Zakaria 7
7
Valin’ny fanontanian’ny avy any Betela ny amin’ny andro fifadiana, ary filazana ny loza hamelezan’i Jehovah ny olony, sy ny mbola hitahiany azy.
1ARY tamin’ny taona fahefatra nanjakan’i Dariosa no nahatongavan’ny tenin’i Jehovah tamin’i Zakaria, tamin’ny andro fahefatra tamin’ny volana fahasivy (Kisleva izany); 2ary Betela efa naniraka an’i Serezera sy Regema-meleka sy ny olony#7.2 Na: ary ny any Betela, dia Serezera . . . . efa naniraka. hifona amin’i Jehovah 3ka hiteny amin’ny mpisoron’ny tranon’i Jehovah, Tompon’ny maro, sy amin’ny mpaminany hoe: Hitomany amin’ny volana fahadimy va aho ka hifady toy ny fanaoko tamin’ny taon-dasa ela?
4Dia tonga tamiko ny tenin’i Jehovah, Tompon’ny maro, nanao hoe: 5Lazao amin’ny vahoaka rehetra amin’ny tany sy amin’ny mpisorona hoe: Raha nifady hanina sy nitomany tamin’ny volana fahadimy sy ny fahafito tamin’izao fito-polo taona izao, hianareo moa nifady ho Ahy va hianareo? 6Ary raha mihinana sy misotro hianareo, moa tsy mihinana sy misotro ho an’ny tenanareo ihany va hianareo?#7.6 Na: Moa tsy hianareo ihany va no mihinana sy misotro. 7Moa tsy tokony ho nihaino ny teny izay nasain’i Jehovah nantsoin’ny mpaminany fahiny va hianareo, fony mbola nonenana sy nandry fahizay Jerosalema sy ny zana-bohiny manodidina azy, sady nonenana koa ny tany atsimo sy ny tany lemaka amoron-tsiraka?#7.7 Na: Sefela.
8Ary tonga tamin’i Zakaria ny tenin’i Jehovah nanao hoe: 9Izao no lazain’i Jehovah, Tompon’ny maro: Manaova fitsarana marina, ary samia mifampiantra sy mifamindra fo amin’ny rahalahiny avy; 10ary aza mampahory ny mpitondratena na ny kamboty, na ny vahiny, na ny mahantra; ary aza misy mihevitra ao am-ponareo hanisy ratsy ny rahalahinareo hianareo. 11Nefa tsy nety nihaino ireny, fa nampihemotra ny sorony, ary nataony lalodalovana ny sofiny mba tsy handre. 12Eny, nanao ny fony ho mafy toy ny diamondra izy, mba tsy hihaino ny lalàna sy ny teny izay nampitondrain’ny Fanahin’i Jehovah, Tompon’ny maro, holazain’ny mpaminany fahiny, ka dia tonga izay fahatezerana mafy avy tamin’i Jehovah, Tompon’ny maro, 13Koa toy ny niantsoan’ireny, fa tsy nohenoiny, dia ho toy izany no hiantsoany kosa, fa tsy hohenoiko, hoy Jehovah, Tompon’ny maro; 14fa haeliko amin’ny tafio-drivotra ho any amin’ny firenena rehetra izay tsy fantany izy. Toy izany no nahalao ny tany tao aoriany, ka tsy nisy olona nandroso na niverina; fa nahatonga ny tany mahafinaritra ho tany lao izy.
Voafantina amin'izao fotoana izao:
Zakaria 7: MBP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Protestanta Malagasy © Malagasy Bible Society, 1965, 2019.