Yohana 18
18
À bwal Yesu
(Matiu 27:47-56; Markus 14:43-50; Luka 22:47-53)
1Anzǝm mǝnana Yesu malǝna hiwi ka, pǝlǝa lo andǝ alaggana male a eauwe a nkaring mala Ɓangŋaban Kidǝron. À kya kutio a ɓe ɓaban mala anggun olif.#18:1 Ɓalli gbal aɓa: Mat 26:30,36; Mar 14:26,32; Luk 22:39; 2Sam 15:23.
2Yahuda, mǝnana mak Yesu ka, surǝna rǝ banì, acemǝnana kusǝ pas Yesu kǝ kpapi kam andǝ alaggana male. 3Agbani Pǝris andǝ amǝ Farisi tasǝ amǝyal Ndàmǝgule mala Ɓakuli andǝ aɓea soje mala amǝ Roma, ɓǝa kyane ata Yahuda aban mǝnana Yesu nakam ngga. À kur rǝia nǝ agirbura, sǝ à bwal bǝsa arǝ aɓukan, andǝ apitǝla, pǝlǝa à puro à yì tusǝo a ɓabanì.#18:3 Ɓalli gbal aɓa: Mat 26:47-56; Mar 14:43-50; Luk 22:47-53. 4Sǝ Yesu ka angŋa dǝmbǝa sǝlǝna gir mǝnana nǝ̀ kumi ka, pǝlǝa puro cam a ɓadǝmbǝia, sǝ ɗia ama, “Yana ɓwe na wu alkite?”
5À eare ama, “Yesu ɓwa Nazarat.”
Banggia wia ama, “Mǝ Nda.”#18:5 Ɓalli gbal aɓa: Pur 3:14.
Yahuda, yì ɓwa mǝnana mak Yesu ka, nda aban came atea. 6Lang Yesu banggia wia ama, “Mǝ Nda” ka, kara à nyar nǝ nzǝmia à sukki a nzali. 7Pǝlǝa Yesu nyare ɗia ama, “Yana ɓwe na wu alkiyite le?”
À eare ama, “Yesu Ɓwa Nazarat.”
8Yesu eare ama, “Ən nanà wun nǝma Mǝ Nda. Sǝ ɓǝ̀ mǝ nda wu alkiyitam ngga, wu ɗeki alaggana mem mǝnia ka ɓǝa o.” 9Mǝnia ka pa anggo ace mǝnana cau mana pur a kuni ka ɓǝ̀ lumsǝo, mǝnana ama, “Dâ, aɓalǝ aɓwana mǝnana a pam ngga, ǝn turta kǝɓwa mwashat ɗang.”#18:9 Ɓalli gbal aɓa: Yoh 17:12; 6:39.
10Shiman Bitǝrus kwetǝ nggeabyau, kwarǝna guro mala Pǝris Mǝgule nǝi, kasǝ kiri mǝli kpat. (Lullǝ mǝno yì guro nda Malchus.) 11Yesu banggi Bitǝrus ama, “Nyesǝ nggeabyau mo oasǝi a nde! A kǝ sǝni kǝla pa mǝ nǝ nu kwap mala tanni mǝnana Tárram pam ama ɓǝn nu ka re?”#18:11 Ɓalli gbal aɓa: Mar 10:38; 14:36.
Yesu a ɓadǝm Annas Pǝris Mǝgule
(Matiu 26:57-58; Markus 14:53-54; Luka 22:54)
12Pǝlǝa asoje andǝ mǝsarǝban malea, andǝ amǝ munagara mala amǝ Yahudi, bwal Yesu, sǝ à taka abui. 13A tadǝmbe ka à umnǝ Yesu a ɓadǝm Annas, nkil Kayafas, yì Pǝris Mǝgule a mǝno yì pǝlǝa ka. 14Kǝ Kayafas mǝno na kwarkir aɓwana-mǝgule mala amǝ Yahudi ama ndanǝ ɓoaro ɓǝ̀ ɓwa mwashat wú a kun aɓwana mala amǝ Yahudi ka.#18:14 Ɓalli gbal aɓa: Yoh 11:49-51.
Shiman Bitǝrus makgir surǝ Yesu
(Matiu 26:69-70; Markus 14:66-68; Luka 22:55-57)
15Shiman Bitǝrus andǝ ɓe lagga mala Yesu wario aban mǝnana à kuti nǝ Yesu kam ngga. Mǝnia yì lagga ka Pǝris Mǝgule surǝì pepe, nda sǝ à eari wi kutio aɓa ɓala mala Pǝris Mǝgule ka. 16Bitǝrus ka ueo aban came a kun-ɓala nǝ nza. Sǝ mǝnia yì lagga mana pǝris mǝgule surǝì ka, nyare yiu yi na cau nǝ muna-ɓwama mǝnana tsǝkiyikir kun-ɓala ka, pǝlǝa eari Bitǝrus ɓǝ̀ kutio. 17Muna mɓwame ɗi Bitǝrus ama, “A nda gbal aɓalǝ amǝkpata ɓwa mǝno à bwali ka le?”
Bitǝrus eari wi ama, “Awo, ǝn pa aɓalǝia ɗang.”
18Ɗwal na kam kǝrkǝr, pǝlǝa amǝturo palta andǝ amǝ munagara bwal bǝsa, à kǝ dandǝ rǝia. Sǝ Bitǝrus yiu, yi cam abania a kun bǝsa.
Pǝris Mǝgule ɗiki Yesu
(Matiu 26:59-66; Markus 14:55-64; Luka 22:66-71)
19Pǝlǝa Pǝris Mǝgule tita ɗiki Yesu amur alaggana male andǝ kanigir male. 20Yesu banggi wi ama, “Acau mem ngga ǝn nea bwāng a ɓadǝm ɓwapǝndǝa kat. Sǝ ko aya pwari ka mǝ ndaban kanigir arǝ ndakpapi andǝ Ndàmǝgule mala Ɓakuli, ban rambǝa mala amǝ Yahudi. Ən na kǝ cau aɓa sǝmbǝrǝa ɗang. 21Sǝ ace man sǝ à kǝ ɗikiam? Ɗi ka aɓwana mǝnana à ok cau mana ǝn na ka. Yia ka à surǝna rǝ cau mǝnana ǝn na ka.”
22Lang Yesu bangŋǝna anggo ka, ɓeɓwa aɓalǝ amǝ yal Ndàmǝgule, mǝnana came abanì, kwak Yesu a takiri, sǝ bangŋa ama, “Anggo sǝ a nǝ pǝlǝì Pǝris Mǝgule cau?”
23Pǝlǝa Yesu ear ama, “Ɓǝ̀ ǝn na cau mǝnana mǝɓane na ka, banggam ɓa ɓwarke, sǝ ɓǝ̀ mǝsǝcau na ǝn na ka, mana nda tǝr kwem a takiram?”
24Anggo, andǝa kǝ tá bu mǝnana à taka abu Yesu ka, sǝ Annas tasǝte aban Kayafas, yì Pǝris Mǝgule.
Ɓaria andǝ tāruia tǝmce surǝ Yesu mala Bitǝrus
(Matiu 26:71-75; Markus 14:69-72; Luka 22:58-62)
25Aɓa mǝno anggo ka, Shiman Bitǝrus na àkǝ̀ bancame a kun bǝsa, aban dandǝ rǝì. Sǝ aɓwana abanì ɗi ama, “We ka, a pa aɓalǝ alaggana mala ɓwa mǝno re?” Pǝlǝa yì ka, tǝmce, na ama, “Awo, ǝn pa aɓalǝia ɗang.”
26Sǝ ɓeɓwa mwashat aɓalǝ aguro mala Pǝris Mǝgule, ɓǝla mala ɓwa mǝnana Bitǝrus kasǝ kiri ka, na cau ama, “Ən sǝno mǝni ata Yesu akano a ɓaban re?”
27Bitǝrus nyare tǝmce, ama, “Awo mǝ nda ɗang.” Anggo ka, kara gwakurok ɓua.
A warinǝ Yesu a ɓadǝm Bilatus
(Matiu 27:1-2,11-14; Markus 15:1-5; Luka 23:1-5)
28Nǝ dǝmbari ɗiɗyal ka à pusǝ Yesu a ɓala mala Kayafas, à um nǝi aban mǝgule mala Nggwamna, ɓwa Roma. Sǝ aɓwana-mǝgule mala amǝ Yahudi, mǝnana à tsǝki Yesu cau ate ka, à ɓinǝ kutio aɓa palta mala Nggwamna, acemǝnana ɓǝa kuti ka, à nǝ̀ pǝndǝki ɓamuria, mǝnana nǝ̀ tsǝa à pà nǝ̀ kumo à nǝ̀ li girlina Lamsan Yalimuru raka.#18:28 à nǝ̀ pǝndǝki ɓamuria, mǝnana nǝ̀ tsǝa à pà nǝ̀ kumo à nǝ̀ li girlina Lamsan Yalimuru raka: Amǝ Yahudi mǝnana à je aɓwana mala acilia anzali ko à gbashi bania tu a dǝm Lamsan Yalimuru ka à earia wia ɓǝa li girlina Lamsan Yalimuru ɗang. 29Ace mǝno ka, Bilatus pur abania, sǝ ɗia ama, “Ya cau na wu yiu nǝi amur mǝnia yì ɓwa ka le?”
30Pǝlǝa à eare ama, “Ɓǝ̀ ɓwa mǝnia ka, mǝ'ɓealɓikea na raka, ɓǝ́ pa sǝm nǝ̀ yiu nǝi abano ɗang.”
31Bilatus pǝlǝa banggia wia ama, “Ɓǝ̀ nda anggo ka, wu um nǝi, wu kya ɓashi wi nǝ nggurcau ma'wun la.”
Pǝlǝa amǝ Yahudi eare ama, “Sǝm pà nǝ́ rǝcandǝa mala kasǝ ɓashi lú amur kǝɓwa ɗang.” 32Mǝnia ka lumsǝ cau mǝnana Yesu bangŋa amur ulang lú mǝnana nǝ̀ wu ka.#18:32 Ɓalli gbal aɓa: Yoh 3:14; 12:32.
33Pǝlǝa Bilatus nyare aɓa palta male sǝ turban ɓǝa kuti nǝ Yesu abani. Ɗi Yesu ama, “A nda murǝm mala amǝ Yahudi le?”
34Yesu eari wi ama, “Mǝnia yì ɗiban ngga, a twali a mala ɓamuro le ko aɓea ɓwana na à no cau a muram ngga?”
35Bilatus ne wi ama, “Mim ngga mǝ nda ɓwa Yahudi le? Aɓwana mo andǝ agbani pǝris ma'wun na à yiu nǝ we a ɓashi abanam ngga. Mana ɗe a pa?”
36Yesu eare ama, “Domurǝm mem ngga mala ɓanza mǝnia na ɗang. Ɓǝ̀ pǝlǝ ama mala ɓanza man na ka, ɓǝ́ amǝkpatam nǝ̀ munǝo acem, à pà nǝ̀ eari aɓwana-mǝgule mala amǝ Yahudi ɓǝà bwalam ɗang. Awo, domurǝm mem ngga mala ɓanza man na ɗang.”
37Bilatus pǝlǝa ne Yesu ama, “Ashe a nda murǝm!”
Yesu eari wi ama, “A bangŋa ama mǝ nda murǝm. Ace kǝ mani sǝ à ɓǝlam, sǝ yiu mem a ɓanza ka nda ace na mǝsǝcau, sǝ ɓwa mǝnana kat kǝ camata mǝsǝcau ka, kǝ kwaki kiri kǝ ok giem.”
38Pǝlǝa Bilatus ɗi ama, “Mana nda mǝsǝcau?”
Bilatus pà Yesu ɓǝa wal-lui
(Matiu 27:15-31; Markus 15:6-20; Luka 23:13-25)
Bilatus nyare puro aban amǝ Yahudi sǝ banggia wia ama, “Mim ngga ǝn kumi nǝ ɓe kǝ cauɓikea ɗang! 39Sǝ wun amǝ Yahudi ka, ko aya pǝlǝa sǝ ɓǝ̀ yi karǝ nǝ Lamsan Yalimuru ka, pak ka wu kǝ earce ama ɓǝn panzǝa wun ɓwa mwashat ata ɓwana mǝnana à kùria a ndàkurban ngga. Ado ka, wu earce ɓǝn panzǝa wun mǝnia yì ‘Murǝm mala amǝ Yahudi’ ka le?”
40Sǝ à nyesǝi wi nǝ loasǝban ama, “Awo, ɓwa mǝnia na à nǝ̀ panzǝa sǝmi ka ɗang! Panzǝa sǝm Barabbas!” (Barabbas ka à bwali acemǝnana yì ka, mǝ'mgbicau na.)
Селектирано:
Yohana 18: mbu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© Wycliffe Bible Translators, Inc. and © The Nigeria Bible Translation Trust 2016