Lukɨ 24

Jizaazai ayɨna dɨkaavake'nesɨ.

(Matɨyui 28:1-10; Maakɨ 16:1-8; Jonɨ 20:1-10)

1Wikɨya mudɨkerɨkɨ Saadehaa', byaaka wanyɨwanya yakegaa' simaangeyabanne kaanna wɨna. Sɨnnawɨ mena tɨvi'na yovɨrawaketa welivananya nawɨ'nya tɨrɨnnaka sajɨ maarɨna yeva makuna. 2Sare dara wanganesa' “O, sɨlyai kengimagɨ mena mwarangɨramwaihɨwaasai daaka!” Simaangevɨre tɨkuryavɨ marihɨ'naryadɨ'nyɨ sara dɨna. 3Dɨna yeva kusawɨ wɨlɨna yeva dara wanganesa' “O, Naanga Jizaazare kɨlaakejɨ' mwarijɨka!” 4Sara deve sa'ne'na sɨmunya kwalaalya yawɨ'daa'nadɨvɨ' navɨ'navɨka yɨdaa'nyɨna. Sara yadɨvɨ', yɨthaa, a'mwe pwaraai kumɨnyabanna yɨma'naabahɨla daa'dakɨlyɨ wanganna. Saraai kɨrɨmɨre baazɨ'ma'nyawaarɨdaa'nya lɨvamwadadaa'nyɨyaraai. 5Wanganna yeva lɨka naanga yadɨvɨ' kumɨre mɨnyagɨnya samwina tuta'nareva kwaakeyɨna baihana'na yadapi saraai wɨdɨna “A'mwe bainɨkeraavɨreba a'mwe gaala kɨnɨnnakerɨna be'na bɨ'manɨgatangihɨlaka! 6Dava mwarika. Aawa. Mena yɨdɨkaa'mwakerɨnera! Sɨnnawɨ sai Galɨli kuna mwaalakegaa' yɨhɨthaka daza'na ayɨna jawɨrila! 7Sai dara yɨhɨtha' ‘A'mweraavɨne Kaimɨraayai a'mwe kayaa'nanyaraavɨre asɨrɨ kumarɨmwangapɨjɨ yɨsavɨri tamarɨmupɨ'delyɨ. Sarei yɨrɨka darɨkaai darɨkɨ ayɨna dɨkaavadelyɨ.’ ” 8Sara wɨdɨna kyagi sa gamɨ kɨgaa' yagaala wɨdaka sanna yawɨ'na yɨna yeva 9simaangeyaba yagalya'makuna yeva sɨvɨlɨrɨdaa'nyɨ pwainanyaraavɨjɨ a'mwe yuya pwaraavɨjɨ yuya wanganeta dazanna wɨdaawɨna. 10A'mwe sa, Maahɨthaala mwaalya' Maarɨyaasɨ Jowaanasɨ Maarɨyaa' Jemɨzare ganaangesɨ sajɨ a'mwe pɨmɨlɨka ye'mwannamwaaina yesamɨlɨkajɨ sa apozelɨyaraavɨ yagaala daza' wɨdaawɨna. 11Sara wɨdaawɨna kye' kɨrɨ' sahwara yawɨ'na “A'mwe da kɨrɨbɨbɨyagaala dahanedɨwaava!” Sara yawɨ'na yeva kumɨre yagaalyangɨ myawɨralɨmwagina. 12Sara yadaapi Pitai simaangeyabannei yarai kaanyave'na wɨna yaka walaruta'nyɨna yaka ke'mu kusawɨnna wanganaasɨna yakei kwaabɨyɨvɨsanna gavenna wa'dɨ'nyɨ wanganna. Sarei angebanna ayɨna wɨna yaka mena wanganaka sanne'na sɨmugwalaalya yawɨ'na.

Anga Emayaazɨne tutaanyavɨne'nesɨ.

(Maakɨ 16:12-13)

13Yɨthaa, yɨrɨka dazahɨrɨka sagaa' kumɨnyɨdaa'nya pwaraai, saraai anga maalɨka pɨba Emayaazɨ wo'nɨkebanna kaanya wɨna. Tuta sa' yune Jeruzaalemɨdaa'nya' Emayaazɨna yɨnamudarɨke' levenɨ kilomitaayababɨsaba. 14Saraai kaanya wodi' yuya yɨma'naka dazanna yagaalya' dɨnɨguna. 15Kɨrɨmɨ saraai yɨdaanganyɨ yɨdaanganya yadi' wɨna. Sara yɨnɨgodaakɨlyɨ Jizaazai gamɨ sai aya kɨbanna yɨma'nadavaabɨna yɨna yaka saraalyɨ ye'mwannɨgwaanna. 16Saraalyɨ ye'mwannɨgwaanna yadaa'nyɨ kɨrɨ' kɨrɨmɨre tɨnnyangɨ nabinya pɨnɨ bɨ'jɨralɨmwaga'dɨ'nyɨ saraai myawɨri “Sai Jizaazai daaka!” 17Sara myawɨri kyagi sai wɨdɨna “Saraaihi, benna dɨnɨgodi' wɨvanɨgɨla?” Sara wɨdaka sa'na saraai daavɨna yagɨla sɨmunya' taanga wina'dɨ'nyɨ sɨnnyɨ' gwaraku'na. 18Sara yagɨla a'mwe pwai Kɨlayopaazai wo'nɨkei ja'nawɨdɨna “A'mwe kwalaalya anga pɨbadaa'nya pɨbadaa'nyara dahaa' Jeruzaalemɨ yune sabanna mwaaihava. Sare'na nabaai gɨmɨ gaveigɨ yune yɨrɨka dahɨnɨngɨ anga naanga Jeruzaalemɨ yɨma'nɨwaka savɨ myawɨryaigɨ daaka!” 19Sai sara daka yadɨ'nyɨ sahwai saraarɨ yɨdaanganna “Benɨnneka?” Yɨdaanganna kya' saraai wɨdɨna “Yɨma'nɨwaka sa Jizaazai Naazaretɨ mwaalyarɨnera. Sahwai Gotɨyarɨ wɨ'nawɨjɨwaakadei Gotɨyare tɨnnyarɨjɨ a'mwe yuyaraavɨre tɨnnyarɨjɨ wawɨnya dɨragɨnyajɨ yada yagaala dɨragɨnyajɨ dadelyɨ. 20Sarerɨ Gotɨyarɨna yɨra'dɨvɨta naangerajɨ nemɨre maremwaaidɨvɨsarajɨ Ga'maanɨyare asɨrɨ marakesarɨnera. Sarerɨ Ga'maanɨyai balya'nerɨna yagaala jamungajakerɨnera. Sarerɨ tamarɨmwɨwa'daasarɨnera. 21Sare kɨrɨ' kɨgaa' nemɨ dɨragɨnna dara lɨmwagoine. A'mwe dazai Yɨzɨrelɨyainaavɨ ayɨna nevadaihasamaaradei daaka! Yo, nabaai yagaala pɨrɨsɨ kuna warɨ'. Sasare daza mena yɨma'nɨwa'dɨkevɨ yɨ dahaa' yɨrɨka gamɨnne darɨkaai yaka darɨkɨnyɨ. 22Sarevɨ yuna dahaasagaa' nemɨnyɨdaa'nya a'mwe pɨnɨ nemɨnyabanna kabathɨwaa' lɨka yɨwaainɨwoinera. Yuna mwanyavɨ simaangeyabanna wawevemɨlɨka 23gamɨre kɨlaakejɨ' mwanganyɨwaasamɨlɨkera. Sara mwanganyɨ yeva ayɨna beva dara nedɨwaa' ‘Nemɨ ejelɨya pwaraarɨ wangamwo. Sahwaraai nedɨwaai “Sai gaala mwaalɨ'.” ’ 24Nabaai nemɨnyɨdaa'nya pwaraai simaangeyaba wawogɨla a'mwe nedɨwaatabaai avaaina sarengɨ wangamwaalyaraalyɨ. Kɨrɨ' yune gamɨ sarɨ miwariwaala.” 25Sara wɨdɨna kyagi wɨdɨna “Kɨrɨmɨ sɨmunya maayaraaihi! Yagaala yuya pɨropetɨyara dɨhata sangɨna kɨrɨmɨre sɨmunya' dɨragɨnya' yawɨralɨmwadi' mɨ'. 26Gatha'darevɨnaka! Kɨrɨmɨ myawɨriwaai ‘Kɨraazɨtɨyai daange' aayagaa' mena maarojɨyai dɨvi gannya byaanna dɨragɨnyavɨ wɨlamwaaladei daaka!’ ” 27Sara wɨdɨna yaka Mozɨzare yagaalyangɨnajɨ pɨropetɨya yuyaraavɨre yagaalyajɨ sare' wɨjɨwaakɨna. Yune gamɨ sarɨna dɨnɨka Bukuyavɨ yuya aaya kaavɨlyajɨ maridɨna.

28Sarera saraai pu'nɨgohɨla anga saba aya kɨbanna yɨ'ma'na. Sarevɨ gamɨ “Sangirɨ' kɨbawa wɨma!” yawɨrakei sara yɨna. 29Sara yɨna yadaa'nyɨ saraai dahalalɨmwanna yagɨla wɨdɨna “Naarɨmɨjɨ ye'mwannamwalaana! Nyɨlyai gaai waladathakadaa'nyɨyagaa' sawɨta mɨlyɨnɨgubala ya'ne kɨbawa yadɨ'nyɨ.” Sara dɨragɨnna wɨdɨna kyagi sai kusawɨ wɨlɨna yaka saraalyɨ wɨlye'mwannamwaaina. 30Sara yɨna yeva dɨvi “Tɨka wapaa naana!” deva saraalyɨ walamwaaina yaka ayabaaibɨ' bɨretɨya' maarɨna yaka Gotɨyarɨ “Wapaayanna gɨmɨre yaya' makimwa!” wɨdɨna yaka gunyɨna yaka saraarɨ wɨjaavɨna. 31Sai sara kya' kɨrɨmɨre tɨnnya pada'galayenna yɨna yagɨla sagaa' sahwarɨ yɨwaranganna. Sara mena kyagi sawɨ sai kaanna yɨmamajɨna'na kya' saraai ayawɨ mwanganyɨ yagi. 32Sarevɨ saraai dɨnyɨna “Naarɨmɨ tutaanyavɨ badaakwoihɨlyɨyagaa' yagaalya' nehɨzɨwaakada Bukuyavɨre yawɨta aaya kaavɨlyabwi nehɨzɨwakadaa'nya yɨ dazagaa' naarɨmɨre sɨmunya' yuna nebwina nehidɨkaa'mwake' daaka!” 33Sara dɨnyɨna yagɨla dazagaasagaa' kuna Jeruzaalemɨneraai ayɨna kaanna wɨna yagi. Wawogɨleraai yɨ'bwa'nemwaaidapi sɨvɨlɨrɨdaa'nyɨ pwainanyaraavɨjɨ kɨrya'mwe pwaraavɨjɨ bɨramaa'na. 34Sara kyagi saraarɨ wɨdɨna “Naangei nebwina ayɨna dathɨkaa'mwaka! Saaimonɨmɨ mena yɨma'naabɨwakelyɨ.” 35Sara wɨdɨna kye' saraai tutaanyavɨ wodi' wanganagɨlyanna wɨjɨwaakɨna. Saraai wɨdɨna “Sai gunyadaa'nyɨ naarɨmɨ yawɨrangamwolyarɨnera.”

Jizaazai gannya mɨdɨdɨvɨsaraayaba yɨma'naabake'nesɨ.

(Matɨyui 28:16-20; Maakɨ 16:14-18; Jonɨ 20:19-23; Apozelɨyara 1:6-8)

36Yagaalya' kuna dɨnɨbainadaa'dapi sahwai kumɨnyɨ tɨnnyaba yɨma'nadavaabɨna yaka wɨdɨna “Kwaamu' dɨmwaalyɨla!” 37Sa'ne' lɨka yɨwaaineva lɨka naanga yɨna. “Kurya pwarɨ dahawangamwona,” yawɨreva lɨka yɨna kye' 38sai wɨdɨna “Sarɨmɨre sɨmunyai be'ne' yɨwɨnakɨvanɨgava! Nabaai sɨmunyangɨ yawɨta kwalaalya be'na yawɨ'manɨgava! 39Nɨmɨre asɨraalyɨ sɨvɨlyɨraalyɨ dɨnyanganyɨla! Nɨmɨ sainyɨ sahwainyɨra. Asa nyɨmwangadɨvɨ' dɨnyanganyɨla! Sare' dare'nanyɨ. Nɨmɨnyɨ nyangamwaatabaaibɨ' kuryai mɨwɨta yagɨnya kunelyɨ.” 40Sara wɨdɨna yaka kumɨnyɨ gamɨre ata sɨvɨla wɨjɨwaainyɨna. 41Tɨvi'na wɨjɨwaainyɨna kya' yɨlaaya naanga yadɨvɨsa'najɨ atɨka maru'na'dɨvɨsa'najɨ sare' myawɨralɨmwagi yadaapi sai wɨdɨna “Dava sarɨmɨre tɨka wapaaya pɨnɨ mwarijɨka?” 42Wɨdɨna kya' yɨdɨka yakɨnɨka jawɨnya pimagɨnyavaa' wɨmaarina kye' 43sai maaraka nadaa'nyɨ tɨnna wanganna.

44Sai kumɨnyɨ wɨdɨna “Kɨgaa' sarɨmɨjɨ kuna mwaalena yagaala da mena yɨhɨthe. Sɨnnawɨ kɨgaa' nɨmɨnyɨna yuya yɨdaveta sa Mozɨzare Kɨwɨnyavɨjɨ pɨropetɨyaraavɨre bukuyangɨjɨ Saamɨyangɨjɨ yuya daza yɨ yunebanna sara yɨma'nya'nevɨnyɨ.” 45Wɨdɨna yaka sagaa' Gotɨyare Bukuyavɨ yawɨranganya'nera kumɨre sɨmunyangɨ yɨwɨrinya'ne sɨmunya wakɨna yaka 46wɨdɨna “Bukuya' dara dɨnɨ' ‘Kɨraazɨtɨyai daange' maarojɨyai yuna baladei yɨrɨka darɨkaai darɨkɨ ayɨna dɨkaavadelyɨ. 47Sarerɨne'na nabaai gamɨnne yayavɨ yuya ajɨmya yuyangɨyaraavɨ wɨjɨwakadaapɨri pwara sɨmunya mudɨkebwi kyawɨramaarapɨri Gotɨyai kumɨre gɨrɨkita'nanya duimwagasɨ'naderera. Wawɨnya daza' Jeruzaalemɨdaa'nyɨ yamaapɨ'derera.’ 48Yuya dazanna a'mweraavɨ jalɨkurakyaihɨlyɨ. 49Yɨthaanyi! Nɨmwai yune naanga nebulya'na dake' yɨhɨzaaya'nerɨ sarɨmɨnyawɨnna yɨhyasaabɨde'nanyɨ. Kɨrɨ' anga naanga dathahɨba kuna mwaalapɨjɨ yune ke'mwewɨ Sɨgunyavɨdaa'nya dɨragɨnya' walaabazahaa'nanneihɨlyɨ.”

Gotɨyai Jizaazarɨ Sɨgunyavɨna makilaawake'nesɨ.

(Maakɨ 16:19-20; Apozelɨyara 1:9-12)

50Gamɨreraavɨ Betaani sabanna makuna yaka. Sara yakei gamɨre asɨraai munyaba makɨlaka Gotɨyare dɨragɨnya yanga wɨjaaya'nei kumɨnyɨ tewaanaange' winade' wɨdɨna. 51Kuna wɨdɨna yada kumɨnyɨ yagalya'makuna kya' Gotɨyai Sɨgunyavɨnerɨ makilaawɨna. 52Makilaawɨna yadaa'nyɨ sahwara gamɨnyɨ yɨlaaya wɨmarina yeva Jeruzaalemɨna ayɨna wawesara yɨlaaya naanga yɨna. 53Sarera yuyagaa' Gotɨyare Angevɨ mwaaidɨvɨ' Gotɨyarɨne yaya' munyaba makidɨvɨsare.

Voafantina amin'izao fotoana izao:

Lukɨ 24: byr

Asongadina

Hizara

Dika mitovy