Obadia 1
1
Ny fahitan’i Obadia ny amin’ny handravana an’i Edoma mbamin’ny jentilisa sasany noho ny ratsy nataony tamin’ny Isiraely, ary ny hampiorenana ny fanjakan’i Jehovah any Ziona.
1NY fahitan’i Obadia.
Izao no lazain’i Jehovah Tompo ny amin’i Edoma:–Nahare filazana avy tamin’i Jehovah izahay,
Ary nisy iraka nalefa ho any amin’ny jentilisa hanao hoe:
Mitsangàna, aoka isika hitsangana hanafika azy!–
2Indro, hataoko tsinontsinona eo amin’ny firenena hianao,
Eny, ho fanazimbazimba indrindra hianao.
3Ny avonavon’ny fonao no namitaka anao,
Ry ilay monina ao an-tsefatsefaky ny harambato,
Any amin’ny fonenana avo,
Sady manao anakampo hoe:
Iza no hampivarina ahy ho eny an-tany?
4Na dia miakatra tahaka ny voromahery aza hianao
Ka mametraka ny akaninao eny amin’ny kintana,
Dia havariko avy eny hianao, hoy Jehovah.
5Raha, tàhiny misy mpangalatra, na jiolahy alina, tonga ao aminao–
(Indrisy, fongotra hianao!)–
Moa tsy izay hahafa-po azy ihany va no hangalariny?
Raha tàhiny misy mpioty voaloboka tonga ao aminao,
Moa tsy hamela voaloboka sisa hotsimponina va izy?
6Endrey ny fitady ny an’i Esao!
Endrey ny fikatsaka ny hareny miafina!
7Ny olona rehetra izay vita fanekena taminao no nampandeha anao hatramin’ny sisin-tany;
Izay tsara fihavanana aminao no namitaka ka naharesy anao;
Izay mihinana ny haninao no namela-pandrika ao ambaninao–
Tsy misy fahalalana ao aminy;
8Moa tsy amin’izany andro izany va, hoy Jehovah, no hamongorako ny olon-kendry ao Edoma,
Sy ny manan-tsaina ao an-tendrombohitr’i Esao?
9Ary ho raiki-tahotra ny lehilahy maherinao, ry Temana,
Mba haringana amin’ny vonoana ho foana ny any an-tendrombohitr’i Esao.
10Noho ny fampahoriana an’i Jakoba rahalahinao dia ho voasaron-kenatra hianao
Ka ho fongotra mandrakizay.
11Tamin’ilay andro namitsahanao#1.11 Heb. nijanonanao. teny am-pita,
Tamin’ny andro namaboan’ny vahiny ny fananany,
Sy nidiran’ny hafa firenena teo amin’ny vavahadiny,
Ary nanaovany loka an’i Jerosalema,
Dia mba toy ny anankiray tamin’ireny koa hianao.
12Aza finaritra mijery ny andron’ny rahalahinao amin’ny andro ahitany loza izay tsy misy toa izany;
Ary aza mifaly ny amin’ny taranak’i Joda amin’ny andro andringanana azy;
Ary aza manao teny miavonavona amin’ny andro fahoriana.
13Aza miditra amin’ny vavahadin’ny oloko amin’ny andro ahitany loza;
Aza finaritra mijery ny fahantrany amin’ny andro ahitany loza hianao,
Ary aza maninji-tànana haka ny fananany amin’ny andro ahitany loza.
14Aza mamitsaka#1.14 Heb. mijanona. eo amin’ny sampanan-dàlana hamono izay afa-nandositra hianao;
Ary aza manolotra izay sisa aminy amin’ny andro fahoriana.
15Fa efa antomotra amin’ny jentilisa rehetra ny andron’i Jehovah;
Toy ny nataonao no mba hatao aminao kosa;
Eny, hitsingerina ho eo an-dohanao ny nataonao.
16Fa toy ny nisotroanareo teo an-tendrombohitra masina,
Dia toy izany koa no hisotroan’ny firenena rehetra mandrakariva,
Eny, hisotro izy ka hitelina,
Ary ho toy ny tsy ary izy.
17Fa ao an-tendrombohitra Ziona dia hisy izay sisa afaka,
Ary ho masina izy;
Ary ny taranak’i Jakoba hahalasa ny fananany.
18Ny taranak’i Jakoba ho afo,
Ary ny taranak’i Josefa ho lelafo,
Fa ny taranak’i Esao kosa ho vodivary,
Ary harehitr’ireny izy ka holevoniny;
Ary tsy hisy sisa afaka ny taranak’i Esao,
Fa Jehovah no efa niteny.
19Ny any amin’ny tany atsimo no hahalasa ny tendrombohitr’i Esao;
Ary ny any amin’ny tany lemaka amoron-tsiraka#1.19 Heb. Sefela. no hahalasa ny Filistina;
Hahalasa ny tanin’ny Efraima sy ny tany Samaria izy;
Ary Benjamina hahalasa an’i Gileada.
20Ary ny babo amin’izao Zanak’Isiraely maro be izao hahalasa ny Kananita hatrany Zarefata,
Ary ny babo#1.20 Na: marobe izao, izay any amin’ ny Kananita hatrany Zarefata, sy ny babo, etc. tany Jerosalema, izay any Sefarada, dia hahalasa ny tanàna any amin’ny tany atsimo.
21Ary hisy mpamonjy miakatra ho ao an-tendrombohitra Ziona
Hitsara ny tendrombohitr’i Esao;
Ary ho an’i Jehovah ny fanjakana.
Voafantina amin'izao fotoana izao:
Obadia 1: MBP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Protestanta Malagasy © Malagasy Bible Society, 1965, 2019.