Apôkalipsa nosoratan’i Md Joany 4
4
II. Ireo fahitana milaza faminaniana
IREO DINIDINIKA MIALOHA NY «ANDRO LEHIBE» AN’ANDRIAMANITRA
1Taorian’izany, dia hitako fa indro nisy varavarana mivoha teny an-danitra; ary ilay feo voalohany efa reko, toy ny an’ny trômpetra, dia niteny tamiko hoe: Miakara atỳ#4,1 Miakara: am-panahy; atỳ, any an-danitra. Toa fiomanana any an-danitra no aseho an’i Md. Joany aloha., dia hasehoko anao ny zavatra tsy maintsy ho avy any aoriana any. 2Niaraka tamin’izay, dia voatsindrin’ny Fanahy aho, ka indro nisy seza fiandrianana niarina tany an-danitra, ary nisy nipetraka#4,2 Nisy nipetraka, Andriamanitra. teo ambonin’ny seza fiandrianana. 3Toy ny vato jaspa sy sardoana ny tarehin’ilay nipetraka; ary voahodidina avana miendrik’emeraoda ny seza fiandrianana.
4Nisy seza fiandrianana efatra amby roapolo nanodidina ilay seza fiandrianana anankiray, ka Anti-dahy 24#4,4 Anti-dahy 24. Saro-pantarina izay tena heviny; angamba anjely toa tandapan’Andriamanitra izany. koa no nipetraka tambonin’ireo; fitafiana fotsy no nentiny, ary satroboninahitra volamena no teny an-dohany. 5Helatra sy feo aman-kotroka no nivoaka tamin’ilay seza fiandrianana, ary fanaovan-jiro fito mirehitra no teo anoloany, dia ny Fanahy fiton’Andriamanitra izany.
6Nisy toa ranomasina fitaratra miendri-kristaly teo anoloan’ilay seza fiandrianana, ary Zava-manana aina efatra#4,6 Zava-manana aina efatra. Ireo koa angamba dia Anjely, mitovitovy amin’ireo Kerobima mpitondra ny fiketrahan’Andriamanitra. feno maso avokoa ny anoloany sy an-damosiny no teo afovoany sy nanodidina azy. 7Ilay Zava-manana aina voalohany moa toy ny liona, ny faharoa tahaka ny zanak’omby, ny fahatelo nanan-tava toy ny an’ny olona, ary ny fahefatra sahala amin’ny voromahery manidina. 8Samy nanana elatra enina avy ireo Zava-manana aina efatra ireo, feno maso ny manodidina ny tenany sy ny tao anatiny, ary tsy nitsahatra izy ireo, fa nilaza andro aman’alina hoe:
Masina, masina, masina
ny Tompo Andriamanitra, mahefa ny zavatra rehetra,
izay taloha sy ankehitriny ary ho avy.
9Nony injay ireo Zava-manana aina manome haja amam-boninahitra sy saotra an’Ilay mipetraka eo ambonin’ny seza fiandrianana sy velona mandrakizay mandrakizay, 10ireo Anti-dahy efatra amby roapolo kosa dia miankohoka eo anoloan’ilay mipetraka amin’ny seza fiandrianana koa, sy mitsaoka an’ilay Velona mandrakizay mandrakizay, ary manipy ny satroboninahiny eo anoloan’ny seza fiandrianany, ka manao hoe: 11«Ianao, ry Tomponay sy Andriamanitray no mendrika handray ny haja amam-boninahitra ary fahefana, fa Ianao no nahary ny zavatra rehetra, ary noho ny sitraponao ihany no nisiany sy naha-àry azy.»
Voafantina amin'izao fotoana izao:
Apôkalipsa nosoratan’i Md Joany 4: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.