Genesisy 30
30
1Ary rehefa hitan-dRahely fa tsy mba niteraka tamin’i Jakoba izy, dia nialona ny rahavaviny izy, ka hoy izy tamin’i Jakoba: Mba omeo zaza aho, fa raha tsy izany, dia ho faty aho. 2Dia nirehitra tamin-dRahely ny fahatezeran’i Jakoba, ka hoy izy: Solon’Andriamanitra, Izay nahamomba anao tsy hiteraka, va aho? 3Ary hoy izy: Indro Bila ankizivaviko, vadio izy; dia hiteraka eo am-pofoako izy, mba hahazoako zaza aminy. 4Dia nomeny azy Bila ankizivaviny ho vadiny; ary dia novadin’i Jakoba koa izy. 5Dia nanan-anaka Bila ka niteraka zazalahy tamin’i Jakoba. 6Ary hoy Rahely: Andriamanitra efa nanome ahy ny rariny sady efa nihaino ny feoko, ka nomeny zazalahy aho; izany no nanaovany ny anarany hoe Dana.#30.6 Dana = Mpanome rariny.
7Dia nanan-anaka indray Bila, ankizivavin-dRahely, ka niteraka zazalahy faharoany tamin’i Jakoba. 8Ary hoy Rahely: Fitolomana mafy dia mafy#30.8 Heb. Fitolomana tamin’Andriamanitra. no nitolomako tamin’ny rahavaviko, ka nahery aho; dia nataony hoe Naftaly#30.8 Naftaly = Fitolomako. ny anarany.
9Ary rehefa hitan’i Lea fa efa nitsaha-jaza izy, dia naka an’i Zilpa ankizivaviny izy, ka nomeny ho vadin’i Jakoba koa. 10Ary Zilpa, ankizivavin’i Lea, dia niteraka zazalahy tamin’i Jakoba. 11Ary hoy Lea: Manan-jara re aho! dia nataony hoe Gada#30.11 Gada = Zara. ny anarany.
12Ary Zilpa, ankizivavin’i Lea, dia niteraka zazalahy faharoany tamin’i Jakoba. 13Ary hoy Lea: Sambatra aho, fa hataon’ny zanakavavin’ny olona hoe sambatra aho; dia nataony hoe Asera#30.13 Asera = Sambatra. ny anarany.
14Ary nivoaka nitsangantsangana Robena tamin’ny andro fijinjam-bary#30.14 Tritika, dia varimbazaha. ka nahita dodaima#30.14 Mandragora, dia zava-maniry iray karazana amin’ny ramiary. naniry tany an-tsaha, dia nitondra azy ho any amin’i Lea reniny. Ary hoy Rahely tamin’i Lea: Veloma hianao, mba anomezo ahy kely ny dodaiman’ny zanakao. 15Ary hoy izy taminy: Moa zavatra kely va ny nakanao ny vadiko? dia halainao koa va ny dodaiman’ny zanako? Ary hoy Rahely: Aoka handry aminao ihany ary izy anio alina noho ny dodaiman’ny zanakao. 16Ary nony hariva, rehefa tonga avy tany an-tsaha Jakoba, dia nivoaka nitsena azy Lea ka nanao hoe: Ho ato amiko no halehanao; fa ny dodaiman’ny zanako no efa nakaramako anao tokoa. Dia nandry taminy izy tamin’iny alina iny.
17Ary Andriamanitra nihaino an’i Lea, dia nanan-anaka izy ka niteraka zazalahy fahadiminy tamin’i Jakoba. 18Ary hoy Lea: Efa nomen’Andriamanitra ny karamako, satria nomeko hovadin’ny vadiko ny ankizivaviko; dia nataony hoe Isakara#30.18 Isakara = Misy karama, na mitondra karama. ny anarany.
19Dia nanan-anaka indray Lea ka niteraka zazalahy faheniny tamin’i Jakoba. 20Ary hoy Lea: Efa nanome anjara soa ho ahy Andriamanitra; amin’izao vao hitoetra amiko ny vadiko, fa efa niteraka zaza enin-dahy ho azy aho; dia nataony hoe Zebolona#30.20 Zebolona = Fitoerana, na fonenena. ny anarany.
21Ary rehefa afaka izany, dia niteraka zazavavy izy, ka nataony hoe Dina ny anarany.
22Ary Andriamanitra nahatsiaro an-dRahely, dia nihaino azy ka nampanan-anaka azy. 23Ary nanan-anaka izy ka niteraka zazalahy; dia hoy izy: Efa nahafa-tondromaso ahy Andriamanitra. 24Dia nataony hoe Josefa#30.24 Josefa = Hanampy, na hanaisotra, Izy. ny anarany, ka hoy izy: Jehovah anie mbola hanampy zazalahy iray ho ahy koa.
Ny fanekena hafa koa izay nataon’i Labana sy Jakoba.
25ARY rehefa niteraka an’i Josefa Rahely, dia hoy Jakoba tamin’i Labana: Alefaso aho hankany amin’ny fonenako sy ny taniko. 26Omeo ahy ny vadiko aman-janako, izay nanompoako anao, dia handeha aho; fa fantatrao ny fanompoana izay nanompoako anao.
27Ary hoy Labana taminy: Masìna hianao, raha nahita fitia eo imasonao aho, mitoera eto amiko; efa namantatra#30.27 Heb. efa nanao sikidy. aho, ka fantatro fa avy taminao no nitahian’i Jehovah ahy. 28Ary hoy koa izy: Tonòny izay ho karamanao, dia homeko anao.
29Ary hoy Jakoba taminy; Fantatrao ny nanompoako anao sy ny toetry ny omby aman-ondrinao tato amiko. 30Fa kely ny fanananao, fony tsy mbola tonga aho, fa efa nitombo be dia be izy; ary efa nitahy anao Jehovah tamin’ny diako rehetra; ary ankehitriny, rahoviana kosa aho no mba hihary ho an’ny ao an-tranoko?
31Ary hoy izy: Inona ary no homeko anao? Ary hoy Jakoba: Tsy hanome ahy na inona na inona hianao; raha hataonao amiko izao zavatra izao, dia mbola handrasako sy hotandremako ihany ny ondry aman-osinao: 32Handeha hitety ny ondry aman-osinao rehetra aho anio ka hanavaka ny mara sy ny sada rehetra, ary ny mainty rehetra eo amin’ny ondry ary ny sada sy ny mara eo amin’ny osy; koa ireny no ho karamako. 33Ny fahamarinako no ho vavolombeloko amin’ny andro ho avy, raha tonga hianao handinika ny karamako: izay rehetra tsy mara ary tsy sada eo amin’ny osy, ary izay tsy mainty eo amin’ny ondry, dia ho halatro izany.
34Ary hoy Labana: Eny, aoka ho araka ny teninao ary. 35Dia navahany tamin’izany andro izany ny osilahy sadika sy sada, ary izay osivavy rehetra mara sy sada, dia izay rehetra nisy fotsy, ary ny mainty rehetra teo amin’ny ondry; dia natolony teo an-tànan’ny zanani-lahy ireny. 36Ary nasiany làlan-kateloana teo anelanelan’izy sy Jakoba; ary Jakoba niandry ny ondry aman-osin’i Labana sisa.
37Ary Jakoba dia naka tsora-kazo maro tamin’ny hazo popola maitso sy tamin’ny hazo lozy#30.37 Lozy = amygdala (?). sy tamin’ny hazo platana; ka nataony ofy vandana ireny hisehoan’ny fotsy izay teo amin’ny tsora-kazo. 38Ary ireny tsora-kazo voaofiny ireny dia napetrany teo anoloan’ny ondry aman-osy, teo anatin’ny tavin-drano, dia teo amin’ny fisotroan-drano, izay nalehan’ny ondry aman-osy hisotro, ka nikambana teo ny lahy sy ny vavy, raha avy hisotro rano izy. 39Dia nikambana tandrifin’ny tsora-kazo ny ondry aman-osy ka niteraka sadika sy mara ary sada. 40Ary ny zanak’ondry navahan’i Jakoba, ary ny ondry sisa dia nataony manatrika ny sadika sy ny mainty rehetra teo amin’ny ondry aman-osin’i Labana; ary natokany izay ondry aman-osy ho azy ka tsy navelany hiharo tamin’ny ondry aman-osin’i Labana. 41Ary na oviana na oviana no hikambanan’ny ondry aman-osy matanjaka, dia napetrak’i Jakoba teo anatin’ny tavin-drano teo anoloan’ny mason’ny ondry aman-osy ireny tsora-kazo ireny, mba hikambanany eo anilan’ny tsora-kazo. 42Fa raha osaosa kosa ny ondry aman-osy, dia tsy mba napetrany teo ireny; ka dia ny osaosa no an’i Labana, fa ny matanjaka kosa no an’i Jakoba.
43Dia nitombo harena indrindra ralehilahy ka nanana ondry aman-osy betsaka ary andevovavy sy andevolahy ary rameva sy boriky.
Voafantina amin'izao fotoana izao:
Genesisy 30: MBP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Protestanta Malagasy © Malagasy Bible Society, 1965, 2019.