Luka 23
23
Kiasaibange ikai cucubungu ki Pilatu
(Matai 27.1-2, 11-14; Maruku 15.1-5; Yuhani 18.28-38)
1Kudra yarubu ka laumawmase la ngidrakale makanaelre, si malra ililuku ki Yesu pucucubungu ki Pilatu. 2La ikai kwini kukusu iniane iya kai, “Wadrele nai kai ki lasu sa pakariciriciu ki sakacekele nai, pelaela naiane madha tukaziluzilu ki tinuhika ki swa Ruma iya, Kirisituaku, talialaladhaku ngiaiyaiya.”
3Ku Pilatu la kivaga ki Yesu, “Kusu talialalaisu ki swa Yuda?”
La tubalre ku Yesu, “Kikai amanisu ka amia.”
4Ku Pilatu la papia ki marudrange ki barakalai si laumawmase iya kai, “Kainaku maka kiadringai ku pasalrivane kai ki lasu.”
5Ai kai lalasu la aru kalritheethe iya kai, “Pangwakai ki tadindwane, si ikai palraelre kai Yuda pakariciriciu ki mapapangale, twalai Galrilri pathagili, kikainga la padarurunga kai.”
Yacucubungu ki Hirudi
6Kai Pilatu sa kilalra kikai vaga la kivaga, “Kikai lasu swa Galrilri ka umawmase?” 7Kikai lasu sathingale ki Yesu ala ka twalai ki takicapilane ki Hirudi, la satedre iniane pwa ki Hirudi. (Kikwidra ku Hirudi yacengecenge ikai Yerusalrime.) 8Ku Hirudi sadrele ki Yesu, kiararaagai turamuru; asi lwiyane kai lasu kialalranga patharukai ku tangimiamiane ki Yesu, maulainga kidremedreme ku adrelane ki Yesu, siadrama ki Yesu ku apadredrelane pia ku pinangu Twaumasane ka puku. 9Lakamani, ku kivaga kwini ki lasu ki Yesu ku lamendai, ai ku Yesu adravane ka niakuvavalane ka vaga kadrwa ku tatubalreaneini. 10Kwini lamarudrange ki barakalai si latarabulrubulru ki Sisiu la mucucubungu, si pangicaeme kukukusu iniane. 11Ku Hirudi si kwapingini la sivavangane iniane, tusinalrelreme iniane. Kwini lalasu la pasipalimemelre ku mathariri ka malragi ka laimai, si satedre iniane pasiwlri pwa ki Pilatu. 12Ikai kwini ki vaivai, ku Hirudi si Pilatu la matatalraaginga; kikai tadrusa kunadruma namakakabadha.
Kiatupasalrivane ku akipapacadhane
(Matai 27.15-26; Maruku 15.6-15; Yuhani 18.39–19.16)
13Ku Pilatu la sarubu kudra ki marudrange ki barakalai si taramasasangililuku ki mapapangale, si kudra ki laumawmase, 14la iya kai liniane, “Kunumi waruthuku numi kikai ki lasu si pwa numi nakwane kai, si kukusu numi iniane pakariciriciu ki mapapangale iya; la icucubungaku numiane saibange kivavaga iniane, ai kainaku maka kiadringai ku pasalriuini kwini takukuswane numi. 15Adravane ku Hirudi la kai maka kidringai lukamanemane ku pasalrivaneini, la sawlri satedre pwa kikai. Lakamani kikai lasu kadrwa ku manemane ku naika akipasudalepane kipapacai ku kakwakudhaneini. 16Lri palrumadhaku ki umawmase iniane, si ala pakatwase.”#23.16 Yakai ku lasidrumane ka hungu ku padrima ku mwasaka 17 ka vaga “Luka tatulrisisisiane ki Takilragavane ka lrisi, kai Pilatu tara pasiakai liniane mukerenge si pulatadre ku tangea ka kiaemenge.” (Drela ki Matai 27.15; Maruku 15.6.)
18Kudra mapapangale la masiasilange karaleale, “Papacadha iniane! La pulatadra baai naiane ki Barabase!” 19(Kai Barabase nayakai ki cekele pakariciu, si ka papacainga ki umawmase, lakamani ku kiemengeini.)
20Kai Pilatu la apipakatwase ki Yesu, si la papukidremedremeana ki mapapangale. 21Ai kwini laumawmase arwa akwadrawlringa tawtau, “Pakedrekedra pwa ki ziwzika iniane! Pakedrekedra pwa ki ziwzika!”
22Ku Pilatu laka saka kingitulrulu iya kai liniane, “Maneemanelringa ku pasalriuini? Kainaku maka kiadringai ku pasalrivane ku naika akipapacadhaneini. Lri sikawlaku ki umawmase si lrumai iniane, ala alra pakatwase iniane.”
23Kudra mapapangale la pacungulu aru akwadrau tawtau, kakeecenge ku wakedrekedre ki Yesu pikai ki ziwzika; ala kudra tatawtavane lini la kasabebelenge. 24Ku Pilatu ala singikai ku taurikaiyane lini si turingaringau. 25La malra kwini ki pakalrithavulu ki cekele si ka papacai ki umawmase, ka kiaemenge ikai taememengane, ka mangangace ka umawmase pulatadre si pakatwase, la malra ki Yesu patarumara liniane, si pangilralraingi ku lrika apangimiane lini.
Kiapakedrekedre ku Yesu pwa ki ziwzika
(Matai 27.32-44; Maruku 15.21-32; Yuhani 19.17-27)
26Ku lakwapingi la malra iluku ki Yesu, sa ikadalranane kiapadradresenge ki tangea ka twalai lregelrege kela ka swa Kurini, ka sia Simune. Kwini lalasu la ruthuku iniane, si malra kwini ziwzika pwa sarare ki tabalanganeini, paangeale iniane, si ilrilrikudru kabibibilrili ki Yesu.
27Kudra tapangale ka la mabibibilrili ki Yesu ka laumawmase, yakai ku lalabaibai ku ngwalai iniane adiridirivane si tubitubi. 28Ku Yesu la ngibangulu, si iya kai liniane, “Kunumi ka lababai ki swa Yerusalrime, madha pasikai nakwane tubi, ngipapasikaiya si pasikai ki lalalake numi tubi! 29Asi lwiyane kwini vai lri kelanga, ku umawmase lri iya kai, ‘Ku kaiyana twalalake, kaiyana tawbaliri, kaiyana pathuthu lapu ki daini, sasipiane turamuru!’ 30Lukamaninga kwidra, ku umawmase lri iya kai ki maadrau ka lregelrege, ‘Mukadrula mwa ki kinawmasane nai!’ Lai lri iya kai ki tikiane ka lregelrege, ‘Kabunga naiane!’ 31Asi lwiyane, alaiyasi kikai lalasu la pia kudra ngimiyaiya kikai papia kudra ki masalese ka angatu, papia ki marudame ka angatu lai ka ngitwatumanenga?”
32Kwini lalasu la pakarededele iluku ku tadrusa ku pasalriu ka umawmase, lri pataelre ki Yesu papacai. 33Kai lalasu sadaruru kudra ki sia “Awlru ka lregelrege”, la ikai kwini pakedrekedre ki Yesu pikai ki ziwzika, si pasilange kedrekedre kwini ki tadrusa ka pasalriu ka umawmase, ku tangea piakai tali vanale, ku tangea piakai tali viri. [ 34Ku Yesu la iya kai, “Ama, pacepa liniane, asi lwiyane kai lalasu kai ngiathathingale luka watumatumane.”]#23.34 Yakai ku lasidrumane ka hungu ku kai wapacase kikai yaadringi kikai [ ] ka vaga.
Kwini lalasu la kuzibiki mavalavala ku laimai ki Yesu. 35Kudra mapapangale la acegecege si dredredrele, kudra latabebelenge ki swa Yuda la mulralralrakai iniane iya kai, “Kai lasu palribulunga ki umawmase, alaiyasi kai lasu laka tengatengane ka pilri ki Twaumase ka Kirisitu, asalu ngipapalribulu!”
36Kudra lakwapingi maiyalri mulralralrakai iniane. Kai lalasu la mwa arwa cucubungu, si malra kudra maalriu ka bava si baai iniane, 37si iya kai, “Alaiyasi ka talialalaisu ki swa Yuda, ngipapalribula!”
38Ikai belenge iniane yakai ku baali ku pinacasane, “Kikai yai talialalai ki swa Yuda.”.
39Kudra palraini kikedrekedre ku tadrusa ka pasalriu ka umawmase, ku tangea la puvaga tusinalrelreme iniane iya kai, “Kaisu kamani kudra Kirisitu? Ngipapalribula si la palribulu naiane!”
40Ai kudra tangea la kaelaelathe kwini ki tangea iya kai, “Mararaamausu kipathavuthavungu, kaisu mwakulukuludru ki Twaumase? 41Kai kipathavunguta drulrithita, kai kipiata kai, naika akipianeta kipathavungu; ai kikai lasu kadrwana ku piaini ku navaevanga ku ngialisiane.” 42La iya kai kwini lasu ki Yesu, “Yesu, lu kelanga kudra atalialaladhanesu, kiatubiaku muswane ku angulringavanesu nakwane!”
43Ku Yesu la iya kai iniane, “Nau pelaela muswane, kaikameane kusu lri taelresu nakwane ikai ki cekeleli.”
Tapacadhane ki Yesu
(Matai 27.45-56; Maruku 15.33-41; Yuhani 19.28-30)
44-45Ikai ku mwalringedele, la kawlrau ku vai, ku dradrimitane la kabungu kai kawmasane, pakela ki ngwatulru ki tuki ki maka mwalringedele; kudra nipakelradhane ikai ki daane ki Twaumase ku make la kathurilace mawdrusa. 46Ku Yesu la akwadrau tawtau, “Ama, kai abakeli lri patarumara ku pikai ki alrimasu!” Samaka iya kikai vaga, la nguniakane si pacai.
47Kudra abelenge ki kwapingi sa drele kikai tangilribatane, la drengedrengere ki Twaumase si iya kai, “Kikai umawmase yai patengatenganelringa ka madringelrese ka umawmase!”
48Kudra ngiathalringulu si dredredrele ka laumawmase sa drelenga kai tangimiane patuelre, la makitu adirivane tubi takubakebake ki tuku lini katwase. 49Kudra sanaka wathingathingale ki Yesu, si tupapapalra inane ka laumawmase, si kudra twalai Galrilri tupapalra iniane kela kudra labaibai, makitwa yadaaili acegecege si dredrele kikai la tangimiane.
Takidralrekane ki Yesu
(Matai 27.57-61; Maruku 15.42-47; Yuhani 19.38-42)
50-51Yakai kudra twalai tali Yuda ki Arimatai ka cekele kela ka umawmase, sia Yusepe. Kikai umawmase matwabake si ka makalecege, amani kudra siadramadrama apalralrawthu ku amutaluvaivadhane ku puku ki Twaumase. Kikai lasu giingi ki swa gikai, ai kai twapalrapalra kudra ki kidremedreme si kakwakudhane kwini ki palrapalra. 52Kai lasu matwase mucucubungu ki Pilatu si kitubi ku amalrane ku kinawmasane ki Yesu. 53Ala katwase mwa malra pulebe ku kinawmasane ki Yesu, si arakai ku lalasare ka kaimadhane lripucu pudriadringai, la pasutelrai pikai kudra ki nitubarungulane lruku ka tadralredralrekane, kikai balriu kai, kadrwana ku drinalrekane ku umawmase. 54Kudra vai kwini laka tapadulrudulrwane ka vai, kudra Taisadrasadrane ka vai lri darurunga.
55Kudra twalai Galrilri tupapalra ki Yesu kela ka lalabaibai si Yusepe la karededele mwa, drele kwini tadralredralrekane, si la drele ku kinawmasane ki Yesu ku takipangimiane pasutelrai ikai adringi. 56Kikai lalisu la katwase siwlri, pasikai ki kinawmasane ki Yesu padulru ku sapasangulrelremane si lawlau. Kai lalisu la pangimia ku taiyane ki hulrice ku kakwakudhane, isadra ikai ki Taisadrasadrane ka vai.
Селектирано:
Luka 23: NDV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© The Bible Society in Taiwan, 2017
All rights reserved
© 臺灣聖經公會版權所有，2017