Matiyu, echî 5

Mfoné ogyebhá-ḿbə́ŋé mbi Obhasi

(Luk 6.20-23)

1Jisos a yên ane á kə́ bha ka nkam ka nkam. A gyʉ̂t a kúmi ka egúí etat, atóbhá abhê á fáre yê á kâk. 2A róghe ábho ekpíím se

3“Deê ogyebhá-ḿbə́ŋé ó jóe na ane

mba á məŋe sê á rî noŋ akpák ka achot Obhasi,

otúi Obhasi a ri mbi ábho.

4Deê ogyebhá-ḿbə́ŋé ó jóe na ane

mba á rî ka ekʉ̂,

Obhasi tîk a fôn ábho obhə́bhe.#Asa 61.2.

5Deê ogyebhá-ḿbə́ŋé ó jóe na ane

mba á ká kep biji ábho sê á chiŋi ochíŋ,

tîk ngun nnyí a jóe nnyi ábho.#Nkôn 37.11.

6Deê ogyebhá-ḿbə́ŋé ó jóe na ane

mba ndûm íkíkéré ḿbə́ŋé ábho a ri sê

á yîm iyîm mbi í rî ka nnyen-i-mbá,

Obhasi tîk a káre ábho nji á wóme.#Asa 55.1-2.

7Deê ogyebhá-ḿbə́ŋé ó jóe na ane

mba á kí ri nsôn na atem-ane,

Obhasi tîk a rî ábho nsôn.

8Deê ogyebhá-ḿbə́ŋé ó jóe na ane

mba á fóne ḿbə́ŋé ábho jáé,

tîk á yên Obhasi.#Nkôn 24.3-4.

9Deê ogyebhá-ḿbə́ŋé ó jóe na ane

mba á nógha sê ekone é jóe ka ngun,

Obhasi tîk a bhîŋ ábho se abhon abhê.

10Deê ogyebhá-ḿbə́ŋé ó jóe na ane

mba ngun á kí karé ábho onyʉk

ka á kí yim ejûm nji Obhasi a wóme,

otúi Obhasi a ri mbi ábho.#1 Pita 3.14.

11Deê ogyebhá-ḿbə́ŋé ó jóe na ên

nji ane á tu ên, á bhibha ên,

á nyerá ên mkpak achot áfúbhí ka ó tobha ên ə̂m.#1 Pita 4.14.

12Gyebhê ên ḿbə́ŋé kpe-eji, ka Obhasi a kî ên ekpatə́m ekəp ka ósô. Nâ noŋ á yími fə́ne na akará-otîp Obhasi ebhú áji.”#2 É fâp 36.16; Etûm 7.52.

O ri ên noŋ akâŋ na ebhát mbâ ane ngun

(Mak 9.50; Luk 14.34-35)

13“O ri ên noŋ akâŋ mbâ ane ngun chénchén. Kən ájoé ogyep akâŋ ó man, ekpak nji á kí yim ḿmáne á kpó gyebhé cháŋ. Eji á kí kpo ko ḿmáne á yîm kpe ejûm cháŋ. Á kí bhum ḿmáne ane á chemá.#Mak 9.50; Luk 14.34-35.

14“O ri ên noŋ ebhát í ngun. Eték nji á gbée ka ńchí egúí, é ká joé ka ebhə̂t.#Jon 8.12; 9.5. 15Nne á bhó nyoé ńtʉ́ríkáŋ, a kô ejûm a bhúi. Á kik nná ka echî ébhúní se ane chénchén ka njû á yén ebhát.#Mak 4.21; Luk 8.16; 11.33. 16Ka ekpak njí mân, deê erû ejə́né é jóe noŋ ebhát mbâ ane chénchén. Ane á yen, á káre nkat mbâ Obhasi Ńsé owəné nnyo a ri ka ósô.”#1 Pita 2.12.

Okpígha-ejûm ka achot ebhín

17“Nne a kâ kére se m báe áno ḿ bá bhíbhí ebhín nji Mosis a karê ên na kpe ḿ bá bhíbhí fə́ne okpígha-ejûm akará-otîp Obhasi. Ń ka bhá áji. Kən m báe bəre ḿ bá yîm iyîm mbi á séŋe í jóe ka etʉri. 18Deê ń sə́ré ên bəre ta ósô na nsi í chîŋ, kpe mmon ikóé ebhín yót nnyo á kí yighí cháŋ, ta chénchén é jên ka ekpak ebhín í nchane é fíi.#Luk 16.17. 19Kpe énê mân nnyo á ka kí ebhín, kpe é rî mkpât, a kpík fə́ne ane etat se á tóp erû ejê, tîk a jóe ńgô mkpât ka otúi Obhasi. Kən nne nnyo a kí ki ebhín Obhasi, a kpík fə́ne ane etat se á tóp erû ejê, tîk a jóe nne nyúp ka otúi Obhasi. 20N kí səre ên mân bəre kən nne a yén otúi Obhasi, ekpin ejê é rî é jóe ka nnyen-i-mbá é chíŋí ekpak nji atóŋá-ebhín na ane echəme Farasi á yíma.”

Nne Obhasi a kâ yâm ḿbə́ŋé na ntem

21“Ó yuk ên sê ka éməné á sə́re sê, nne a kâ yúi nne. Ó yui, á kí kak wâ ka esup.#Ane 20.13; Otira 5.17. 22Kən mme n kí səre ên mfá-mfá bəre kpe énê nnyo á fon oyámá-ḿbə́ŋé na ntem, á kí kak yê ka esup. Kpe énê nnyo á sə́re ntem se, we nâ énê, a kí gyimi a támé bibhə̂p ka ochî echəme Atáŋá-eték. Nne fə́ne nnyo á tu ntem se o ri énə́mé nne, nne ányo á ro məŋé, a kí gye ka erəmta-ngûn.

23“Ájoé mân ó ko ekəp ó jí káre mbâ Obhasi kən o sî eji á túbha ekəp njí, o tît se ó yim ntem owa ejûm ebhí, 24kî ekəp ejâ áfo, o chə́bhe njəm o jî mân achot. Ó fôn ên ekone kən o bhâ kə̂n ekəp ejâ mân o káre mbâ Obhasi.

25“Ájoé ó fon nchot na nne, deê ó wóm ekpak nji nchot ányi a kí man, a kâ kô wâ a ji esup. Man ńnyə́ne ka mbá kən ó sí ên esup, ka ó kam a sî na we, a kí karé wâ mbâ ntáŋa-esup. Ó ro məŋé, ntáŋa-esup tîk a káre wâ ka obhô anyaghá-orə́p, á kâk wâ ka ókúmí. 26Deê ń sə́ré wâ bəre o kí kət ka ókúmí mbí ta o káre ngom eya a mân fép.”

Nne Obhasi a kâ gbô ekun

27“Ó yuk ên noŋ á sə́re éməné sê, nne a kâ gbô ekun.#Ane 20.14; Otira 5.18. 28Kən mme, n kí səre ên bəre nne nnyo á kep nne-nkáé kpe nnyón-nnyón a fôn íkíkéré enuŋ na yê, a gbô ekun. 29Ájoé eyə̂t obhô-orûm ejâ é kí kak wâ ka obhí, kpaghê ńjə́ne bhum. É nop sê ó bhíbhí eyô-biji ejâ jə́t, na nji o kí joé biji ibhâ ndə́m, o gyê ka erəmta-ngûn.#Mat 18.9; Mak 9.47. 30Ájoé obhô-orûm obhâ ó kí kak wâ ka obhí, gbût bhum. É nop sê ó bhíbhí eyô-biji ejâ jə́t na nji ó kə́n biji ndə́m ó kâk ka erəmta-ngûn.”#Mat 18.8; Mak 9.43.

Kə́n ebháé é mân nan?

(Mat 19.9; Mak 10.11-12; Luk 16.18)

31“Ó yûk ên noŋ á sə́re éməné sê nne nnyo á timí a bhím nkáé ka ebháé, deê a séŋ nwet ebháé emanám a káre nne-nkáé ányo.#Otira 24.1-4; Mat 19.7; Mak 10.4. 32Kən mme, n kí sə́re ên bəre nne-ndûm nnyo á bhim nkáé owe nji nkáé á ka nuŋí nne-ndûm etat, nâ a chóe nkáé owe a gbô ekun nji nkáé á ko ndûm etat. Kpe nne-ndûm nnyón fə́ne nnyo a kóe nkáé nnyó, a gbô ekun.”#Mat 19.9; Mak 10.11-12; Luk 16.18; 1 Korin 7.10-11.

Nne Obhasi á chot nchot, a kâ chími

33“Ó yuk ên fə́ne á to ta ka éməné sê, nne á chimí ejûm ka ochî Obhasi, deê a yim ńjə́ne a kâ yóŋe eyum.#Mbín 19.12; Mfana 30.2; Otira 23.21. 34Kən mme, n kí səre ên bəre nne a kâ chími kpe echimím. O kâ chími ebhú tat se, ‘Ta ósô,’ ka ósô a ri ekumi otúi Obhasi.#Jems 5.12; Asa 66.1; Mat 23.22. 35Ka chími se, ‘Ta nsi,’ ka nâ eji Obhasi á kuná akát. Ka chími ebhú tat se, ‘Jerusarem ee!’ ka nâ eték ekpatə́m í ntûfâm nnyo a chíŋi ochíŋí.#Asa 66.1; Nkôn 48.2. 36Kpe se ó chími se, ‘Ta echî ejámé,’ o kâ chími, ka kpe ekát í nnyʉ̂ jə́t ó ka yim se é chə́bhe ényaghê, kpe ébháré. 37Kpe é fóghe wâ nan, nji o fonê ka eyimím a ri ekamám se, ‘Nn̂,’ na etáŋám se, ‘Ée.’ Nji ó kpo chot é chíŋi njí, é dʉ̂ mbâ Satan.”

Nne Obhasi a kâ dî nkáŋ

(Luk 6.29-30)

38“Ó yuk ên noŋ á tóe sê, ó tane eyə̂t í ntem, á táne ejâ eróŋ. Ó mək eyîŋ í ntem, á yíghi fə́ne ejâ.#Ane 21.24; Mbín 24.20; Otira 19.21. 39Kən mme, n kí səre ên bəre, nne á yim wâ ejûm, deê o kâ yîm yê ó fé. Nne á sum wâ nsâp ka okîk obhô-orûm, kpíghi, tóŋé yê fə́ne okîk obhô-okáé, yê a súm. 40Sê ebhú tat a kâk wâ ka esup, ńga a kə̂n nkʉ̂ eya nnyi ó kaghá, kpére kə̂n kût eya fə́ne karê yê. 41Ájoé nne a fî wâ ka ikom se ó kə́n echóé ejê ó jên ntáé yə́t, kə́n ńjə́ne jen ntáé ébháe. 42Ájoé nne á bhəp wâ ejûm nji ó fon, karê yê. Nne a bháe obhô mbâ eya, ájoé ó fon, bho yê.”

Kot ane ebhan abhâ

(Luk 6.27-28,32-36)

43“Ó yuk ên fə́ne á səre éməné sê deê nne a tóŋé okot na nne nnyo a korê yê, a bhan fə́ne nne nnyo a yíri yê.#Mbín 19.18. 44Kən mme, n kí səre ên bəre ó kôt ên ane ebhan abhə́né. Gorê ên Obhasi sê a ri nsôn na ane mba á kára ên oseŋe. 45Ó yim ên ka ekpak njí, tîk o jóe ên abhon í Ńsé owəné Obhasi nnyo a ri ka ósô. Echî aŋ? Yê a kí yim njúí a gbok ane chénchén, kpe ane abhí, kpe ane ano. A kí yim mbúta a nak a bherá ane chénchén, kpe á yíma iyîm ka nnyen-i-mbá, kpe á rôk oyim. 46Ájoé ó kot ên a ri ane mba á kóre ên, o kí yim ên nan ó fôn ekəp Obhasi, ka kpe ane abhí noŋ abhə́bhá-ntí-echî á kóra a ri ane mba á kóra ábho. 47Ájoé o kí joé ka ekone a ri na atem abhâ, ó kere se ó yim ejûm eno etat egyê a? Ó ka yim, ka kpe ane mba á ká məŋé Obhasi, á kóra fə́ne a ri atem ábho. 48Nâ deê mân erû ejə́né é jóe ka nnyen-i-mbá noŋ nji Ńsé owəné ka ósô.”#Mbín 19.2; Otira 18.13.

Voafantina amin'izao fotoana izao:

Matiyu, echî 5: ETUNT

Asongadina

Hizara

Dika mitovy