Marka 3

Ny nanasitranana ilay lehilahy maty tanana an’ila

(Jereo Mt 12,9-14; Lk 6,6-11)

1Indray mandeha koa dia niditra tao amin’ny sinagoga i Jesoa, ary nisy lehilahy anankiray maty tanana an’ila tao. 2Ary nizaha taratra Azy ny sasany#3,2 Ny sasany. Dia ny mpanora-dalàna sy ny Farisianina. na hanasitrana an’io amin’ny sabata Izy na tsia, mba hiampangany Azy. 3Dia hoy Izy tamin’ilay lehilahy maty tanana: «Mitsangana etsy afovoany.» 4Ary hoy koa Izy tamin’ny olona: «Inona no mety hatao amin’ny sabata, ny soa sa ny ratsy, ny mamonjy aina sa ny mamono?» Fa tsy niteny tsy nivolana izy ireo. 5Dia nijery azy rehetra tamin-katezerana Izy, sy nalahelo noho ny hajamban’ny fony, ary nilaza tamin-dralehilahy hoe: «Ahinjiro ny tananao» Dia nahinjiny, ka sitrana ny tanany. 6Ary lasa nivoaka ny Farisianina, ka niaraka tamin’izay dia niara-nihevitra tamin’ny Herôdianina hanao izay hahavoazana Azy.

Ireo vahoaka nanaraka an’i Jesoa

(Jereo Mt 12,15-16; Lk 6,17-19)

7Fa niala teo i Jesoa sy ny mpianany ka nankany amin’ny ranomasina, ary maro ny olona avy tany Galilea no nanaraka Azy. 8Ary maro koa no tany Jodea sy Jerosalema, sy tany Idomea, sy tany an-dafin’i Jordany, ary tamin’ny tany manodidina an’i Tira sy Sidona no nankeo aminy nony nandre ny nataony. 9Ary nilaza tamin’ny mpianany Izy mba hanomana sambo kely hiandry Azy eo noho ny habetsahan’ny vahoaka, fandrao dia poritin’ny olona Izy. 10Fa nahasitrana olona betsaka Izy, ka nifanesika hanendry Azy izay rehetra nanana aretina. 11Ary raha mahita Azy koa ny fanahy maloto#3,11 Ny fanahy maloto. Izany hoe ny olona nidiran’ny demony sy ampiasainy., dia miankohoka eo anatrehany, ka miantso hoe: 12«Ianao no Zanak’Andriamanitra»; fa rarany sy rahonany mafy izy ireo mba tsy hanao izay hahafantarana Azy.

Ny nanendrena ny 12 lahy

(Jereo Mt 10,1-4; Lk 6,12-16)

13Ary niakatra tamin’ny tendrombohitra anankiray Izy, ka niantso izay tiany hantsoina hankeo aminy, dia nankeo aminy ireo. 14Ary nanendry roa ambin’ny folo lahy Izy hiara-kitoetra aminy sy hirahiny hitory teny, 15sady hanam-pahefana hanasitrana ny aretina sy handroaka ny demony. 16Ary i Simôna nomeny fanampin’anarana hoe Piera; 17ary i Jakôba, zanak’i Zebede sy i Joany rahalahin’i Jakôba izay nomeny fanampin’anarana koa hoe Boanerijesy#3,17 Boanerijesy... zana-baratra, Asa na noho ny hafanam-pony na zavatra hafa no niantsoana azy mirahalahy toy izany., izany hoe zana-baratra; 18ary i Andre, sy i Filipo, sy i Bartelemy, sy i Matio, sy i Tomà, sy i Jakôba zanak’i Alfe, sy i Tade, sy i Simôna Zelôty, 19ary i Jodasy IsKariota ilay namadika Azy.

Fihetsik’ireo havan’i Jesoa

20Niverina nankany an-trano Izy, dia nivory indray ny vahoaka, ka tsy afa-nihinana akory izy ireo. 21Nony nandre izany ny havany dia nivoaka hihazona Azy, fa hoy izy ireo: «Efa very saina Izy.»

Fanendrikendrehan’ireo mpanora-dalàna

(Jereo Mt 12,24-32; Lk 11,15-23; 12,10)

22Ny mpanora-dalàna izay nidina avy tany Jerosalema kosa nanao hoe: «Efa azon’i Belzeboba Izy, ary ny filohan’ny demony no androahany ny demony.» 23Nantsoin’i Jesoa izy ireo ka nanaovany fanoharana hoe: «Hataon’i Satana ahoana no fandroaka an’i Satana? 24Raha misy fanjakana miady an-trano, dia tsy haharitra izany fanjakana izany; 25ary raha misy fianakaviana miady an-trano, dia tsy haharitra izany fianakaviana izany; 26koa raha mitsangan-kanohitra ny tenany àry i Satana, ka miady an-trano, dia tsy maharitra izy fa rava ny heriny. 27Tsy misy olona afa-miditra ao an-tranon’ny mahery sy mandroba ny ao an-tranony, raha tsy afatony aloha ilay mahery, vao robainy ny ao an-tranony. 28Lazaiko marina aminareo fa hahazo famelan-keloka ihany ny zanak’olombelona amin’ny fahotany rehetra, sy ny fitenenan-dratsy rehetra izay itenenany ratsy an’Andriamanitra; 29fa izay hiteny ratsy ny Fanahy Masina no tsy hahazo famelan-keloka na oviana na oviana, fa manam-pahotana mandrakizay.» 30Satria hoy izy ireo hoe: «Manana Fanahy maloto Izy.»

Ireo tena havan’i Jesoa

(Jereo Mt 12,46-50; Lk 8,19-21)

31Ary tonga ny reniny sy ny rahalahiny, nijanona teo alatrano, ka naniraka nampiantso Azy. 32Fa nisy olona maro nipetraka nanodidina Azy, dia nilazana Izy natao hoe: «Indreo ao alatrano ny reninao sy ny rahalahinao mitady anao.» 33Fa novaliany hoe: «Iza moa no reniko sy rahalahiko?» 34Dia nijery izay nipetraka nanodidina Azy Izy ka nanao hoe: «Ireo no reniko sy rahalahiko; 35fa na iza na iza manao ny sitrapon’Andriamanitra, dia izy no rahalahiko sy anabaviko ary reniko».

Voafantina amin'izao fotoana izao:

Marka 3: MBC

Asongadina

Hizara

Dika mitovy