KASAUKAN 16
16
I Agar am i Ismail
1I Sarai andu' ri Abram ti lakat poyo kolondo' anak. Kaa' i Sarai makaulipon intor ra Misir, sangulun ralaa inggalan no i Agar. 2Indagu i Sarai ri Abram, “Kalo noyo lair paganakon aku ru Tuhan. Ginio ra rulugo' noyo ulipon kuno. Makapaganak io lair raki' kasangulun anak.” I Abram pana nangiou ra atan ondo' rinagu ri Sarai. 3Ginio ra pataako' ri Sarai i Agar no ri Abram. Paat raginio mopor ngambilor noyo buoi ri Abram namagun ra pagun ru Kanaan. 4Rinulug boo ri Abram i Agar am kaapang io. Kalimani' ri Agar ra maapang io noyo, liminimbau io boo am magasab ri Sarai.
5Indagu boo i Sarai ri Abram, “Ginio sala muno#Ginio sala muno; kapoam polosoon kou maimbolo' sabap ra nambaal ra kasalaan ti raki'. saboi magasab i Agar no raki'. Aku galama' napataak riso rirun am paat nalimanan no ra maapang io, magasab io boo raki'. Gama' ru salingapuon toojo ru Tuhan no ra osoi kia rito motopot, okou kia kapoam aku.”
6Taam i Abram, “Ba iou, io ulipon muno am makakuasa' kou poyo riso. Okou ra guang mambaal ra atan ayuk pamakuan muno riso.” Imboloo' boo ri Sarai i Agar ra najanjayan saboi nagiru'.
7Malaikat ru Tuhan nakatuum ri Agar maar ra taur ru timug ra tana' kaagisan, giu' ra ralan mongoi ra tana' kaagisan Syur. 8Indagu malaikat no, “Agar, ulipon ri Sarai, ati intor muno am ati angayan muno?”
Taam i Agar, “Nagiru' aku intor ri Sarai, nangulipon raki' no.”
9Indagu malaikat no, “Ruli' no riso am sauk noyo ra ulipon nano.” 10Indagu poyo malaikat no, “Aniin tokou ra papag masuang saboi kolondo' sangulun pana makauntob risilo. 11Kalo boo mabuoi maganak kou ra sangulun anak ungkuyon ondo' inggalanin mu ri Ismail#Ismail: Ralalom ragu Ibrani, inggalan ti makaarati' ra “I Aki Kapuuno' mangining”. sabap naining ru Tuhan laa muli. 12Kaa' anak muno maayag koson ra kaladai masigo, manggal io ra osoi ayuk am manggal osoi ayuk riso. Mayan io ra maalur intor ra ngaangai' pabukat nano.”
13Magikuot i Agar ra guang nano, “Motopot kia nakakito aku ri Aki Kapuuno' am kalo minatoi?” Ginio ra sabito' no Tuhan ondo' minindagu riso no ri “I Aki Kapuuno' Ondo' Magilong”. 14Ginio ra ulun manginggalan ra tulubong ondo' lolot ru Kadis am Birid, “Tulubong ru Io Ondo' Maayag Ondo' Magilong Raki'”.
15 #
Gal. 4:22
I Agar pana naganak ra sangulun anak ungkuyon, ama' no i Abram ondo' nanginggalan ra anak no i Ismail. 16Paat raginio umur ri Abram balu' ngoopor am onom ngambilor.
Voafantina amin'izao fotoana izao:
KASAUKAN 16: TMT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Hakcipta © Bible Society of Malaysia, 2013.