Matei 1

Lukolo lwa Yesu Kiristu

1Ichitabu cha lukolo lwa Yesu Kiristu, mwana wa Daudi, mwana wa Abrahamu. 2Abrahamu tsakamweleka Isaka, Isaka kamweleka Yakobu, Yakobu kamweleka Yuda na ndughu tsake, 3Yuda kaweleka Peresi na Zera, mamo wawo tsakakala Tamari, Peresi kamweleka Hezironi, Hezironi kamweleka Aramu, 4Aramu kamweleka Aminadabu, Aminadabu kamweleka Nashoni, Nashoni kamweleka Salumoni, 5Salumoni kamweleka Boazi, mai wake Boazi tsakakala Rahabu, Boazi kamweleka Obedi kwa Rutu, Obedi kamweleka Yese; 6Yese kamweleka Imfalume Daudi, naye Daudi kamweleka Selemani; mai wake Selemani tsaayula iyakalile mwehe wa Uriya. 7Selemani kamweleka Rehoboamu; Rehoboamu kamweleka Abiya; Abiya kamweleka Asa; 8Asa kamweleka Yehoshafati; Yehoshafati kamweleka Yoramu; Yoramu kamweleka Uzia; 9Uzia kamweleka Yothamu; Yothamu kamweleka Ahazi; Ahazi kamweleka Hezekiya; 10Hezekiya kamweleka Manase; Manase kamweleka Amoni; Amoni kamweleka Yosia; 11Yosia kamweleka Yekonia na ndughu tsake mna ghamatsuwa aghala Wayahudi ghawaghalighwe kuna utumwa isi ya Babilonia.

12Wayahudi hawakalile Babeli, Yekoniya kamweleka Shealitieli; Shealitieli kamweleka Zerubabeli; 13Zerubabeli kamweleka Abiudi; Abiudi kamweleka Eliakimu; Eliakimu kamweleka Azori; 14Azori kamweleka Sadoki; Sadoki kamweleka Akimu; Akimu kamweleka Eliudi; 15Eliudi kamweleka Eliazazi; Eliazari kamweleka Matani; Matani kamweleka Yakobu; 16Yakobu kamweleka Yosefu, immale wake Maria, mai wake Yesu, iyokemighwa Kiristu, au Masia. 17Apfo kukala na pfeleko kumi na nne kulawa Abrahamu mbaka Daudi; na pfeleko kumi na nne kulawa Daudi mbaka Wayahudi hawaghalighwe akula Babilonia; na pfeleko kumi na nne kulawa Wayahudi hawaghalighwe Babilonia mbaka ukwelekighwa kwa Kiristu.

Ukwelekighwa kwa Yesu Kiristu

(Luk 2:1-7)

18Ukwelekighwa kwa Yesu Kiristu tsakukala apfino, Maria mai wake Yesu tsakalapfighwa tsengele na Yosefu; lekeni tsang'ana wawase hamwe baye, Mariya koneka kana inda kwa uwetso wa Loho Yelile. 19Kwaapfila Yosefu tsakakala munu wa haki, ng'abamile kumghela chinyala baye, apfo kabama yamleke kwa chipfiso. 20Hayang'ali yotongelela ichinu acho, malaika wa Imndewa kamlawila mndoto kamlongela, “Yosefu mwana wa Daudi, uleke kupfuka kumsola Maria imwehe wako, kwaapfila inda iyali nayo kaipata kwa uwetso wa Loho Yelile. 21Katsakweleka imwana mmale, naghwe kutsomkema taghwa lyake Yesu, kwaapfila yeye katsowakombola iwanu wake na tsinzambi tsawo.”

22Ghose aghano ghalawila kutimilitsa aghala ghayalongile Imtwatsa kubitila inabii;

23“Lola! Mwali ng'ana yawase na mmale katsokinda inda,

naye katsakweleka mwana,

nawo watsomkema Imanweli!

Mana yake, Imlungu kahamwe na twetwe.”

24Apfo Yosefu hayalamke katenda apfila imalaika wa Imtwatsa pfayamlongele; kamsola imwehe wake; 25lekeni ng'awasile naye baye mbaka hayeleke imwanaghe; kamkema litaghwa lyake Yesu.

Voafantina amin'izao fotoana izao:

Matei 1: LBV

Asongadina

Hizara

Dika mitovy