Jôsoe 4
4
Ireo vato 12 fahatsiarovana
1Nony tafita an’i Jordany avokoa ny firenena rehetra, dia hoy i Iaveh tamin’i Jôsoe: 2«Mangalà roa ambin’ny folo lahy amin’ny vahoaka, dia lehilahy iray avy isam-pokony, 3ka omeo didy izy ireo: Makà vato roa ambin’ny folo, avy eo amin’ity fitoerana ity, eo afovoan’i Jordany, amin’ilay fitoerana nitsatohan’ny tongotry ny mpisorona, dia ento miaraka aminareo, sy apetraho eo amin’izay fitoerana hitobianareo anio alina.» 4Dia nantsoin’i Jôsoe ny lehilahy iray avy asam-pokony, 5ka nilazany hoe: «Mandehana eo alohan’ny fiaran’i Iaveh Andriamanitrareo, eo afovoan’i Jordany, ka samia maka vato iray avy, hatao an-tsoroka, araka ny isan’ny fokon’ny zanak’i Israely, 6mba ho famantarana eo afovoanareo izany. Raha manontany anareo ny zanakareo indray andro any, manao hoe: Inona, hoy ianareo, no hevitr’ireo vato ireo? 7dia valio hoe: Tapaka teo anoloan’ny fiaran’ny faneken’i Iaveh ny ranon’i Jordany, fa nony nita an’i Jordany ny fiara dia tapaka ny ranon’i Jordany; ka fahatsiarovana mandrakizay ho an’ny zanak’i Israely ireto vato ireto.» 8Notanterahin’ny zanak’i Israely ny didin’i Jôsoe, dia naka vato roa ambin’ny folo teo afovoan’i Jordany, araka ny isan’ny fokon’i Israely, nentiny teo amin’ny fitoerana tsy maintsy handriany amin’ny alina dia napetrany teo.
9Nanangana vato roa ambin’ny folo i Jôsoe, teo afovoan’i Jordany, teo amin’ilay toerana nijanonan’ny tongotry ny mpisorona nitondra ny fiaran’ny fanekena; ka nipetraka tao mandrak’androany izany.
Faran’ny fitàna
10Nijanona teo afovoan’i Jordany ny mpisorona nitondra ny fiara, mandra-pahatanteraky ny zavatra nasain’i Iaveh nolazain’i Jôsoe tamin’ny vahoaka, araka izay rehetra nandidian’i Môizy an’i Jôsoe; dia nita faingana ny olona. 11Nony tapitra avokoa ny vahoaka rehetra dia nandeha teo anoloan’ny vahoaka ny fiaran’i Iaveh sy ny mpisorona. 12Ary nandroso samy nitam-piadiana teo alohan’ny zanak’i Israely, araka ny tenin’i Môizy taminy, ny tarana-dRobena sy ny taranak’i Gada, ary ny antsasaky ny fokon’i Manase. 13Lehilahy sahabo ho 40.000 voaoman-kiady no nita teo anatrehan’i Iaveh teo amin’ny tany lemak’i Jerikô. 14Nasandratr’i Iaveh teo imason’i Israely rehetra i Jôsoe, tamin’izany andro izany, ka toy ny natahoran’izy ireo an’i Môizy no natahorany azy koa, tamin’ny andro rehetra niainany.
15Ary niteny tamin’i Jôsoe i Iaveh nanao hoe: 16«Omeo didy ny mpisorona mitondra ny fiaran’ny Vavolombelona, hiala eo Jordany.» 17Dia nomen’i Jôsoe ny mpisorona izao didy izao: «Mialà eo Jordany ianareo.» 18Nony niala teo afovoan’i Jordany ny mpisorona nitondra ny fiaran’ny faneken’i Iaveh ka vao nikasika ny tany maina ny faladian-tongony, dia nody amin’ny toerany ny ranon’ny ony, toy ny taloha nihoatra ny morona indray.
Ny nahatongavana tany Galgalà
19Tamin’ny andro fahafolon’ny volana voalohany no niala teo Jordany ny vahoaka dia nitoby tao Galgalà, teo amin’ny sisin-tanin’i Jerikô farany atsinanana.
20Natsangan’i Jôsoe teo Galgalà, ny vato roa ambin’ny folo nalain’izy ireo tao Jordany, 21ka hoy izy tamin’ny zanak’i Israely: Rehefa hanontany an-drainy ny zanakareo indray andro any hoe: 22«Inona no hevitr’ireo vato ireo? dia atoroy ny zanakareo ataovy hoe: Nandia tany maina i Israely nita io Jordany io. 23Satria nataon’i Iaveh Andriamanitrareo maina ny ranon’i Jordany teo anoloanareo mandra-pitanareo, toy ny nataon’i Iaveh Andriamanitrareo tamin’ny Ranomasina Mena, izay nataony maina teo anoloantsika, mandra-pitantsika, 24mba ho fantatry ny firenena rehetra eto an-tany, fa mahery ny tanan’i Iaveh, ary mba hatahoranareo mandrakariva an’i Iaveh Andriamanitrareo.»
Voafantina amin'izao fotoana izao:
Jôsoe 4: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.