Nda sǝ Yisǝfu wario kya twal lú Yesu um nǝi ka. 39#19:39 Ɓalli gbal aɓa: Yoh 3:1,2. Nikodimus, ɓwabura mǝnana ɗiɗyal yiu aban Yesu nǝ du ka, wari ata Yisǝfu. Yiu nǝ muru mǝ'rǝmɓoarne, a bui, ace hasǝi lú. Muruì ka à pe nǝ myang nggun mǝr mana à zurǝì andǝ muku nggun-alus ka. Dǝmbǝrya male na kǝla dǝmbǝrya mala mǝssa tasau lumi-tārú. 40Aburana mǝnia yia kǝm ngga à twal lú Yesu sǝ à marǝki aɓa nggurbyau pwasǝa andǝ muru mǝ'rǝmɓoarne, kǝla mǝnana amǝ Yahudi kǝ pang nǝ lú sǝ à nǝ̀ ci ka. 41Aban mǝnana à gballì Yesu kam ngga, ɓe ɓaban na kam nǝ ɓembe a ɓalǝi, mǝnana à kwari aɓa sorotali ka, bǝshe na, à malaká tsǝk kǝɓwa kam ɗang. 42Sǝ acemǝnana pwari mǝno ka pwari gilǝkirǝu na ace Sabbat andǝ Lamsan Yalimuru mala amǝ Yahudi ka, sǝ acemǝnana gbal mǝno yì ɓembe ka nda abania tu ka, à tsǝk lú Yesu a ɓalǝi.
Селектирано:
Yohana 19: mbu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© Wycliffe Bible Translators, Inc. and © The Nigeria Bible Translation Trust 2016