Amosa 4
4
Ny hanjo ny Isiraely noho ny tsi-fetezany hibebaka.
1MIHAINOA izao teny izao, hianareo vantotr’ombivavin’i Basana,
Izay eny an-tendrombohitr’i Samaria,
Dia hianareo izay mampahory ny mahantra
Sy manorotoro ny malahelo
Ary manao amin’ny vadinareo#4.1 Na: ny tomponareo: Heb. tompony, na vadiny. hoe: Mitondrà hosotrointsika.
2Jehovah Tompo efa nianiana tamin’ny fahamasinany hoe:
Indro, ho avy aminareo ny andro
Hitarihany anareo amin’ny farango sy izay sisa aminareo amin’ny fintana.
3Ary avy eo amin’ny banga no hivoahanareo,
Samy amin’izay hitsiny avy;
Ary horoahina ho any Harmona#4.3 Na: an-tranobe. hianareo,#4.3 Na: ary harianareo ny fahefana (?). hoy Jehovah.
4Mankanesa any Betela, ka manotà,
Ary any Gilgala, ka manotà fatratra;
Ento isa-maraina ny fanatitrareo alatsa-dra
Ary isan-kateloana ny fahafolon-karenareo;
5Mandoroa zavatra misy masirasira ho fanati-pisaorana,
Ary miantsoa fanati-tsitrapo, eny, ambarao izany!
Satria ny toy izany no sitrakareo, ry Zanak’Isiraely, hoy Jehovah Tompo.
6Fa Izaho dia efa nanome anareo ny mahamavovava tao an-tanànanareo rehetra,
Sy ny tsi-fahampian-kanina tamin’ny fonenanareo rehetra;
Nefa tsy niverina tamiko ihany hianareo, hoy Jehovah.
7Ary Izaho koa efa nampihantona ny orana tsy ho aminareo,
Raha mbola telo volana sisa tsy ho fararano,
Ka tamin’ny tanàna iny no nampilatsahako orana,
Ary tamin’ny tanàna iray kosa tsy mba nampilatsahako azy;
Ny saha iray nilatsahan’ny orana,
Ary ny saha iray kosa tsy mba nilatsahany ka maina.
8Dia nivembena ny tanàna roa aman-telo nitady rano tany amin’ny tanàna iray,
Kanjo tsy afa-ketaheta izy;
Nefa tsy niverina tamiko ihany hianareo, hoy Jehovah.
9Efa nasiako tamin’ny vary main’ny rivotra sy maty fotsy hianareo;
Ny habetsahan’ny tanimbolinareo sy ny tanimboalobokareo
Sy ny aviavinareo sy ny hazo olivanareo
Dia nohanin’ny valala;#4.9 Na: mpikiky.
Nefa tsy niverina tamiko ihany hianareo, hoy Jehovah.
10Efa naterako areti-mandringana tahaka ny any Egypta hianareo;
Novonoiko sabatra ny zatovonareo
Sady nobaboina koa ny soavalinareo;
Ary nampakariko ho eo am-bavoronareo ny hamaimboan’ny tobinareo;
Nefa tsy niverina tamiko ihany hianareo, hoy Jehovah.
11Efa nisy noravako teo aminareo tahaka ny nandravan’Andriamanitra an’i Sodoma sy Gomora,
Ka efa tahaka ny forohana nosarihana tamin’ny afo hianareo;
Nefa tsy niverina tamiko ihany hianareo, hoy Jehovah.
12Koa izao no hataoko aminao, ry Isiraely,–
Satria hanao izany aminao Aho,
Dia miomàna hihaona amin’Andriamanitrao, ry Isiraely ô.
13Fa indro Ilay mamorona ny tendrombohitra sy manao ny rivotra
Ary mampahafantatra ny olombelona izay heviny,–
Dia Ilay mahatonga ny maraina ho aizina
Ary mandia ny fitoerana avo amin’ny tany:
Jehovah, Andriamanitry ny maro, no anarany.
Voafantina amin'izao fotoana izao:
Amosa 4: MBP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Protestanta Malagasy © Malagasy Bible Society, 1965, 2019.