Yohana 17
17
Yesu pak hiwi ace amǝkpate
1Anzǝm mǝnana Yesu malǝna naki acau mǝnia ka, pǝlǝa loasǝ mǝsǝì a kuli, sǝ pak hiwi ama:
Dâ, adyan ngga bu-pwarî yina. Gusǝlǝ Munio ace mǝnana ɓǝ̀ Munio po gulo mo ka. 2A panì wi rǝcandǝa amur ɓanza kat, ɓǝ̀ pea aɓwana mǝnana a yinǝia abani ɓǝa duk amǝkpate ka, yilǝmu mǝnana málá male pà kàm raka. 3Sǝ mǝnia ka nda njar kum yilǝmu mǝnana pà nǝ̀ mal raka, ɓǝa surǝo, kǝ we Ɓakuli Mǝ'mǝsǝcau nì, andǝ Munio Yesu Kǝrǝsti mǝnana a turi aɓa ɓanza ka. 4Ən yinǝno nǝ́ gulo a ɓanza man, acemǝnana ǝn malǝna turo mo mana a pam ama ɓǝn pe ka. 5Sǝ ado ka, Dâ, nyesǝam gulo a ɓadǝmbǝo, gulo mǝnana mǝ ndanǝi sǝnǝ we ɗiɗyal sǝ a yi pusǝ ɓanza ka.
6 Ən lǝmndǝni aɓwana mǝnana a pam mia a ɓanza ka rǝo. Yia ka amo na. A nǝ̀ pam mia, sǝ à kpanata cau mo. 7Yia adyan ngga à sǝlǝna ama koya gir mǝ ndanǝi ka kǝ pur nǝ bano. 8Ən pania wia cau mǝnana a pam ngga, sǝ yia gbal ka à angŋǝni; à sǝlǝna ama mǝsǝcau na ǝn pur abano, sǝ à earǝna ama a nǝ̀ turam.
9 Hiwi mem ngga, pà ace ɓanza ɗang, nda kǝ cea, aɓwana mǝnana a pam ngga, acemǝnana yia ka amo na. # 17:9 Ɓalli gbal aɓa:
Luk 22:32; Yoh 14:16. 10Aɓwana mǝnana kat mǝ ndanǝia ka amo na, sǝ a nda a pamia ka, ace mǝnana ɓǝa lǝmndǝ gulo mem aɓalǝia ka.
11 Ado ka mǝ ndo mǝ nǝ nying ɓanza, mǝ nǝ nyare abano, sǝ yia ka à ndakani a ɓanza piu. Dâ Ɓakuli Mǝfele! Yalia, nǝ rǝcandǝa mala lullǝo mǝnana a pam ngga, acemǝnana yia ka ɓǝa duk mwashat kǝla mǝnana sǝm nda mwashat sǝnǝ we ka. 12A do mem sǝnǝia ka, ǝn yalia, sǝ ǝn bwalia nǝ rǝcandǝa mala lùllǝo mǝnana a pam ngga. Kǝ ɓe ɓwàr atea ɗang, she kǝ yì ɓwa mǝnana dupi ká kìɗìkì ka, acemǝnana cau mo mana à gilǝì aɓa Malǝmce ka, ɓǝ̀ lumsǝo.
13 Adyan ngga mǝ ndya ǝn nggǝ ká abano ka. Ən nggǝ banggia wia amǝnia yia cau mǝnana mǝ ndakani piu amǝnia yì ɓanza ka, acemǝnana ɓǝa lumsǝ nǝ bumpwasǝa mem. 14Ən pania wia cau mo, sǝ ɓanza kǝ ɓinǝ mǝsǝia, acemǝnana yia ka à ndaka mala ɓanza ɗang, kǝla mǝnana mim ngga mǝ nda mala ɓanza raka.
15 Ən pa aban zǝmbǝa nǝma wu pusǝia, ɓǝa nying ɓanza ɗang. Mǝ nda aban zǝmbǝa ama, wu bwalia, ɓǝa ká kuti a ɓabu Shetan, mǝɓealɓikea ɗang. 16Yia ka à mala ɓanza mǝnia na ɗang kǝla mǝnana mim ngga mǝ nda mala ɓanza raka. 17Tària ɓǝà duk amo nǝ mǝsǝcau mo; cau mo ka nda kǝ mǝsǝcau. 18Kǝla mǝnana a turam aɓa ɓanza ka, anggo gbal sǝ ǝn nggǝ turia aɓa ɓanza. 19Sǝ àkǝ̀ cea sǝ ǝn tar ɓamuram ɓǝn duk mo, acemǝnana yia gbal ka, ɓǝa tar ɓamuria aceo ɓǝa duk amo aɓa mǝsǝcau.
20 Hiwi mem ngga pa ace alaggana mem mǝnia nǝmurǝia ɗang, nda gbal ace aɓwana mǝnana à nǝ̀ yia ak Cau Amsǝban mǝnana amǝkpatam nǝ̀ hamnǝi abania ka. 21Ən nggǝ pak hiwi nǝma yia kat ka ɓǝa duk mwashat, kǝla mǝnana mim sǝnǝ we, sǝm nda mwashat ka. Dâ, kǝla mǝnana a nda a ɓalǝam, sǝ mǝ nda a ɓalǝo ka, yia gbal ka ɓǝa do aɓalǝ sǝm, ace mǝnana ɓanza ɓǝ̀ eare ama a nǝ turam ngga.
22 Ən pania wia gulo mǝnana a pam ngga, acemǝnana ɓǝa duk mwashat, kǝla mǝnana mim sǝnǝ we sǝm nda mwashat ka. 23Mim sǝnǝia ka sǝm nda mwashat, sǝ mim sǝnǝ we ka sǝm nda mwashat. Cia, ɓǝa kum ulang mǝnia yì dotarǝu mǝɓoarne ka aɓalǝia, ace mǝnana amǝɓanza ɓǝa sǝlǝ ama a nǝ turam, sǝ ɓǝa sǝlǝ gbal ama a kǝ earcea kǝla mǝnana a kǝ earcem ngga.
24 Dâ! Ən nggǝ earce nǝma aɓwana mǝnana a pamia ka, ɓǝa do atam aban mǝnana mǝ nda kam ngga; sǝ ɓǝa sǝn gulo mem mǝnana a pam, acemǝnana a kǝ earcem sǝ a yi pusǝ ɓanza ka. # 17:24 Ɓalli gbal aɓa:
Yoh 1:14; 17:5; Mat 25:34. 25We Dâ Mǝ'cauɓoarna! Ɓanza surǝo ɗang, sǝ mim ngga ǝn surǝo, sǝ amǝnia yì alaggana mem ngga, à sǝlǝna ama a nǝ turam. 26Ən lǝmndǝnia wia rǝo, sǝ mǝ nǝ lidǝmbǝa nǝ lǝmndǝia wia rǝo ɗǝm, ace mǝnana earcearǝu mana a ndanǝi a rǝam ngga ɓǝ̀ do aɓalǝia, sǝ mim ngga mǝ nǝ duk gbal aɓalǝia.
Селектирано:
Yohana 17: mbu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© Wycliffe Bible Translators, Inc. and © The Nigeria Bible Translation Trust 2016