Lioka 7

Fanasitranana ny mpanompon’ilay mpifehy zato

(Jereo Mt 8,5-10; Jn 4,46-54)

1Rehefa tapitra nampandre ny vahoaka izany toriteniny rehetra izany i Jesoa, dia niditra tao Kafarnaoma. 2Ary nisy kapiteny anankiray nanana ankizilahy tiany tokoa, narary efa ho faty. 3Nony nahare ny amin’i Jesoa ilay kapiteny, dia naniraka loholon’ny Jody ho any aminy mba hangataka Azy ho avy hanasitrana ilay ankizilahiny. 4Ary rehefa tonga tany amin’i Jesoa izy ireo, dia nangataka mafy taminy ka nanao hoe: «Mendrika hanaovanao izany izy, 5fa sady tia ny firenentsika no nanao ny sinagogantsika aza.» 6Dia niara-nandeha tamin’izy ireo i Jesoa. Fa nony mby teo akaikin’ny trano Izy, dia nampaniraka ny sasantsasany tamin’ny sakaizany ilay kapiteny hilaza aminy hoe: «Tompo ô, aza dia misahirana toy izao re, fa tsy mendrika hidiranao ao ambanin’ny tafon-tranoko akory aho; 7ary na dia ny tenako aza dia noheveriko ho tsy mendrika hanatona Anao akory, fa manonòna teny iray monja, dia ho sitrana ny ankiziko. 8Fa izaho olona manan-dehibe mba mifehy miaramila koa, ka ny anankiray ilazako hoe: ‹Mandehana›, dia mandeha; ny anankiray ataoko hoe: ‹Avia›, dia avy; ary ny mpanompoko koa hoe: ‹Ataovy izany›, dia manao izy.» 9Gaga i Jesoa nony nandre izany, ka nitodika ny vahoaka nanaraka Azy nanao hoe: «Lazaiko marina aminareo fa tsy mbola nahita finoana lehibe toy izany Aho, na dia tamin’i Israely aza.» 10Ary nony tafaverina tao an-tranon’ilay kapiteny ireo iraka, dia nahita fa sitrana ilay ankizilahy narary.

Fananganan-ko velona ny zanaka lahin’ilay mpitondratena tao Naima

11Taorian’izany, dia nankany amin’ny tanàna anankiray atao hoe Naìma Izy, ary mpianany maro sy vahoaka betsaka no niaraka taminy. 12Rehefa mby teo akaikin’ny vavahadin’ny tanàna Izy, dia indro nisy fatin’ny zazalahy anankiray nentina halevina, zanak’olona lahy tokana sady mpitondratena indray ireniny, ka vahoaka be avy ao an-tanàna no nanaraka azy. 13Nangoraka ny Tompo nony nahita an-dravehivavy, ka nanao taminy hoe: «Aza mitomany.» 14Ary nanatona Izy ka nanendry ny tranovorona; dia nijanona ny mpilanja, ary hoy i Jesoa: «Ry zatovo, Izaho mandidy anao, mitsangàna.» 15Dia niarina niaraka tamin’izay ny maty#7,15 Niarina ny maty. Tsy nisy rakotra ny tranovoron’ny Jody., sady niteny, ary nomen’i Jesoa an-dreniny. 16Raiki-tahotra avokoa izay rehetra teo, sady nankalaza an’Andriamanitra nanao hoe: «Mpaminany lehibe no efa niseho eto amintsika, ary Andriamanitra efa namangy ny olony.» 17Dia niely eran’i Jodea sy ny tany manodidina rehetra izany teny fankalazana Azy izany.

Fanontanian’i Joany Batista, sy filazan’i Jesoa azy

(Jereo Mt 11,2-15)

18Nambaran’ny mpianatr’i Joany taminy izany rehetra izany, 19ka dia niantso roa lahy tamin’izy ireo izy nalefany ho any amin’i Jesoa hanao aminy hoe: «Ianao va no Ilay ho avy, sa mbola hafa no handrasantsika?». 20Nony tonga tany aminy ireo dia nanao hoe: «Nirahin’i Joany Batista hankatỳ aminao izahay hanontany raha Ianao no Ilay ho avy, na mbola hafa no handrasantsika?» 21Tamin’izay indrindra i Jesoa dia nanasitrana olona maro niferin’aina tamin’ny aretina sy ny rofy ary ny fanahy ratsy, sady nampahiratra jamba maro koa, 22ka izao no navaliny an’ireto iraka: «Mandehana lazao amin’i Joany izay zavatra renareo sy hitanareo: mahiratra ny jamba, mandeha ny mandringa, madio ny boka, malady ny marenina, mitsangan-ko velona ny maty, torina amin’ny mahantra ny Evanjely, 23ary sambatra izay rehetra tsy ho tafintohina noho ny Amiko.»

24Nony lasa ny irak’i Joany, dia nambaran’i Jesoa tamin’ny vahoaka ny aminy ka hoy Izy: Hizaha inona no nalehanareo tany an’efitra? Volotara hozongozonin’ny rivotra va? 25Sa hizaha inona no nalehanareo tany? Lehilahy tsara fitafiana va? Raha izay tsara fitafiana sy manao fiainana, dia any an-tranon’ny mpanjaka no itoerany. 26Sa hizaha inona no nalehanareo tany? Mpaminany va? Eny, hoy Izaho aminareo, ary ambony noho ny mpaminany aza. 27Fa izy no ilay voasoratra hoe: Indro Aho maniraka ny Anjeliko eo anoloanao mba hamboatra lalana eo alohanao.

28Koa lazaiko aminareo fa amin’izay natera-behivavy tsy misy mpaminany lehibe noho i Joany Batista; nefa izay kely indrindra amin’ny fanjakan’Andriamanitra no lehibe noho izy.

(Jereo Mt 21,31-32)

29Ary ny vahoaka rehetra izay nandre Azy mbamin’ny poblikanina aza dia nanamarina an’Andriamanitra, tamin’ny nandraisany ny batemin’i Joany; 30fa ny Farisianina sy ny mpampiana-dalàna kosa nanatsinontsinona ny fikasàn’Andriamanitra ny aminy, tamin’ny nandàvany ny batemin’i Joany.

Fitsaran’i Jesoa ireo mpiara-belona taminy

(Jereo Mt 11,16-19)

31Ary hoy ny Tompo: Hohariko amin’iza re ny olona amin’ity taranaka ity, ary tahaka an’iza izy? 32Tahaka ny ankizy mipetraka eny an-kianja izy, izay mifampilaza hoe: Nitsoka sodina izahay, fa tsy nandihy ianareo! Nanao hira mampalahelo izahay, nefa tsy nitomany ianareo.

33Fa tonga i Joany Batista tsy nihinana mofo na nisotro divay, lazainareo hoe: Azon’ny demony izy. 34Tonga indray ny Zanak’olona mihinana sy misotro, ataonareo hoe: Lehilahy tendan-kanina sy mpisotro io, sady sakaizan’ny poblikanina sy ny olon-dratsy fiaina. 35Fa ny Fahendrena efa nohamarinin’ny zanany rehetra.

Ilay vehivavy mpanota navela heloka sy be fitiavana

36Nisy Farisianina anankiray nanasa an’i Jesoa hiara-mihinana aminy, ka niditra tao an-tranon’ilay Farisianina Izy, dia nipetraka nihinana. 37Ary indro nisy vehivavy anankiray ratsy fitondran-tena#7,37 Vehivavy ratsy fitondra-tena. Fa efa nanenina sy efa nikasa hiova toetra. tao an-tanàna nahalala fa nihinana tao an-tranon’ilay Farisianina i Jesoa, ka dia nivimbina tavoara alabastra feno diloilo manitra, 38dia nijanona teo ivohony#7,38 Teo ivohony. Nandry am-parafara ny Tompo, ny tarehiny nanatrika ny latabatra, ary ny tongony nitsotra nankany ivohony. tanilan’ny tongony sady nitomany ka kotsan’ny ranomasony ny tongony, fa nofaohiny tamin’ny volon-dohany sy norohany, ary nohosorany diloilo manitra. 39Nony nahita izany ilay Farisianina nanasa Azy, dia nanao anakam-po hoe: «Raha mpaminany Izy dia ho nahalala ny toetran’ity vehivavy mikasika Azy, fa hoe mpanota io.» 40Ary i Jesoa niteny taminy nanao hoe: «Ry Simôna, misy zavatra holazaiko aminao.» Dia hoy izy: «Lazao, ry Mpampianatra.»

41«Nisy olona roa lahy nananan’ny mpampanjana-bola anankiray trosa, ny iray nananany denie dimanjato, ary ny iray dimampolo. 42Noho izy ireo samy tsy nanan-kaloa, dia nafoiny ny trosa tamin’izy roa lahy. Koa iza amin’ireo no ho tia azy kokoa?» 43«Ataoko fa ilay namoizany bebe kokoa#7,43 Ilay namoizana bebe kokoa no tsy maintsy ho tia kokoa, raha ny trosa no heverina. Indraindray anefa, ilay namoizana kelikely kokoa aza no mety ho be fitiavana.,» hoy i Simôna namaly Azy. «Marina ny anao,» hoy Izy taminy. 44Dia nitodika an-dravehivavy Izy ka nanao tamin’i Simôna hoe: «Hitanao va io vehivavy io? Niditra teto an-tranonao Aho, fa ianao tsy nanome rano hanasako tongotra, izy kosa nanondraka ny tongotro tamin’ny ranomasony sy namaoka azy tamin’ny volon-dohany. 45Ianao tsy nanoroka Ahy, izy kosa tsy nitsahatra nanoroka ny tongotro hatrizay nidirako. 46Ianao tsy nanosotra diloilo ny lohako, izy kosa nanosotra diloilo manitra ny tongotro. 47Noho izany dia lazaiko aminao fa voavela ny heloka be nataony satria be fitiavana izy#7,47 Be fitiavana sy lavorary fanenenana izy ka dia afaka ny otany rehetra. Ny kely fitiavana. Voa i Simôna araka ilay valiny teo (and faha-43); namelàna kely noho ravehivavy izy (araka ny fiheviny). ka dia kelikely fitiavana kokoa. Tsy dia izany mandrakariva anefa; fa, ohatra ny olo-masina namelàna kely, mety ho tia kokoa noho ny mpanota namelàna be.; fa izay amelana kely no kely fitiavana.» 48Dia hoy Izy tamin-dravehivavy: «Voavela ny helokao.» 49Ary izay niara-nihinana taminy nanao anakampo hoe: «Iza moa ity no mamela na dia ny heloka aza?» 50Fa hoy Izy tamin-dravehivavy: «Ny finoanao#7,50 Ny finoanao, sns. Hita miharihary fa tsy finoana fotsiny izany, fa arahim-pitiavana, sy fitiavana lavorary aza. no nahavonjy anao; mandehana amim-piadanana.»

Voafantina amin'izao fotoana izao:

Lioka 7: MBC

Asongadina

Hizara

Dika mitovy