Ohabolana 25
25
5. AMBOARAN’OHABOLAN’I SALÔMÔNA, HAFA
Lanjalanjao ny teny sy ny atao
1Izao koa no ohabolan’i Salômôna, nangonin’ny olon’i Ezekiasa#25,1 Olon’i Ezekiasa. Angamba izany, dia milaza ireo olon-kendry sy manan-tsaina, tamin’ny andron’i Ezekiasa tahaka an’i Isaia, i Eliakina, i Jôahe, ary i Sôbinà., mpanjakan’i Jodà.
2Voninahitr’Andriamanitra ny manafin-javatra,
fa voninahitry ny mpanjaka kosa ny mandini-javatra.
3Ny lanitra amin’ny haavony, ny tany amin’ny halaliny,
ary ny fon’ny mpanjaka, samy zavatra tsy azo takarina.
4Esory ny taim-bolafotsy,
dia hisy hanaovana fanaka hataon’ny mpanao anidina.
5Esory ny ratsy fanahy eo anoloan’ny mpanjaka.
dia hiorina mafy ny seza fiandrianany amin’ny fahamarinana.
6Aza manao endrika miavonavona eo anatrehan’ny mpanjaka,
ary aza mipetraka eo amin’ny fitoeran’ny lehibe;
7Fa aleo ny olona no hilaza aminao hoe: Miakara atỳ;
toy izay ianao no haetry eo imason’ny andriana,
izay efa hitanao maso.
8Aza dia faingam-panohitra foana,
fandrao tsy mahita izay hatao ianao amin’ny farany.
9Raha naniratsira anao ny namanao,
dia tohano ny adinao amin’ny namanao,
10fa aza manambara ny zavatra miafin’ny olon-kafa,
fandrao mahasafo-kenatra anao, izay mandre izany,
ka tsy ho afaka aminao ny fahafaham-baraka.
11Toy ny paoma volamena#25,11 Paoma volamena. Izany paoma izany, dia haingo tsara sady sarobidy napetraka na nahantona tamin’ny andrim-parafara, na napetraka mihitsy tamin’ny farafara. eo amin’ny ravaka voasikotra amin’ny volafotsy,
ny teny atao amin’ny antony.
12Toy ny kavim-bolamena amam-piravaka volamena tsara,
ny olon-kendry mananatra olona manan-tsofina mihaino tsara.
13Toy ny fangatsiatsiakan’ny oram-panala#25,13 Fangatsiatsiakan’ny oram-panala. Amin’ny andro fijinjam-bary, izany hoe, amin’ny volana jona sy jolay, dia mafana aok’izany erỳ any Jodea, ka mba hampangatsiatsiaka ny rano sotroina, dia asian’ny Hebrio vongan’oram-panala kely; ka any Libàna no ahitana oram-panala betsaka. Ny Grika sy ny Latinina dia nanana fomba toy izany koa. amin’ny taom-pijinjana,
ny iraka mahatoky amin’izay naniraka azy:
mamelombelona ny fanahin’ny tompony izy.
14Fa toy ny rahona aman-drivotra tsy misy orana kosa,
ny olona mirehaka amin’ny fanatitra hosoka.
15Ny fahari-po mety hampiekena ny mpitsara;
ary ny vava malefaka, mahafolaka ny taolana.
16Raha tojo tantely ianao, ny sahaza anao ihany hanina,
fandrao voky azy ianao, ka handoa azy indray.
17Aza mateti-piavy ao an-tranon’ny namanao,
fandrao tofoka anao izy, ka hankahala anao.
18Kanonta aman-tsabatra ary zana-tsipìka maranitra;
toy izany ny olona mitsangan-kiampanga tsy marina ny namany.
19Nify tapatapaka sy tongotra mibolisatra,
dia toy izany no fitokiana ny mpamadika, amin’ny andron’ny fahoriana.
20Toy ny miala lamba amin’ny andro mangatsiaka,
na manisy vinaingitra amin’ny sirahazo,
ny manao kalokalo amin’ny malahelo am-po.
21Raha noana ny fahavalonao, omeo mofo hohaniny,
raha mangetaheta izy, omeo rano hosotroiny;
22fa amin’izany ianao hanangona vainafo ho eo an-dohany;
ary i Iaveh hamaly soa anao.
23Ny rivotra avy avaratra miteraka orana;
ny lela mpifosa kosa, mampahasosotra endrika.
24Aleo mitoetra eny an-joron-tafon-trano,
toy izay miara-mipetraka amin’ny vehivavy tia ady.
25Rano mangatsiaka ho an’ny olona mangetaheta,
toy izany ny filazan-java-tsoa, avy any an-tany lavitra.
26Fantsakana voatsikebona, loharano voaloto,
toy izany ny marina mangozohozo eo anoloan’ny ratsy fanahy.
27Tsy mety ny mihinan-tantely betsaka#25,27 Mihinan-tantely betsaka. Ny tantely dia zavatra mamy, nefa mankarary ny mihinana azy be loatra. Mamy toy izany koa, ny mianatra ny zavatra momba an’Andriamanitra; nefa tsy azon’ny saintsika izay misy fetra atao, noho ny fahalianan-kahalala fotsiny na noho ny fieboana, ny mandinika ny fahambonian’ny Avo indrindra. Koa raha minia mankahatra an’izany isika, dia ho jenjina foana ary ho tafalatsaka any amin’ny hantsan’ny zava-miafina.,
toy izany koa ny mitady hahatakatra ny fiambonian’Andriamanitra,
fa ho resin’ny voninahiny.
28Tanàna efa afaka ny fahavalo ka tsy misy manda,
toy izany ny olona tsy mahay mifehy tena.
Voafantina amin'izao fotoana izao:
Ohabolana 25: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.