Salamo 105
105
SALAMO 105#105 Ny andininy dimy ambin’ny folo voalohany amin’ity Salamo ity, dia mitovy amin’ilay ao amin’ny 1Tan 16,8 sy ny manaraka, fa kely foana no mahasamihafa azy. (Volgata 104)
Tantara mahagagan’i Israely
1Mankalazà an’i Iaveh, miantsoa ny Anarany;
ampahafantaro eny amin’ny firenena ny asa lehibe nataony.
2Mihirà ho Azy, mankalazà Azy!
Torio ny fahagagana rehetra ataony.
3Mireharehà amin’ny Anarany masina;
hiravoravo anie ny fon’izay mitady an’i Iaveh.
4Mitadiava an’i Iaveh sy ny heriny,
aza mitsahatra mitady ny Tavany.
5Tsarovy ny asa mahagaga nataony,
ny fahagagana amam-pitsarana navoaky ny vavany,
6ry taranak’i Abrahama#105,6 I Abrahama, razam-ben’ny Jody. mpanompony,
tamingan’i Jakôba olom-boafidiny.
7Izy Iaveh Andriamanitsika;
mihatra amin’ny tany rehetra ny fitsarany.
8Tsaroany mandrakizay ny fanekeny,
ilay teny nolazainy marimarina ho an’ny taranaka mandimby;
9Fanekena nataony tamin’i Abrahama;
ary fianianana nataony tamin’i Isaaka.
10Naoriny ho lalàna izany, tamin’i Jakôba,
ary ho fanekena mandrakizay tamin’i Israely,
11nataony hoe: «Homeko anao ny tany Kanaana,
ho anjara lovanao.»
12Mbola olom-bitsy izy fahizany,
sady vitsy no vahiny teo amin’ny tany;
13ka nifindrafindra tany tamin’ny firenena;
niala tamin’ny fanjakana iray ho amin’ny firenen-kafa.
14Tsy nisy navelany hampahory azy;
ary izy ireo no namaizany mpanjaka:
15Aza mikasika an’ireo voahosotro,
ary aza manisy ratsy an’ireo mpaminaniko.
16Niantso mosary hamely ny tany Izy,
notapahiny ny haniny#105,16 Notapahiny ny hanina. Notapahiny ny tehina mofo, hoy ny fiteny hebrio; satria ny mofo na ny hanina no manohana ny aina, ka atao hoe tehina. Ny hevitr’izany teny izany amin’ny Hebrio, dia hoe: Nesoriny ny hanin-kohanina. Jereo Lev 26,26. izay tohan’ainy.
17Naniraka olona hialona azy ireo Izy:
i Josefa#105,17 I Josefa, zanak’i Jakôba, no tantaraina eto. namidy ho andevo.
18Nogiazana tamin’ny fatorana ny tongony,
nogadrana vy izy#105,18 Nogadrana vy izy. Ampitahao amin’i Lk 2,35.,
19mandra-pahatongan’ny andro nahatanterahan’izay voalazany mialoha#105,19 Izay voalazany mialoha. Izany hoe, mbola nihiboka tao an-tranomaizina i Josefa ambara-pahatanterahan’ilay faminaniana nolazainy tamin’ilay mpandroso divain’i Faraôna (Jen 60,22,23). Ka izany faminaniana izany no nahafantarana an’i Josefa ho tena mpaminany; ka dia teo amin’io fotoana io no fiantombohan’ny fahafahany sy ny fisondrotany.,
izay nanamarinan’ny tenin’Andriamanitra azy.
20Naniraka hanesotra ny fatorany ny mpanjaka:
nalefan’ny filohan’ny vahoaka ho afaka izy.
21Dia natsangany ho tompon’ny tranony,
sy ho mpanapaka ny taniny rehetra,
22mba hifehy ireo andriandahy araka izay sitraky ny fony,
sy hampianatra fahendrena an’ireo loholony#105,22 Andriandahy...loholony izany hoe, ny zanak’andriana sy ny olon-kendry tao an-dapa, ary ny mpanolo-tsaina azy, samy ambany fahefan’i Josefa avokoa..
23Izay vao nankany Ejipta i Israely,
ka nitoetra teo amin’ny tanin’i Kama#105,23 Tanin’i Kama: Ny lazaina amin’izany, dia i Ejipta; satria i Kama zanak’i Nôe no nitoetra tao; i Mesraima, zanaka lahiaivon’i Kama no nonina tao. i Jakôba.
24Nohamaroin’Andriamanitra fatratra ny vahoakany,
ary nataony mahery noho ireo mpampahory azy.
25Novany ny fon’ireo#105,25 Novany ny fon’ireo. Jereo ny tena hevitr’ity andininy faha-25 ity ao amin’ny Eks 4,21., ka tonga nankahala ny vahoakany,
sy nanao famadihana an’ireo mpanompony.
26Dia nirahiny i Môizy mpanompony,
sy i Aarôna olom-boafidiny.
27Ary ireo nanao ny famantaran’Andriamanitra teo amin’izy ireo,
nanao fahagagana teo amin’ny tanin’i Kama.
28Nandefa haizina Izy#105,28-36 Nandefa haizina Izy, sns. Fitantarana ny fery folon’i Ejipta ireo andininy ireo., ka nampanjariany alina ny andro,
fa tsy nandà ny teniny ireny.
29Nanova ny ranony ho ra Izy,
ka nahafaty ny hazandranon’izy ireo.
30Nisy sahona nihahohaho teo amin’ny taniny,
hatrany amin’ny efitranon’ny mpanjakany.
31Niteny izy ka lalitra zavon-tany no tonga,
dia moka nanerana ny faritaniny.
32Norotsahany havandra ho solon’ny ranonorana izy ireo;
sy afo nidedadeda teo amin’ny taniny.
33Namono ny voalobony aman’aviaviny izy,
ary nanapatapaka ny hazo teo amin’ny taniny.
34Niteny Izy dia tonga ny valala,
ka valala tsy hita isa.
35Ka nohanin’ireny avokoa ny ahitra teo amin’ny taniny,
nolevonin’ireny ny vokatry ny sahany.
36Namono ny lahy matoa rehetra teo amin’ny taniny Izy,
dia ny voalohan’ainy rehetra.
37Dia nentiny nivoaka#105,37 Nentiny nivoaka. Ny lazaina amin’izany, dia ny Hebrio na Israelita, voalaza erỳ amin’ny andininy faha-24-25. ny vahoakany nitondra volafotsy sy volamena#105,37 Nitondra volafotsy sy volamena. Zahao Eks 11,2; 12,35,36.,
ary tsy nisy nangozohozo tamin’ireo fokony, na dia iray aza.
38Nifaly tamin’ny nahalasanany ny Ejiptianina,
satria nahazo an’ireo ny fahatahorana an’i Israely.
39Namelatra rahona hanalokaloka azy Izy,
ary afo hanazava azy amin’ny alina.
40Nangataka izy ireo dia nandefasany papelika,
ary mofo avy any an-danitra no namokisany azy,
41Nanokatra ny vatolampy izy, dia niboiboika ny rano,
ka nandriaka sahala amin’ny ony tany an’efitra.
42Fa tsaroany ny teny masina,
sy i Abrahama mpanompony.
43Ka nentiny nivoaka tamin-kafaliana ny vahoakany;
ary tamin’ny hobim-pifaliana ny olom-boafidiny.
44Nomeny azy ireo ny tanin’ny firenena,
ary nahazo nizaka ny vokatry ny asan’ny firenena izy ireo.
45Raha tahiny nitandrina ny didiny anefa izy ireo:
sy nitana ny lalàny.
Aleloia!
Voafantina amin'izao fotoana izao:
Salamo 105: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.