Yohana 15
15
Yesu nda nggun anap mǝ mǝsǝcau nì
1 Mǝ nda nggun anap mǝ'mǝsǝcau nì, sǝ Tárram nda mǝtsǝkkir ɓaban. # 15:1 Ɓalli gbal aɓa:
Isha 5:1-7; Ezǝk 19:10; Mar 12:1-9; Mat 15:13; Rom 11:17. 2Ko ya bu-nggun a ɓalǝam mǝnana kǝ pa ɓǝle raka, kǝ kasǝi kǝ turi a nzali, sǝ abu-nggun mǝnana à kǝ pa ɓǝlea ka, kǝ gilǝkicea ace mǝnana ɓǝa ɓoaro ɓǝa pa ɓǝlea kpǝm ngga. 3Cau mǝnana ǝn kania wun ngga gilǝkina wun, wu fànà.
4 Wu do a ɓalǝam sǝ mim ngga mǝ nǝ do aɓalǝ wun. Kǝla mǝnana bu-nggun anap pà nǝ̀ gandǝ pa ɓǝle nǝmurǝì raka, she ɓǝ̀ dumǝna aɓa nggea ngguni ka, anggo gbal sǝ wun ngga pà wù nǝ̀ gandǝ pa ɓǝla wun ɗang, she ɓǝ̀ wu dumǝna a ɓalǝam ngga. # 15:4 Ɓalli gbal aɓa:
Yoh 6:56; 1Yoh 2:6.
5 Mǝ nda nggun-anap, sǝ wu nda ka bu-nggun. Ɓǝ̀ ɓwa do a ɓalǝam, sǝ ǝn do a ɓālǝi ka, nǝ̀ pusǝ ɓǝle kpǝm. Ɓǝ̀ nǝ́ mim raka pà wù nǝ̀ gandǝ pak ɓe kǝgir ɗang. 6Ɓǝ̀ ko ya ɓwa na sǝ do a ɓalǝam raka, nda kǝla bu-nggun mǝnana à turi sǝ im ngga; a'ulang abu-nggun mǝno ka aɓwana kǝ ramnggia, à nǝ̀ soea aɓa bǝsa à nǝ̀ pisǝia.
7 Sǝ ɓǝ̀ wu do a ɓalǝam, sǝ cau mem do aɓalǝ wun ngga, wu zǝmbǝi Ɓakuli gir mǝnana kat wu earkiyice ka, sǝ nǝ̀ pa wun gir nî. # 15:7 Ɓalli gbal aɓa:
Yoh 14:13; 16:23; Mat 7:7; Jem 1:5. 8Ɓǝ̀ wu pusǝ aɓǝla wun kpǝm ngga, nda lǝmndǝ ama wu ndaka laggana mem ngga. Sǝ mǝno gbal ka nda nǝ̀ yinì Tárram nǝ́ gulo ka.
9 Kǝla mǝnana Tárram kǝ earcem ngga, anggo sǝ ǝn nggǝ earce wun. Wu do aɓa earcearǝu mem. 10Ɓǝ̀ wu kpata anzongcau mem ngga, wu nǝ̀ do aɓa earcearǝu mem, kǝla mǝnana ǝn kpata anzongcau mala Tárram sǝ ǝn do aɓa earcearǝu male ka.
11 Ən bangga wun agir mǝnia ka, ace mǝnana ɓǝ̀ bumpwasǝa mem do aɓalǝ wun, sǝ ɗǝm ngga, ɓǝ̀ bumpwasǝa ma'wun ɓǝ̀ lumsǝo. 12Mǝnia ka nda nzongcau mem: Wu earce rǝarǝ wun kǝla mǝnana ǝn earce wun ngga.#15:12 Ɓalli gbal aɓa: Yoh 13:34. 13Earcearǝu mǝgule kat mǝnana ɓwa nǝ̀ lǝmndǝì agyajam male ka, nda mǝnana ɓǝ̀ pà yilǝmi acea ka.#15:13 Ɓalli gbal aɓa: Rom 5:7; Yoh 10:11. 14Ɓǝ̀ wu kǝ pak gir mǝnana ǝn bangga wun nǝma wu pak ka, wu ndaka gyajam mem.#15:14 Ɓalli gbal aɓa: Luk 12:4. 15Pa mǝ nǝ tunǝ wun ɗǝm ama aguro ɗang, acemǝnana guro ka surǝ gir mǝnana mǝtala-ɓala male kǝ pak ka ɗang. Ado ka, wu ndaka gyajam mem, acemǝnana ǝn nanà wun gir mana kat ǝn ok a kun Tárram ka.
16 Wun nǝ̀ taram ɗang, mǝ nǝ̀ tár wun, sǝ ǝn pa wun turo nǝma wu kya pâ ɓǝla wun, ulang ɓǝle mǝnana pà nǝ̀ kiɗiki raka. Anggo ka sǝ Tárram nǝ̀ pa wun gir mǝnana kat wu zǝmbǝi wi aɓa lullǝam ngga. 17Mǝnia ka nda nzongcau mǝnana ǝn pa wun ngga: Wu earce rǝarǝ wun.
Ɓinǝmǝsǝu mala ɓanza arǝ amǝkpata Yesu
18 Ɓǝ̀ ɓanza ɓinǝmǝsǝ wun ngga, wu sǝlǝ ama, ɓinǝna mǝsǝam gbal a dǝmbǝa. 19Ɓǝ̀ wu ndaka mala ɓanza ka, ɓanza nǝ̀ earce wun kǝla amale. Sǝ ado ka wu ndaka mala ɓanza ɗang. Acemǝnana ǝn tarki wun ɓǝ̀ wu puri ɓa ɓanza ka, nda tsǝa sǝ ɓanza kǝ ɓinǝmǝsǝ wun ngga. 20Wu ɗenyi nǝ cau mǝnana ǝn bangga wun nǝma, “Kǝ guro pà kàm gulo kuti mǝtala-ɓala male ɗang.”#15:20 Ɓalli gbal aɓa: Mat 10:24; Luk 6:40; Yoh 13:16; 1Kor 4:12; Aturo 4:17; 1Bit 4:14; Sǝn 2:3. Ɓǝa pam tanni ka, à nǝ̀ pa wun tanni gbal. Sǝ ɓǝ̀ pǝlǝa ama à kpanata kanigir mem ngga, à nǝ̀ kpata kanigir ma'wun gbal.
21 À nǝ̀ pakka wun amǝnia yì agir kat ka ata cau mem, acemǝnana à surǝ Tárram mǝnana tasǝam ngga ɗang. 22Ɓǝ̀ ǝn yiu ma ǝn yi namia cau raka, ɓǝ́ cauɓikea pa a ɓamuria ɗang. Sǝ ado ka à pànǝ kun na cau ace acauɓikea malea ɗang.
23 Ɓwa mǝnana kat ɓinǝ mǝsǝam ngga, ɓinǝna mǝsǝ Tárram gbal. 24Ɓǝ̀ ǝn pakki ma agir mǝnana kǝɓwa malaká pea aɓalǝia raka, ɓǝ a pà nǝ̀ kumia nǝ cauɓikea ɗang. Sǝ ado ka à sǝnǝna amǝnia yì agir-ndali ǝn pea ka, sǝ kat andǝ mǝno ka, à ɓinǝ mǝsǝam sǝnǝ Tárram. 25Mǝnia ka nda yi lumsǝ gir mǝnana à gilǝì aɓa Malǝmce mala Ɓakuli ama: “À ɓinǝ mǝsǝam ɓà, tǝri pà kàm ɗang.”#15:25 Ɓalli gbal aɓa: Ang 35:19; 69:4.
26 Nǝ nzǝmo ka mǝ nǝ tasǝa wun Mǝbwali aɓwana, yì Bangŋo mala mǝsǝcau mǝnana nǝ̀ pur nǝban Tar sǝm aban yiu aban wun ngga, nǝ̀ yia bang kuni kat a muram. 27Sǝ wun gbal ka dumǝna ama wu nǝ̀ nakunam aban aɓwana, acemǝnana tita turo mem ngga sǝm nda a tarǝ sǝm sǝnǝa wun.
Селектирано:
Yohana 15: mbu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© Wycliffe Bible Translators, Inc. and © The Nigeria Bible Translation Trust 2016