Ohabolana 2:1-5
Ohabolana 2:1-5 Malagasy Bible (MG1865)
Anaka, raha raisinao ny teniko, Ary raketinao ao am-ponao ny didiko, Ka atongilanao amin'ny fahendrena ny sofinao, Ary ampitandremanao fahalalana ny fonao; Eny, raha miantso ny fahalalana ianao Ary manandratra ny feonao hahazo saina, Raha mitady azy toy ny fitady volafotsy ianao Ary mikatsaka azy toy ny fikatsaka harena afenina: Dia ho fantatrao marina ny fahatahorana an'i Jehovah, Ary ho hitanao ny fahalalana an'Andriamanitra.
Ohabolana 2:1-5 La Bible en Malgache (MRV)
Anaka, raha raisinao ny teniko, ary raketinao ao am-ponao ny didiko ka atongilanao ho amin’ny fahendrena ny sofinao, ary atodikao ho amin’ny fahalalana ny fonao; eny, raha miantso ny fahalalana ianao, ary manandratra ny feonao mba hahazo fahaiza-mandinika, raha mitady azy toy ny fitady volafotsy ianao, ary mikatsaka azy toy ny fikatsaka harena miafina, dia ho fantatrao marina ny fahatahorana NY TOMPO, ary ho hitanao ny fahalalana an’Andriamanitra.
Ohabolana 2:1-5 Baiboly Protestanta Malagasy (MBP)
ANAKA, raha raisinao ny teniko, Ary raketinao ao am-ponao ny didiko, Ka atongilanao amin’ny fahendrena ny sofinao, Ary ampitandremanao fahalalana ny fonao; Eny, raha miantso ny fahalalana hianao Ary manandratra ny feonao hahazo saina, Raha mitady azy toy ny fitady volafotsy hianao Ary mikatsaka azy toy ny fikatsaka harena afenina: Dia ho fantatrao marina ny fahatahorana an’i Jehovah, Ary ho hitanao ny fahalalana an’Andriamanitra.
Ohabolana 2:1-5 DIEM PROTESTANTA (DIEM)
Anaka, raisonao ny teniko ary ataovy raki-tsoa ho anao ny didiko. Henoy ny teny ataon’ny fahendrena ka ampiezaho ny fonao hahay manavaka. Mangataha fanampiana amin’ny fahalalana, miantsoa famonjena amin’ny fahaiza-manavaka. Fa raha tadiavinao toy ny fitady volafotsy ireo ary katsahinao toy ny fikatsaka harena nafenina. dia ho fantatrao tokoa ny fanajana ny TOMPO ary ho hitanao ny fahalalana an’Andriamanitra.
Ohabolana 2:1-5 Baiboly Katolika (MBC)
Anaka, raha mandray ny teniko ianao, ary mitana ny didiko ao aminao, mampandry sofina tsara hihaino ny fahendrena ianao, ka mampiròna ny fonao ho amin’ny fahalalana; eny, raha miantso ny fahamalinana ianao, ka manandra-peo amin’ny fahafantarana, raha mikaroka azy toy ny fikaroka volafotsy ianao, ka mandalina azy toy ny fihady rakitra; dia ho azonao an-tsaina ny fahatahorana an’i Iaveh, ary ho hitanao amin’izany ny fahalalana an’Andriamanitra.