Luka 24
24
Siaela ku Yesu
(Matai 28.1-10; Maruku 16.1-8; Yuhani 20.1-10)
1Kudra saka niciwbi, sa pathagili ledra ka mialrealre, kwini lamaliali wailuku kudra padulru lini ku sapasangulrelremane si mwa tadralredralrekane. 2Kai lalisu la drele kwini lrenege ka ngiabalrutainga twalai ki lrawlrawdru ki balriu, 3la katwase mwadringi ki balriu, ai kai wadrele ku kinawmasane ki Tamatama ka Yesu. 4Sa icengecenge thekelrane ku kidremedremedreme yai, la kirimu ikai ku tadrusa ku waleedra ku laimai ku umawmase acegecege ithili liniane; 5kwini lalisu la ngituluku mukuludru turamuru, la pidruru guruthungane ikai daedae. Kwini tadrusa ka umawmase la iya kai liniane, “Anu ikai ki wapacai ki umawmase silasilape ku panianiake ka umawmase? 6Kwi lasu kai yakainga kai; siaelanga panianiake! Ngulringava kudra sa ikai Galrilri kudra pelaelaini numiane ku vaga; amia kai, 7‘Kai Lalake ki Umawmase lri tara kibaai patarumara pikai ki alrima ki pasalrisalriu ka umawmase, si kikedrekedre piziwzika, luka samakatulrulu lai lri sielane.’ ”
8Kikai lalisu ala ngulringau ku vaga ki Yesu, 9la twalai kwini ki tadralredralrekane katwase, si kudra drele lini patuelre la pelaela kwini ki ta 11 ka situ si drumane ka umawmase. 10Kudra papia ki lanisikawlane pelaela kilakikai patuelre ka lalabaibai, yakai ku swa Magedaleni ka Malria, Yuana, tina ki Yakubu ka Malria, si kudra drumane ka labaibai. 11Ai kwini lanisikawlane lau pakeakeakelrau kikai lalisu kawriva la iya, kai kipawtenga kwini vaga lini. 12Ai ku Pitiru ngiadrakale, si katwase lailai mwa tadralredralrekane, la pangu lukwane lili kwini ki balriu, la drele ku lalasare ka kaimadhane sikakathane, kadrwa ku drumane. Ala katwase kwini lasu siwlri, la kasamali turamuru kwini tangimiane.#24.12 Yakai ku lasidrumane ka hungu ku kai wapacase kikai mwasaka 12 ka vaga.
Yakai Imause kadadalranane
(Maruku 16.12-13)
13Ivaivaai kwini, yakai ku tadrusa kwini ki lasitu ku lri mwa ki vaeva ka cekele. Kikai cekele sia Imause, ku adailane Yerusalrime lri ikai kau 11 ka kunlri. 14Kai lamalala tarakadalranane mapapelaelaela kikai tangimiamiane patuelre. 15Sa icengecenge makakawrivariva, ku Yesu la mwa deethe liniane, si karedededele liniane katwase. 16Kai lamalala la drele iniane, ai kai wathingale iniane. 17Ku Yesu la kivaga liniane, “Kai takudadadavace numi, si takumapapelaelaela patharwakai ki manemane?”
La idrengere acegecege kwini lamalala, si kwaalri kudra kidremedreme lini. 18Kudra tangea ka sia Keliwpa, la kivaga ki Yesu, “Bekacesu ikai ki swa Yerusalrime ka umawmase, ka kathaanenga ku kai wathingale kai ki minakapialane ku takipadradresengane ikai kwini lukamanemane?”
19Ku Yesu la iya kai, “Lakamanemane?”
La tubalre kwini lalasu, “Amani kudra patharwakai ki swa Nazarethe ka Yesu! Yuginsia kwini lasu, ikai cucubungu ki Twaumase si umawmase, lu kawriva lu twatumane sapukwane turamuru; 20kudra marudrange ki barakalai nai si latabebelenge la malra iniane tu lri kipapacai, si malra iniane pakedrekedre pwa ki ziwzika. 21Kunai nasiadrama nai iniane, ka amani kai lasu kudra lri kela si palribulu ki swa Iseraylri iya! La kai ngimiya kikai sikakathane, kikai ku tangimiane makatulrulunga. 22Ikai naiane yakai ku tapia ku lalabaibai ku pakasamaimali naiane, kikai lalisu ngwalalakese mutadralredralrekane, 23lakai drele ku kinawmasaneini. Kikai lalisu la kela pelaela iya kai, wadrele nai ki sasiakawlu ki Twaumase, ku sasiakawlu ki Twaumase la pelaela liniane, ku Yesu siaelanga panianiake iya. 24Kunai la ikai ku wamwa tadralredralrekane drele, ku tadrelane lini la mararaamau ku taiyane kikai ki lalisu patuelre, ai kai nai wadrele iniane.”
25Ala kirimu ku Yesu pelaela liniane iya kai, “Kunumi ala makulrungu numi! Patharukai ku tapuvagane ki yuginsia ku vaga, anu ngithaanga mia kikai pakakucingalre turamuru kasalru? 26Ku Kirisitu kaika lri tara ngilribate kikai patuelre ala lri dulru mwa ki kalrigwane?” 27Ala kirimu, kwi lasu la patwalai kudra ki pacase ki Musi si yuginsia, pathagili papia liniane palalrwai kai Sisiu sanaka pinatharukaiyane iniane patuelre ku nipacasane.
28Kikai lalasu la ka wadethenga kudra amwane lini ku cekele, ai ku Yesu miakau kiasanu pacuungulwana ku kadalrananeini, 29ai kikai lalasu la ruthuku iniane si iya kai, “Walriwgunga ka vai, la lri kadradrimitinga kai subelebelenge, ala taelreanga naiane sulai!” Ku Yesu la mudaane, si lri taelre liniane sulai. 30Sa nenenga kikai lalasu si lri kane ku aga, ku Yesu wamalra kudra pange, si kiaseasene ki Twaumase, ala apapipithingi kwini pange, si baai liniane. 31Kudra maca lini ala kirimu ledra, si ala tau patakulringau thingale iniane, ai ku Yesu kiarimu kawlrau kakadrwa. 32La maiya kai kikai lamalala, “Sa ikadadalrananeta si kawrivariva mitane kikai lasu palalrwalrwai ku Sisiu, kudra kidremedremeta kaika mararaamau ki apwi kudaladalai?”
33Kwini lamalala la makakaai ngidrakale, si katwase siwlri mu Yerusalrime. Ikai kwini, kikai lamalala la drele kwini ki ta 11 ka situ si kudra drumane ka laumawmase yakai taelre irurubu, 34si icengeecenge iya kai, “Ku Tamatama patengatengane ka siaelanenga panianiake; si kidrelenga ki Simune!”
35Kwini tadrusa kudra tamadredrelane lini ikai kadadalranane, si kudra tangimiane sa apapipipithingi ku Tamatama ku pange, kikai lamalala kudra takirimwane patakulringau thingale iniane, peaelaelanga liniane makanaelre.
Ku Yesu adrelane ki lasitu
(Matai 28.16-20; Maruku 16.14-18; Yuhani 20.19-23; Nisikawlane 1.6-8)
36Ala kudra sa icengecenge makawriariariva kilakikai, ala kirimu, ku Tamatama ngiakakamani acegecege ikai liniane, si iya kai liniane, “Kunumi kasulivalivata!”#24.36 Yakai ku lasidrumane ka hungu ku kai wapacase kikai “si iya kai liniane, ‘Kunumi kasulivalivata’ ” ka vaga.
37Kwini lalasu la kathathiburu si manugiligili, lau wadrele nai ku galrale la iya. 38Ku Yesu la iya kai liniane, “Anu kavangavange? Anu kalrikilriki? 39Drela kai alrimali kai drapaleli! Amaniaku, kaika palrapalra! Bwala sulrapaili, lri thingale numi; kai galrale kadrwa ku beate, kadrwa ku culrale, kunumi drela, kunaku yakai.”
40La iya kwini pelaela, si padrele liniane kwini alrima si drapaleini.#24.40 Yakai ku lasidrumane ka hungu ku kai wapacase kikai mwasaka 40 ka vaga. 41Kikai lalasu la kaiyana masalru, ai ngiatuluku turamuru ki sakiararagai. Ku Yesu la kivaga liniane, “Kunumi ikai kai yakai ku manemane ku akaneane?” 42Kai lalasu la malra ku niakamane ku kange si baai iniane. 43La alra tarumara, si kane icucubungu liniane kikai lasu.
44Ala iya kai liniane ku Yesu, “Kikai sanaka maneemanenga patuelre amani kudra sa taelreaku numiane ku pelaelaelali numiane: Kudra hulrice ki Musi, hungu ki yuginsia, si Lasenai kudra pelaelaela patharukai nakwane sanaka manemane lri tara ngimia.”
45Ala muelebe ki lrigilane ki kidremedreme lini, si ala pulringalringau ku vaga ki Twaumase kikai lalasu, 46la iyanga kai liniane, “Nipacasane ikai ki Sisiu: Lri kipamatikuru ku Kirisitu, luka samakatulrulu ku vai lai sielane panianiake twalai ki wapacai. 47Kunumi lri pangukai numi ku naganeini, si pelaelaela paswadrau kudra angitatupelane si akipacepane ku pasalrivane ka vaga ki Twaumase, twalai Yerusalrime pelaela si pasalraelre ki sanaka kuni. 48Kunumi amani numi kudra lri akasi pasikai kilakikai. 49Lri ngikakamaniaku malra ku palraingi ki Ama patarumara numiane; kunumi lri ikai numi ki cekele mukalavalava, pakela kudra takelane ku puku twalai subelebelenge mulebe mwa numiane.”
Ku Yesu kiamalramalra pusubelebelenge
(Maruku 16.19-20; Nisikawlane 1.9-12)
50La pacungulu, ku Yesu mailuku liniane mulatadre ki cekele, katwase mwa Bithani. Saikai kwini, ku Yesu la ciliki ku alrima si subulrubulru liniane. 51Sa icengecenge subulrubulrubulru liniane ku Yesu matwasenga kidaili liniane, kiamalramalra katwase musubelebelenge#24.51 Yakai ku lasidrumane ka hungu ku kai wapacase kikai “kiamalramalra katwase musubelebelenge” ka vaga.. 52Kwini lalasu la sukubu iniane, si sueteane kudra sialribate ku sakiararagai ki kidremedreme si siwlri mu Yerusalrime, 53laka taikaikaiyane ki daane ki Twaumase senasenai drengedrengere ki Twaumase.
Селектирано:
Luka 24: NDV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© The Bible Society in Taiwan, 2017
All rights reserved
© 臺灣聖經公會版權所有，2017