Yohana 16
16
1 Ən na wun amǝnia yì acau ka, ace mǝnana wu kǝa vwaki bu wun arǝ paɓamuru ma'wun abanam ɗang. 2À nǝ̀ pǝr wun arǝ yiu aɓalǝ andakpapi, sǝ pwari na kǝ yiu ka, mana ɓwa mǝnana wal-lú wun ngga nǝ̀ twali ama nda ban pakki Ɓakuli turo.#16:2 Ɓalli gbal aɓa: Yoh 9:22; Aturo 26:9-11; Isha 66:5. 3À nǝ̀ pakka wun amǝnia yì agir ka acemǝnana à malaká surǝ Tárram ɗang, sǝ à malaká surǝam gbal ɗang. 4Mǝ nda arǝ bangga wun agir mǝnia ka ado, ace mǝnana ɓǝ̀ pwari nì yi karǝna, sǝ à tinata pa wun tanni ka, ɓǝ̀ ɓalǝ wun kasǝa ama ǝn nunna kir wun. Ən bangga wun agir mǝnia ka atadǝmbe ɗang, acemǝnana banem nǝ̀ sauwa ata wun.
Turo mala Bangŋo mala Ɓakuli
5 Ado ka, mǝ ndo mǝ nǝ nyare aban Tárram mǝnana tasǝam ngga, sǝ kǝɓwa aɓalǝ wun ɗiem ban mǝnana mǝ nǝ ká kam ngga ɗang. 6Sǝ acemǝnana ǝn bangga wun ngga, kara wu lumsǝ nǝ bumkiɗikea. 7Sǝ aɓa mǝsǝcau ka, o mem ngga nda ace ɓoaro ma'wun. Ɓǝn u raka, Ɓwa mǝnana nǝ̀ kwarkir wun, yì Bangŋo mala Ɓakuli ka, pà nǝ̀ yiu ɗang. Sǝ ɓǝn u ka, mǝ nǝ ngga tasǝi ɓǝ̀ yiu aban wun.
8 Sǝ ɓǝ̀ yina ka, nǝ̀ yia pusǝta aɓwana a ɓanza, nǝ̀ lǝmndǝia wia ɓwarkio mala ɗenyicau malea amur cauɓikea, andǝ gir mana nda anjari, sǝ amur ɓashi mala Ɓakuli mana kǝ yiu ka. 9Nǝ̀ lǝmndǝì aɓwana ama cauɓikea malea ka, nda mǝnana ama à ginǝ pa ɓamuria abanam ngga. 10Nǝ̀ lǝmndǝìa wia ɓwarkio malea amur gir mana nda pepè a njari ka, acemǝnana mǝ ndo mǝ nǝ nyare mǝ nǝ o aban Tárram, sǝ pà wu nǝ̀ sǝnam ɗǝm. 11Ɗǝm ngga nǝ̀ lǝmndǝì aɓwana ama ɓashi na amuria acemǝnana Ɓakuli angŋa dǝmbǝa kasǝna ɓashi amur Shetan, yì murǝm mala Ɓanza mǝnia ka.
12 Mǝ ndanǝ agir kam pas mǝnana ǝn earce na wun ngga, sǝ pà wu nǝ̀ gandǝ ea ado ɗang. 13Sǝ ɓǝ̀ Bangŋo, mǝnana kǝ lǝmndǝ mǝsǝcau amur Ɓakuli, yina ka, nǝ̀ yia kania wun ɓǝ̀ wu surǝ mǝsǝcau kat mǝnana kǝ pur aban Ɓakuli ka. Pà nǝ̀ ɓun cau a ɓamuri ɗang, kǝgir mǝnana o a kun Ɓakuli ka, kǝ nda nǝ̀ bang ngga. Sǝ nǝ̀ bangga wun ce agir mǝnana à malaká yiu peatu raka. 14Yì ka, nǝ̀ yinǝam nǝ gulo, acemǝnana nǝ̀ twal cau mana ǝn ne ka sǝ nǝ̀ mǝnggia wun ɓalǝi. 15Agir kat mǝnana mala Tárram na ka amem na. Nda gir mana tsǝa sǝ ǝn na wun nǝma, Bangŋo ni nǝ̀ twal cau mǝnana mem na ka sǝ nǝ̀ mǝnggia wun ɓalǝi.
16 Zuku ka pà wu nǝ̀ sǝnam ɗǝm ɗang. Sǝ zuku anzǝmi ka wu nǝ̀ sǝnam ɗǝm.
Bumkiɗikea mala alaggana male nǝ̀ pǝlǝ bumpwasǝa
17Aɓea alaggana male ɗiki rǝarǝia ama, “Mana nda ɓacau male mǝnana ama, ‘Zuku ka pà wu nǝ̀ sǝnam ɗang, sǝ zuku anzǝmi ka wu nǝ̀ sǝnam.’ Sǝ ɗǝm ngga ama, ‘Mǝ ndo mǝ nǝ o aban Tárram’ ka? 18Sǝ ‘Zuku’ mǝnana nakiyi ce ka, ɓālǝi aman le? Sǝm surǝ gir mǝnana nakiyi ka ɗang!”
19Yesu sǝlǝna ama à kǝ earce à nǝ̀ ɗi amuri, pǝlǝa nea wia ama:
Wu ndarǝ ɗiki rǝarǝ wun amur man nda ɓacau mǝnana ǝn na nǝma, “Zuku ka pa wu nǝ̀ sǝnam ɗang, sǝ zuku anzǝmi ka wu nǝ̀ sǝnam ɗǝm” ngga le? 20Mǝ ndarǝ na wun mǝsǝcau: Wu nǝ̀ ɓua nǝ mǝrǝm, andǝ keban, amur gir mǝnana nǝ̀ kumam ngga, sǝ amǝ ɓanza ka à nǝ̀ pak bumpwasǝa. Wu nǝ̀ pak bumkiɗikea, sǝ bumkiɗikea ma'wun nǝ̀ yia pǝlǝ bumpwasǝa.
21 Ɓǝ̀ mɓwama malanǝ gbashi ka kǝ kutio aɓa tanni kwanban mala gbashi acemǝnana pwari male yina; sǝ ɓǝ̀ yi gbashina ka, ɓālǝi lorǝna kwanban mala gbashi, acemǝnana ban na ban ɓoari wi nǝ́ ɓǝl bǝsa muna a ɓanza. 22Anggo sǝ wu pa: Adyan ngga wu ndanǝ bumkiɗikea, sǝ ǝn nggǝ na wun ama, mǝ nǝ ngga sǝn wun ɗǝm, sǝ ɓabum wun ngga nǝ̀ pakiɗire, ulang bumpwasǝa mǝnana kǝɓwa pà nǝ̀ é arǝ wun raka.
23 A pwari mǝno ka, pà wu nǝ̀ zǝm kǝgir ɗǝm abanam ɗang. Ən nggǝ bangga wun mǝsǝcau, Tárram nǝ̀ pa wun gir mǝnana kat wu zǝmbǝa aɓa lullǝam ngga. 24Yale ado ka wu malaká zǝm kǝgir aɓa lullǝam ɗang: wu zǝmbǝa sǝ à nǝ̀ pà wun, sǝ bumpwasǝa ma'wun nǝ̀ lumsǝo.
Yesu nǝ̀ limurǝm amur ɓanza
25 Ən na wun amǝnia yì acau ka nǝ cauɓaɓi, sǝ pwari na kǝ yiu ka mǝnana pà mǝ nǝ na wun cau ɗǝm nǝ cauɓaɓi raka. Mǝ nǝ pusǝa wun cau a banfana amur Tárram. 26Sǝ wu nǝ̀ zǝmbǝa aɓa lullǝam. Ən pa aban na nǝma mǝ nǝ zǝmbǝi Tárram amur wun ɗang. 27Tárram nǝ ɓamuri ka kǝ earce wun kǝrkǝr, acemǝnana wu kǝ earcem, sǝ acemǝnana wu earnǝ mim ama ǝn pur nǝ bani ka. 28Ən pur aban Tárram sǝ ǝn yiu a ɓanza, sǝ ado ka, mǝ ndo mǝ nǝ nying ɓanza mǝ nǝ nyar aban Tárram.
29Pǝlǝa alaggana male banggi wi ama, “Ado wuni sǝ a kǝ pusǝa sǝm cau a banfana. Cauɓaɓe na a banggiyi ɗǝm ngga ɗang. 30Adyan ngga sǝm sǝlǝna ama we ka a surǝ agir kat, ɓwa pà nǝ̀ na ama nǝ̀ ɗio kǝ cau ɗang. Ace mǝno ka sǝm earǝna ama we ka a pur nǝban Ɓakuli.”
31Yesu pǝlǝa eare ama:
Ado ka, wu earǝna nǝ mim le? 32Wu sǝni, pwari na kǝ yiu ka, yale nggearǝ pwari nì yina, yì mǝnana wun kat ka, wu nǝ̀ mesǝke, ko yan ngga nǝ̀ bwal njar male, wu nǝ̀ ɗekiam nǝmurǝam. Sǝ ǝn pa gbal nǝmurǝam ɗang, acemǝnana Tárram na atam.#16:32 Ɓalli gbal aɓa: Yoh 4:23; Mar 14:27; Zak 13:7. 33Ən bangga wun amǝnia yì acau ka, acemǝnana a ɓalǝam ngga wu nǝ̀ kum dorǝpwala. Aɓa mǝnia yì ɓanza ka, wu nǝ̀ kum patanni, Sǝa ma ɓabum wun ɓǝ̀ kǝa ɓunggi ɗang! Ən linamurǝm amur ɓanza!#16:33 Ɓalli gbal aɓa: Yoh 14:27; 15:18; Rom 8:37; 2Kor 2:14; Sǝn 3:21.
Селектирано:
Yohana 16: mbu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© Wycliffe Bible Translators, Inc. and © The Nigeria Bible Translation Trust 2016